ຜົນການປະຊຸມ "G-4" ທີ່ປາຣີສ

ບໍ່ມີ "ແຜນກອບກູ້ Paulson" ສຳລັບ ຢຸໂຣບ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 05/10/2008 ແກ້ໄຂໃຫມ່ຫລ້າສຸດເມື່ອວັນທີ 06/10/2008 10:06 TU

ຈາກຊ້າຍໄປຂວາ: ຊິລວີໂອ ແບຣ໌ລຸສໂກນີ ນາຍົກ ຣມຕ ອິຕາລີ, ອັງເຄີລາ ແມຣ໌ເຄລ ນາຍົກ ຣມຕ ເຍີຣະມັນ, ນິໂກລາສ໌ ຊາຣ໌ໂກຊີ ປະທານາທິບໍດີຝຣັ່ງເສດ ແລະ ກໍຣ໌ດັນ ບຣາວນ໌ ນາຍົກ ຣມຕ ອັງກິດ ໃນກອງປະຊຸມສຸດຍອດຂນາດຍ່ອຍ "G-4" ທີ່ປາຣີສ (ພາບ: Reuters)

ກອງປະຊຸມສຸດຍອດຂນາດຍ່ອຍຂອງ "G-4" ທີ່ປະກອບໄປດ້ວຍສີ່ ປະເທດ
ສະມາຊິກສະຫະພາບ ຢຸໂຣບ ທີ່ເປັນສະມາຊິກຂອງກຸ່ມ "G-8" (ເຍີຣະມັນ,
ຝຣັ່ງເສດ, ສະຫະຣາຊອານາຈັກ ແລະ ອິຕາລີ) ສິ້ນສຸດລົງເມື່ອຄໍ່າວານນີ້
(ເສົາ 4 ຕຸລາ) ທີ່ນະຄອນຫລວງປາຣີສ ໂດຍບໍ່ມີການຈັດຕັ້ງກອງ ເງິນທຶນ
ຮວມ ແບບ "ແຜນກອບກູ້ Paulson" ຂອງສະຫະຣັດອະເມຣິກາ

ແຕ່ເຫັນດີໃຫ້ມີການປຶກສາຫາລືກັນຢ່າງໃກ້ຊິດ ກ່ຽວກັບ: ມາຕຣາການ ທີ່
ແຕ່ລະປະເທດຈະວາງອອກ "ໃນຣະດັບຊາດ" ເພື່ອຊ່ວຍເຫລືອບັນດາທະ
ນາຄານທີ່ມີປັນຫາ ໂດຍບໍ່ໃຫ້ກະທົບຕໍ່ປະເທດສະມາຊິກອື່ນ, ກ່ຽວກັບການ
ລົງໂທດບັນດາຜູ້ນຳສຖາບັນການເງິນທີ່ຂາດຄວາມຣະມັດຣະວັງ ແລະກ່ຽວ
ກັບການພຍາຍາມຈັດກອງປະຊຸມນາໆຊາດ ແບບ "ເບຣັຕເຕັນ ວູດສ໌"
(Bretten Woods) ເພື່ອວາງກົດເກນໃໝ່ສຳລັບຄວບຄຸມການເຄື່ອນໄຫວ
ຂອງວົງການຕລາດການເງິນຂອງ ໂລກ

ບໍ່ມີການຈັດຕັ້ງກອງເງິນທຶນຮວມແບບ "ແຜນກອບກູ້ Paulson"
ເປັນທີ່ໜ້າສັງເກດວ່າ ກອງປະຊຸມບໍ່ມີການຕົກລົງກັນໃດໆກ່ຽວກັບແນວຄວາມຄິດໃຫ້ມີການ
ຈັດຕັ້ງກອງ ເງິນທຶນຮວມ 300 ຕື້ຢູໂຣ (416 ລ້ານດອລລາຣ໌) ຂອງສະຫະພາບຍຸໂຣບ
27 ປະເທດ ເພື່ອຊ່ວຍບັນດາທະນາຄານທີ່ມີປັນຫາ ແບບດຽວກັບ "ແຜນກອບກູ້ Paul-
son" ຂອງສະຫະຣັດອະເມຣິກາ ອັນເປັນແນວຄວາມຄິດທີ່ນຳສເນີໂດຍທ່ານປະທານາທິ
ບໍດີຝຣັ່ງເສດ ນິໂກລາສ໌ ຊາຣ໌ໂກຊີ ທີ່ໄດ້ຮັບການສນັບສນຸນໂດຍປະເທດເນເທີແລນດ໌ ແລະ
ຜູ້ອຳນວຍການອົງການເງິນທຶນສາກົນ "IFM" ທ່ານໂດມີ ນິກ ສໂຕຣສການຫ໌ ແຕ່ໄດ້ຮັບ
ການຄັດຄ້ານຢ່າງເຍືອກເຢັນທີ່ສຸດຈາດປະເທດເຍີຣະມັນແລະສະຫະຣາຊອານາຈັກ

