ບົດວິເຄາະ: ປັນຫານິວເຄລັຽອີຫຣ່ານ ເປັນຫຍັງຝຣັ່ງເສດຈຶ່ງມີທ່າທີແຂງກ້າວ?

ຫັນປ່ຽນທ່າທີດັ້ງເດີມຢ່າງສິ້ນເຊີງ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 18/09/2007 ແກ້ໄຂໃຫມ່ຫລ້າສຸດເມື່ອວັນທີ 18/09/2007 16:35 TU

ກອງປະຊຸມສມາຊິກຖາວອນຂອງຄນະມົນຕຣີ ຄວາມໝັ້ນຄົງແຫ່ງອົງການສຫະປະຊາຊາດ (ພາບ: AFP)

"ຍາກ" ທີ່ ຣມຕ ຕ່າງປະເທດຝຣັ່ງເສດ
ທ່ານແບຣ໌ນາຣດ໌ ກຸສແນຣ໌ (Bernard
Kouchner) ຈະໂນ້ມນ້າວໃຫ້ຣັດເຊັຽ
ເຫັນດີເຫັນງາມນຳມາຕຣາການທາງທະ
ຫານຕໍ່ປະເທດອີຫຣ່ານ?

ຄຳອະທິບາຍງ່າຍໆກໍຄືກໍຄື ຣັດເຊັຽມີຜົນ
ປໂຍດໃນປະເທດອີຫຣ່ານ ແລະສູນພລັງ
ງານນິວເຄລັຽແຫ່ງໜຶ່ງຂອງອີຫຣ່ານທີ
ເມືອງ Bouchehr ໃນພາກໃຕ້ຂອງປະເທດ ກໍແມ່ນຣັດເຊັຽເປັນຜູ້ດຳເນີນການ
ຕິດຕັ້ງ

 

ສນັ້ນເຖິງທັງຣັດເຊັຽແລະ ສປ ຈີນ ເຄີຍໄດ້ລົງມະຕິໃນຄນະມົນຕຣີຄວາມໝັ້ນ
ຄົງແຫ່ງອົງການສຫະປະຊາຊາດມາກ່ອນເພື່ອລົງໂທດປະເທດອີຫຣ່ານກໍຕາມ
ແຕ່ກໍແມ່ນມາຕຣາການລົງໂທດທາງເສຖກິດເທົ່ານັ້ນ ບໍ່ເຄີຍເຫັນພ້ອມນຳມາ
ຕຣາການລົງໂທດທາງທະຫານຈັກເທື່ອ ໃນການລົງມະຕິຄັ້ງຕໍ່ ໄປກໍຄາດຄະ
ເນວ່າຣັດເຊັຽແລະ ສປ ຈີນ ຈະຄົງຢືນຢູ່ໃນທ່າທີ່ເດີມ

ແມ່ນຫຍັງຄືເຫດຜົນທີ່ຜັກດັນໃຫ້ຝຣັ່ງເສດເອົາທ່າທີແຂງກ້າວກັບປະເທດອີຫຣ່ານຄືແນວ
ນີ້? ເວົ້າໃຫ້ຖືກບາດດຽວໂລດກໍຄື  ປະເທດຝຣັ່ງເສດພາຍໃຕ້ການນຳຂອງທ່ານປະທາ
ນາທິບໍດີນິໂກລາສ໌ ຊາຣ໌ໂກຊີ ໄດ້ປ່ຽນແປງທ່າທີດັ້ງເດີມຢ່າງສິ້ນເຊີງ

ກ່າວຄືປ່ຽນຈາກປະເພນີຄັດຄ້ານສຫະຣັດອະເມຣິກາ ທີ່ເປັນປະເພນີດັ້ງເດີມທີ່ປະຕິບັດມາ
ຕັ້ງແຕ່ຊຸມປີ 60 ສມັຍທີ່ທ່ານນາຍພົນ Charles de Gaulle ເປັນປະທານາທິບໍດີພຸ້ນ
ມາເປັນທ່າທີທີ່ສອດຄ່ອງກັບສຫະຣັດອະເມຣິກາ

ເວົ້າງ່າຍໆກໍຄື ປ່ຽນຈາກໜ້າມືເປັນຫລັງມືເລີຍ ອັນເປັນການສແດງໃຫ້ເຫັນເຖິງຄວາມ
ນິຍົມຊົມຊອບຂອງທ່ານປະທານາທິບໍດິຊາຣ໌ໂກຊີທີ່ມີຕໍ່ສຫຣັດອະເມຣິກາ

