ໄຂ້ຫວັດສັດປີກ H5N1

ມນຸດຜູ້ທີສອງ ເສັຽຊີວິດໃນລາວ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 20/03/2007 ແກ້ໄຂໃຫມ່ຫລ້າສຸດເມື່ອວັນທີ 20/03/2007 à 12:39 TU

ເປັນການຢືນຢັນແນ່ນອນແລ້ວວ່າຍິງອາຍຸ 42 ປີ ຈາກເມືອງໂພນໂຮງ ທີ່ເສັຽ
ຊີວິດເມື່ອວັນທີ 4 ມີນາຜ່ານມາທີ່ໂຮງພຍາບານໄຊເຊດຖານະຄອນວຽງຈັນນັ້ນ
ແມ່ນເສັຽຊີວິດຍ້ອນເຊື້ອໂຣກ ໄຂ້ຫວັດສັດປີກປະເພດ H5N1 ຊຶ່ງເປັນປະເພດ
ທີ່ຮ້າຍແຮງທີ່ສຸດ

ແມ່ນກະຊວງສາທາຣະນະສຸກຂອງລາວແລະອົງການອະນາມັຍໂລກເປັນຜູ້ໃຫ້ການຢືນຢັນ
ຂ່າວດັ່ງກ່າວໃນຖແລງການຮ່ວມທີ່ເຜີຍແຜ່ອອກເມື່ອວັນສຸກ ທີ 16 ມີນາທີ່ຜ່ານມາຫລັງ
ຈາກທີ່ໄດ້ນຳເອົາຕົວຢ່າງຂອງເຊື້ອໂຣກໄປກວດສອບໃນຫ້ອງທົດລອງທີ່ປະເທດຍີ່ປຸ່ນ

ເມື່ອຕອນເສັຽຊີວິດໃໝ່ໆ ເປັນພຽງແຕ່ການສົງໃສເທົ່ານັ້ນວ່າຍິງອາຍຸ 42 ປີຜູ້ນີ້ອາດ
ຕິດເຊື້ອ H5N1 ທັງນີ້ເພາະຈາກການນຳເອົາຕົວຢ່າງໄປກວດສອບໃນຂັ້ນຕົ້ນໄດ້ພົບພຽງ
ແຕ່ເຊື້ອ H5 ເທົ່ານັ້ນ

ນັບເປັນການເສັຽຊີວິດຂອງມນຸດຜູ້ທີສອງແລ້ວໃນລາວທີ່ໄດ້ຮັບການຢືນຢັນວ່າຍ້ອນການຕິດ
ເຊື້ອ H5N1 ນີ້ ກ່ອນໜ້ານີ້ການເສັຽຊີວິດຂອງເດັກນ້ອຍຜູ້ຍິງອາຍຸ 15 ປີເມື່ອວັນທີ 8
ມີນາທີ່ໂຮງພຍາບານເມືອງໜອງຄາຍ ປະເທດໄທຍນັ້ນ ໄດ້ຮັບການຢືນຢັນມາກ່ອນແລ້ວ
ເປັນລາຍທຳອິດ ເຖິງນາງນ້ອຍຜູ້ນີ້ເສັຽຊີວິດຫລັງຍິງອາຍຸ 42 ປີ ກໍຕາມ ເດັກຍິງມີພູມລຳ
ເນົາທີ່ເມືອງສີສັຕນາກ ເຂດກຳແພງນະຄອນວຽງຈັນ ໄດ້ຮັບການນຳສົ່ງໄປປິ່ນປົວທີ່ໂຮງ
ພຍາບານເມືອງໜອງຄາຍຕັ້ງແຕ່ເດືອນກຸມພາຫລັງຈາກທີ່ອາການຢູ່ໃນຂັ້ນໜັກແລ້ວ
ແລະໄດ້ເສັຽຊີວິດທີ່ນັ້ນ

