ແຜນປະຕິຮູບ ລະບົບບຳນານ ຝຣັ່ງເສດ ການທົດສອບ ຄັ້ງໃຫຍ່ຂອງ ຊາຣ໌ໂກຊີ

ບົດວິເຄາະ du 11/9/2007

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 11/09/2007 ແກ້ໄຂໃຫມ່ຫລ້າສຸດເມື່ອວັນທີ 11/09/2007 12:26 TU

ກັມມະບານກ່າວຫາຣັຖບານວ່າມີແຜນປະຕິ ຮູບລະບົບເບັ້ຽບຳນານໂດຍບໍ່ມີການປຶກສາ ຫາລື ແຕ່ຣັຖບານວ່າຈະປຶກສາຢ່າງກວ້າງ ຂວາງກ່ອນການປະຕິຮູບໃດໆ (ພາບ: Fotolia)

ແຜນປະຕິຮູບ "ລະບົບເບັ້ຽບຳນານພິ ເສດ" ເປັນສາເຫດແຫ່ງການຂັດແຍ່ງ ແລະຖົກຖຽງລະຫວ່າງຣັຖບານຝ່າຍໜຶ່ງ ແລະ ບັນດາອົງການຈັດຕັ້ງກັມມະບານ ແລະຝ່າຍຄ້ານອີກຝ່າຍໜຶ່ງ ຂໍ້ຂັດແຍ່ງ ກໍມີຢູ່ວ່າຝ່າຍຣັຖບານຕ້ອງການປະຕິຮູບ "ຣະບົບບຳນານແບບພິເສດ" ໃຫ້ຄືກັນ ຫລືໃກ້ຄຽງກັບລະບົບທັມມະດາ ທັງນີ້ ເພື່ອຊ່ວຍຊູລະບົບບຳນານໃຫ້ຄົງຢູ່ ບໍ່ເຊັ່ນ ນັ້ນກໍຈະລົ້ມລະລາຍໃນຣະຍະ 30 – 50 ປີຂ້າງໜ້າ

ລະບົບບຳນານພິເສດເປັນແນວໃດ?

"ລະບົບບຳນານພິເສດ" ກໍຄື ຜູ້ເຮັດການກິນເງິນເດືອນສາມາດອອກກິນເບັ້ຽບຳນານ
ໄດ້ໄວກວ່າລະບົບທັມມະດາ ກ່າວຄື ອາຍຸ 55 ປີກໍໄປກິນເບັ້ຽບຳນານໄດ້ແລ້ວ ຖ້າໄດ້
ເຮັດວຽກມາແລ້ວເປັນເວລາ 37 ປີເຄີ່ງ ຫລືບາງກໍຣະນີອາຍຸ 50 ປີກໍມີຖ້າຫາກເປັນ
ອາຊີບທີ່ຖືວ່າ "ລຳບາກ" ເຊັ່ນພະນັກງານຂັບຣົດໄຟໃຕ້ດິນເປັນF ຊາວປະມົງ ຫລື
ຄົນງານບໍ່ແຮ່ຫລືຄົນງານຂຸດເໝືອງຖ່ານຫິນເປັນຕົ້ນ

ໃນຂນະທີ່ລະບົບບຳນານທັມມະດານັ້ນ ຕ້ອງອາຍຸ 60 ປີ ແລະຕ້ອງເຮັດວຽກມາແລ້ວ
ເປັນເວລາ 40 ປີ.....ນັບຕັ້ງແຕ່ປີ 2008 ເປັນຕົ້ນໄປໃຫ້ເພີ້ມເປັນ 41 ປີ ແລະ
ຕັ້ງແຕ່ປີ 2012 ເປັນຕົ້ນໄປເພີ້ມເປັນ 42 ປີ.....ແຕ່ໃນກໍຣະນີທີ່ປີການບໍ່ພໍພຽງ
ເພາະເລີ້ມຕົ້ນການປະກອບອາຊີບຊ້າ ກໍສາມາດຕໍ່ການເຮັດວຽກອອກໄປໄດ້ຈົນ
ເຖິງອາຍຸ 65 ປີ

ປັດຈຸບັນນີ້ ມີບັນດາພະນັກງານຜູ້ກ່ຽວຂ້ອງກັບ "ລະບົບບຳນານພິເສດ" ນີ້ 1 ລ້ານ
6 ແສນຄົນ ໃນນັ້ນ 5 ແສນຄົນຍັງເຮັດວຽກຢູ່ ສ່ວນອີກ 1 ລ້ານ 1 ແສນຄົນ ອອກກິນ
ເບັ້ຽບຳນານແລ້ວ ໝາຍຄວາມວ່າຄົນ 5 ແສນຄົນຜູ້ເຮັດວຽກ ຈ່າຍເງິນເຂົ້າກອງ
ເງິນທຶນເບັ້ຽບຳນານລ້ຽງຄົນທີ່ອອກກິນເບັ້ຽບຳນານແລ້ວ 1 ລ້ານ 1 ແສນຄົນ

