ຝລັ່ງ/ວັນແຫ່ງຄວາມຮັກ (ໂສວົງ)

ດອກຮັກແລະວັນກັມມະກອນ

ໂດຍ  ໂສວົງ

ບົດຄວາມນີ້ເຜີຍແຜ່ເມື່ອວັນທີ 01/05/2007 ແກ້ໄຂໃຫມ່ຫລ້າສຸດເມື່ອວັນທີ 01/05/2007 à 07:37 TU

ດອກຮັກຝລັ່ງ (muguet) ອອກ ໃນເດືອນພຶສພາ ເພື່ອມອບໃຫ້ ກັນໃນວັນທີ່ 1 ພຶສພາທຸກໆປີ
(ຮູບ : ໂສວົງ)

ແມ່ນແລ້ວ ວັນທີ່ 1 ພຶສພາ ຢູ່ປະເທດ ຝລັ່ງ ເພິ່ນຖືເປັນມື້ແຫ່ງຄວາມຮັກ ຮັກ ລະຫວ່າງເພດ ຮັກລະຫວ່າງບ່າວສາວ ລະຫວ່າງຄູ່ຊີວິດທຸກເພດວັຍ ແລະອື່ນໆ ອີກ ເຊິ່ງເປັນປະເພນີສືບທອດກັນມາ ຕັ້ງແຕ່ 400 ປີແລ້ວ ໃນການມອບດອກ ຮັກໃຫ້ກັນ ຝລັ່ງເອີ້ນວ່າ ດອກ muguet

ດອກຮັກຂອງລາວກໍຈູມຄ້າຍໆຄືກັນ ຕ່າງແຕ່ກົກດອກຮັກລາວນັ້ນໃຫຍ່ເປັນຟຸ່ມບໍ່ສູງ ທໍ່ໃດ ມີໃບ ຫຼືກ້ານມັນອອກຢາງໜຽວໆສີຂາວ ກົກດອກຮັກລາວມີໃບໃຫຍ່ລັກສນະ ຫູຊ້າງ ສີໝົ່ນ ດອກຂອງມັນກໍມີລັກສນະຈູມເປັນກີບ (ສີ່ກີບ) ທາງລາວຊົນນະບົດ ມັກເກັບໄປບູຊາ ບໍ່ຄ່ອຍມັກນຳໄປມອບໃຫ້ຄູ່ຮັກປານໃດ ເພາະນິຍົມດອກຈຳປາຫຼາຍ ກວ່າດອກຮັກແຄມຮົ້ວ ເພາະຢູ່ບ້ານນອກນັ້ນ ຕົ້ນດອກຮັກມັກເກີດຢູ່ແຄມຮົ້ວບ້ານ ກາຍເປັນຮົ້ວບ້ານໄປເລີຍ

ສ່ວນດອກຈຳປານັ້ນ ກໍມີຈຳປາແດງ ຈຳປາຂາວ ຈຳປາຫຼາກສີ ທາງບ້ານນອກ ບ່າວ ສາວນິຍົມກັນມອບດອກຈຳປາເພື່ອຄວາມຮັກ ເພື່ອຄວາມສົນໃຈເຊິ່ງກັນແລະກັນໃນ ຄວາມຮັກ ນອກນັ້ນ ຜູ້ສາວກໍຍັງມັກປັກດອກຈຳປາ ຫຼືດອກຮັກໃສ່ເກົ້າຜົມ ຫຼືຮ້ອຍ ເປັນຮວດຍາວໆກ້ຽວໃສ່ເກົ້າຜົມ ນອກນັ້ນກໍຍັງນຳເອົາຮວດດອກຮັກມາຂາຍຕາມທ້ອງ ຕລາດໃນສມັຍປັດຈຸບັນ

ບັດນີ້ກ້ຽວມາຫາດອກຮັກຝລັ່ງ ເຊິ່ງນິຍົມກັນປີລະເທື່ອ ເພື່ອນຳໄປມອບໃຫ້ຄູ່ຮັກຄູ່ ແພງ ໂດຍບໍ່ວ່າ ເຖົ້າ ແລະໜຸ່ມ ຕ່າງກໍພາກັນຊື້ດອກຮັກນີ້ມາຕ້ອນກັນ ໃນສມັຍການ ຄ້າເປັນເອກປັດຈຸບັນ ສ່ວນຫຼາຍແມ່ນຊາວຄ້າຂາຍເປັນຜູ້ເໝົາຕລາດຂນາດໃຫຍ່ ມາ ລັກສນະອຸດສາຫະກັມຈຳໜ່າຍດອກຮັກທົ່ວປະເທດ ທົ່ວໂລກອີກດ້ວຍ

ດອກຮັກຝລັ່ງບໍ່ເປັນຕົ້ນເປັນກົກ ແຕ່ເກີດແກມຫຍ້າ ມີໃບຍາວໆສີຂຽວ ບໍ່ພົ້ນຟຸ່ມຫຍ້າ ບໍ່ສູງປານໃດ ສລູບແລ້ວກໍແມ່ນຫຍ້າຊນິດນຶ່ງ ດັ່ງດຽວກັບດອກຫຍ້າຊນິດອື່ນໆ ມັນບໍ່ ເກີດເປັນຟຸ່ມ ແຕ່ເກີດເປັນຕິ່ງໃຜຕິ່ງມັນຕາມທັມມະຊາດ