ການແຜ່ລະບາດຂອງເຊື້ອໄຂ້ຫວັດສັດປີກໃນ ສປປ ລາວ ໄດ້ມີຂຶ້ນຄືນໃໝ່ຕັ້ງແຕ່ເດືອນ
ມັງກອນປີນີ້ຫລັງຈາກທີ່ໄດ້ງຽບສງົບລົງເປັນເວລາເຖິງ 7 ເດືອນ ໂດຍສເພາະການລະ
ບາດຄືນໃໝ່ນີ້ເລີ້ມຕົ້ນທີ່ນະຄອນວຽງຈັນ ກ່ອນທີ່ຈະແຜ່ລະບາດຕື່ມອີກທີ່ແຂວງສວັນນະ
ເຂດແລະຈຳປາສັກ

ວາງມາຕຣາການປ້ອງກັນເຂັ້ມງວດ

ຕາມການລາຍງານຂອງບັນດາສື່ມວນຊົນຂອງລາວນັ້ນ ນັບຕັ້ງແຕ່ວັນທີ 12 ມີນາເປັນຕົ້ນ
ມາ ທາງການກຳແພງນະຄອນວຽງຈັນໄດ້ປະກາດວາງມາຕຣາການເຂັ້ມງວດເພື່ອປ້ອງ
ກັນການຂຍາຍຕົວຂອງການແຜ່ລະບາດ ໂດຍຈະນຳໃຊ້ມາຕຣາການທາງກົດໝາຍຕໍ່ເຈົ້າ
ຂອງຟາຣ໌ມຜູ້ທີ່ດື້ດຶງບໍ່ຍອມປະຕິບັດຕາມວິທີປ້ອງກັນຂອງທາງການ

ການປະກາດມາຕຣາການຂັ້ນເດັດຂາດນີ້ມີຂຶ້ນຫລັງຈາກທີ່ທາງເຈົ້າໜ້າທີ່ໄດ້ພົບພໍ້ກັບອຸປ
ສັກ ຍ້ອນເຈົ້າຂອງຟາຣ໌ມຈຳນວນໜຶ່ງໄດ້ເຄື່ອນຍ້າຍນຳເອົາສັດປີກຂອງຕົນໄປຊຸກເຊື່ອງ
ເພື່ອຫລີກເວັ້ນການທຳລາຍຂອງເຈົ້າໜ້າທີ່

"ການປະຕິເສດ ບໍ່ຍອມໃຫ້ການຮ່ວມມືກັບເຈົ້າໜ້າທີ່ເທົ່າກັບການເຮັດຫູໜວກກິນຟານຕໍ່ໄພ
ອັນຕຣາຍ ທີ່ຈະມີຕໍ່ຜູ້ອື່ນໃນບຣິເວນໃກ້ຄຽງ ແລະການເຮັດຫູໜວກກິນຟານແນວນັ້ນຖືວ່າມີ
ຄວາມຜິດ" ທ່ານຣາຊນິວົງ ອັມມະຣາທິທາດາ ຫົວໜ້າກະສິກັມແລະປ່າໄມ້ໄດ້ກ່າວ ຕາມ
ການລາຍງານຂອງສື່ມວນຊົນລາວ

ປະກາດເຂດເຫລືອງແດງ

ນັບຕັ້ງແຕ່ໄດ້ເກີດການແຜ່ລະບາດຄັ້ງໃໝ່ຂອງເຊື້ອໄວຣັສໄຂ້ຫວັດສັດປີກເມື່ອເດືອນມັງ
ກອນທີ່ຜ່ານມາ ທາງການລາວໄດ້ດຳເນີນການອອກທຳລາຍສັດປີກຢ່າງເປັນຂັ້ນຕອນມາ
ເລື້ອຍໆ ເລີ້ມຕົ້ນຈາກ 23 ໝູ່ບ້ານໃນເຂດເມືອງສີສັຕນາກແລະເຂດເມືອງສີໂຄຕບອງ
ກຳແພງນະ ຄອນວຽງຈັນ ແລະມີການຂຍາຍສືບຕໍ່ການທຳລາຍອອກໄປເລື້ອຍໆຈົນກວ່າ
ຈະຄົບຖ້ວນທັງໝົດ 211 ໝູ່ບ້ານເຖິງແມ່ນວ່າໃນຈຳນວນນີ້ບາງໝູ່ບ້ານຍັງບໍ່ທັນມີການ
ແຜ່ລະບາດກໍຕາມ

