ຄວ້ຳບາດໂອແລມປິກປັກກິ່ງ?

ກັມມາທິການຕ່າງປະ ເທດ ສ. ເອີຣົບ ອອກມາເອົາທ່າທີ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 29/03/2008 ແກ້ໄຂໃຫມ່ຫລ້າສຸດເມື່ອວັນທີ 29/03/2008 15:09 TU

ຊາວທິເບດພັດຖິ່ນໃນປະເທດເນປານ ປະທະກັບເຈົ້າໜ້າທີ່ຮັກສາຄວາມປອດໄພໃນຂນະຊຸມນຸມ ປະທ້ວງຕໍ່ໜ້າສຖານທູດຂອງ ສປ ຈີນ ທີ່ກຸງກັດມັນດຸ (ພາບ: Reuters)

ບັນດາ ຣມຕ ຕ່າງປະເທດຂອງສະຫະພາບເອີຣົບ ມີກຳໜົດເປີດປະຊຸມຄ່ຳມື້ນີ້ ທີ່ເມືອງ BRDO KRANJU ປະເທດ Slovénie ຊຶ່ງເປັນປະທານວຽນຂອງ ສະຫະພາບໃນຊ່ວງ 6 ເດືອນທຳອິດຂອງປີນີ້ ປັນຫາຄວາມປັ່ນປ່ວນວຸ້ນວາຍ ໃນທິເບດ ແລະປັນຫາເອກຣາດຂອງໂຄໂຊໂວ ເປັນຫົວຂໍ້ສຳຄັນຂອງລາຍການ ປະຊຸມ

ຮຽກຮ້ອງນັກລົງທຶນໃນ ສປ ຈີນ ພິຈາຣະນາປັນຫາ ສິດທິມະນຸດ
ຢ່າງໃດກໍຕາມ ສຳລັບປັນຫາທິເບດນັ້ນ ກ່ອນເປີດການປະຊຸມ ທ່ານນາງ Benita
Ferrero-Waldner ກັມມາທິການຝ່າຍພົວພັນກັບຕ່າງປະເທດຂອງສະຫະພາບເອີຣົບ
ກໍໄດ້ຍົກປັນຫາການຄວ້ຳບາດໂອແລມປິກປັກກິ່ງຂື້ນມາກ່າວກ່ອນແລ້ວ

"ເຫລືອເວລາອີກ 5 ເດືອນກ່ອນພິທີເປີດການແຂ່ງຂັນກິລາໂອແລມປິກທີ່ປັກກິ່ງ ພວກ
ເຮົາຄວນຈັບຕາເບີ່ງຢ່າງໃກ້ຊິດວ່າຣັຖບານປັກກິ່ງຈະແກ້ປັນຫາທິເບດແນວໃດ ກ່ອນ
ທີ່ຈະຕັດສິນໃຈວ່າຈະຄວ້ຳບາດ ລືບໍ່" ທ່ານນາງ Ferraro-Waldner ໃຫ້ສັມພາດຕໍ່
ຂ່າວສານຂອງປະເທດເຍີຣະມັນ Bild am Sonntag ທີ່ຈະວາງຕລາດໃນມື້ອື່ນ (ອາ
ທິດ 30 ມີນາ)

ນອກຈາກນີ້ ກັມມາທິການພົວພັນກັບຕ່າງປະເທດຂອງສະຫະພາບເອີຣົບ ຊຶ່ງເປັນຊາວ
Autriche ຍັງກ່າວອີກວ່າ ບັນດາບໍຣິສັດຕ່າງປະເທດທີ່ລົງທຶນໃນ ສປ ຈີນ ນັ້ນ ກໍຄວນ
ຄຳນຶງແລະເອົາຄວາມຮັບ ຜິດຊອບໃນເຣື່ອງການເຄົາຣົບສິດທິມະນຸດຊົນນຳແດ່ ເຖິງ
ແມ່ນວ່າບໍ່ສາມາດທີ່ຈະຢຸດກິຈການໄດ້ໃນມື້ ໜຶ່ງຍາມດຽວກໍຕາມ

