ເຮືອນສາມ ນ້ຳສີ່ : ວັທນະທັມລາວ ທີ່ສອນໃຫ້ຜູ່ຍິງລາວ ຮູ້ຈັກໜ້າທີ່ຂອງຕົນ

ເປັນຍິງທີ່ດີເລີດລ້ຳ

ໂດຍ  ສິຣິ

ບົດຄວາມນີ້ເຜີຍແຜ່ເມື່ອວັນທີ 09/10/2007 ແກ້ໄຂໃຫມ່ຫລ້າສຸດເມື່ອວັນທີ 09/10/2007 15:01 TU

ເຮືອນສາມ ນ້ຳສີ

'' ຍິງໃດສົມບູນໄດ້ດ້ວຍເຮືອນສາມນ້ຳສີ່
ເປັນຍິງທີ່ດີເລີດລ້ຳ ສົມ ຄວນແທ້ແມ່ເຈົ້າເຮືອນ '' 

ໃນ ສມັຍບູຮານນະການ ຮິດຄອງ ປະເພນີຂອງລາວແມ່ນມີຄຳແນະນຳ
ສຕຣີຜູ່ເປັນລູກ ຫລານໃຫ້ຮູ້ຈັກ ຮັກສາ ໜ້າທີ່ຂອງຜູ່ຍິງທີ່ຄວນມີໄວ້
ໃນພາຣະກິດປະຈຳວັນ ຂອງຕົນ ອັນຄຳວ່າເຮືອນ ສາມນ້ຳສີ່ໄດ້ແກ່ :

ເຮືອນຄົວ
ແນ່ນອນ ເຮືອນຄົວນັ້ນກໍເປັນບ່ອນທີ່ມີໄວ້ສຳຫລັຼບປຸງແຕ່ງອາຫານ
ການກີນ ດັ່ງນັ້ນ ຜູ່ເປັນແມ່ບ້ານຈຶ່ງຕ້ອງມີໜ້າທີ່ຮັກສາ ທຳຄວາມ ສອາດປັດກວາດໃຫ້ມັນສອາດເປົ່າ ແປ້ນ ເປັນລະບຽບຮຽບຮ້ອຍ
ເພື່ອອະນາມັຍ

ເຮືອນນອນ
ກໍແມ່ນສຖານທີ່ ພັກຜ່ອນ ຫລັບນອນ ແລະເປັນທີ່ສ້າງຄວາມໜ້າຢູ່
ມີຄວາມຮົ່ມເຍັນ ແກ່ຜູ່ທີ່ມາຂໍພຶ່ງພາອາສັຍ ເປັນລະບຽບໃນການ
ມ້ຽນເຊັດຖູ ເກັບຜ້າແພພັນເຄື່ອງນຸ່ງຫົ່ມ ໃຫ້ເປັນທີ່ສະອາດຫູ
ສະອາດຕາຜູ່ພົບເຫັນ

ເຮຶອນຜົມ
ສຕຣີລາວໃນຍຸກບູຮານນະການແມ່ນມັກຮັກສາ ໄວ້ຜົມຍາວດຳສນິດ
ເອົາໄວ້ເກົ້າເປັນມວຍ ງາມ ສນັ້ນ ນາງຈຶ່ງຕ້ອງຮູ້ຈັກ ຮັກສາຜົມທີ່
ຍາວດຳ ໃຫ້ ມັນສອາດ ໃຫ້ມັນຖືກຫວີ ຈົບງາມ ພາໃຫ້ ຜູ່ພົບ ຮູ້ສຶກ
ສະອອນຕາ ເມື່ອຫາກໄດ້ຊົມ ເບີ່ງ ເກົ້າຜົມດຳ ເປັນເງົາງາມອັນ
ພາໃຫ້ ເຊີດຊູ ບຸຄລິກ ບໍ່ແມ່ນ ຈະ ປະປ່ອຍໃຫ້ມັນ ຫຍູ້ງເຫຍີງຂາດ
ການເອົາໃຈໃສ່

ນໍ້າ 4

ນໍ້າ 1

ໃນຄຳສັ່ງສອນຂອງຄົນບູຮານນັ້ນ ແມ່ນ ນໍ້າອາບ ສົງຄົນໃນບ້ານ ເພາະ
ຕ້ອງມາ ໄວ້ບໍ່ໃຫ້ອຶດຢາກ ເພິ່ນເວົ້າວ່າ ຢ່າໃຫ້ ໄຫໃນບ້ານ ຂາດແຫ້ງ 
ຢ່າໃຫ້ແອ່ງຂາດກ້ຽງ ຊາວບ້ານຊິກ່າວຂວັນ ລະເດີ

