ຄວ້ຳບາດ ໂອແລມປິກປັກກິ່ງ?

ທ່າທີຢຸດໆຢ່ອນໆ ຂອງປະຊາຄົມ ນາໆຊາດ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 29/03/2008 ແກ້ໄຂໃຫມ່ຫລ້າສຸດເມື່ອວັນທີ 29/03/2008 15:14 TU

ສນາມກິລາໂອແລມປິກປັກກິ່ງ ໃນຂນະຢູ່ ໃນການກໍ່ສ້າງ (ພາບ: Flickr.com)

ກ່ຽວກັບການອອກມາເອົາທ່າທີຂອງທ່ານ
ນາງ Benita Ferraro-Waldner ກັມ
ມາທິການສະຫະ ພາບເອີຣົບ ຝ່າຍພົວ
ພັນກັບຕ່າງປະເທດ ທີ່ຮຽກຮ້ອງໃຫ້ບັນ
ດາບໍຣິສັດຕ່າງປະເທດທີ່ລົງທຶນໃນ ສປ
ຈີນ ໃຫ້ເອົາຄວາມຮັບຜິດຊອບໃນປັນຫາ
ສິດທິມະນຸດຊົນ ເວົ້າງ່າຍໆ ກໍເຫັນໄດ້
ຈະແຈ້ງວ່າແມ່ນການເອົາທ່າທີແບບ
ສອງແງ່ສອງມຸມ ດ້ານໜຶ່ງທ່ານນາງ Benita Ferraro-Waldner ຈາກປະ
ເທດອົຕຣິສ ຫລື ອອສເຕຣັຽ ຕ້ອງການໃຫ້ບັນດາບໍຣິສັດຕ່າງປະເທດ ທີ່ລົງ
ທຶນໃນ ສປ ຈີນ ເອົາມາຕຣາການຖ້າການລະເມີດສິດທິມະນຸດໃນທິເບດຫາກ
ຮ້າຍແຮງກວ່ານີ້ ແຕ່ຈະເອົາມາຕຣາການແນວໃດ ເພີ່ນບໍ່ໄດ້ໃຫ້ລາຍລະອຽດ
ຄັກແນ່ແລະອີກດ້ານໜຶ່ງເພີ່ນກໍຮັບຮູ້ວ່າການຢຸດກິຈການທີ່ລົງທຶນໄປແລ້ວມະຫາ
ສານໃນສປ ຈີນ ນັ້ນ ແມ່ນເປັນໄປບໍ່ໄດ້

ສລຸບກໍຄືວ່າ ເປັນທ່າທີທີ່ຍັງບໍ່ຄັກບໍ່ແນ່ ບໍ່ແຈ້ງບໍ່ຂາວວ່າສະຫະພາບເອີຣົບຈະຄວ້ຳບາດ
ພິທີເປີດ ລືວ່າຄວ້ຳບາດການແຂ່ງຂັນໂອແລມປິກທັງໝົດ ໄດ້ແນວໃດ

ອີກປະການໜຶ່ງ ຕາມກົດເກນການປະຕິບັດຂອງສະຫະພາບເອີຣົບນັ້ນ ການທີ່ສະຫະພາບ
ທັງມວນຈະວາງນະໂຍບາຍທີ່ເປັນໜຶ່ງດຽວທາງດ້ານຕ່າງປະເທດໄດ້ ກໍຕໍ່ເມື່ອບັນດາປະ
ເທດສມາຊິກທັງໝົດ 27 ປະເທດ ມີສຽງທີ່ເປັນເອກສັນເທົ່ານັ້ນ ຖ້າບໍ່ເຊັ່ນນັ້ນກໍຈະ ບໍ່ສາ
ມາດຄວ້ຳບາດໃດໆໃນນາມຂອງສະຫະພາບໄດ້ ເວັ້ນເສັຽແຕ່ຈະເອົາທ່າທີໃຜມັນເທົ່ານັ້ນ

ຢ່າງໃດກໍຕາມ ການທີ່ສະຫະພາບເອີຣົບໄດ້ອອກມາສແດງທ່າທີເປັນຄັ້ງທຳອິດຄືແນວ
ນີ້ ກໍຖືໄດ້ວ່າເປັນການເອົ່າທ່າທີທີ່ໜັກແໜ້ນກວ່າເກົ່າ ຫລັງຈາກທີ່ບັນດາຜູ້ນຳຂອງ
ຫລາຍປະເທດເຊັ່ນ ຝຣັ່ງເສດ ອັງກິດ ໂປໂລຍ ແລະ ອື່ນໆ ໄດ້ອອກມາສແດງທ່າທີໃນ
ລັກສນະດຽວກັນ ແທນທີ່ວ່າຈະຈຳກັດການຮຽກຮ້ອງ ໃຫ້ ສປ ຈີນ ໃຊ້ຄວາມອົດກັ້ນແລະ
ສແດງຄວາມເປັນຫ່ວງເປັນໃຍໃນເຫດການທີ່ເກີດຂື້ນໃນທິເບດເທົ່ານັ້ນ ເວົ້າງ່າຍໆກໍຄື
ເປັນການເພີ້ມຄວາມກົດດັນຕໍ່ ສປ ຈີນ ຂື້ນອີກຣະດັບໜຶ່ງກ່ຽວກັບເຫດການການປະທ້ວງທີ່
ໄດ້ຮັບການປາບປາມຢ່າງນອງເລືອດໃນທິເບດ