ພວກເຮົາຍັງຈື່ໄດ້ວ່າ ເມື່ອວັນທີ່ 27 ສິງຫາທີ່ຜ່ານມາ ເນື່ອງໃນໂອກາດກອງປະຊຸມບັນ
ດາເອກອັກຣັຖທູດຝຣັ່ງເສດທີ່ທຳນຽບປະທານາທິບໍດີ ວັງ Elysée ທ່ານປະທານາທິບໍ
ດີ ໄດ້ກ່າວກ່ຽວກັບປະເທດອີຫຣ່ານແບບກຳປັ້ນທຸບໂຕ໊ະເລີຍ ໃນທຳນອງທີ່ວ່າ "ຖ້າອີ
ຫຣ່ານມີອາວຸດນິວເຄລັຽຍາມໃດແລ້ວ ກໍຈະຖືກໂຈມຕີຖິ້ມລະເບີດທາງອາກາດໂລດ"

ເພາະສນັ້ນ ການຖແລງຂອງ ຣມຕ ຕ່າງປະເທດ ແບຣ໌ນາຣດ໌ ກຸສແນຣ໌ ເມື່ອວັນອາທິດ
ທີ່ຜ່ານມາຈຶ່ງ ບໍ່ແມ່ນການຖແລງຜິດພາດເປັນການສ່ວນຕົວຂອງທ່ານເອງແຕ່ຢ່າງ
ໃດເລີຍ ຫາກແຕ່ວ່າເປັນການຕອກຢ້ຳໃຫ້ທ່າທີຂອງທ່ານປະທານາທິບໍດີ ມີຄວາມຊັດ
ເຈນຕື່ມຂື້ນ

ນອກຈາກນີ້ກໍຍັງເປັນທີ່ໜ້າສັງເກດອີກວ່າ ກ່ອນທີ່ຈະຖແລງແບບກຳປັ້ນທຸບດິນໃນກອງ
ປະຊຸມບັນດາເອກອັຄຣັຖທູດນັ້ນ ຜູ້ນຳຝຣັ່ງເສດຫາກໍເດີນທາງກັບຄືນມາຈາກການພັກ
ຮ້ອນໃນສຫະຣັດອະເມຣິກາ ໃນໂອກາດດັ່ງກ່າວເພີ່ນກໍໄດ້ມີການພົບປະປຶກສາຫາລືກ່ຽວ
ກັບປັນຫາໂລກກັບ GWB ມາດ້ວຍ

ຍັງມີເຄື່ອງໝາຍອີກຫລາຍຢ່າງທີ່ຊີ້ໃຫ້ເຫັນເຖິງການນິຍົມອະເມຣິກັນຂອງທ່ານຊາຣ໌
ໂກຊີ ກ່າວຄື ເມື່ອບໍ່ນານມານີ້ເພີ່ນກໍໄດ້ຖແລງວ່າປະເທດຝຣັ່ງເສດຕຽມພ້ອມແລ້ວທີ່
ຈະຫວນກັບຄືນເຂົ້າຮ່ວມຢ່າງເຕັມຮູບແບບໃນກອງເສນາທິການຮ່ວມຂອງສົນທິສັນຍາ
ປ້ອງກັນອັຕລັງຕິກເໜືອ OTAN ຫລື NATO ຫລັງຈາກທີ່ທ່ານປະທານາທິບໍດີ
Charles de Gaulle ໄດ້ປະກາດຖອນອອກເມື່ອ 41 ປີກ່ອນ

ການຖອນຕົວອອກຈາກກອງເສນາທິການຮ່ວມຂອງ NATO ຄັ້ງນັ້ນ ບໍ່ໄດ້ໝາຍຄວາມ
ວ່າຝຣັ່ງເສດອອກຈາກການເປັນສມາຊິກ ຫາກແຕ່ຖອນອອກເພື່ອຮັກສາຄວາມເປັນ
ເອກຣາດຂອງກອງທັບ ໂດຍສເພາະກຳລັງທາງດ້ານນິວເຄລັຽ ບໍ່ໃຫ້ໄປຂື້ນກັບການຕັດ
ສິນໃຈຂອງກອງເສນາທິການຮ່ວມຂອງ NATO

ນັບແຕ່ນັ້ນເປັນຕົ້ນມາ ຝຣັ່ງເສດກໍພຍາຍາມຜັກດັນໃຫ້ມີການສ້າງລະບົບປ້ອງກັນຂອງ
ສຫະພາບເອີຣົບມາຕລອດໃນທຳນອງໃຫ້ເປັນຄູ່ແຂ່ງກັບລະບົບປ້ອງກັນຂອງ NATO
ແຕ່ໃຜໆກໍເບີ່ງເຫັນວ່າກຳລັງປ້ອງກັນຂອງເອີຣົບນັ້ນບໍ່ເຄີຍສແດງນ້ຳຢາຫຍັງອອກມາ
ຈັກເທື່ອ