ດາໄລ ລາມາ ເອີ່ຍເຖິງ "ຊາດໜ້າ"
ທາງດ້ານອົງ ດາໄລ ລາມາ ກໍໄດ້ຊົງວິງວອນຈາກກຸງ ນິວ ເດລລີ ເຖິງປະຊາຄົມນາໆ
ຊາດ ໃຫ້ຊ່ວຍແກ້ໄຂປັນຫາໃນທິເບດ ທັງນີ້ອັນເນື່ອງມາຈາກຊາວທິເບດພັດຖິ່ນ ບໍ່ມີອຳ
ນາດແລະຂີດຄວາມສາມາດພຽງພໍທີ່ຈະເຮັດໄດ້ ນອກຈາກຄວາມຈິງໃຈ

ອີກປະການໜຶ່ງ ຜູ້ນຳທິເບດພັດຖິ່ນ ຍັງໄດ້ຊົງຮ່ວມກັບບັນດາຜູ້ນຳທາງສາສານາອື່ນໆ
ເຊັ່ນ ຮິນດູ ມຸສລິມ ແລະ ຊິກສ໌  ສວດມົນອຸທິດໃຫ້ແກ່ດວງວິນຍານຂອງຜູ້ປະທ້ວງທີ່ເສັຽ
ຊີວິດໃນທິເບດຍ້ອນຖືກປາບປາມຈາກເຈົ້າໜ້າທີ່ຈີນ

ພະອົງຍັງໄດ້ຖືໂອກາດນີ້ກ່າວກັບຜູ້ສື່ຂ່າວວ່າໃນອີກບໍ່ນານ ພະອົງ ອາດຈະ "ຖອນຕົວ"
ແລະ "ປ່ອຍມື" ຈາກການເປັນຜູ້ນຳພັດຖິ່ນ ທັງນີ້ເພື່ອຈະມີເວລາກະກຽມການເດີນທາງ
ໄປສູ່ "ຊາດໜ້າ"

ກ່ອນໜ້ານີ້ ຂບວນການຊາວໜຸ່ມທິເບດພັດຖິ່ນ ຊຶ່ງເປັນຄົນຮຸ່ນໃໝ່ໄດ້ອອກມາຕຳນິຕິຕຽນ
ຕໍ່ການຕໍ່ສູ້ໂດຍວິທີ "ອະຫິງສາ" ບໍ່ໃຊ້ຄວາມຮຸນແຮງຂອງອົງ ດາໄລ ລາມາ ທີ່ໄດ້ນຳປະ
ຕິບັດເກືອບ 50 ປີ ມາ ແລ້ວ ວ່າບໍ່ໄດ້ຜົນໃດໆເລີຍ ແລະຮຽກຮ້ອງໃຫ້ມີການຕໍ່ສູ້ແບບໃຊ້
ກຳລັງອາວຸດ

ນອກຈາກນີ້ ອົງດາໄລ ລາມາ ບໍ່ຊົງຄັດຄ້ານການເປັນເຈົ້າພາບຂອງ ສປ ຈີນ ຈັດການ
ແຂ່ງຂັນກິລາໂອແລມປິກຣະດູຮ້ອນລະຫວ່າງວັນ 8 – 24 ສິງຫາໜ້າ ໃນຂນະທີ່ຂບວນ
ການຊາວໜຸ່ມທີເບດພັດຖິ່ນ ຮຽກຮ້ອງໃຫ້ປະຊາຄົມນາໆຊາດທຳການຄວ້ຳບາດ

ນັກການທູດຕ່າງປະເທດ ໄປນະຄອນ Lhassa
ທາງດານສຳນັກຂ່າວຈີນໃໝ່ ກໍໄດ້ເຜີຍໃນມື້ນີ້ (ເສົາ 29 ມີນາ) ວ່າທາງການຈີນໄດ້ປະ
ກາດມາຕຣາການເຂັ້ມງວດການຮັກສາຄວາມປອດໄພໃນໂອກາດການແຂ່ງຂັນກິລາໂອ
ແລມປິກ ໂດຍອະນຸຍາດໃຫ້ເຈົ້າໜ້າທີ່ຕຳຣວດທຳການກວດຄົ້ນໄດ້ໃນສນາມທຽນອັນເໝິນ
ແລະໃນສຖານີຣົດໄຟຕ່າງໆຂອງນະຄອນຫລວງປັກກິ່ງ