ທັງໝົດນີ້ແມ່ນເປັນພະນັກງານຂອງຣັຖວິສາຫະກິດເປັນສ່ວນໃຫຍ່ເຊັ່ນ ບໍຣິສັດຣົດໄຟ
ແຫ່ງຊາດ (SNCF), ບໍຣິສັດຂົນສົ່ງມວນຊົນຣົດເມປະຈຳທາງ (RATP), ບໍຣິສັດໄຟ
ຟ້າແລະກ໊າສ (EDF-GDF), ແລະນອກຈາກນີ້ອີກກໍຍັງມີເອກຊົນເຊັ່ນ ອາຊີບປະມົງ,
ອາຊີບຂຸດບໍ່ແຮ່ ຫລືເຫມືອງແຮ່ ທີ່ຖືວ່າເປັນອາຊີບລຳບາກ

ແຕ່ອາຊີບທີ່ບໍ່ລຳບາກກໍມີເຊັ່ນດຽວກັນຄື ນັກກົດໝາຍກ່ຽວກັບອະສັງຫາຣິມະຊັບ ທີ່
ພາສາຝຣັ່ງເສດເພີ່ນເອີ້ນວ່າ "Clercs de notaire" ຕລອດຈົນຮອດອາຊີບການ
ສແດງຕ່າງໆເຊັ່ນ Opéra de Paris ແລະນັກສແດງອື່ນໆ ທີ່ອາຊີບບໍ່ແນ່ນອນ

ປັນຫາເກີດຂື້ນແນວໃດ?
ປັນຫາທີ່ເກີດຂື້ນກໍມີຢູ່ວ່າ ລະບົບບຳນານທັງໝົດຂອງປະເທດຝຣັ່ງເສດນີ້ ທັງລະບົບ
ພິເສດແລະລະບົບທັມມະດາ ໄດ້ຖືກຳເນີດມາໄດ້ໄດ້ຊ້ານານແລ້ວ ໃນສມັຍຕົ້ນໆກໍ
ດຳເນີນໄປດ້ວຍດີ

ແຕ່ຕົກມາເຖິງສມັຍນີ້ ອະນາໄມຂອງພົລເມືອງດີຂື້ນ ເປັນປັດຈັຍໃຫ້ອາຍຸຍືນຍາວ
ກວ່າເກົ່າ ຈຶ່ງເຮັດໃຫ້ຜູ້ອອກກິນເບັ້ຽບຳນານເພີ້ມຈຳນວນຕາມໄປນຳ ໃນຂນະທີ່ຄົນ
ຮຸ່ນໃໝ່ທີ່ອອກສູ່ຕລາດແຮງງານ ທີ່ເປັນຜູ້ຈ່າຍເງິນເຂົ້າລະ ບົບນັ້ນ ຍັງຄົງເທົ່າ
ເດີມ ທັງນີ້ອັນເນື່ອງມາຈາກພົລເມືອງບໍ່ເພີ້ມ ອັນໝາຍເຖິງວ່າລາຍຮັບຂອງກອງ
ເງິນທຶນເບັ້ຽບຳນານເທົ່າເດິມ ໃນຂນະທີ່ລາຍຈ່າຍເພີ້ມຂື້ນເລື້ອຍໆຕາມຈຳນວນ
ການເພີ້ມຂອງຜູ້ອອກກິນເບັ້ຽບຳນານ

ໃນເມື່ອສຖານະການເປັນແນວນີ້ ຣັຖບານຈຶ່ງຫລິງເຫັນຄວາມຈຳເປັນຕ້ອງທຳ
ການປະຕິຮູບເພື່ອໃຫ້ລະບົບຄົງຢູ່ ຖ້າບໍ່ເຊັ່ນນັ້ນລະບົບກໍຈະລົ້ມລະລາຍໃນອີກ 30 ປີ
ເຖິງ 50 ປີຂ້າງໜ້າ ບັນດາລູກຫລານຂອງພວກເຮົາຈະບໍ່ມີເງີນເບັ້ຽບຳນານກິນ
ອີກຕໍ່ໄປ

ປັດຈຸບັນນີ້ກອງເງິນທຶນເບັ້ຽບຳນານຂາດດຸນເປັນຈຳນວນມາກ ເຖິງແມ່ນວ່າຣັຖ

ບານດຶງເອົາເງີນຈາກທາງອື່ນມາຖົມກໍຍັງສູ້ບໍ່ໄຫວ ແລະກໍໄດ້ຮັບການຕິຕຽນຈາກ
ຄນະມົນຕຣີຄວບຄຸມການໃຊ້ຈ່າຍຂອງຣັດ La Cour des Comptes ມາແລ້ວ