ເຖິງປານນັ້ນກໍຕາມ ທ່ານປະທານາທິບໍດີຝຣັ່ງເສດ ກໍຍັງພໍໃຈເປັນຢ່າງຍິ່ງຕໍ່ຜົນຂອງ
ກອງປະຊຸມ ທີ່ເຫັນດີເຫັນພ້ອມນຳກັນທັງສີ່ ໃຫ້ມີການປຶກສາຫາລືກັນຢ່າງໃກ້ຊິດຖ້າປະ
ເທດໃດໜຶ່ງຂອງສະຫະພາບ ມີແຜນຈະວາງອອກເພື່ອຊ່ວຍທະນາຄານຂອງຕົນ

"ສິ່ງສຳຄັນແມ່ນຢູ່ບ່ອນວ່າ ຕໍ່ໜ້າວິກິຕການການເງິນຂອງໂລກທີ່ເກີດຂຶ້ນ ຢຸໂຣບໄດ້ສແດງ
ອອກໃຫ້ເຫັນເຖິງບົດບາດຂອງຕົນເພື່ອແກ້ໄຂປັນຫາ" ທ່ານຊາຣ໌ໂກຊີ ໄດ້ກ່າວໃນນາມປະ
ທານວຽນສະຫະພາບຢຸໂຣບ ໃນກອງປະຊຸມໃຫ້ສັມພາດຕໍ່ຜູ້ສື່ຂ່າວ ຫລັງຈາກກອງປະຊຸມ
ເສັດສິ້ນລົງເມື່ອຄືນວັນເສົາຜ່ານມາ (4 ຕຸລາ)

"ແຕ່ລະປະເທດຂອງພວກເຮົາມີກົດເກນ ແລະ ວັທນະທັມ ທີ່ແຕກຕ່າງກັນ ແຕ່ພວກເຮົາກໍ
ໄດ້ຕັດສິນໃຈຫຍັບເຂົ້າໃກ້ຊິດກັນ ເພື່ອສເນີທາງອອກທີ່ກົມກຽວກັນ" ຜູ້ນຳຝຣັ່ງເສດໄດ້
ກ່າວອີກຕອນໜຶ່ງ ເປັນການກ່າວອ້າງເຖິງຂໍ້ຂັດແຍ່ງທີ່ເກີດຂຶ້ນກ່ອນຈັດກອງປະຊຸມ (ເຊີນ
ອ່ານລາຍລະອຽດໃນບົດຣາຍງານ ວັນທີ 4 ຕຸລາ ດ້ານຂວາມື)

ຈັດກອງປະຊຸມປະເພດ "Bretten Woods" ໄວໆ
ນອກຈາກນີ້ "ກຸ່ມ G-4" ກໍຍັງເຫັນດີເຫັນພ້ອມນຳກັນເພື່ອຜັກດັນໃຫ້ມີການຈັດກອງປະຊຸມ
"ແບບBretten Woods" ໄວໆ ເພື່ອວາງກົດເກນໃໝ່ອອກສຳລັບຄວບຄຸມການເຄື່ອນ
ໄຫວຂອງວົງການຕລາດການເງິນຂອງໂລກ ຊຶ່ງທ່ານປະທານາທິບໍດີຝຣັ່ງເສດໄດ້ເຄີີຍ
ສເນີແນວຄິດນີ້ມາກ່ອນແລ້ວໃນການກ່າວຄຳປາໃສຕໍ່ໜ້າກອງປະຊຸມສະມັດຊາໃຫຍ່ອົງ
ການສະຫະປະຊາຊາດເມື່ອວັນທີ 23 ກັນຍາທີ່ຜ່ານມາ

