ອິຣານ

ປະທ້ວງ ຕ້ານອາເມຣິກາ ແລະ ຕ້ານ ອາມາດິເນຊາດ

ໂດຍ ບັນດານ ສີສຸນທອນ B. Sisounthone

ບົດຄວາມນີ້ເຜີຍແຜ່ເມື່ອວັນທີ 04/11/2009 ແກ້ໄຂໃຫມ່ຫລ້າສຸດເມື່ອວັນທີ 04/11/2009 12:11 TU

ໄອຢາໂຕລ່າ ອາລີ່ ຄາເມໄນ່

ກຸ່ມຕ້ານ ອາເມຣິກາ ຫລາຍພັນຄົນ ໄດ້ລົງຖນົນປະທ້ວງ ໃນກຸງ ເຕເອຣັງ ເພື່ອເປັນສັນຍາລັກ 30 ປີ ແຫ່ງການບຸກເຂົ້າຢຶດຄອງ ສະຖານທູດ ອາເມຣິກາ. ສ່ວນ ກຸ່ມປະທ້ວງ ອີກກຸ່ມນຶ່ງ ແມ່ນ ກຸ່ມຕ້ານ ການຖືກເລືອກຕັ້ງ ຂອງທ່ານ ອາມາດິເນຊາດ, ແຕ່ໄດ້ຖືກ ເຈົ້າໜ້າທີ່ປາບ

ກຸ່ມປະທ້ວງ ຕ້ານອາເມຣິກາ ຖືກຈັດເປັນທາງການ ໄດ້ພາກັນຖືທຸງ ອິຣານ ແລະ ຮ້ອງໂຮວ່າ "ອິສຣາແອນ ຈົງຈິບຫາຍວາຍວອດ" ແລະ "ອາເມຣິກາ ກໍຈົງຈິບຫາຍວາຍວອດ". ສ່ວນ "ເລືອດ ທຸກຫຍົດ ຂອງ ພວກເຮົານີ້ ຂໍມອບໃຫ້ ຜູ່ນຳຄຳພີປະຕິວັດ ອິສລາມ ສູງສຸດ ໄອຢາໂຕ ລ່າ ອາລີ່ ຄາເມໄນ່".

 

ການປະທ້ວງ ຕ້ານ ອາມາດິເນຊາດ ໃນນະຄອນຫລວງ ເຕເອຣັງ

 

ກ່ອນໜ້ານີ້ ໃນວັນທີ 4 ກໍຣະກະດາ 1979, ສະຖານທູດ ອາເມຣິກັນ ທີ່ກຸງ ເຕເອຣັງ ໄດ້ຖືກ ນັກສຶກສາອິສລາມ ບຸກເຂົ້າຢຶດ ແລະ ຈັບນັກ ການທູດ ເປັນຕົວປະກັນ 444 ມື້,  ແລະ ການພົວພັນ ການທູດ ລະ ຫວ່າງ ເຕເອຣັງ ແລະ ວໍຊິງຕັນ ກໍໄດ້ຖືກຕັດ.  ຫລັງຈາກ ປີນັ້ນມາ ການເດີນຂະບວນ ປະທ້ວງ ກໍໄດ້ຖືກຈັດຂື້ນ ທຸກໆປີ ຢູ່ຕໍ່ໜ້າ ສະຖານ ທູດເກົ່າ ອາເມຣິກາ ໃນກຸງ ເຕເອຣັງ.

 

ກຸ່ມ ຕ້ານປະທານາທິບໍດີ ອາມາດິເນຊາດ ກໍໄດ້ລົງຖນົນປະທ້ວງ ໃນມື້ນີ້ ຄືກັນ, ຮ່າງຈາກ ກຸ່ມປະທ້ວງຕ້ານອາເມຣິກາ ເປັນທາງການ ປະມານ 3-4 ຮ້ອຍ ແມດ.

ແຕ່ ຕຳລວດໄດ້ຍິງ ລະເບີດນໍ້າຕາ ໄສ່ຂະບວນການປະທ້ວງ ຂອງ ຝ່າຍຄ້ານ ທີ່ກຳລັງ ເຕົ້າໂຮມກັນໃນກຸງ ເຕເອຣັງ ແລະຕຳລວດ ນອກ ເຄື່ອງແບບ ກໍໄດ້ຈັບກຸມ ຄນະປະທ້ວງ ໃນທັນໃດ.

ຄນະປະທ້ວງ ໄດ້ຮ້ອງໂຮວ່າ "ພຣະເຈົ້າເປັນໃຫຍ່ສູງສຸດ ແລະ ພວກ ຜະເດັດການ ຈົງຈິບຫາຍ ວາຍວອດ".

