20 ປີ ແຫ່ງການຖືກ ທັບມ້າງກຳແພງ ແບກແລ່ງ

ເປັນສັນຍາລັກ ແຫ່ງການສິ້ນສຸດ ສົງຄາມເຢັນ ແລະ ການທ້ອນໂຮມ ເຍັຽຣະມັນ ເຂົ້າເປັນປະເທດດຽວ

ໂດຍ ບັນດານ ສີສຸນທອນ B. Sisounthone

ບົດຄວາມນີ້ເຜີຍແຜ່ເມື່ອວັນທີ 09/11/2009 ແກ້ໄຂໃຫມ່ຫລ້າສຸດເມື່ອວັນທີ 09/11/2009 12:25 TU

ກຳແພງ ແບກແລ່ງ

ມື້ນີ້ ເປັນວັນ ສລອງຄົບຮອບ 20 ປີແຫ່ງການທັບມ້າງ ກຳແພງ ແບກແລ່ງ ຊຶ່ງເປັນສັນຍາລັກ ແຫ່ງ ການສິ້ນສຸດ ສົງຄາມເຢັນ ແລະ ການທ້ອນໂຮມ ເຍັຽຣະມັນ ເຂົ້າເປັນປະເທດດຽວ

ໃນຕອນແລງມື້ນີ້, ຈະມີລະດັບຜູ່ນຳ ຈາກປະເທດຕ່າງໆເຂົ້າມາຮ່ວມ ໃນພິທີ ແລະຄາດວ່າຈະມີ ມວນຊົນ ເຖີງ ແສນຄົນມາຮ່ວມຊົມພິທີ ທີ່ສນາມ ປະຕູຊັຍ ແບຣນເດິບວກ Brandebourg, ຊຶ່ງເປັນ ອານຸ ສາວະຣີ ຂອງນະຄອນຫລວງ ແບກແລ່ງ ແລະ ກຳແພງ ທີ່ຖືກກ່າວ ຂານກັນວ່າ ກຳແພງ ແຫ່ງຄວາມອັບອາຍ ກໍໄດ້ຖືກ ສ້າງຂື້ນ ເພື່ອຂັ້ນ ເຂດແດນ ອອກ ເປັນສອງຕອນ ຄື ແບກແລງ ຕາເວັນອອກ ແລະ ແບກແລງ ຕາເອັນຕົກ ແລະ ກຳແພງ ດັ່ງກ່າວນັ້ນ ກໍເປັນເຂດແດນ ແຍກ ເຍັຽຣະມັນ ອອກເປັນ ສອງປະເທດ ອີກດ້ວຍ ຄື ເຍັຽຣະມັນ ຕາເວັນອອກ  ພາຍໃຕ້ການຄຸ້ມຄອງ ໂດຍລະບອບ ຄອສມູຍນິດ ຈາກສະຫະພາບ ໂຊວຽດ ແລະ ເຍັຽຣະມັນ ຕາເວັນຕົກ ພາຍໃຕ້ ການປົກຄອງ ໃນລະບອບ ປະຊາທິປະຕັຍ ແລະຄຸ້ມຄອງໂດຍ ອາເມ ຣິກາ, ອັງກິດ ແລະຝຣັ່ງ.

 

ບຸກຄົນສຳຄັນ ຕາງໜ້າຈາກປະເທດ ທີ່ມີສ່ວນຮ່ວມ ໃນການປົດປ່ອຍ ເຍັຽຣະມັນ ອອກຈາກ ລະບອບ ຜະເດັດການ ທະຫານ ນ່າຊີ່ ຮິດເລີ້ ມີ ດັ່ງນີ້ :

ປະທານາທິບໍດີ ຣັດເຊັຍ ດິມິຕຣີ ເວດເມເດັບ ແລະ ອະດີດປະທານ ສະຫະພາບ ໂຊວຽດ ທ່ານ ມິກ່າແອ່ນ ກ໊ອກບາເຊັບ.

ສ່ວນ ອາເມຣິກາ ຖືກຕາງໜ້າ ໂດຍ ຍານາງ ຮິນລາຣີ່ ກລິງຕັນ ລັຖ ມົນຕຣີ ການຕ່າງປະເທດ, ສຳຫລັບ ຝຣັ່ງ ແລະ ອັງກິດ ນັ້ນ ແມ່ນ ປະທານາທິບໍດີ ນິກໂກລາ ສ໊າກໂກຊີ່ ແລະ ນາຍົກຣັຖມົນຕຣີ ໂກດອນ ບຣ່າວ.

 

ສະພາບການ ໂດຍຫຍໍ້ ໃນວະຣະ ກ່ອນກຳແພງ ຈະຖືກທັບມ້າງ

ຫລັງຈາກ ເຍັຽຣະມັນ ລະບອບ ນາຊີ່ ຮິດເລີ້ ໄດ້ ເສັຽຊັຍ ສົງຄາມ ໂລກຄັ້ງທີ 2 ໃຫ້ແກ່ຝ່າຍພັນທະມິຕ ທີ່ມີ ອາເມຣິກາ, ຝຣັ່ງ, ອັງກິດ ແລະ ໂຊວຽດ ແລ້ວ.