ຣັຖບານສເນີແຜນປະຕິຮູບແນວໃດ?
ຖ້າເວົ້າໃຫ້ຖືກຈຸດບາດດຽວໂລດກໍຈະໄດ້ຄວາມວ່າ ຣັຖບານຢາກໃຫ້ລະບົບບຳນານ
ເປັນອັນໜຶ່ງອັນດຽວກັນ ກ່າວຄືຢາກໃຫ້ຣະບົບພິເສດກາຍມາເປັນລະບົບທັມມະດາ
ໝາຍຄວາມວ່າທຸກຄົນທີ່ເຮັດການກິນເງິນເດືອນ ຕ້ອງມີປີການເທົ່າກັນຫລືໃກ້ຄຽງກັນ
ຈຶ່ງໃຫ້ອອກກິນເບັ້ຽບຳນານໄດ້ ຄືໃຫ້ເຮັດການຍາວນານກວ່າເກົ່າ ຈ່າຍເງິນເຂົ້າຫລາຍ
ກວ່າເກົ່າ ເມື່ອອອກກິນເບັ້ຽບຳນານອາດໄດ້ເງິນນ້ອຍກວ່າເກົ່າ

ເມື່ອປີ 1995 ຣັຖບານທີ່ມີທ່ານ Alain Juppé ເປັນນາຍົກ ຣມຕ ໄດ້ປະສົບກັບຄວາມ
ລົ້ມແຫລວມາແລ້ວໃນການພຍາຍາມປະຕິຮູບລະບົບເບັ້ຽບຳນານນີ້ ທັງນີ້ເພາະໄດ້ຮັບ
ການຕໍ່ຕ້ານໜັກດ້ວຍການນັດຢຸດງານຢ່າງລຽນຕິດເປັນເວລາຫລາຍສັປດາ

ຄັ້ງນັ້ນເປັນການພຍາຍາມປະຕິຮູບລະບົບບຳນານລະຫວ່າງຣັຖກອນຫລືຂ້າຣາຊການ
ດ້ານໜຶ່ງ ແລະພະ ນັກງານເອກຊົນອີກດ້ານໜຶ່ງ ໃຫ້ເທົ່າທຽມກັນ ແທນທີ່ຈະແມ່ນຂ້າ
ຣາຊການອອກກິນບຳນານໄວກວ່າພະນັກງານຂອງບໍຣິສັດເອກຊົນ

ຕໍ່ມາເມື່ອປີ 2003 ຣັຖບານຈຶ່ງສາມາດຜ່ານການປະຕິຮູບນີ້ໄດ້ ກ່າວຄືທັງຂ້າຣາຊ
ການແລະພະນັກງານເອກຊົນຕ້ອງເຮັດວຽກແລະຈ່າຍເງິນເຂົ້າເປັນເວລາ 40 ປີ
ແທນທີ່ຈະແມ່ນ 37 ປີເຄີ່ງຄືແຕ່ກ່ອນ (ສຳລັບຂ້າຣາຊການ) ນັບຕັ້ງແຕ່ປີ 2008
ເປັນຕົ້ນໄປໃຫ້ເພີ້ມເປັນ 41 ປີ ແລະຕັ້ງແຕ່ປີ 2012 ເປັນຕົ້ນໄປເພີ້ມເປັນ 42
ປີ.....

ຢ່າງໃດກໍຕາມ ການປະຕິຮູບເມື່ອປີ 2003 ນັ້ນ ບໍ່ໄດ້ແຕະຕ້ອງເຖິງ "ລະບົບບຳນານ
ພິເສດ" ແຕ່ຢ່າງໃດ ຈົນເຖິງເວລານີ້ຣັຖບານຈຶ່ງໄດ້ຢິບຍົກຂື້ນມາ ແລະກໍປະຕິເສດ
ວ່າບໍ່ມີແຜນເຮັດອອກມາໂດຍລຳພັງຝ່າຍດຽວ ແຕ່ຈະປຶກສາຫາລືກັບການຈັດຕັ້ງ
ກັມມະບານຢ່າງກວ້າງຂວາງເສັຽກ່ອນ

ໃນວັນທີ່ 19 ແລະ 20 ເດືອນນີ້ ທ່ານປະທານາທິບໍດີ ນິໂກລາສ໌ ຊາຣ໌ໂກຊີ ຈະອອກ
ມາກ່າວເຜີຍຄັກແນ່ວ່າ ເພີ່ນມີແຜນປະຕິຮູບແນວໃດ ໃນນັ້ນຮວມທັງແຜນບໍ່ທົດ
ແທນຂ້າຣາຊການ 22 700 ຄົນ ທີ່ຈະອອກກິນເບັ້ຽບຳນານໃນປີ 2008 ນຳດ້ວຍ

ທັງໝົດນີ້ຈະຖືໄດ້ວ່າເປັນການທົດສອບກຳລັງຄັ້ງໃຫຍ່ທີ່ສຸດລະຫວ່າງບັນດາອົງການ
ຈັດຕັ້ງກັມມະບານແລະທ່ານປະທານາທິບໍດີ ນັບຕັ້ງແຕ່ເພີ່ນເຂົ້າຮັບຕຳແໜ່ງເມື່ອ
ເກືອບ 4 ເດືອນຜ່ານມາ