ທາງການຖືວ່າ ການປະທ້ວງ ຂອງຝ່າຍຄ້ານບໍ່ຖືກຕ້ອງຕາມກົດໝາຍ. ສ່ວນຝ່າຍຄ້າຍນັ້ນ ບໍ່ຮັບຮູ້ ການຖືກເລືອກເປັນປະທານາທິບໍດີ ຂອງ ທ່ານ ອາມາດິເນຊາດ ໂດຍໃຫ້ເຫດຜົນວ່າ ມີການລັກໂລບ ຄະແນນ ສຽງ ຢ່າງໃຫຍ່ຫລວງ.

 

ການປະທ້ວງ ໃນນະຄອນຫລວງ ເຕເອຣັງ

 

ສຳຫລັບ ອີກ 2 ກຸ່ມ ທີ່ເປັນປໍຣະປັກກັນ ໄດ້ນັດກັນໄປປະທ້ວງ ທີ່ ສນາມ ຫັບຕ໌ ເອີ ຕຽກ ໜ້າຕໍ່ໜ້າ ລະຫວ່າງ ຝ່າຍສະນັບສນູນ ປທນ ບໍດີ ອາມາດິເນຊາດ ແລະ ກຸ່ມຝ່າຍຄ້ານ.

ຝ່າຍສນັບສນູນ "ຮ້ອງວ່າ ອາເມຣິກາ ຈົງຈິບຫາຍວາຍວອດ, ສ່ວນ ຝ່າຍຄ້ານນັ້ນ ກໍຮ້ອງຕອບຄືນວ່າ "ຣັດເຊັຍ ຈົງຈິບຫາຍວາຍວອດ".

 

ຫລັງຈາກ ການເລືອກຕັ້ງປະທານາທິບໍດີ ທີ່ເຕັມໄປດ້ວຍການຄັດແຍ້ງ ແລະການປະທ້ວງ ຂອງທ່ານອາມາດິເນຊາດ, ເຈົ້າໜ້າທີ່ໄດ້ ປາບພວກ ປະທ້ວງຢ່າງນອງເລືອດ, ຫລາຍ 10 ຄົນ ໄດ້ເສັຽຊີວິດ ແລະ ປະມານ 4.000 ຄົນ ໄດ້ຖືກຈັບ.

ນັບວ່າເປັນ ຄວາມວຸ້ຍວາຍພາຍໃນ ຢ່າງໜັກໜ່ວງທີ່ສຸດ ໃນວິກິດການ ການເມືອງ ຂອງ ອິຣານ ນັບຕັ້ງແຕ່ ການປະຕິວັດ ອິສລາມ ມາແຕ່ 1979.

 

ອີກດ້ານນຶ່ງ, ກ່ຽວກັນ ບັນຫານິວຄເລັຽ.

ໄອຢາໂຕລ່າ ອາລີ່ ຄາເມໄນ່ ຜູ່ນຳຄຳພີປະຕິວັດ ອິສລາມ ສູງສຸດ ໄດ້ຕຳນິ ຢ່າງແຂງຂັນ ໂດຍ ປະຕິເສດວ່າ "ຈະບໍ່ຮ່ວມເຈຣະຈາ ທີ່ເຮັດຕາມຄຳສັ່ງຂອງ ອາເມຣິກາ ເດັດຂາດ ກ່ຽວກັບບັນຫານິວຄເລັຽ ອິຣານ. ແລະຖືວ່າ ຂໍ້ສເນີສົນທະນາຂອງ ປະທານາທິບໍດີ ໂອບາມາ ນັ້ນ ມີການນາບຂູາມາພ້ອມ".

 

ປະຊາຄົມສາກົນ ໄດ້ກົດດັນ ຕໍ່ ອິຣານ ໂດຍຮຽກຮ້ອງໃຫ້ ອິຣານ ຕອບຮັບ ໂຄງການຕົກລົງ ຂອງອົງການສາກົນ ດ້ານພະລັງງານ ນິວຄເລັຽ, ສ່ວນ ອິຣານນັ້ນ ຮຽກຮ້ອງຄືນວ່າ ໃຫ້ ຈັດກອງປະຊຸມ ສາກົນ ຄືນໃໝ່ ກ່ຽວກັບ ທາດອູຣານຽມ ສຳຫລັບເປັນ ຖ່ານພະລັງ ງານ ຂອງຫົວຈັກນິວຄເລັຽ ທີ່ສ້າງຂື້ນ ສຳຫລັບການຄົ້ນຄວ້າ.