ບົດວິເຄາະ : ທ່ານສໂຕຣສການຫ໌ ມີຫວັງໄດ້ຮັບການເລືອກ ໃຫ້ເປັນຜູ່ນໍາ ອົງການເງີນທືນສາກົນ FMI

ທ່ານໂດມີນີກ ສໂຕຣສການຫ໌ (Dominique Strauss-Kahn) ເປັນອດີດຣັຖມົນຕຣີເສຖກິດແລະການເງີນຝຣັ່ງເສດຈາກພັກສັງຄົມນິຍົມ ແຕ່ໄດ້ຣັ້ບການສນັບສນຸນຈາກສຫະຣັດອະເມຣິກາ

ໂດຍ  ພອນແກ້ວ

ບົດຄວາມນີ້ເຜີຍແຜ່ເມື່ອວັນທີ 28/09/2007 ແກ້ໄຂໃຫມ່ຫລ້າສຸດເມື່ອວັນທີ 28/09/2007 18:39 TU

ທ່ານໂຢເຊັຟ ໂຕຊອ໊ບສກີ (ຊ້າຍ) ອດີດຜູ້ອຳນວຍການທະນາຄານກາງແລະອດີດນາຍົກ ຣມຕ ຂອງສາທາຣະນະຣັດເຊັກສ໌ ຜູ້ໄດ້ຮັບການສເນີຊື່ໂດຍປະເທດຣັດເຊັຽ ແຕ່ກໍຕ້ອງປລາໄຊຢ່າງຫ່າງ ໄກທີ່ສຸດໃຫ້ແກ່ ທ່ານໂດມີນິກ ສໂຕຣສການຫ໌ ອດີດ ຣມຕ ເສຖກິດແລະການເງິນຝຣັ່ງເສດທີ່ ກາຍມາເປັນຜູ້ອຳນວຍການອົງການເງິນທຶນສາກົນ FMI ຄົນໃໝ່ (ພາບ: AFP ແລະ Reuters)

ຂ້ອນຂ້າງແນ່ນອນແລ້ວວ່າ ທ່ານໂດມີນີກ ສໂຕຣສການຫ໌ ອດີດ ຣັຖມົນຕຣີ ເສຖກິດແລະການເງີນຝຣັ່ງເສດ ຈາກພັກສັງຄົມນິຍົມ ຈະໄດ້ຖືກເລືອກ ໃຫ້ຂື້ນ ມາກໍາຕໍາແໜ່ງຜູ້ອຳນວຍການໃຫຍ່ອົງການເງີນທືນສາກົນ FMI ຄົນໃໝ່ໃນມື້ນີ້ (ສຸກ 28 ກັນຍາ) ທີ່ກຸງວໍຊີງຕັນ ໂດຍການລົງຄະແນນສຽງຂອງຄນະກັມມະ ການບໍຣິຫານ ເພື່ອໃຫ້ຂື້ນມາແທນທີ່ ທ່ານໂຣດຣີໂກ ຣາໂຕ (Rodrigo Rato) ຈາກປະເທດເອັສປາຍ (ສເປນ) ທີ່ໄດ້ລາອອກຈາກຕໍາແໜ່ງກອ່ນໝົດປີການ

ທ່ານສຕໂຣສການ ອາຍຸ 58 ປີ ໄດ້ຮັບການສນັບສນູນຈາກປະທານາທິບໍດີຝຣັ່ງ ນິໂກ
ລາສ໌ ຊາຣ໌ໂກຊີ ທີ່ສັງກັດພັກການເມືອງທີ່ແຕກຕ່າງ ຄືພັກຂວາ UMP ທີ່ເປັນຜູ້ສເນີ
ໃຫ້ອດີດຜູ້ນໍາພັກສັງຄົມນິຍົມສມັກກໍາຕໍາແໜ່ງອັນສຳຄັນດັ່ງກ່າວ ໃນນາມຂອງທີສດີເປີດ
ກວ້າງເອົານັກການເມືອງທີ່ມີຄວາມສາມາດ ມີປະສົບການຈາກທຸກພັກເຂົ້າມາຮ່ວມງານ
ກັບຣັຖບານ

