ບົດວິເຄາະ:: ການຢ້ຽມຢາມຣັດເຊັຽ ຂອງຜູ້ນຳຝຣັ່ງເສດ ເປັນຫຍັງຊາຣ໌ໂກຊີ ຈຶ່ງປ່ຽນທ່າທີ ຢ່າງໜ້າມືເປັນຫັລງມື?

ຜິດກັນໄກ ເມື່ອທຽບກັບທີ່ເຄີຍ ໃຊ້ຄຳເວົ້າແຂງກ້າວ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 10/10/2007 ແກ້ໄຂໃຫມ່ຫລ້າສຸດເມື່ອວັນທີ 10/10/2007 15:28 TU

ທ່ານປະທານາທິບໍດີຝຣັ່ງເສດ ນິໂກລາສ໌ ຊາຣ໌ໂກຊີ (ຊ້າຍ) ສັມຜັດມືດ້ວຍຄວາມ ເບີກບານມ່ວນຊື່ນກັບຜູ້ນຳຣັດເຊັຽ ທ່ານ ປະທານາທິບໍດີ ວລາດິເມັຽຣ໌ ປຸດຕິນ ຫລັງເສັດສິ້ນກອງປະຊຸມໃຫ້ສັມພາດຂ່າວ ຮ່ວມກັນທີ່ກຸງມົສກູ (ພາບ:Reuters)

ການພົບປະສຸດຍອດລະຫວ່າງຜູ້ນຳຝຣັ່ງ ເສດແລະຣັດເຊັຽເມື່ອຄ່ຳວານນີ້ (ອັງຄານ 9 ຕຸລາ) ມີບັນຍາກາດຜ່ອນຄາຍ ເວົ້າ ງ່າຍໆກໍຄື ຜິດກັນໄກເມື່ອປຽບທຽບກັບທ່າ ທີຂອງທ່ານປະທານາທິບໍດີຊາຣ໌ໂກຊີ ທີ່ ເຄີຍໃຊ້ຄຳເວົ້າທີ່ແຂງໃນການຕຳນິຕິຕຽນ ຕໍ່ທ່າທີໂດຍສ່ວນຮວມຂອງປະເທດຣັດ ເຊັຽໃນເວທີການເມືອງໂລກ ເປັນຫຍັງມີ ການປ່ຽນແປງແບບໜ້າມືເປັນຫລັງມືຄື ແນວນີ້ ?

ມຫາອຳນາດທີ່ເທົ່າທຽມກັນ
ຄຳຕອບງ່າຍໆກໍຄື ການປ່ຽນແປງທ່າທີດັ່ງກ່າວເປັນການ ຊີ້ໃຫ້ເຫັນເຖິງການເດີນແຕ້ມ
ທາງດ້ານການທູດແບບສອງແງ່ສອງມຸມຂອງຜູ້ນຳຝຣັ່ງເສດ ທັງນີ້ເພາະທັງສອງປະເທດ
ຝຣັ່ງເສດແລະ ຣັດເຊັຽ ຕ່າງກໍເປັນປະເທດໃຫຍ່ ເປັນມຫາອຳນາດນິວເຄລັຽ ແລະເປັນ
ສມາຊິກຖາວອນຂອງຄນະມົນຕຣີຄວາມໝັ້ນຄົງແຫ່ງອົງການສຫະປະຊາຊາດດ້ວຍກັນ

ດັງນັ້ນການແກ້ໄຂປັນຫາຄວາມຫຍຸ້ງຍາກໃດໆໃນເວທີການເມືອງໂລກຍ່ອມເປັນໄປບໍ່ໄດ້ຖ້າ
ປາສຈາກການຮ່ວມໄມ້ຮ່ວມມືຊຶ່ງກັນແລະກັນ ແລະ ການສືບຕໍ່ການປະເຊີນໜ້າກໍເປັນສິ່ງທີ່
ເປັນໄປບໍ່ໄດ້

ດັ່ງນັ້ນບໍ່ວ່າສອງປະເທດຈະມີການຂັດແຍ່ງກັນໃນປັນຫາຕ່າງໆຂອງໂລກຫລາຍປານໃດກໍ
ຕາມ ທັງສອງປະເທດກໍຈຳເປັນຈະຕ້ອງຊອກຫາທາງອອກທີ່ອະລຸ້ມອະຫລ່ວຍທີ່ທັງສອງ
ຝ່າຍພໍຮັບໄດ້