ນອກຈາກນີ້ເຈົ້າໜ້າທີ່ຍັງໄດ້ປະກາດໃຫ້ເປັນເຂດການແຜ່ລະບາດເປັນ "ເຂດແດງ" ແລະ
ເຂດການຕິດຕາມເຝົ້າລະວັງເປັນ "ເຂດເຫລືອງ"

ໃນການອອກປະຕິບັດງານທຳລາຍສັດປີກຂອງຄນະເຈົ້າໜ້າທີ່ ທີ່ປະກອບໄປດ້ວຍສັຕວະ
ແພດ ເຈົ້າໜ້າທີ່ໝູ່ບ້ານ ແລະ ເຈົ້າໜ້າທີ່ຕຳຣວດນັ້ນ ໃນຫລາຍທ້ອງທີ່ກໍໄດ້ຮັບການ
ຮ່ວມໄມ້ຮ່ວມມືເປັນຢ່າງດີ ໂດຍເຈົ້າຂອງຟາຣ໌ມໄດ້ແຈ້ງຈຳນວນສັດປີກຂອງຕົນໃຫ້ເຈົ້າ
ໜ້າທີ່ຊາບແລະນຳມອບໃຫ້ເຈົ້າໜ້າທີ່ດຳເນີນການກຳຈັດຖິ້ມດ້ວຍຄວາມຈິງໃຈແລະເຕັມໃຈ

ແຕ່ກໍຍັງມີເຈົ້າຂອງຟາຣ໌ມຈຳນວນໜຶ່ງທີ່ບໍ່ໃຫ້ຄວາມຮ່ວມມືດ້ວຍການຊຸກເຊື່ອງສັດປີກຂອງ
ຕົນ ຫລືບໍ່ກໍປ່ອຍໃຫ້ອອກຈາກຄອກໄປກ່ອນທີ່ເຈົ້າໜ້າທີ່ຈະເດີນທາງມາເຖິງ "ເປັນເຣື່ອງ
ຮ້າຍແຮງທີ່ກ່ຽວກັບຄວາມເປັນຄວາມຕາຍ ຖ້າພວກເຮົາດຳເນີນການບໍ່ໄດ້ ການລະບາດ
ຂອງເຊື້້ອໂຣກກໍຈະແຜ່ຂຍາຍ ເພາະສະນັ້ນພວກເຮົາຈຶ່ງຈະເຈຣະຈາໂດຍດີເສັຽກ່ອນກັບ
ເຈົ້າຂອງຟາຣ໌ມຕ່າງໆ ແຕ່ຖ້າຍັງມີການດື້ດຶງຢູ່ຈຶ່ງຈະມີການດຳເນີນການທາງກົດໝາຍ"
ທ່ານຣາຊນິວົງໄດ້ກ່າວຕໍ່ຜູ້ສື່ຂ່າວ