ນໍ້າ 2

ກໍແມ່ນ ນໍ້າສະອາດບໍລິສຸດ ເອົາໄວ້ດື່ມກີນ ຕັກນໍ້າກີນໃສ່ອຸໄວ້ ໜ້າຂັ້ນໃດ
ເຮືອນ ເພື່ອຜູ່ໃດຜ່ານມາ ຈະໄດ້ ແວະເຊົາ ກີນນໍ້າໃສສະອາດ ໃນອຸ ໄດ້
ແລະ ກໍແມ່ນສຳລັບຄົນໃນເຮືອນກໍເຊັ່ນກັນ ດັ່ງນັ້ນ ບູຮານເພີ່ນຈຶ່ງສັ່ງສອນ
ວ່າ ຢ່າໃຫ້ແມງງ່ອງແງ່ງລົງຫລີ້ນນໍ້າແອ່ງກີນ ຢ່າໃຫ້ມີຂີ້ໝີ່ນມ້ຽງສນິມ
ໄຄໃຕ້ກົ້ນແອ່ງ ຢ່າໃຫ້ນໍ້າຂອດແຫ້ງ ແລງເຊົ້າໃຫ້ເຈົ້າເກື່ອຍຂົນເດີ ອັນນີ້
ກໍ ແມ່ນອີກວ່າ ຜູ່ໃດ ຫີວນໍ້າຍາມໃດ ແມ່ນກີນໄດ້ທຸກຍາມ

ນໍ້າ 3

ໄດ້ແກ່ນໍ້າ ທີ່ຄວນໃສ່ໃນເຕົ້າປູນ ຜູ່ໃດເປັນແມ່ເຮືອນ ກໍຕ້ອງຮັກສານໍ້າໃນ
ກະບອກປູນ ຢ່າໃຫ້ມັນແຫ້ງເລີຍ ເພາະເມື່ອຫາກມີແຂກ ມາຢ້ຽມຢາມ ກໍ
ແມ່ນວ່າ ໄດ້ ເອົາຂັນໝາກ ຂັນພູ ສູ່ແຂກ ຜູ່ມາເຢືອນຖາມຂ່າວ ຄາວສຸກ
ທຸກຕາມ ອັທຍາສັຍອັນຈົບງາມ ຂອງຊາວລາວແຕ່ບູຮານ


ນໍ້າ 4

ອັນນີ້ໝາຍເຖີງ ນໍ້າຈິດ ນໍ້າໃຈ ຂອງເຈົ້າແມ່ເຮືອນ ໂດຍຄວນເປັນຄົນໃຈ
ກວ້າງ ເພື່ອແຜ່ ແກ່ ຍາຕິພີ່ນ້ອງ ຂອງຝ່າຍສາມີ ແລະຝ່າຍຕົນ ໃຫ້ມັນ
ສເມີພາບລະວ່າງກັນ ເຊັ່ນວ່າ ຢ່າໄດ້ມີຄຳຂົມ ຕໍ່ໃຜພໍນ້ອຍ ຢ່າໄດ້ຄອຍ
ຫາຂໍ້ງໍແງຮ້ອຍແງ່ ຄຽດຂໍ້ລໍ້ ແຂ່ແຫລ້ ແນວນີ້ ມັນບໍ່ດີນໍ ຂໍໃຫ້ ແມ່ເຮືອນ
ເຈົ້າເຮັດຕາມບູຮານເກົ່າ ຈຶ່ງຊິມີຂື້ນໄດ້ ຄວາມໄຮ້ແມ່ນ ໜີໄກພຸ້ນແລ້ວ

ເຮືອນ 3 ນໍ້າ 4 ເປັນຄຳສັ່ງສອນບູຮານ ໃຫ້ ຄົນຮຸ້ນໃຫມ່ ນຳໄປຮິ່ນຕອງ
ແລະ ສາມາດ ປະຕິບັດໄດ້ ຕາມການປັບຕົວເອງໃຫ້ເຂົ້າ ກັບຍຸກໂລກາ
ພິວັຕ ເພື່ອ ສຸຂພາບ ແລະ ອະນາມັຍ ແລະ ສືບຕໍ່ ກິຣິຍາອັນໜ້າພູມໃຈ
ຂອງຄວາມມີມາຣະຍາດດີ ກິຣິຍາຄ່ອງ ຂອງ ຜູ່ຍິງລາວ

ຈາກປື້ມ ຄຳບູຮານ ແດ່ ຍຸວະຊົນ ຮຸ້ນໃຫມ່
ໂດຍອາຈານ ຈັນທ໌ ອິນທຸພິລາດ