"ທ່ານປຸດຕິນເປັນບຸກຄົນທີ່ສລາດຫລັກແຫລມ ເປັນບຸກຄົນທີ່ຮູ້ແຈ້ງໃນທຸກປັນຫາຂອງໂລກ
ເປັນບຸກຄົນທີ່ມີເຈຕນາດີໃນການແລກປ່ຽນຄວາມຄິດເຫັນ ບໍ່ແມ່ນບຸກຄົນທີ່ຖືກແຕ້ມສີທີ່ພວກ
ເຮົາເຄີນເຫັນໃນຂ່າວຕ່າງໆທີ່ບັນດາສື່ນຳເຜີຍແຜ່ແຕ່ຢ່າງໃດ" ທ່ານຊາຣ໌ໂກຊີໄດ້ກ່າວຕໍ່
ຜູ້ສື່ຂ່າວ

  ທ່າທີໃກ້ຄຽງກັນກ່ຽວກັບ
  ປັນຫານິວເຄລັຽອີຫຣ່ານ
ກ່ຽວກັບປັນຫານິວເຄລັຽອີຫຣ່ານ
ຜູ້ນຳຝຣັ່ງເສດກໍກ່າວວ່າທັງ
ສອງຝ່າຍມີທ່າທີທີ່ໃກ້ຄຽງກັນ
ແຕ່ທ່ານກໍບໍໄດ້ໃຫ້ລາຍລະອຽດ
ຫຍັງຕື່ມຫລາຍກວ່ານີ້

ທີ່ຜ່ານມາຝ່າຍຝັຣ່ງເສດກໍຄືກັນ
ກັບສຫະພາບເອີຣົບແລະສຫະ
ຣັດອະເມຣິກາ ເຫັນດີໃຫ້ມີການເພີ້ມມາຕຣາການລົງໂທດຕໍ່ອີຫຣ່ານໃຫ້ໜັກໜ້າເພື່ອກົດ
ດັນໃຫ້ປະເທດນີ້ລົ້ມເລີກໂຄງການນິວເຄລັຽຂອງຕົນ

ໃນຂນະທີ່ຝ່າຍຣັດເຊັຽນັ້ນມີແຕ່ເຄີຍຮ່ວມສນັບສນຸນມະຕິປະນາມອີຫຣ່ານຊື່ໆ ແຕ່ບໍ່ເຫັນ
ພ້ອມໃຫ້ມີການເພີ້ມມາຕຣາການລົງໂທດ ໃນເມື່ອທ່ານປະທານາທິບໍດີຝຣັ່ງເສດບໍ່ໄດ້ໃຫ້
ລາຍລະອຽດກ່ຽວກັບທີ່ວ່າ "ສອງປະເທດມີທ່າທີໃກ້ຄຽງກັນ" ກ່ຽວກັບປັນຫານິວເຄລັຽອີ
ຫຣ່ານແລ້ວ ໃນຂັ້ນຕໍ່ໄປຈຶ່ງມີຄວາມເປັນໄປໄດ້ຢ່າງສູງທີ່ຣັດເຊັຽຈະສືບຕໍ່ທ່າທີເດີມ ກ່າວ
ຄືຄັດຄ້ານການວາງມາຕຣາການລົງໂທດເພີ້ມເຕີມຕໍ່ອີຫຣ່ານຕໍ່ໄປ

ກ່ຽວກັບແຂວງໂກໂຊໂວ
ສ່ວນທີ່ກ່ຽວກັບແຂວງ "ໂກໂຊໂວ" ນັ້ນ ຝ່າຍຝຣັ່ງເສດກໍຄືກັນກັບສຫະພາບເອີຣົບ ເຫັນ
ວ່າການແຍກອອກຈາກປະເທດແຊກບີເພື່ອປະກາດຕົວເປັນປະເທດເອກຣາດ ເປັນສິ່ງທີ່
ຫລີກລ້ຽງບໍ່ໄດ້ ໃນຂນະທີ່ຝ່າຍຣັດເຊັຽຄັດຄ້ານການເປັນເອກຣາດຂອງແຂວງນີ້ທີ່ມີພົລ
ເມືອງເຖິງກວ່າ90% ເປັນຄົນເຊື້ອຊາດອາລບານີແລະນັບຖືສາສນາອິສລາມ

ທັງນີ້ເພາະໃນແງ່ວັທນະທັມແລະການເມືອງແລ້ວ ຣັດເຊັຽມີຄວາມຜູກພັນຕິດແໜ້ນກັບ
ປະເທດແຊກບີມາຕລອດ ຄົນແຊກບີແລະຄົນຣັດເຊັຽມີເຊື້ອຊາດເຜົ່າພັນແລະພາສາ
ປາກເວົ້າອັນດຽວກັນ ຄືເຊື້ອຊາດແລະພາສາ Slave ນັ້ນເອງ