ຫລັງຈາກໄດ້ຮັບການສນັບສນູນເປັນເອກສັນຈາກສຫະພາບເອີຣົບແລ້ວ ທ່ານ ສໂຕຣສ
ການຫ໌ກໍໄດ້ຮັບການສນັບສນູນຕື່ມອີກຈາກສຫະຣັດອະເມຣິກາ ຊຶ່ງເປັນປະເທດທີ່ມີນ້ຳໜັກ
ແລະມີສຽງຫລາຍກວ່າໝູ່ ພອ້ມທັງໄດ້ຮັບການຊົມເຊີຍຈາກບັນດາປະເທດທີ່ກໍາລັງພັທນາ
ແລະກ້າວສູ່ຍຸກອຸດສາຫະກັມທີ່ສໍາຄັນໆ ຄື ເບຣຊິລ, ອາຣ໌ຊັງຕິນ, ຊິລີ, ແລະ ອິນເດັຽ
ເປັນຕົ້ນ

ຕາມທັມນຽມແລ້ວ ຜູ້ນຳອົງການເງີນທືນສາກົນ FMI ຈະແມ່ນມາຈາກສຫະພາບເອີຣົບ
ໃນຂນະທີ່ປະທານທະນາຄານໂລກນັ້ນ ຕອ້ງແມ່ນຄົນອະເມຣິກັນ

ການເບັ່ງກ້າມຂອງຣັດເຊັຽ
ກໍແປວ່າ ທ່ານໂດມີນິກ ສໂຕຣສການຫ໌ ຈະ
ໄດ້ຮັບສຽງຫລາຍກົ່ວ 50% ຂື້ນໄປໃນການ
ເລືອກຮອບທີໜຶ່ງ ຊຶ່ງມາຍເຖິງວ່າຄູ່ແຂ່ງຄື
ທ່ານໂຢເຊັຟ ໂຕຊອ໊ບສກີ (Josef  Tosov-
sky) ຊາວເຊັກສ໌ (Tchèque) ແຕ່ບໍ່ໄດ້ຮັບ
ການສນັບສນຸນຈາກສາທາຣະນະຣັດເຊັກສ໌
ບໍ່ມີຫວັງຈະໄດ້ຮັບກຽດອັນສູງສົ່ງຂື້ນກໍາຕໍາ
ແໜ່ງຜູ້ອຳນວຍການອົງການເງີນທືນສາກົນ FMI ເລີຍ ເມື່ອເປັນເຊັ່ນນັ້ນ ໃນຮອບທີ່ສອງ
ຄນະກັມມະການບໍຣິຫານທຸກທ່ານ ໃນນັ້ນຮວມທັງກັມມະການບໍຣິຫານຈາກປະເທດຣັດ
ເຊັຽທີ່ສນັບສນຸນທ່ານໂຕຊ໊ອບສກີກໍຈະລົງຄະແນນຢ່າງເປັນເອກສັນໃຫ້ແກ່ທ່ານສໂຕຣສ
ການຫ໌

