ຄວາມສອດຄ່ອງກັນຂອງ ໂອບາມາ ແລະ ຫູ ຊິນທ່າວ

ຕ້ອງພິສູດກັນ ທີ່ພາກປະຕິບັດ ຕົວຈິງ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 17/11/2009 ແກ້ໄຂໃຫມ່ຫລ້າສຸດເມື່ອວັນທີ 17/11/2009 15:03 TU

ທັງອະເມຣິກາແລະຈີນ ຕ່າງກໍຕ້ອງການໃຫ້ເງິນສະກຸນແຫ່ງຊາດຂອງແຕ່ ລະຝ່າຍມີຄ່າສູງຂຶ້ນ ແຕ່ກໍຍັງບໍ່ມີຝ່າຍໃດ ສາມາດຕອບສນອງ ຕໍ່ຄວາມ ຕ້ອງການນີ້ໄດ້ (ພາບ: Reuters)

ໃນດ້ານຫລັກການໃຫຍ່ໆ ສອງຜູ້ນໍາ ມີຄວາມເຫັນສອດຄ່ອງກັນວ່າ ຕ້ອງເຮັດວຽກປະສານງານກັນເພື່ອແກ້ໄຂປັນຫາຂອງໂລກຮອບດ້ານ ແຕ່ເມື່ອການເຈຣະຈາ ເຂົ້າເຖິງປັນຫາປີກຍ່ອຍ ຈະມີຜົນ ຕາມການ ສອດຄ່ອງນີ້ຫລືບໍ່ ຕ້ອງຕິດຕາມເບີ່ງກັນຕໍ່ໄປ

ໃນການພົບປະຫາລືສອງຝ່າຍທີ່ກຸງປັກກິ່ງໃນມື້ນີ້ ລະຫວ່າງ ທ່ານປະທານາທິບໍດີ ຫູ
ຊິນທ່າວ ຂອງຈີນ ແລະ ຄູ່ຕໍາແໜ່ງອະເມຣິກັນ ບາຣັກ ໂອບາມາ ທັງສອງຜູ້ນຳ ມີ
ຄວາມເຫັນສອດຄ່ອງກັນໃນຫລາຍປັນຫາ ຕາມທີ່ພວກເຮົາໄດ້ສເນີຂ່າວໄປແລ້ວ

ແມ່ນແລ້ວ ທັງສອງຜັູ້ນໍາມີຄວາມເຫັນທີ່ສອດຄ່ອງກັນໃນຫລາຍປັນຫາ ໝາຍຄວາມ
ວ່າເຫັນສອດຄ່ອງກັນໃນດ້ານຫລັກການໃຫຍ່ ທີ່ວ່າທັງສອງປະເທດມະຫາອໍານາດ
ຕ້ອງຮ່ວມມືກັນໃນການແກ້ໄຂ ບໍ່ເຊັ່ນນັ້ນກໍຍ່ອມເປັນໄປໄດ້ຍາກ ຫລື ເປັນໄປບໍ່ໄດ້ເລີຍ
ທີ່ປັນຫາຈະໄດ້ຮັບການແກ້ໄຂ

ແຕ່ເມື່ອເຂົ້າເຖິງລາຍລະອຽດຂອງການແກ້ປັນຫາແລ້ວ ເຮົາຍັງບໍ່ສາມາດເວົ້າໄດ້ວ່າ
ຈະມີຜົນຕາມທີ່ທັງສອງຜູ້ນໍາໄດ້ຮ່ວມກັນຖແລງໃນມື້ນີ້ຫລືບໍ່

ແຕ່ຢ່າງນ້ອຍທີ່ສຸດ ການທີ່ມີຄວາມເຫັນທີ່ສອດຄ່ອງກັນໃນດ້ານຫລັກການນັ້ນ ກໍຖືໄດ້
ວ່າເປັນຜົນບວກຂອງການຢ້ຽມຢາມ ສປ ຈີນ ຂອງທ່ານປະທານາທິບໍດີ ບາຣັກ ໂອບາ
ມາ ໃນຄັ້ງນີ້

ໃນປັນຫາຕໍ່ສູ້ກັບພາວະໂລກຮ້ອນນັ້ນ ສອງປະເທດທີ່ ປ່ອຍກ໊າສ CO2 ຫລາຍທີ່ສຸດໃນ
ໂລກນັ້ນ ຈະມີຂໍ້ສເນີຫຍັງທີ່ເປັນຕົວເລກຄັກແນ່ໃນກອງປະຊຸມສຸດ ຍອດ "ໂຄເປັນເຮເກັນ"
ໃນເດືອນໜ້ານີ້?