ຜ່ອນຜັນເຣື່ອງການຂາດດຸນງົບປະມານ
ໃນຖແລງການຮ່ວມ 15 ຂໍ້ທີ່ຖືກນຳອອກເຜີຍແຜ່ຫັລງເສັດສິ້ນກອງປະຊຸມ ມີຂໍ້ໜຶ່ງກ່າວ
ໄວ້ວ່າ "ການປະຕິບັດພັນທະກ່ຽວກັບວິນັຍທາງດ້ານການເງິນນັ້ນ ຄວນມີການຄຳນຶງ
ເຖິງສຖານະການສະເພາະໜ້າ ທີ່ພວກເຮົາກຳລັງຜະເຊີນຢູ່ໃນເວລານີ້"

ຂໍ້ຄວາມດັ່ງກ່າວໝາຍເຖິງວ່າ ຄວນໃຫ້ມີການໂຍ໊ະຍານກ່ຽວກັບວິນັຍທາງດ້ານການ
ເງິນຂອງສະຫະພາບຢຸໂຣບ ທີ່ສົນທິສັນຍາ "Maastricht" ໄດ້ກຳໜົດໄວ້ວ່າ ການຂາດ
ດຸນງົບປະມານຂອງບັນດາປະເທດສະມາຊິກຂອງສະຫະພາບ ທີ່ຮ່ວມໃນການໃຊ້ເງິນສະ
ກຸນດຽວ "ຢູໂຣ" ນັ້ນ ຕ້ອງບໍ່ເກີນ 3% ຂອງຜົນຜລິດມວນຮວມແຫ່ງຊາດ" (PIB ຫລື
GDP)

"ຢ້ານວ່າຂໍ້ຄວາມໃນຖແລງການຮ່ວມຂໍ້ນີ້ ຈະເຮັດໃຫ້ບາງປະເທດ ເຊັ່ນຝຣັ່ງເສດ ຫລື
ເຍີຣະມັນນຳເປັນຂໍ້ອ້າງເພື່ອທີ່ຈະສາມາດດຳເນີນນະໂຍບາຍຂາດດຸນງົບປະມານເກີນ
3%" ທ່ານ Gunther Cappelle-Blancard ອາຈານວິຊາເສຖສາດຂອງມະຫາວິທ
ຍາໄລ Panthéon Sorbonne ໄດ້ກ່າວສແດງທັສນະຕໍ່ຜູ້ສື່ຂ່າວ

ຜູ້ຊ່ຽວຊານທ່ານນີ້ຍັງສແດງຄວາມເສັຽໃຈອີກ ທີ່ຖແລງການຮ່ວມຂອງ "ກຸ່ມ G-4"
ບໍ່ມີຄວາມຈະແຈ້ງກ່ຽວກັບການຈຳກັດເງິນເດືອນແລະຣາຍໄດ້ຂອງບັນດາຜູ້ນຳທະນາ
ຄານຕ່າງໆ ທີ່ສູງເກີນຂອບເຂດໃນເວລາປັດຈຸບັນ ບໍ່ວ່າສຖາບັນຈະມີກຳໄລຫລືຂາດ
ທຶນຂນາດໜັກກໍຕາມ

ຢ່າງໃດກໍຕາມ ທ່ານ Jean-Claude Junker ປະທານ "ກຸ່ມຢູໂຣກຣຸ໊ບ" (ກຸ່ມ ຣມຕ
ການເງິນ 11 ປະເທດສະມາຊິກສະຫະພາບ ທີ່ກໍ່ຕັ້ງເງິນສະກຸນດຽວຢູໂຣ) ກໍໄດ້ອອກ
ມາຊີ້ແຈງຕໍ່ຜູ້ສື່ຂ່າວວ່າ "ຂໍ້ຄວາມການຜ່ອນຜັນໃນຖແລງການຮ່ວມຂໍ້ນີ້ ບໍ່ໄດ້ໝາຍ
ຄວາມວ່າພວກເຮົາຈະປະປ່ອຍໃຫ້ການຂາດດຸນງົບປະມານ ສູງເຖິງຣະດັບໃດກໍໄດ້"