ເປັນທີ່ໜ້າສັງເກດວ່າແມ່ນຣັດເຊັຽ ເປັນຜູ້ນໍາສເນີຊື່ຂອງ ທ່ານໂຕຊ໊ອບສກີ້ ໃຫ້ ເປັນຜູ້
ສມັກທັງນີ້ເພື່ອໃຫ້ເປັນການທ້າທາຍຕໍ່ໂລກຕະວັນຕົກ ແລະເປັນການຊີ້ບອກໃຫ້ເຫັນເຖີງ
ຄວາມເປັນມຫາອຳນາດຄືນໃໝ່ຂອງຣັດເຊັຽ ຄຽງຄູ່ກັບສຫະຣັດອະເມຣິກາໃນເວທີໂລກ
ດັ່ງທີ່ເຄີຍເປັນມາແລ້ວໃນຍຸກກ່ອນການພັງທະລາຍຂອງສຫະພາບໂຊວຽດແລະຄ້າຍ
ຄອມມຸຍນິດໃນເອີຣົບຕະວັນອອກ ທັງນີ້ອັນເນື່ອງມາຈາກຣັດເຊັຽໄດ້ໃຊ້ໜີ້ສີນອັນມະຫາ
ສານຂອງຕົນກອ່ນກໍາໜົດ ໂດຍອາສັຍລາຍໄດ້ຈາກການຜລິດນ້ຳມັນດິບແລະກ໊າສທັມມະ
ຊາດ ແລະທ່າແຮງທາງດ້ານພລັງງານຂອງຣັດເຊັຽທີ່ກ່າວມານີ້ ໄດ້ກາຍມາເປັນປັດ
ຈັຍທີ່ສຳຄັນຍິ່ງທີ່ ທ່ານປະທານາທິບໍດີ ວລາດິເມັຽ ປຸດຕິນ (Vladimir Putin) ໄດ້ນຳ
ໃຊ້ເປັນເຄື່ອງມືໃນການເດີນແຕ້ມການເມືອງຂອງຕົນໃນເວທີໂລກ

ວຽກສໍາຄັນຮີບດ່ວນຂອງຜູ້ອຳນວຍການ FMI ຄົນໃໝ່
ເມື່ອໄດ້ຖືກເລືອກໃຫ້ຂື້ນກຳຕໍ່າແໜ່ງຜູ້ອຳນວຍການຂອງອົງການເງີນທືນສາກົນແລ້ວ ທ່ານ
ສໂຕຣສການຫ໌ ກໍຈະມີພາຣະກິດຮີບດ່ວນຫລາຍປະການເພື່ອດັດແປງປະຕິຮູບອົງການເງິນ
ຂອງໂລກແຫ່ງນີ້ ໃຫ້ມີປະສິດທິພາບ ສອດຄອ່ງກັບຍຸກສມັຍ ສອດຄ່ອງກັບສພາບຕົວຈີງ
ຂອງໂລກທີ່ປ່ຽນແປງເມື່ອປຽບທຽບກັບຍຸກສມັຍທີ່ FMI ໄດ້ຮັບການສ້າງຕັ້ງຂື້ນມາໃນປີ
1944 ຕາມຂໍ້ຕົກລົງ Bretton Woods ພອ້ມໆກັນກັບການກໍ່ຕັ້ງທະນາຄານໂລກ

ມາຮອດດຽວນີ້ ອົງການເງີນທືນສາກົນ FMI ມີໜ້າທີ່ສຳຄັນຕົ້ນຕໍໃນການກະຕຸ້ນໃຫ້ມີການ
ຮວ່ມມືປະສານງານເພື່ອເຮັດໃຫ້ສຖານະການການເງິນແລະການຄ້າຂອງໂລກມີສເຖັຽ
ຣະພາບ ພອ້ມກັບໃຫ້ຄວາມຊວ່ຍເຫລືອຕໍ່ບັນດາປະເທດທີ່ກຳລັງພົບກັບບັນຫາທາງດ້ານ
ການເງີນ

ໃນປັດຈຸບັນ FMI ບໍ່ສາມາດເປັນຜູ້ກຳໜົດກົດເກນຕລາດການເງິນແຕ່ພຽງຜູ້ດຽວໄດ້
ແຕ່ວົງການຕລາດຮຸ້ນ ພ້ອມທັງບັນດາມຫາເສດຖີທັງຫລາຍໃນໂລກ ຫລື ສປ ຈີນ ທີ່ມີ
ເງິນທຶນສຳຮອງຕ່າງປະເທດອະພິມຫາສານເຖິງ 1 200 000 ລ້ານດອລລາຣ໌ ກໍສາ
ມາດເປັນຜູ້ກຳໜົດກົດເກນຕລາດການຄ້າແລະການເງິນໄດ້ຄືກັນ ຕົວຢ່າງ ການກຳໜົດ
ຄ່າຂອງເງິນດອລລາຣ໌ ອະເມຣິກັນ, ເງິນຢູໂຣຂອງສຫະພາບເອີຣົບແລະ ເງິນເຢັນຂອງ
ຍີ່ປຸ່ນເປັນຕົ້ນ

