ເປັນຫຍັງຄອຍຖ້າ ເຖິງກວ່າ 30 ປີ

ກ່ອນຈັບວັງປາວແລະພັກພວກ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 05/06/2007 ແກ້ໄຂໃຫມ່ຫລ້າສຸດເມື່ອວັນທີ 05/06/2007 à 13:30 TU

ນາຍພົນວັງປາວແລະຄນະໄດ້ຖືກເຈົ້າໜ້າທີ່ອະເມຣິກັນຈັບກຸມແລ້ວທີ່ຣັດ Cali-
fornia ໃນຖານວາງແຜນໂຄ່ນລົ້ມຣັຖບານລາວ ນາຍພົນວັງປາວໄດ້ປະຕິບັດ
ການຕໍ່ຕ້ານຣັຖບານລາວໃນຫລາຍຮູບແບບມາເປັນເວລາຊ້ານານແລ້ວ ມີທັງ
ຮູບແບບການເມືອງແລະຮູບແບບການໃຊ້ອາວຸດ ໂດຍມີສູນກາງການວາງແຜນ
ໃນດິນແດນຂອງສຫະຣັດອະເມຣິກາມາເປັນເວລາເຖິງກວ່າ 30 ປີແລ້ວ ໂດຍບໍ່
ໄດ້ຮັບການແຕະຕ້ອງໃດໆທັງໝົດຈາກເຈົ້າໜ້າທີ່ອະເມຣິກັນ ເພາະສນັ້ນໃນເມື່ອ
ມາຖືກກວາດລ້າງແລະຈັບກຸມໃນຕອນນີ້ ຈຶງຖືໄດ້ວ່າເປັນເຫດການທີ່ສ້າງຄວາມ
ຕົກຕະລຶງແລະສ້າງຄວາມແປກປລາດໃຈບໍ່ແມ່ນຂອງຄ່ອຍ

ເປັນຫຍັງຈຶ່ງຄອຍຖ້າເຖິງກວ່າ 30 ປີ ຈຶ່ງຖືກຈັບກຸມ?

ມີຄຳອະທິບາຍຫລາຍຢ່າງຕໍ່ຄຳຖາມຂ້າງເທິງນີ້ ປະການທີ່ໜຶ່ງແມ່ນທາງດ້ານກົດໝາຍ
ຕາມກົດໝາຍຂອງເມືອງລຸງແຊມນັ້ນ ແມ່ນຫ້າມພົລເມືອງອະເມຣິກັນທຸກຄົນບໍ່ໃຫ້ໃຊ້ດິນ
ແດນຂອງສຫະຣັດອະເມຣິກາ ເປັນຖານປະຕິບັດການດ້ວຍອາວຸດເພື່ອທຳການໂຄ່ນລົ້ມຣັຖ
ບານຂອງປະເທດອື່ນ ທີ່ມີການພົວພັນທີ່ດີແລະມີສັນຕິພາບກັບສຫະຣັດອະເມຣິກາ

ຖ້າພົລເມືອງອະເມຣິກັນຜູ້ໃດຫາກລ່ວງລະເມີດກົດໝາຍຂໍ້ນີ້ ຊຶ່ງເປັນກໍຣະນີຂອງນາຍພົນ
ວັງປາວທີ່ມີສັນຊາດອະເມຣິກັນ ກໍຈະມີໂທດເຖິງຂັ້ນຈຳຄຸກຕລອດຊີວິດຖ້າຫາກໃຫ້ການຮັບ
ສາຣະພາບຕໍ່ຂໍ້ກ່າວຫາ

ປະການທີສອງ ແມ່ນກ່ຽວຂ້ອງທາງດ້ານການເມືອງແລະທາງດ້ານການທູດ ກ່າວຄືໃນເວ
ລາປັດຈຸບັນນີ້ ການພົວພັນລະຫວ່າງສອງປະເທດ ສຫະຣັດອະເມຣິກາແລະ ສສປ ລາວ
ແມ່ນການພົວພັນທີ່ດີ ໂດຍເຮົາເຫັນໄດ້ຈາກການທີ່ສຫະຣັດໄດ້ໃຫ້ການຊ່ວຍເຫລືອແກ່
ລາວໃນການກຳຈັດການປູກຝິ່ນແລະສົ່ງເສີມການປູກພືດແນວອື່ນທົດແທນ ຕລອດໃຫ້ການ
ຊ່ວຍເຫລືອແກ່ລາວໃນການເກັບກູ້ລະເບີດທີ່ຍັງບໍ່ແຕກຕັ້ງແຕ່ສມັຍສົງຄາມ ໃນຂນະດຽວ
ກັນລາວກໍໄດ້ໃຫ້ການຮ່ວມໄມ້ຮ່ວມມືເປັນຢ່າງດີໃນການຊອກຄົ້ນຫາຊາກສົບທະຫານອະເມ
ຣິກັນທີ່ເສັຽຊີວິດໃນປາງສົງຄາມ