ເວົ້າງ່າຍໆກໍຄືຫ້າມເສິກຢູ່ໃສກໍບໍ່ໄດ້ຖ້າປາສຈາກການເຂົ້າຮ່ວມຂອງກຳລັງ NATO
ສົງຄາມໃນປະເທດ Bosnie ເປັນຕົວຢ່າງທີ່ຊີ້ໃຫ້ເຫັນຢ່າງຊັດແຈ້ງ

ເມື່ອເວົ້າເຖິງກຳລັງ NATO ແລ້ວ ເຖິງແມ່ນວ່າມີສມາຊິກໃນປັດຈຸບັນເຖິງ 26 ປະ
ເທດກໍຕາມ (ໃນນັ້ນ 21 ປະເທດເປັນສມາຊິກຂອງສຫະພາບເອີຣົບ) ແຕ່ໃຜໆກໍ
ປະຕິເສດບໍ່ໄດ້ຕໍ່ບົດບາດຊີ້ນຳຂອງສຫະຣັດອະເມຣິກາ

ສລຸບ.....ທີ່ວິເຄາະມາທັງໝົດນີ້ເອງຄືຄຳອະທິບາຍທີ່ວ່າເປັນຫຍັງປະເທດຝຣັ່ງ
ເສດຈຶ່ງສແດງທ່າທີແຂງກ້າວເອົາແທ້ເອົາວ່າຕໍ່ປະເດອີຫຣ່ານ

ແຕ່ຢ່າງໃດກໍຕາມ ຫລາຍນັກສັງເກດການກໍຍັງເຊື່ອວ່າການຖແລງແບບແຂງກ້າວ
ຂອງທ່ານປະທານາທິບໍດີ ນິໂກລາສ໌ ຊາຣ໌ໂກຊີ ກໍດີ ຫລືຂອງ ທ່ານແບຣ໌ນາຣດ໌ ກຸສ
ແນຣ໌ ກໍດີ ອາດເປັນພຽງແຕ່ການນາບຂູ່ທາງດ້ານຈິຕວິທຍາຊື່ໆເພື່ອໂນ້ມນ້າວ
ໃຫ້ອີຫຣ່ານອ່ອນທ່າທີລົງແລະຍອມຮັບທີ່ຈະຢຸດເຊົາໂຄງການກັ່ນທາດ Uranium
ແລະຫລາຍໆນັກສັງເກດການກໍຍັງເຫັນອີກວ່າ ຖ້າເຮັດສົງຄາມຢ່າງແທ້ຈິງກັບ
ປະເທດອີຫຣ່ານນັ້ນ ກໍຈະແມ່ນການຕັດສິນໃຈທີ່ຜິດພາດຢ່າງໃຫຍ່ຫລວງທີ່ສຸດ
ແບບດຽວກັນກັບການຕັດສິໃຈເຮັດສົງຄາມ ໃນປະເທດອີຣັກຢ່າງບໍ່ມີຜິດພ້ຽນ

ອີກປະການໜຶ່ງ ຫລັງຈາກທີ່ ຣມຕ ຕ່າງປະເທດຝຣັ່ງເສດຖແລງແນວນັ້ນແລ້ວ ຫາງ
ສຽງຕຳນິຕິຕຽນກໍ ໄດ້ພາກັນຫລັ່ງໄຫລມາຈາກທຸສາຣະທິດ ກ່ອນອື່ນກໍແມ່ນມາຈາກ
ທ່ານໂມຮັມມັດ ເອລບາຣາດາຍ ຜູ້ອຳນວຍການສຳນັກງານສາກົນວ່າດ້ວຍພລັງ
ງານນິວເຄລັຽ (AIEA) ທີ່ອອກມາກ່າວເຕືອນວ່າໃນທຳ ນອງທີ່ວ່າ "ຢ່າໃຊ້ອາຣົມ
ເປັນໃຫຍ່"

ໃນຂນະທີ່ພາຍໃນສຫະພາບເອີຣົບກໍມີທ່າທີທີ່ບໍ່ສອດຄ່ອງກັນ ເຍີຣະມັນແລະເນເທີ
ແລນດ໌ເບີ່ງຄືວ່າເຫັນດີນຳທ່າທີຝຣັ່ງເສດ ນັ້ນກໍຄືລົງໂທດປະເທດອີຫຣ່ານໂດຍບໍ່
ຜ່ານການອະນຸມັດຂອງຄນະມົນຕຣີຄວາມໝັ້ນຄົງແຫ່ງອົງການສຫະປະຊາຊາດ ຊຶ່ງ
ເປັນການຂັດແຍ່ງກັບທ່າທີຂອງອິຕາລີແລະແອສປາຍ (ສເປນ)