ຍີ່ປຸ່ນບໍ່ເຫັນດີການຄວ້ຳບາດ

ເປັນທີ່ໜ້າສັງເກດວ່າ ໃນຂນະທີ່ໂລກຕະວັນຕົກພາກັນຂື້ນສຽງແດ່ນັ້ນ ທາງປະເທດຍີ່ປຸ່ນ
ກໍໄດ້ອອກມາສແດງທ່າທີໃນທຳນອງທີ່ວ່າບໍ່ເຫັນພ້ອມທີ່ຈະໃຫ້ມີການຄວ້ຳບາດກິລາໂອ
ແລມປິກຣະດູຮ້ອນ ທີ່ນະຄອນຫລວງປັກກິ່ງຈະເປັນເຈົ້າພາບລະຫວ່າງວັນທີ 8 ເຖິງ 24
ເດືອນສິງຫາໜ້າ

ທ່າທີຂອງປະເທດຍີ່ປຸ່ນດັ່ງກ່າວນີ້ ສແດງອອກໂດຍ ທ່ານ Yasuo Fukuda ນາຍົກ
ຣມຕ ເອງ ທີ່ກ່າວສແດງຄວາມກັງວົນໃຈວ່າ ພວກເຮົາຄວນຈະຕິຕຽນຈີນໃນເຣື່ອງສິດ
ທິມະນຸດ ຫລືວ່າຈະຄວ້ຳບາດ ຕ້ອງຄິດໃຫ້ດີ

ການສແດງອອກເຖິງຄວາມກັງວົນຂອງນາຍົກ ຣມຕ ຍີ່ປຸ່ນໃນຄັ້ງນີ້ ເປັນທີ່ເຂົ້າໃຈໄດ້
ຢ່າງດີທີ່ສຸດວ່າ ເປັນການສງວນທ່າທີຕໍ່ໜ້າຄວາມຣ້າຍແຮງຂອງເຫດການໃນຕທິເບດ
ໂດຍປະກາດຊັດເຈນວ່າ ຈະບໍ່ຄວ້ຳບາດໂອແລມປິກປັກກິ່ງແຕ່ຢ່າງໃດ

ເປັນທີ່ຮູ້ກັນດີແລ້ວວ່າ ນາຍົກ ຣມຕ ຍີ່ປຸ່ນຄົນໃໝ່ ທ່ານ Yusuo Fukuda ມີແນວນະໂຍ
ບາຍຈະ ແຈ້ງທີ່ຈະປັບປຸງການພົວພັນກັບ ສປ ຈີນ ໃຫ້ດີຂື້ນ ຫລັງຈາກທີ່ວ່າໄດ້ຊຸດໂຊມ
ລົງໜັກເຖິງຂັ້ນເຄັ່ງຕຶງຮ້າຍແຮງໃນຣະຍະຫລັງຫລາຍປີທີ່ຜ່ານມາ ອັນເນື່ອງມາກຈາກ
ເຫດການໃນຄັ້ງປວັດສາດທີ່ຝື້ນຕົວກັບຄືນມາຫລອກຫລອນໃໝ່ອີກ ອັນເນື່ອງມາຈາກໄປ
ຄາຣະວະສຸສານ Yasukuni ຂອງອດີດ ນາຍົກ ຣມຕ ຍີ່ປຸ່ນ ທ່ານ Koïzumi ຊຶ່ງຝ່າຍ
ສປ ຈີນຖືວ່າເປັນການໄປເຊີດຊູຄາຕກອນສົງຄາມ ທີ່ເຂັ່ນຂ້າຊາວຈີນໃນສມັຍສົງຄາມ
ໂລກຄັ້ງທີ່ສອງ ທັງນີ້ເພາະສຸສານ Yasukuni ມີສົບນາຍທະຫານ ຍີ່ປຸ່ນ ທີ່ຖືກຕັດສິນ
ເປັນອາຊຍາກອນສົງຄາມຝັງຮ່ວມນຳດ້ວຍ

ອີກປະການໜຶ່ງ ທ່ານປະທານາທິບໍດີ ຫູ ຊິນທ່າວ ຂອງ ຈີນ ກໍມີກຳໜົດຈະເດີນທາງຢ້ຽມ
ຢາມຍີ່ປຸ່ນຢ່າງເປັນທາງການໃນເດືອນພຶສພາໜ້າ ດັ່ງນັ້ນຈຶ່ງເປັນການຍາກທີ່ສຸດທີ່ປະ
ເທດຍີ່ປຸ່ນຈະສ້າງຄວາມບາດໝາງກັບຈີນຄືນໃໝ່ດ້ວຍການເອົາທ່າທີແຂງກ້າວກ່ຽວກັບ
ປັນຫາໃນທິເບດ ຫລັງຈາກທີ່ວ່າການພົວພັນລະຫວ່າງສອງປະເທດໄດ້ກະເຕື້ອງດີຂື້ນ
ຫລາຍແລ້ວຫລັງຈາກທີ່ ທ່ານ Junichiro Koïzumi ໄດ້ພົ້ນຈາກຕຳແໜ່ງນາຍົກ ຣມຕ

ສຣຸບກໍຄື ປະຊາຄົມນາໆຊາດ ຈົນຮອດມື້ນີ້ ຍັງຄົງມີທ່າທີແບບສອງແງ່ສອງມຸມຕໍ່ໄປຕໍ່ໜ້າ
ຄຳຖາມທີ່ວ່າ ຈະຄວ້ຳບາດໂອແລມປິກປັກກິ່ງຫລືບໍ່ ເຖິງແມ່ນວ່າຈະມີການຂື້ນສງແດ່ກໍ
ຕາມ