ແຕ່ໃນປັດຈຸບັນນີ້ ກໍມີນັກລົງທຶນປູກຢ່າງກວ້າງຂວາງດັ່ງກ່າວແລ້ວອັນເຮັດໃຫ້ໄທເຮືອນ ທີ່ເຄີຍນຳເອົາດອກຮັກມາຂາຍຕາມແຄມຫົນທາງພາກັນຂາດລາຍໄດ້ປະຈຳຄອບຄົວ ເພາະແຂ່ງລາຍໃຫຍ່ບໍ່ໄດ້ ແຕ່ກ່ອນເປັນປະເພນີພາຍໃນຄອບຄົວ ແຕ່ບັດນີ້ ກາຍເປັນ ທຸຣະກິດແຂ່ງກັນ ຈົນຜິດຖຽງກັນກໍມີຍ້ອນຍາດສະຖານທີ່ຈຳໜ່າຍ ເຊົ່ນວ່າ ພວກທີ່ໄປ ຫາເກັບດອກຮັກຕາມປ່າຖືກຫ້າມບໍ່ໃຫ້ໄປຂາຍໃກ້ຕລາດດອກຮັກທີ່ໄດ້ຮັບອະນຸຍາດ

ດອກຮັກຝລັ່ງ(muguet) ເຊິ່ງເພິ່ນປູກໄດ້ສາມປີ ກໍຕ້ອງນຳອອກຈຳໜ່າຍໃຫ້ທັນກັບ ມື້ວັນທີ່ 1 ພຶສພາ ສຳລັບປີ 2007 ເພາະວ່າ ພໍດີໃຊ້ໄດ້ ພາຍໃນສີ່ ຫາ ຫ້າມື້ ຊາວ ຄ້າດອກຮັກດັ່ງກ່າວສາມາດເກັບກ່ຽວກວ່າ 45 ລ້ານດອກ ສຳລັບຢູ່ເຂດເມືອງນັງ (Nantes) ເຊິ່ງມີຢູ່ 85% ຈາກຜົນຜລິດລະດັບຊາດ ນອກຈາກເຂດນີ້ ກໍຍັງມີເຂດ ເມືອງບອກໂດ (Bordeaux) ທີ່ມາອັນດັບສອງ ງ່າດອກຮັກທີ່ຖືກນຳອອກຈຳໜ່າຍໄດ້ ກໍຕ້ອງສູງ 25 - 30 ຊັງຕີແມດ ໃນປີ 2006 ຜ່ານມາ ສິນຄ້າດອກຮັກ ໃຫ້ລາຍໄດ້ 12 ລ້ານເອີໂຣ ເປັນອັນວ່າ ຢຽບຢ່ຳປະເພນີໄທບ້ານທີ່ເຄີຍເກັບດອກຮັກຕາມປ່າມາ ຢືນຂາຍແຄມທາງ ເພື່ອລາຍໄດ້ເລັກໆນ້ອຍໆ

ດອກຮັກຝລັ່ງ (muguet) ມີຄວາມເປັນມາແນວໃດ ເປັນດອກໄມ້ທີ່ນຳມາຈາກປະເທດ ຍີ່ປຸ່ນ ໃນສມັຍສັຕວັດທີ່ 14 ໂດຍລື້ງເຄີຍກັບອາກາດເອີໂຣບຕັ້ງແຕ່ສມັຍນັ້ນມາ ເຈົ້າຊີວິດຝລັ່ງ ຊາກອົງທີ່ 9 (Charles IX) ເປັນຜູ້ສົ່ງເສີມດອກຮັກນີ້ ໂດຍພາປະຕິ ບັດປະເພນີຢື່ນມອບດອກດັ່ງກ່າວໃນວັນທີ່ 1 ພຶສພາ 1561 ເພາະວ່າ ຫຼັງຈາກພຣະ ອົງໄດ້ຮັບການຖວາຍດອກຮັກຄັ້ງຕຳອິດ ເພື່ອເປັນຂອງຄ້ຳຄູນ ກໍເລີຍໃຫ້ມີການນຳ ຖວາຍແຕ່ລະປີບໍ່ໄດ້ຂາດ

ຕໍ່ມາໄລຍະນຶ່ງ ກໍຕົກຢູ່ໃນຄວາມຫຼົງລືມ ໃນເມື່ອວັນກັມມະກອນໄດ້ຖືກຕັ້ງຂຶ້ນຢູ່ປະ ເທດຝລັ່ງໃນວັນທີ່ 1/5/1890 ຜູ້ຄົນຫັນໄປສົນໃຈນຳພິທີສລອງວັນກັມມະກອນຢ່າງ ກວ້າງຂວາງ ກໍພາກັນປະລະຮີດດອກຮັກ ແລ້ວພາກັນໃຊ້ຮູບສາມຫຼ່ຽມແດງເປັນສັນ ຍະລັກ ຕໍ່ມາກໍຖືດອກກຸຫຼາບຊນິດນຶ່ງ ແລ້ວຕໍ່ມາໃນປີ 1907 ກໍພາກັນກັບຄືນມາຖື ດອກຮັກທຸກປີ ຈົນຮອດດຽວນີ້