ເມື່ອສຣຸບຄວາມແລ້ວ ກໍແມ່ນການພົວພັນທີ່ດີລະຫວ່າງສຫະຣັດອະເມຣິກາແລະ ສປປ
ລາວ ນັ້ນເອງ ທີ່ເປັນຄຳອະທິບາຍທີ່ສົມເຫດສົມຜົນທີ່ສຸດ ຕໍ່ການທີ່ນາຍພົນວັງປາວແລະ
ພັກພວກໄດ້ຖືກເຈົ້າໜ້າທີ່ອະເມຣິກັນຈັບກຸມໃນຄັ້ງນີ້ ແທນທີ່ຈະແມ່ນເພາະຍ້ອນຜິດກົດ
ໝາຍອະເມຣິກັນພຽງແຕ່ຢ່າງດຽວເທົ່ານັ້ນ

ໃຜໆກໍຮູ້ຢູ່ແລ້ວວ່າຣັຖບານຂອງປະເທດໃດໃນໂລກກໍຕາມ ຈະອ້າງອີງຕໍ່ກົດໝາຍຂອງຕົນ
ເພື່ອຈັບກຸມບຸກຄົນໃດບຸກຄົນໜຶ່ງດ້ວຍຂໍ້ກ່າວຫາທາງດ້ານການເມືອງ ກໍຕໍ່ເມື່ອການກະທຳ
ຂອງຜູ້ຖືກຈັບກຸມເປັນການກະທຳທີ່ຂັດແຍ່ງຕໍ່ຜົນປໂຍດຂອງຣັຖບານຂອງປະເທດນັ້ນໆ

ແຕ່ຢ່າງໃດກໍຕາມ ນັກວິເຄາະບາງທ່ານຊ້ຳພັດມີສາຍຕາຍາວໄກ ເບີ່ງໄປເຖິງວ່າເປັນ
ຄວາມພຍາຍາມຂອງຣັຖບານກຸງວໍຊິງຕັນໃນການຫຍັບເຂົ້າໃກ້ຊິດກັບຣັຖບານວຽງຈັນ ທັງ
ນີ້ເພື່ອແຜນອັນຍາວນານໃນການສກັດກັ້ນການຂຍາຍອິດທີພົນໃນຂົງເຂດຂອງ ສປ ຈີນ
ຫລັງຈາກທີ່ສຫະຣັດເຄີຍໄດ້ຫຍັບເຂົ້າໃກ້ຊິດວຽດນາມແລະກັມພູເຈັຽມາແລ້ວ ເທັດຈິງ
ປະການໃດໃນຈຸດນີ້ ມີແຕ່ອະນາຄົດຈະເປັນຂໍ້ພິສູດໄດ້

ອດີດຂອງວັງປາວຄືປັດໃຈແກ່ຍາວການຈັບກຸມຫລືບໍ່?

ອັນທີ່ຈິງ ນາຍພົນວັງປາວແລະຄນະມີການເຄື່ອນໄຫວຢ່າງຄຽງບ່າຄຽງໄຫລ່ກັບ CIA ໃນ
ສມັຍສົງຄາມຕໍ່ຕ້ານກັບຝ່າຍຄອມມຸຍນິດໃນປະເທດລາວໃນຊຸມປີ 60 - 70 ຂໍ້ນີ້ເປັນຄຳ
ອະທິບາຍໄດ້ຫລືບໍ່ຕໍ່ການແກ່ຍາວການຈັບກຸມນາຍພົນວັງປາວແລະຄນະໄດ້?

ແມ່ນຄຳຖາມທີ່ໜ້າສົນໃຈ  ອດີດຂອງນາຍພົນວັງປາວອາດສາມາດເປັນຄຳອະທິບາຍ
ໄດ້ຄືກັນໃນຈຳນວນຫລາຍໆຄຳອະທິບາຍຕໍ່ຄຳຖາມທີ່ວ່າ ເປັນຫຍັງຈຶ່ງມີການແກ່ຍາວ
ເຖິງກວ່າ 30 ປີ ກ່ອນ ທີ່ນາຍພົນວັງປາວແລະພັກພວກຈະຖືກຈັບກຸມເມື່ອວານນີ້ ທັງນີ້
ເພາະໃນຖານະປະເທດສຫະຣັດອະ ເມຣິການັ້ນ ການຮ່ວມໄມ້ຮ່ວມມືຂອງນາຍພົນວັງປາວ
ໃນສມັຍສົງຄາມນັ້ນ ຖືວ່າເປັນການສ້າງຄຸນງາມຄວາມດີ ໃນຂນະທີ່ຝ່າຍຣັຖບານລາວຖື
ວ່າເປັນການສ້າງໂທດກັມລົ້ນຟ້າເຫລືອແຜ່ນດິນ