ນອກຈາກນີ້ ທາງການຈີນກໍຍັງໄດ້ຈັດໃຫ້ບັນດານັກການທູດຈາກ 15 ປະເທດ ໃນນັ້ນ
ຮວມທັງສະຫະຣັດອະເມຣິກາ ສະຫະຣາຊອານາຈັກ ຝຣັ່ງເສດ ອົສຕຣາລີ ອີຕາລີ
ຣັດເຊັຽ ການາດາ ເບຣາຊິລ ແລະ ຊໂລເວນີ ຊຶ່ງເປັນປະທານວຽນຂອງສະຫະພາບ
ເອີຣົບ ເດີນທາງ ໄປຍັງນະຄອນ Lassha ເມືອງຫລວງຂອງທິເບດເມື່ອວານນີ້ ໂດຍ
ມີເຈົ້າໜ້າທີ່ຂອງ ສປ ຈີນ ນຳພາໄປ

ກະຊວງການຕ່າງປະເທດທີ່ກຸງປັກກິ່ງວ່າ ການຈັດໃຫ້ນັກການທູດຕ່າງປະເທດເດີນທາງ
ໄປນະຄອນ Lassha ໃນເທື່ອນີ້ ແມ່ນເພື່ອໃຫ້ບັນດານັກການທູດເຫລົ່ານີ້ເບີ່ງເຫດການ
ໃນທິເບດຢ່າງມີຄວາມເປັນທັມ

ອົງດາໄລ ລາມາ ປະມຸກຊາວທິເບດພັດຖິ່ນ ຮ່ວມສວດມົນມີ່ນະຄອນຫລວງອິນເດັຽ ກຸງນິວເດລລີ ອຸທິດໃຫ້ແດ່ດວງວິນຍານຂອງຜູ້ປະທ້ວງໃນທິເບດ ທີ່ເສັຽຊີວິດຍ້ອນ ການປາບປາມຂອງເຈົ້າໜ້າທີ່ຈີນ (ພາບ: Reuters)

ສະຫະຣັດຮຽກຮ້ອງໃຫ້ເຈຣະຈາ
ສ່ວນປະທານາທິບໍດີອະເມຣິກັນ GWB ກໍໄດ້ອອກມາຮຽກຮ້ອງເມື່ອວານນີ້ ໃຫ້ຣັຖບານ
ປັກກິ່ງຈັດຄນະຜູ້ແທນພົບປະຫາລືກັບຄນະຜູ້ແທນຂອງຊາວທິເບດພັດຖິ່ນ ແລະໃຫ້ຝ່າຍ
ຈີນໃຊ້ຄວາມອົດກັ້ນໃນປັນຫາທິເບດ

ກ່ອນໜ້ານີ້ສອງວັນ ຜູ້ນຳອະເມຣິກັນກໍໄດ້ໂທຣະສັບເຖິງປະທານາທິບໍດີ ຫູ ຊິນທ່າວ ມາ
ກ່ອນແລ້ວ ອັນເປັນການຮຽກຮ້ອງໃນທຳນອງດຽວກັນກັບ ທ່ານ Kevin Rudd ນາຍົກ
ຣມຕ ຂອງປະເທດອົສຕຣາລີ ທີ່ຮັບຮູ້ອະທິປະໄຕຂອງ ສປ ຈີນ ໃນທິເບດ ແຕ່ກໍຢາກໃຫ້
ສປ ຈີນ ເຈຣະຈາກັບ ອົງດາໄລລາມາ ຫລືຄນະຕົວແທນຂອງເພີ່ນ

ອີກດ້ານໜຶ່ງ ເຈົ້າໜ້າທີ່ຕຳຣວດຂອງປະເທດ Grèce ກໍໄດ້ຮັບຄຳສັ່ງໃຫ້ວາງມາຕຣາ
ການຮັກສາຄວາມປອດໄພສຸດເຄັ່ງຄັດໃນນະຄອນຫລວງ Athènes ແລະບໍຣິເວນໃກ້ຄຽງ
ທີ່ທວນໄຟໂອແລມປິກຈະຜ່ານໃນມື້ນີ້ (ເສົາ 29 ມີນາ) ທັງນີ້ເພື່ອປ້ອງກັນການກໍ່ຄວາມວຸ້ນ
ວາຍຂັດຂວາງທີ່ອາດເປັນໄປໄດ້ໂດຍຂບວນການຊາວທິເບດພັດຖິ່ນແລະກຸ່ມສນັບສນຸນໃນ
ຕ່າງປະເທດ