 

ໂຊວຽດ ແລະ ຝ່າຍພັນທະມິຕ ຕາເວັນຕົກ ສົງສັຍ ຊຶ່ງກັນແລະກັນ ແລະກໍ ບໍ່ສາມາດຕົກລົງ ລະບົບການ ຄຸ້ມຄອງເຍັຽຣະມັນ ໃຫ້ຢູ່ໃນ ລະບອບດຽວກັນໄດ້.

ເວລານັ້ນ ເຍັຽຣະມັນ ເປັນປະເທດ ພ່າຍແພ້ສົງຄາມ ບໍ່ມີສິດອອກສຽງ ຄັດຄ້ານ ມະຕິຂອງຝ່າຍ ຊນະສົງຄາມ ນັ້ນໄດ້.

 

ໂຊວຽດ ຕ້ອງການຄຸ້ມຄອງ ເຍັຽຣະມັນ ດ້ວຍລະບອບ ຄອມມູຍນິດ, ສ່ວນ ອາເມຣິກາ, ອັງກິດ ແລະ ຝຣັ່ງ ຕ້ອງການ ຄຸ້ມຄອງ ດ້ວຍ ລະບອບ ເສຣີປະຊາທິປະຕັຍ, ສນັ້ນ ຈຶ່ງຈຳຕ້ອງໄດ້ຕົກລົງ ສ້າງ ກຳແພງ ກັ້ນເຂດແດນ ເຍັຽຣະມັນ ອອກ ເປັນສອງ ເຂດ ໃນປີ 1961.

 

ຕໍ່ມາ ໃນຕອນ ຢ້ຽມຢາມ ແບກແລງ ຂອງປະທານາທິບໍດີ ອາເມຣິກາ ທ່ານ ຈອນ ແອຟ ເຄນເນດີ ໄດ້ປະກາດວ່າ "ມີກຳແພງ ດີກ່າວ ມີ ສົງຄາມ".

 

ເມື່ອ ເລຂາທິການໃຫຍ່ ຂອງສະຫະພາບໂຊວຽດ ຄືທ່ານ ກ໊ອກບາ ເຊັບ ນັ້ນເຫັນວ່າ ການນຳພາ ດ້ວຍລະບອບ ຄອມມູຍນິດ ນີ້ມີ ຄວາມ ຍຸ້ງບາກ ແລະໄປບໍ່ລອດແລ້ວ ບໍ່ວ່າບັນຫາ ການເມືອງ, ເສຖກິດ ແລະ ສັງຄົມ ໃນໂຊວຽດ ແລະ ປະເທດເຄືອຄ່າຍ ບັນດາ ປະເທດສັງຄົມ ນິຍົມ ອື່ນໆໃນຄ່າຍ ຕາເວັນອອກນັ້ນ ກໍມີແຕ່ສຸດສ້ວຍອ່ວຍລົງ.

 

ສນັ້ນຕອນຂື້ນກຳອຳນາດ ເປັນ ເລຂາທິການໃຫຍ່ ຂອງ ສະຫະພາບ ໂຊວຽດນັ້ນ ທ່ານໄດ້ປະກາດ ນະໂຍບາຍ ປະຕິຮູບໂຊວຽດ ໃຫ້ມີ ຄວາມໂປ່ງສັຍ (ກລາກສນົສ) ແລະ ປະຕິຮູບລະບົບເສຖກິດໃໝ່ (ປາແລສໂຕອິກ່າ).

 

ເຫັນໄດ້ຈາກ ການປະທ້ວງຢ່າງລຽນຕິດ ໃນເຍັຽຣະມັນ, ໃນໂປໂລຍ ແລະ ໃນ ຣູມານີ່, ຕອນນັ້ນ ທ່ານ ເລຂາທິການໃຫຍ່ ກ໊ອກບາເຊັບ ມີຈຸດປະສົງ ປ່ອຍໃຫ້ ປະຊາຊົນ ຂອງປະເທດ ທີ່ຢູ່ໃນຄ່າຍ ສັງຄົມ ນິຍົມນັ້ນ ເປັນຜູ່ຊີ້ຂາດ ໂຊກຊາຕາກັມ ຂອງປະເທດໃຜລາວ, ສນັ້ນ ຈຶ່ງບໍ່ມີການ ສັ່ງກຳລັງທະຫານ ເຂົ້າປາບ ກຸ່ມປະທ້ວງ ເພື່ອຫລີກເວັ້ນ ການນອງເລືອດ.