ການຕັກເຕືອນຂອງລຸງແຊມ

ອີກປະການໜຶ່ງ ນັບຕັ້ງແຕ່ນາຍພົນວັງປາວຖືກຣັຖບານໄທຍປະກາດຫ້າມເຂົ້າປະເທດມາ
ຕັ້ງແຕ່ຊຸມປີ 80 ຜູ້ກ່ຽວກໍໄດ້ເພີ້ມທະວີການເຄື່ອນໄຫວຫລາຍຂື້ນໃນດິນແດນຂອງສຫະຣັດ
ອະເມຣິກາ ຄຽງຄູ່ກັນໄປກັບການດີຂື້ນເລື້ອຍໆຂອງຄວາມສັມພັນລະຫວ່າງລາວແລະສຫະ
ຣັດ ເພາະສນັ້ນກະຊວງການຕ່າງປະເທດທີ່ກຸງວໍຊິງຕັນຈຶງເຄີຍໄດ້ເອີ້ນບັນດາຜູ້ຕາງໜ້າ
ຂອງກຸ່ມຕ່າງໆທີ່ຕໍ່ ຕ້ານຣັຖບານລາວເຂົ້າພົບ ໃນນັ້ນຮວມທັງຜູ້ຕາງໜ້າຂອງກຸ່ມນາຍພົນ
ວັງປາວນຳດ້ວຍ ທັງນີ້ເພື່ອຕັກ ເຕືອນໃຫ້ຢຸດເຊົາຕໍ່ການເຄື່ອນໄຫວ ພ້ອມດຽວກັນກໍມີການ
ອະທິບາຍກົດໝາຍອະເມຣິກັນໃຫ້ບັນດາຜູ້ຕາງໜ້າເຫລົ່ານັ້ນເຂົ້າໃຈນຳດ້ວຍ ຊຶ່ງກໍຖືໄດ້ວ່າ
ເປັນການນາບຂູ່ໄປໃນຕົວ

ຈາກການດຳເນີນການຂອງກະຊວງການຕ່າງປະເທດອະເມຣິກັນ ຫລາຍກຸ່ມກໍໄດ້ຢຸດເຊົາຕໍ່
ການເຄື່ອນໄຫວ ແຕ່ກຸ່ມຂອງນາຍພົນວັງປາວຍັງຄົງເດີນໜ້າຕໍ່ໄປ ໂດຍມີການຈັດສົ່ງເງິນ
ໄປໃຫ້ສມັກພັກພວກຂອງຕົນຈັດຊື້ອາວຸດເຖື່ອນຕາມແນວຊາຍແດນຂອງຫລາຍປະເທດ
ອ້ອມໆປະເທດລາວ ອັນເປັນເງື່ອນໄຂເຮັດໃຫ້ສາມາດປະຕິບັດການດັກໂຈມຕີຣົດໂດຍ
ສານໄດ້ຕາມເສັ້ນທາງເລກທີ່ 13 ລະຫວ່າງວຽງຈັນແລະຫລວງພຣະບາງ ອັນເປັນສາ
ເຫດເຮັດໃຫ້ກອງທັບລາວເລັ່ງມືໃນການປາບປາມຢ່າງໜັກມືເຊັ່ນດຽວກັນ ຈົນວ່າບັນດາ
ອົງການຈັດຕັ້ງປ້ອງກັນສິດທິມນຸດຊົນຕ່າງໆໄດ້ພາກັນອອກມາກ່າວປະນາມ

ແຕ່ຢ່າງໃດກໍຕາມ ການປະຕິບັດການຂອງເຈົ້າໜ້າທີ່ອະເມຣິກັນຈັບກຸມນາຍພົນວັງປາວ
ແລະຄນະໃນຄັ້ງນີ້ ກໍຄົງຈະເຮັດໃຫ້ການເຄື່ອນໄຫວຕ້ານຣັຖບານລາວດ້ວຍອາວຸດນັ້ນ ຊົບ
ເຊົາລົງໄປຢ່າງຫລວງຫລາຍ ທັງນີ້ເພາະກຸ່ມດັ່ງກ່າວເປັນກຸ່ມທີ່ແຂງແຮງທີ່ສຸດໃນຈຳ
ນວນຫລາຍໆກຸ່ມໃນຕ່າງປະເທດ ທີ່ຕໍ່ຕ້ານຣັຖບານລາວ