ຊຸມນຸມປະທ້ວງ ທີ່ກຸງພະນົມເປັນ ຕ້ານຄ່າຄອງຊີບແພງ

ຝ່າຍຄ້ານເປັນຜູ້ ນຳພາໃນການ ຈັດຊຸມນຸມປະທ້ວງ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 06/04/2008 ແກ້ໄຂໃຫມ່ຫລ້າສຸດເມື່ອວັນທີ 14/04/2008 15:38 TU

ການຊຸມນຸມປະທ້ວງທີ່ກຸງພະນົມເປັນພາຍໃຕ້ການນຳຂອງພັກຝ່າຍຄ້ານ ຊັມ ຣັງສີ ເພື່ອຕ້ານຄ່າ ຄອງຊີບແພງ ທວງໃຫ້ຣັຖບານແກ້ໄຂດ້ວຍການຂື້ນເງີນເດືອນໃຫ້ແກ່ບັນດາຂ້າຣາຊການແລະ ພະນັກງານ (ພາບ: Reuters)

ທ່ານຊັມ ຣັງສີ ຫົວໜ້າພັກຝ່າຍຄ້ານເປັນຜູ້ນຳພາໃນການຈັດຊຸມນຸມປະທ້ວງ ຄັ້ງນີ້ ບັນດາອົງການຊ່ວຍເຫລືອນາໆຊາດວ່າ ອີກບໍ່ນານຊາວຂເມນໃນຊົນນະ ບົດຫລາຍສິບພັນຄົນຈະຫິວໂຫຍອົດຢາກ

ທວງໃຫ້ຂື້ນເງິນເດືອນ
ທີ່ກຸງພະນົມເປັນ ມີປະຊາຊົນປະມານ 300 ຄົນ ພາຍໃຕ້ການນຳຂອງ ທ່ານຊັມ ຣັງສີ
ຫົວໜ້າພັກຝ່າຍຄ້ານ ພາກັນຊຸມນຸມປະທ້ວງ ຕ້ານຄ່າຄອງຊີບແພງ ພ້ອມທັງທວງໃຫ້
ຣັຖບານແກ້ໄຂດ້ວຍການຂື້ນເງີນເດືອນໃຫ້ແກ່ບັນດາຂ້າຣາຊການແລະພະນັກງານ ພ້ອມ
ກັນນີ້ ທ່ານຊັມ ຣັງສີ ກໍຍັງໄດ້ກ່າວໃນການປະທ້ວງ ຕຳນິຕິຕຽນຣັຖບານຂອງທ່ານນາ
ຍົກ ຣມຕ ຮຸນເຊັນ ວ່າ ບໍ່ມີຄວາມສາມາດແກ້ໄຂປັນຫາເງິນເຟີ້ໄດ້

ຄນະປະທ້ວງຍັງໄດ້ຍ່າງໄປຍັງສຖານທີ່ທີ່ກຸ່ມປະທ້ວງເຄີຍຖືກໂຍນລະເບີດໃສ່ ຈົນມີການ
ເສັຽຊີວິດ 16 ຄົນ ແລະບາດເຈັບກວ່າ 100 ເມື່ອປີ 1997

ການປະທ້ວງທີ່ກຸງພະນົມເປັນຄັ້ງນີ້ ດຳເນີນໄປພາຍໃຕ້ການຄວບຄຸມຄວາມປອດໄພຢ່າງ
ໃກ້ຊິດຂອງເຈົ້າໜ້າທີ່ຕ້ານການຈະລາຈົນປະມານ 100 ຄົນ

ເງີນເຟີ້ 11% ເມື່ອປີ 2007
ເມື່ອປີ 2007 ທີ່ຜ່ານມາ ຣາຊອານາຈັກກັມພູເຈັຽມີອັຕຣາເງິນເຟີ້ເຖິງ 11% ອັນເນື່ອງ
ມາຈາກຣາຄາເຄື່ອງອຸປໂພກບໍຣິໂພກທີ່ຈຳເປັນຕໍ່ຊີວິດປະຈຳວັນຂອງປະຊາຊົນໄດ້ດີດ
ຕົວສູງຂື້ນ ໂດຍສະເພາະຣາຄາເຂົ້າສານ ອາຫານຫລັກຂອງປະຊາຊົນນັ້ນໄດ້ພຸ່ງຣາຄາ
ຂື້ນເກືອບເຖິງ 1 ດອລລາຣ໌ຕໍ່ກິໂລແລ້ວໃນປັດຈຸບັນ