ຕາມການລາຍງານຂອງສື່ມວນຊົນລາວນັ້ນ ເຂດທີ່ລະບາດຫລາຍທີ່ສຸດໃນກຳແພງນະ
ຄອນວຽງຈັນແມ່ນທີ່ບ້ານໂພນຕ້ອງທີ່ຖືກປະກາດເປັນ "ເຂດແດງ" ເຈົ້າໜ້າທີ່ຂອງບ້ານ
ທ່ານໜຶ່ງໄດ້ບອກກັບຜູ້ສື່ຂ່າວວ່າອຸປສັກສຳຄັນປະການໜຶ່ງກໍຄືການຕໍ່ວ່າຕໍ່ຂານຂອງບັນດາ
ເຈົ້າຂອງ "ໄກ່ຕີ" ທີ່ອ້າງວ່າໄກ່ຂອງພວກເຂົາເຈົ້າຕົວໜຶ່ງຣາຄາເກືອບສອງລ້ານກີບ
ແພງເກິນໄປທີ່ຈະໃຫ້ນຳເອົາໄປຂ້າຖິ້ມຢ່າງງ່າຍໆ ໃນຂນະທີ່ທາງການໃຊ້ຄ່າເສັຽຫາຍ
ໃຫ້ພຽງແຕ່ 15 000 ກີບເທົ່ານັ້ນຕໍ່ນ້ຳຫນັກສັດປີກ 1 ກິໂລ  ໃນບາງກໍຣະນີກໍມີການຕໍ່
ວ່າຕໍ່ຂານໃຫ້ທາງການຊົດໃຊ້ຄ່າເສັຽຫາຍຕາມຣາຄາທີ່ຕົນຕ້ອງການ

ຫ້າມຂາຍຊີ້ນສັດປີກ

ຄຽງຄູ່ກັນໄປກັບການອອກກຳຈັດສັດປີກຕາມເຂດຕ່າງໆທີ່ມີການລະບາດແລ້ວ ທາງການ
ລາວກໍຍັງໄດ້ອອກຄຳສັ່ງຫ້າມການຈຳໜ່າຍສັດປີກທຸກປະເພດ ບໍ່ວ່າຢູ່ໃນຕລາດຕ່າງໆກໍ
ຄືກັນກັບໃນຮ້ານອາຫານທຸກແຫ່ງ ໂດຍມີຄນະເຈົ້າໜ້າທີ່ອອກກວດກາຢ່າງໃກ້ຊິດ ນອກ
ຈາກນີ້ແລ້ວກໍ ຍັງໄດ້ຫ້າມການເຄື່ອນຍ້າຍສັດປີກເຂົ້າອອກເຂດນະຄອນວຽງຈັນແລະເຂດ
ອື່ນໆທີ່ມີການລະບາດນຳດ້ວຍ

ສຖິຕິ

ນັບຕັ້ງແຕ່ເຊື້ອໂຣກໄຂ້ຫວັດສັດປີກໄດ້ເລີ້ມຕົ້ນປາກົດຕົວຂຶ້ນໃນເອເຊັຽຕະວັນອອກສຽງໃຕ້
ເມື່ອເດືອນທັນວາ ປີ 2003 ເປັນຕົ້ນມາ ໄດ້ມີຜູ້ເສັຽຊີວິດຍ້ອນເຊື້ອໄວຣັສໄຂ້ຫວັດສັດປີກ
ປະເພດ H5N1 ແລ້ວ ໃນປະເທດຕ່າງໆທົ່ວໂລກຈຳນວນ 171 ຄົນໂດຍຕິດເຊື້ອຈາກ
ການຢູ່ໃກ້ຊິດກັບສັດປີກ ມີສັດປີດຊນິດຕ່າງໆຖືກທຳລາຍຖິ້ມປະມານ 300 ລ້ານຕົວ
ຕາມຕົວເລກຂອງອົງການອະນາມັຍໂລກ

ຈຳນວນຜູ້ເສັຽຊີວິດໃນປະເທດຕ່າງໆມີດັ່ງນີ້:
1. ອາແຊກໄບຈັນ (Azerbaïdjan) 5 ຄົນ
2. ກັມພູເຈັຽ 6
3. ຈີນ 14
4. ອີຢິບ 13 ຄົນ
5. ອິນໂດນີເຊັຽ 65 ຄົນ
6. ອີຣັກ 2 ຄົນ
7. ລາວ 2 ຄົນ
8. ນີເຈເຣັຽ (Nigeria) 1 ຄົນ
9. ໄທຍ 17 ຄົນ
10. ຕຸຣກີ 4 ຄົນ
11. ວຽດນາມ 42 ຄົນ