ກໍຣະນີພິພາດ ຣັດເຊັຽ - ຢໍຣ໌ເຢັຽ

ກໍາລັງຣັດເຊັຽ ເລີ້ມຖອນອອກຈາກ ເຂດພິພາດແລ້ວ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 05/10/2008 ແກ້ໄຂໃຫມ່ຫລ້າສຸດເມື່ອວັນທີ 07/10/2008 08:42 TU

ທະຫານຝຣັ່ງເສດ ສັງກັດຄນະສັງເກດການຂອງສະຫະພາບຢຸໂຣບ ກໍາລັງເຈຣະຈາກັບທະຫານ ຣັດເຊັຽ (ຢືນກາງໃສ່ຊຸດສນາມ) ທີ່ໝູບ້ານແຫ່ງໜຶ່ງ ຫ່າງຈາກກຸງ "ບີລິສຊີ" ນະຄອນຫລວງຂອງ ຢໍຣ໌ເຢັຽ ໄປທາງດ້ານຕະວັນຕົກ 110 ກ.ມ. (ພາບ: Reuters)

ຣັດເຊັຽເລີ້ມປະຕິບັດການຖອນທະຫານອອກຈາກເຂດຍຶດຄອງຂອງຕົນໃນ
"ອອສເຊເທັຽໃຕ້" ແລ້ວຕັ້ງແຕ່ມື້ນີ້ເປັນຕົ້ນໄປ ແລະກະໃຫ້ແລ້ວເສັດພາຍໃນ
ວັນທີ 10 ເດືອນຕຸລານີ້ ຕາມຂໍ້ຕົກລົງ "ເມັດເວເຢັບ-ຊາຣ໌ໂກຊີ" ທີ່ກໍາໜົດໃຫ້
ທະຫານຣັດເຊັຽຖອນອອກຈາກ "ອັບຄາເຊັຽ" ນໍາດ້ວຍ

ກ່ອນໜ້ານີ້ ສະຫະຣັດອະເມຣິກາແລະຢໍຣ໌ເຢັຽ ໄດ້ສແດງຄວາມສົງໃສວ່າຣັດເຊັຽອາດ
ແກ່ຍາວການຖອນທະຫານຂອງຕົນກໍໄດ້ ໂດຍຈະອ້າງເອົາເຫດການກໍ່ການຮ້າຍທີ່ທໍາ
ໃຫ້ທະຫານຣັດເຊັຽເສັຽຊີວິດ 8 ຄົນ ແລະ ພົລເຮືອນອີກ 3 ຄົນ ເມື່ອວັນສຸກທີ່ຜ່ານມາ
(3 ຕຸລາ) ໃນຖານທັບຣັດເຊັຽ ທີ່ກຸງ "ສຄິນເວເລັຽ" ເມືອງຫລວງຂອງ "ອອສເຊເທັຽ
ໃຕ້" ມາເປັນຂໍ້ອ້າງ

"ຄນະສັງເກດການຂອງພວກເຮົາໄດ້ເຫັນທະຫານຣັດເຊັຽຖອນຕົວອອກຈາກເມືອງ "ອາລີ"
ແລ້ວ ທີ່ຢູ່ຫ່າງຈາກຊາຍແດນ "ອອສເຊເທັຽໃຕ້" ປະມານ 15 ກ.ມ." ໂຄສົກຂອງຄນະ
ນັກສັງເກດການຂອງສະຫະພາບຢຸໂຣບ ໄດ້ກ່າວຕໍ່ຜູ້ສື່ຂ່າວ

ຄນະນັກສັງເກດການຂອງສະຫະພາບຢຸໂຣບ 200 ຄົນ ໄດ້ເດີນທາງເຂົ້າໄປປະຕິບັດງານ
ໃນຢໍຣ໌ເຢັຽ ຕັ້ງແຕ່ວັນພຸດທີ່ແລ້ວ (1 ຕຸລາ) ຕາມຂໍ້ຕົກລົງ "ເມັດເວເຢັບ-ຊາຣ໌ໂກຊີ" ທັງ
ນີ້ເພື່ອທົດແທນທະຫານຣັດເຊັຽ 800 ຄົນ ທີ່ຈະຕ້ອງຖອນອອກໃຫ້ໝົດ

ໃນຂນະທີ່ ຣມຕ ກະຊວງພາຍໃນຂອງຢໍຣ໌ເຢັຽ "ທ່ານໂຊຕາ ອູຕີອາສວີລີ"  ກໍໄດ້ກ່າວ
ສແດງຄວາມຫວັງວ່າ ການເລີ້ມຖອນຂອງທະຫານຣັດເຊັຽຄັ້ງນີ້ ຄົງເປັນການເລີ້ມຕົ້ນທີ່
ຈະນໍາໄປສູ່ການຖອນຈົນໝົດຕາມກໍາໜົດ

ອີກປະການໜຶ່ງ ປະທານາທິບໍດີຣັດເຊັຽ "ທ່ານດີມິຕຣີ ເມັດເວເຢັບ" ກໍໄດ້ອອກຄໍາສັ່ງໃຫ້ມີ
ການດໍາເນີນການສືບສວນສອບສວນຫາຂໍ້ເທັດຈິງກ່ຽວກັບການກໍ່ການຮ້າຍດ້ວຍຣົດຍົນບັນ
ທຸກລະເບີດໃສ່ຖານທັບຣັດເຊັຽທີ່ເມືອງ "ສຄິນເວເລັຽ" ເມື່ອວັນສຸກຜ່ານມາ ເຊີນທ່ານ
ຄລິກລຸ່ມນີ້ເພື່ອຮັບຟັງ ການຣາຍງານຈາກ "ບຸນຖນອມ ສີປະທຸມທອງ" ຜູ້ສື່ຂ່າວ
"RFI" ຂອງພວກເຮົາປະຈໍາກຸງມອສໂຄວ໌