ຝຣັ່ງເສດ / ນັດຢຸດງານມື້ທີສີ່ ການເຈຣະຈາ ກັມມະບານ-ຣັຖບານ ຢຸດຊະງັກ

ການຂົນສົ່ງຍັງຄົງ ຍາກລຳບາກຕໍ່ໄປ ໃນທົ່ວປະເທດ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 17/11/2007 ແກ້ໄຂໃຫມ່ຫລ້າສຸດເມື່ອວັນທີ 17/11/2007 13:21 TU

ການນັດຢຸດງານປະທ້ວງໃນວົງການ ຂົນສົ່ງມວນຊົນສືບຕໍ່ເປັນມື້ທີສີ່ ການ ເຈຣະຈາລະຫວ່າງຣັຖບານແລະກັມ ບານຢຸດຊະງັກ (ພາບ: AFP)

ການນັດຢຸດງານປະທ້ວງໃນວົງການຂົນ ສົ່ງມວນຊົນສືບຕໍ່ເປັນມື້ທີສີ່ແລ້ວໃນມື້ນີ້ ແລະຈະດຳເນີນຕໍ່ໄປຈົນເຖິງວັນຈັນໜ້າ ຕາມການລົງມະຕິຂອງອົງການຈັດຕັ້ງ ກັມມະບານ 6 ອົງການດ້ວຍກັນເພື່ອ ຄັດຄ້ານແຜນປະຕິຮູບລະບົບບຳນານພິ ເສດ ທີ່ສເນີໂດຍຣັຖບານ ທຳໃຫ້ການ ຂົນສົ່ງມວນຊົນຕິດຂັດໃນທົ່ວປະເທດ ໂດຍສເພາະທີ່ນະຄອນຫລວງປາຣີສ ແລະເຂດຊານເມືອງ ໃນຂນະທີ່ການ ເຈຣະຈາລະຫວ່າງຣັຖບານແລະບັນດາ ອົງການຈັດຕັ້ງກັມມະບານຕ່າງກໍໄດ້ຢຸດຊະງັກ

ການສັນຈອນຕິດຂັດ
ຣົດໄຟຄວາມໄວສູງ TGV ມີພຽງ 180 ຖ້ຽວເທົ່ານັ້ນໃນມື້ນີ້ (ເສົາ 17 ພະຈິກ) ເມື່ອວານ
ນີ້ມີ 250 ຖ້ຽວ (ໃນພາວະປົກຕິມີ 700 ຖ້ຽວ)  ຣົດໄຟປະເພດ Corail ມີພຽງ 40 ຖ້ຽວ
ເມື່ອວານນີ້ມີ  60 ຖ້ຽວ (ໃນພາວະປົກຕິມີ 300)

ທີ່ສຖານີຣົດໄຟ Gare St. Lazare ນະຄອນຫລວງປາຣີສ ມີຣົດໄຟບໍຣິການພຽງ 1/3
ເທົ່ານັ້ນ.....ທີ່ Gare de l'Est ມີພຽງຄັນດຽວຕໍ່ຊົ່ວໂມງ

ສ່ວນຣົດໄຟໃຕ້ດິນສາຍ 1 ກໍມີພຽງ 1/3 ໃນຂນະທີ່ສາຍອື່ນໆມີ 1 ໃນ 5 ຍົກເວັ້ນສາຍ
14 ເທົ່ານັ້ນທີ່ຍັງຄົງບໍຣິການຕາມປົກຕິອັນເນື່ອງມາຈາກໃຊ້ລະບົບອັຕໂນມັດ ສ່ວນຣົດ
ເມແລະຣົດລາງກໍມີບໍຣິການພຽງ 40%

ຜູ້ຮ່ວມຢຸດງານນ້ອຍລົງ
ຢ່າງໃດກໍຕາມ ເມື່ອວານນີ້ບັນດາພນັກງານຂອງຣັຖວິສາຫະກິດ RATP ແລະ
SNCF ທີ່ຮ່ວມການປະທ້ວງມີຈຳນວນລົດລົງ ຄືມີພຽງແຕ່ 23,3% ເທົ່ານັ້ນ ໄດ້ເຂົ້າ
ຮ່ວມໃນການນັດຢຸດງານເມື່ອວັນພະຫັດມີເຖິງ 27,2% ແລະເມື່ອວັນພຸດ 44%

ການເຈຣະຈາຢຸດຊະງັກ
ບັນດາກັມມະບານທີ່ນຳພາໃນການນັດຢຸດງານຄັ້ງນີ້ ບໍ່ຍອມຮັບຕໍ່ຂໍ້ສເນອຂອງຣັຖບານ
ໃຫ້ເພີ້ມປີການຈາກ 37 ປີເຄິ່ງ ໄປເປັນ 40 ປີໃນຂັ້ນທຳອິດ ແລະ 41 ປີໃນຂັ້ນຕໍ່ໄປ
ກ່ອນທີ່ຈະສາມາດອອກກິນເບັ້ຽບຳນານໄດ້ເຕັມອັຕຣາ

ນອກຈາກນີ້ກັມມະບານກໍຍັງປິຕິເສດລະບົບ Surcote ແລະ Décote ອີກດ້ວຍ ລະບົບ
ດັ່ງກ່າວກໍຄື ພນັກງານໃດມີປີການບໍ່ພຽງພໍ ແຕ່ຕ້ອງອອກກິນເບັ້ຽບຳນານເພາະອາຍຸ
ເຖິງແລ້ວ ຈະບໍ່ໄດ້ຮັບເບັ້ຽບຳນານເຕັມອັຕຣາ ແຕ່ຖ້າພນັກງານຜູ້ໃດມີປີການເກີນຫລື
ວ່າຫລາຍໂພດຍ້ອນເຮັດການມາແຕ່ອາຍຸຍັງນ້ອຍ ຈະໄດ້ຮັບເບັ້ຽບຳນານເກີນອັຕຣາ

ນອກຈາກນີ້ກໍຍັງປະຕິເສດການຂື້ນເງີນເບັ້ຽບຳນານຕາມການຂື້ນຂອງຣາຄາສິນຄ້າ
ດ້ວຍໝາຍຄວາມວ່າຖ້າເງິນເຟີ້ມີນ້ອຍກໍຂື້ນນ້ອຍ ເງິນເຟີ້ມີຫລາຍກໍຂື້ນຫລາຍ ແຕ່ກັມ
ມະບານຕ້ອງການໃຫ້ຂື້ນໂດຍອັຕໂນມັດ ບໍ່ວ່າເງິນເຟີ້ຈະເປັນແນວໃດກໍຕາມ ເງີນເຟີ້
ໃນປະທດຝຣັ່ງເສດໃນຣະຍະຫລາຍປີຜ່ານມາຢູ່ໃນຣະດັບຕ່ຳ