ໃຫ້ນ້ຳໜັກຕື່ມຕໍ່ມະຫາອໍານາດໃໝ່
ວຽກງານສຳຄັນຮີບດ່ວນຂອງຜູ່ນຳ FMI ຜູ້ໃໝ່ກໍຈະແມ່ນການປະຕິຮູບກົດລະບຽບພາຍ
ໃນຂອງສຖາບັນເພື່ອໃຫ້ບັນດາປະເທດມະຫາອຳນາດເສຖກິດໃໝ່ ຄື ສ.ປ. ຈີນ, ອີນ
ເດັຽ, ເບຣຊິລ ຫລື ເມັກຊິກ (ເມັກຊິໂກ) ໃຫ້ມາມີນ້ຳໜັກຫລາຍຂື້ນ ພອ້ມທັງຈະຕອ້ງນຳ
ກິຈການອັນໃໝ່ເຂົ້າປະຕິບັດຄື ຊ່ວຍເຫລືອປະເທດທີ່ທຸກຈົນ ຫາຊ່ອງທາງແກ້ໄຂການ
ພັທນາທີ່ບໍ່ເທົ່າທຽມກັນໃນໂລກ

ສ່ວນສຫະຣັດອະເມລິການັ້ນ ກໍຕ້ອງການໃຫ້ຜູ້ອຳນວຍການຄົນໃໝ່ຂອງ FMI ຮຽກຮ້ອງ
ໃຫ້ ສ.ປ. ຈີນ ຂື້ນຄ່າເງິນຢວນຂອງຕົນ ທີ່ກຸງວໍຊີງຕັນເຫັນວ່າອ່ອນຕົວກວ່າທີ່ຄວນ ເຮັດ
ໃຫ້ສິນຄ້າຂາອອກຂອງຈີນຖ້ວມລົ້ນຕລາດອະເມຣິກັນ ເຮັດໃຫ້ສຫະຣັດອະເມຣິກາຂາດ
ດຸນການຄ້າກັບຈີນຈຳນວນມຫາສານມາຕລອດ

ທ່ານໂດມີນີກ ສໂຕຣສການຫ໌ ໄດ້ຮັບຮູ້ເຖິງຄວາມຈິງຂໍ້ນີ້ ແລະໄດ້ສແດງທ່າທີໄປແລ້ວວ່າ
ທ່ານຈະເປັນຜູ້ອຳນວຍການ FMI ຂອງທັງໝົດ 185 ປະເທດສມາຊິກ ຈະເປັນຕົວແທນ
ຂອງບັນດາປະເທດອຸດສາຫະກັມໃຫ່ຍຮັ່ງມີ ຄືກັນກັບເປັນຕົວແທນຂອງບັນດາປະເທດດ້ອຍ
ພັທນາທີ່ຍັງທຸກຈົນ ຄືດັ່ງປະເທດ Palau ທີ່ປະກອບສ່ວນເຂົ້າໃນເງິນທຶນຂອງ FMI ພຽງ
ແຕ່ 0,001% ເທົ່ານັ້ນ ໃນຂນະທີ່ສຫະຣັດອະເມຣິກາ ມີເຖີງ 17.09% ຫລາຍກວ່າທຸກ
ປະເທດສມາຊິກອື່ນໆ (ທ່ານທີ່ຕ້ອງການຟັງບົດວິເຄາະໂດຍສຽງຂອງນັກຂ່າວ ກະ
ຣຸນນາຄລິກລຸ່ມນີ້)