 

ໃນເມື່ອເປັນເຊັ່ນນັ້ນ, ຜູ່ນຳ ຂອງຄອມມູຍນິດ ເຍັຽຣະມັນຕາເວັນອອກ ກໍໄດ້ປະປ່ອຍໃຫ້ ປະຊາຊົນ ຂ້າມຊາຍແດນ ອອກມາທາງຕາເວັນຕົກ ແລະນັບແຕ່ ວັນ ທີ 9 ພຶສຈິກາ 1989 ນັ້ນມາ ກຳແພງ ແບກແລາງ ກໍໄດ້ຖືກທັບມ້າງ ແລະ ໃນ ປີ 1990 ເຍັຽຣະມັນກໍໄດ້ປະກາດ ເປັນ ປະເທດດຽວກັນ.

 

ຕໍ່ມາ ລະບອບຄອມູຍນິດ ໃນໂຊວຽດ ກໍໄດ້ຄ່ອຍພັງທະລາຍ ແລະຖືກ ແບ່ງແຍກ ອອກເປັນ ເອກະລາດ ອີກຫລາຍປະເທດ, ນອກຈາກ ບັນດາປະເທດ ທີ່ຣັດເຊັຍ ຖືວ່າ ເປັນ ຈຸດຍຸທະສາດ ແລະ ມີຊັພ ໃນດິນສິນໃນນໍ້າ ຈຶ່ງບໍ່ວາງມື ແລະ ຈັດເຂົ້າເປັນ ສະຫະພັນ ຣັດເຊັຍ.

 

ຈາກນັ້ນມາ ລະບອບຄອມມູຍນິດ ໃນບັນດາປະເທດ ເອີຣົບ ຕາເວັນ ອອກ ກໍໄດ້ລົ້ມລະລາຍ ລົງໄປຕາມໆກັນ.

 

 

ຍານາງ ອັງເກນລ່າ ແມກເກີນ ນາຍົກລັຖມົນຕຣີ ເຍັຽຣະມັນ ຈະເປັນ ປະທານ ພິທີສລອງ ຄົບຮອບ 20 ປີແຫ່ງການທັບມ້າງ ກຳແພງ ແບກແລ່ງ ຊຶ່ງເປັນສັນຍາລັກ ແຫ່ງ ການສິ້ນສຸດ ສົງຄາມເຢັນ ແລະ ການທ້ອນໂຮມ ເຍັຽຣະມັນ ເຂົ້າເປັນປະເທດດຽວ ແລະກໍເປັນການ ເປີດອິສຣະພາບ ໃຫ້ແກ່ປະຊາຊົນ ທີ່ຢູ່ ຂ້າງກຳແພງ ຕາເວັນອອກ ສາມາດ ສັນຈອນ ທ່ອງທ່ຽວ ທາງພາກ ຕາເວັນຕົກ ໄດ້ ຢ່າງເສຣີ.

 

ຍານາງ ແມກເກີນ ໄດ້ຖແລງໃນຕອນເຊົ້າມື້ນີ້ວ່າ : 20 ປີ ຫລັງຈາກ ກຳແພງ ແບກແລ່ງ ໄດ້ຖືກພັງລົງແລ້ວ, ແຕ່ຄວາມເປັນເອກະພາບ ຫຼືວ່າ ການເຂົ້າເປັນອັນນຶ່ງອັນດຽວກັນ ຂອງເຍັຽຣະມັນ ນັ້ຍ ຍັງບໍ່ທັນ ແລ້ວ ໝົດເທື່ອ ໂດຍສະເພາະ ທາງດ້ານ ເສຖກິດ ລະຫວ່າງ ເຂດ ຕາເວັນອອກ ແລະ ຕົກ, ເຂດຕາເວັນອອກ ມີຈຳນວນຄົນຫວ່າງງານ ເກີນເຂດຕາເວັນຕົກ 2 ເທົ້າຕົວ.

 

ຢ່າງໃດກໍດີ ນັບຕັ້ງແຕ່ ກຳແພງ ໄດ້ຖືກທັບມ້າງລົງ ແລະ ເຍັຽຣະມັນ ກໍໄດ້ເຂົ້າເປັນນຶ່ງອັນດຽວກັນ, ແຕ່ເສຖກິດ ຂອງເຂດ ຕາເວັນອອກ ໃນວາຣະນັ້ນ ຕົກຕໍ່າທີ່ສຸດ, ຝ່າຍເສຣີ ຕາເວັນຕົກຈຳຕ້ອງ ໄດ້ຊົດ ຊ່ວຍ ຢ່າງມະຫາສານ ເພື່ອຍົກ ຖານະ ໃຫ້ທຽມກັນ.

 

ໃນ 20 ປີ ມານີ້, ເຍັຽຣະມັນ ຕາເວັນຕົກ ໄດ້ຊ່ວຍ ເຍັຽຣະມັນ ຕາເວັນອອກ ໄປແລ້ວໃນຈຳນວນເງີນ 1.300 ພັນລ້ານ ເອີໂຣ.