ໃນຂນະທີ່ຣາຄາຊິ້ນກໍດີດຕົວສູງຂື້ນເກີນ 40% ໃນຣະຍະໜຶ່ງປີທີ່ຜ່ານມາ ສ້າງຄວາມ
ເດືອດຮ້ອນໃຫ້ແກ່ປະຊາຊົນ 14 ລ້ານຄົນຕື່ມເຂົ້າໄປອີກ ໃນນັ້ນປະມານ 5 ລ້ານຄົນມີ
ລາຍໄດ້ບໍ່ເຖິງເຄິ່ງດອລລາຣ໌ຕໍ່ວັນ

ຣັຖບານກັມພູເຈັຽໄດ້ວາງມາຕຣາການຫລາຍຢ່າງອອກເພື່ອແກ້ໄຂປັນຫາ ເຊັ່ນຫ້າມການ
ສົ່ງເຂົ້າອອກຂາຍຕ່າງປະເທດ ແລະຍົກເລີກການຫ້າມການສັ່ງຊີ້ນໝູມາຈາກຕ່າງປະເທດ
ແຕ່ເຖິງປານນັ້ນຣາຄາສິນຄ້າກໍຍັງຄົງສູງຂື້ນຕໍ່ໄປ

ບັນດາອົງການຊ່ວຍເຫລືອສາກົນໄດ້ເຕືອນວ່າການທີ່ຄ່າຄອງຊີບດີດຕົວສູງຂື້ນຄືແນວນີ້ຈະ
ທຳໃຫ້ປະຊາຊົນຫລາຍ 10 ພັນຄົນໃນຊົນນະບົດເກີດຄວາມອົດຫິວໃນໄວໆນີ້

ໄທຍກໍວຸ້ນເຣື່ອງຣາຄາເຂົ້າແພງ

ຣາຄາເຂົ້າປະເພດ "ປະທຸມທານີ" ຂອງໄທຍດີດຕົວສູງຂື້ນເຖິງ 52% ໃນຣະຍະ ພຽງເດືອນດຽວ (ພາບ: Reuters)

ອີກດ້ານໜຶ່ງ ນາຍົກ ຣມຕ ໄທຍ ທ່ານສມັກ ສຸນທໍຣະເວດ ກໍໄດ້ອອກມາຮຽກຮ້ອງຕື່ມ
ອີກໃນມື້ນີ້ ບໍ່ໃຫ້ປະຊາຊົນພາກັນແຕກຕື່ນດ້ວຍການເຮໂລກັນໄປຊື້ເຂົ້າມາຕຸນໄວ້ຍ້ອນ
ເກີດຄວາມຫວັ່ນວິຕົກວ່າຣາຄາຈະສູງຂື້ນ ນັບເປັນຄັ້ງທີ່ສອງໃນຣະຍະພຽງສາມວັນທີ່
ນາຍົກ ຣມຕ ໄທຍ ໄດ້ອອກມາກ່າວຮຽກຮ້ອງປະຊາຊົນເຊັ່ນນີ້

ທ່ານສມັກ ສຸນທໍຣະເວດ ກ່າວໃຫ້ຄວາມໝັ້ນໃຈແກ່ປະຊາຊົນວ່າ ປະເທດໄທຍມີເຂົ້າ
ພຽງພໍສຳລັບການບໍຣິໂພກຂອງຄົນໄທຍທຸກຄົນໃນທົ່ວປະເທດ ໂດຍມີສຕ໊ອກເຖິງ 2
ລ້ານໂຕນ

