ນິໂກລາສ໌ ຊາຣ໌ໂກຊີ ຢ້ຽມຢາມ ນາຍຕຳຣວດບາດເຈັບ ໃນເຫດການ ຈະລາຈົນຊານເມືອງ ນະຄອນຫລວງ ປາຣີສ

ຫລັງກັບຈາກການຢ້ຽມຢາມ ສປ ຈີນ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 28/11/2007 ແກ້ໄຂໃຫມ່ຫລ້າສຸດເມື່ອວັນທີ 28/11/2007 12:51 TU

ທ່ານປະທານາທິບໍດີ ນິໂກລາສ໌ ຊາຣ໌ໂກຊີ (ຂວາ) ແລະ ທ່ານນາງມິແຊລ ອາລລີໂອ-ມາຣີ ຣມຕ ກະຊວງພາຍໃນ ຢ້ຽມຢາມບັນດານາຍຕຳຣວດທີ່ໄດ້ຮັບບາດເຈັບຈາກການປະທະກັບກຸ່ມຊາວໜຸ່ມກໍ່ ການຈະລາຈົນ (ພາບ: Reuters)

ຫລັງຈາກທີ່ເດີນທາງກັບຈາກການຢ້ຽມຢາມປະເທດຈີນແລ້ວ ທ່ານປະທານາທິ
ບໍດີ ນິໂກລາສ໌ ຊາຣ໌ໂກຊີ ກໍເດີນທາງໄປຍັງຊານເມືອງນະຄອນຫລວງປາຣີສ
ໃນທັນທີທັນໃດໂລດ ໂດຍສເພາະທີ່ໂຮງພຍາບານເມືອງ Eubonne ເພື່ອຢ້ຽມ
ຢາມບັນດາເຈົ້າໜ້າທີ່ຕຳຣວດທີ່ໄດ້ຮັບບາດເຈັບຈາກການປະທະກັບກຸ່ມຊາວໜຸ່ມ
ທີ່ກໍ່ການຈະລາຈົນທີ່ເມືອງ Villiers-Le-Bel ເມື່ອທ້າຍສັປດາຜ່ານມາ

ທ່ານປະທານາທິບໍດີຊາຣ໌ໂກຊີ ໄດ້ກ່າວຕໍ່ຜູ້ສື່ຂ່າວວ່ານັກກໍ່ການຈະລາຈົນທີ່ຍິງຕຳຣວດ
ຈະຕ້ອງຖືກນຳຕົວຂື້ນພິຈາຣະນາຄະດີໃນສານໃນຂໍ້ຫາພຍາຍາມຄາຕກັມເຈົ້າໜ້າທີ່
ບ້ານເມືອງ

ການທີ່ຊາວໜຸ່ມສອງຄົນເສັຽຊີວິດຍ້ອນຂັບຣົດໂມໂຕຕຳກັບຣົດຕຳຣວດນັ້ນ ບໍ່ແມ່ນເຫດ
ຜົນສຳລັບການກໍ່ການຈະລາຈົນ ທ່ານປະທານາທິບໍດີໄດ້ກ່າວທາງດ້ານສຖານະການ

ໃນພື້ນທີ່ ທີ່ເມືອງ Villiers-Le-Bel ປາກົດງຽບສງົບເມື່ອຄືນວັນອັງຄານຕໍ່ວັນພຸດ
ຜ່ານມາຫລັງຈາກເກີດຈະລາຈົນຊາວໜຸ່ມເຜົາທຳລາຍຣົດຍົນ ຫ້ອງສມຸດ ພັງພິ
ນາດ ເຈົ້າໜ້າທີ່ຕຳຣວດໄດ້ຮັບບາດເຈັບເຖີງ 130 ຄົນ

ໃນວັນພຸດ 28 ພະຈິກນີ້ ທ່ານປະທານາທິບໍດີກໍຕ້ອນຮັບບັນດາຄອບຄົວຂອງຊາວໜຸ່ມ
ອາຍຸ 15 ແລະ 16 ປີ ທີ່ເສັຽຊີວິດຍ້ອນອຸບັດຕິເຫດຣົດໂມໂຕນ້ອຍຕຳກັບຣົດຕຳຣວດ

ເມື່ອຄ່ຳວານນີ້ (ຄ່ຳວັນອັງຄານ 27 ພະຈິກ) RFI ພາກພາສາລາວ ໄດ້ໂທຣະສັບ
ສອບຖາມ "ທ່ານຈິນດາວົງ"  ຫົວໜ້າຄອບຄົວຊາວລາວທີ່ເມືອງ Villiers-Le-Bel
ທີ່ມີບ້ານຕິດກັບສຖານທີ່ເກີດເຫດ ທ່ານຈິນດາວົງ ໄດ້ເລົ່າໃຫ້ພວກ ເຮົາຟັງດັ່ງນີ້