ນອກຈາກນີ້ ໃນປັນຫາຄວາມຂັດແຍ່ງດ້ານການຄ້າ ແລະ ຄ່າຂອງເງິນຫຍວນນັ້ນ ສອງ
ຝ່າຍຈະຜ່ອນສັ້ນຜ່ອນຍາວເຂົ້າຫາກັນແນວໃດ ທັງນີ້ເພາະຈົນຮອດດຽວນີ້ ສຫຣ ອະ
ເມຣິກາ ຂ້ອງໃຈທີ່ສຸດທີ່ຄ່າເງິນຫຍວນອ່ອນຕົວເກີນໄປ ເຮັດໃຫ້ ສຫຣ ອະເມຣິກາຂາດ
ດຸນການຄ້າກັບຈີນມະຫາສານ ແລະ ຕ້ອງການໃຫ້ຝ່າຍຈີນປັບຄ່າເງີນສະກຸນແຫ່ງຊາດ
ຂອງຕົນໃຫ້ສູງຂຶ້ນ

ແຕ່ຈີນກໍບ່າຍບ່ຽງມາເລື້ອຍໆ ເຊັ່ນ ດຽວກັນ ກັບປັນຫາທີ່ ສຫຣ ອະເມຣິກາ ຂ້ອງໃຈ
ເຣື່ອງທີ່ຈີນບໍ່ຍອມເປີດຕລາດຮັບສິນຄ້າຕ່າງປະເທດຫລາຍຂຶ້ນກວ່າເກົ່າ

ເທື່ອນີ້ທ່ານປະທານາທິບໍດີທັງຈີນແລະອະເມຣິກັນ ຕ່າງກໍເຫັນດີນໍາກັນວ່າ ຈະຮ່ວມໄມ້ຮ່ວມ
ມືກັນແກ້ໄຂປັນຫາຮອບດ້ານ ສະນັ້ນເຮົາກໍຕ້ອງຕິດຕາມກັນຕໍ່ໄປວ່າ ເມື່ອເຖິງການເຈຣະ
ຈາໃນປັນຫາລາຍລະອຽດແລ້ວ ຈະສອດຄ່ອງນ້ອຍຫລາຍປານໃດກັບການສແດງເຈຕນາ
ດີຂອງທັງສອງຜູ້ນຳ

ເມື່ອເວົ້າເຖິງປັນຫາຄວາມຂ້ອງໃຈຂອງ ສຫຣ ອະເມຣິກາແລ້ວ ບາດນີ້ເຮົາກໍຫັນມາເບີ່ງ
ທາງດ້ານຄວາມຂ້ອງໃຈຂອງຈີນແດ່ ໂດຍສະເພາະຈີນກັງວົນທີ່ສຸດທີ່ເງິນສະກຸນໂດລາອະ
ເມຣິກັນ ທີ່ນັບມື້ນັບມີຣາຄາຕົກຕໍ່າຢ່າງລຽນຕິດໃນຣະຍະຫລາຍປີຫລັງທີ່ຜ່ານມານີ້

ສປ ຈີນ ຂ້ອງໃຈກໍເພາະວ່າການທີ່ເງິນໂດລາຕົກຕໍ່າທຳໃຫ້ຈີນເສັຽຜົນປໂຍດ ອັນເນື່ອງ
ມາຈາກຈີນຊື້ພັນທະບັດຂອງຣັຖບານອະເມຣິກັນເກັບໄວ້ຈຳນວນມະຫາສານ ພັນທະບັດ
ຂອງຣັຖບານອະເມຣິກັນ ກໍແມ່ນຕີຣາຄາເປັນເງິນໂດລາອະເມຣິກັນ ເມື່ອຣາຄາເງິນໂດ
ລາອະເມຣິກັນຕົກຕໍ່າ ຈີນກໍຍ່ອມເສັຽຜົນປໂຍດຕາມໄປນໍາ

ນອກຈາກນີ້ ຈີນຍັງຂ້ອງໃຈທີ່ ສຫຣ ອະເມຣິກາ ຂຶ້ນພາສີສິນຄ້າຂາເຂົ້າສຳລັບຢາງຣົດ
ຍົນແລະເຫລັກກ້າທີ່ສັ່ງຈາກຈີນ

ປັນຫາທັງໝົດນີ້ເມື່ອເຈຣະຈາກັນລົງເລິກແທ້ໆແລ້ວ ຈະມີກ່ອນຜ່ອນຜັນສັ້ນຍາວກັນ
ໄດ້ນ້ອຍຫລາຍຂນາດໃດ ເມື່ອທຽບກັບຜົນການພົບປະຫາລືຂອງສອງປະທານາທິບໍດີ
ທີ່ກຸງປັກກິ່ງໃນມື້ນີ້ ກໍເປັນເຣື່ອງທີ່ຈະຕ້ອງຕິດຕາມເບີ່ງກັນຕໍ່ໄປ