ໃນຂນະທີ່ອັຕຣາການບໍຣິໂພກຂອງຊາວໄທຍ 64 ລ້ານຄົນນັ້ນແມ່ນ 6,6 ລ້ານໂຕນຕໍ່
ປີ ຕາມຕົວເລກຂອງອົງການອາຫານໂລກ (FAO) ທີ່ຢ້ຳວ່າເ ມື່ອປີ 2007 ຜ່ານມາ

ໄທຍສົ່ງເຂົ້າອອກຂາຍໃນຕ່າງປະເທດມີປະຣິມານທັງໝົດ 9,5 ລ້ານໂຕນ ແຕ່ປີນີ້ຄາດ

ວ່າຈະສົ່ງອອກພຽງ 9,2 ລ້ານໂຕນເທົ່ານັ້ນ ທັງນີ້ເພື່ອລົດຜ່ອນການດີດຕົວສູງຂື້ນຂອງ

ຣາຄາພາຍໃນປະເທດ

ປະເທດໄທຍເປັນປະເທດອັນດັບທີ່ໜຶ່ງຂອງໂລກໃນການຜລິດເຂົ້າ ໃນຣະຍະໜຶ່ງເດືອນທີ່
ຜ່ານມາເທົ່ານັ້ນ ເຂົ້າປະເພດ "ປະທຸມທານີ" ຂອງໄທຍ ໄດ້ດີດຕົວສູງຂື້ນເຖິງ 52%
ເປັນ 930 ດອລລາຣ໌ຕໍ່ໂຕນ

ໂຍນຄວາມຮັບຜິດຊອບໃຫ້ກັນແລະກັນ
ສະມາຄົມຜູ້ສົ່ງເຂົ້າອອກໄດ້ກ່າວຫາບັນດາໂຮງສີແລະພໍ່ຄ້າຄົນກາງວ່າເປັນຜູ້ກັກຕຸນເພື່ອ
ການສົ່ງອອກ ຈຶ່ງທຳໃຫ້ຣາຄາເຂົ້າພາຍໃນປະເທດດີດຕົວສູງຂື້ນ ຝ່າຍໂຮງສີແລະພໍ່ຄ້າ
ຄົນກາງກໍຕອກໜ້າຄືນໄປວ່າ ແມ່ນບັນດາພໍ່ຄ້າຜູ້ສົ່ງອອກນັ້ນແຫລະຄືຕົວການກັກຕຸນເພື່ອ
ສົ່ງອອກເພາະໄດ້ກຳໄລງາມ ຣາຄາເຂົ້າໃນຕລາດໂລກສູງຂື້ນ ໂດຍສະເພາະໃນປະເທດ
ຈີນທີ່ປະສົບກັບປັນຫາຂາດແຄນຍ້ອນປະສົບໄພທັມມະຊາດ

ປະເທດອື່ນກໍຍຸ້ງຍາກ
ສ່ວນໃນປະເທດອື່ນ ກໍປະສົບປັນຫາການຂາດແຄນເຊັ່ນດຽວກັນ ວຽດນາມໄດ້ຕົກລົງຈະ
ສົ່ງຂາຍໃຫ້ຟີລິບປິນຈຳນວນ 1 500 000 ໂຕນ ທັງໆທີ່ຣາຄາໃນວຽດນາມກໍສູງຂື້ນ
ເຊັ່ນດຽວກັນ

ປະທານາທິບໍດີ ຟີລິບປິນ ທ່ານນາງອາໂຣໂຢ ເຖິງປະກາດມາຕຣາການຈຳຄຸກສຳລັບ
ຜູ້ກັກຕຸນເຂົ້າ ໃນຂນະທີ່ສີລັງກາກໍມີແຜນຈະສັ່ງເຂົ້າມາຈາກພະມ້າຈຳນວນ 100 000
ໂຕນ ເພື່ອສນອງຄວາມຕ້ອງການຂອງປະເທດ ສ່ວນທາງການບັງຄລາເທດກໍໄດ້ອອກ
ຄຳສັ່ງໃຫ້ເຈົ້າໜ້າທີ່ຄອຍສອດສ່ອງຢ່າງໃກ້ຊິດ ຜູ້ໃດທຳການກັກຕຸນຈະໄດ້ຮັບໂທດ
ສຖານໜັກ