ຫລັງການພົບປະຫາລືລະຫວ່າງສອງຜູ້ນຳ ຝຣັ່ງເສດ-ຣັດເຊັຽ ແລ້ວ ທ່ານຊາຣ໌ໂກຊີໄດ້
ເຜີຍຕໍ່ຜູ້ສື່ຂ່າວວ່າສອງປະເທດຫຍັບເຂົ້າໃກ້ກັນຫລາຍທີ່ສຸດ ແລະມີທາງເປັນໄປໄດ້ທີ່
ຈະມີທາງອອກຮ່ວມກັນ

ແຕ່ທີ່ໜ້າສັງເກດແມ່ນຢູ່ບ່ອນວ່າ ທາງອອກຮ່ວມກັນທີ່ທ່ານປະທານາທິບໍດີຝຣັ່ງເສດຍົກຂື້ນ
ມາເວົ້ານັ້ນແມ່ນ "ທາງອອກຮ່ວມກັນທີ່ປະເທດແຊກບີພໍຮັບໄດ້" ຊຶ່ງກໍໝາຍຄວາມວ່າ
"ຄວາມເປັນເອກເທດຢ່າງກວ້າງຂວາງໃນການປົກຄອງຕົນເອງ" ຂອງແຂວງໂກໂຊໂວ
ນັ້ນເອງ ບໍ່ແມ່ນການແຍກຕົວອອກເປັນປະເທດເອກຣາດ ຊຶ່ງກໍແມ່ນທ່າທີດັ້ງເດີມຂອງ
ຣັດເຊັຽຢູ່ແລ້ວ

ເພາະສນັ້ນຈຶ່ງເຫັນໄດ້ວ່າໃນເຣື່ອງຂອງແຂວງໂກໂຊໂວນີ້ ຝຣັ່ງເສດຈຶ່ງໜ້າຈະເປັນຝ່າຍ
ປ່ຽນທ່າທີຫຍັບເຂົ້າໃກ້ຣັດເຊັຽ ຫລາຍກວ່າທີ່ຝ່າຍຣັດເຊັຽຈະເປັນຜູ້ປ່ຽນທ່າທີ

ປັນຫາຂີປະນາວຸດຕ້ານຂີປະນາວຸດ
ເປັນທີ່ຊາບກັນດີແລ້ວວ່າສຫະຣັດອະເມຣິກາກຳລັງດຳເນີນການຕິດຕັ້ງຂີປະນາວຸດຕ້ານ
ຂີປະນາວຸດໃນສາທາຣະນະຣັດເຊັກສ໌ແລະໃນປະເທດໂປໂລຍ ສອງປະເທດອດີດບໍຣິວານ
ຂອງສຫະພາບໂຊວຽດທີ່ພັງທະລາຍໄປແລ້ວ

ວໍຊິງຕັນອ້າງວ່າເພື່ອປ້ອງກັນການຍິງຈຣວດຈາກອີຫຣ່ານ ແຕ່ຣັດເຊັຽຖືວ່າເປັນການ
ປິດລ້ອມແລະເປັນພັຍນາບຂູ່ຕໍ່ຕົນດ້ວຍ ທັງນີ້ເພາະນຳມາຕິດຕັ້ງໃນປາກປະຕູບ້ານຂອງ
ຣັດເຊັຽໂດຍບໍ່ໃຫ້ຣັດເຊັຽໄດ້ມີສ່ວນນຳໃນການວາງແຜນ

ກ່ຽວກັບປັນຫານີ້ ທ່ານປະທານາທິບໍດີຝຣັ່ງເສດກໍພຽງແຕ່ໄດ້ແນະນຳໃຫ້ກຳລັງໃຈແກ່
ຣັດເຊັຽການການສືບຕໍ່ເຈຣະຈາກັບສຫະຣັດອະເມຣິກາກ່ຽວກັບຂໍ້ສເນີຂອງຣັດເຊັຽທີ່ຈະ
ໃຫ້ມີການນຳໃຊ້ສຖານີຣາດາຣ໌ໃນປະເທດອາແຊກໄບຢັງ (Azerbaïdjan) ຊຶ່ງກໍເຄີຍ
ເປັນຣັດໜຶ່ງຂອງອດີດສຫະພາບໂຊວຽດ ຊຶ່ງຈະທຳໃຫ້ຣັດເຊັຽມີສ່ວນຮ່ວມໃນໂຄງ
ການຂີປະນາວຸດຕ້ານຂີປະນາວຸດດັ່ງກ່າວ

ໃຜຍິງຈຣວດໃສ່ປະເທດເຊອ໊ອກຊີ (Géorgie)
ນອກຈາກປັນຫາຂີປະນາວຸດຕ້ານຂີປະນາວຸດແລ້ວ ທ່ານປະທານາທິບໍດີຝຣັ່ງເສດຍັງ
ເຜີຍຕໍ່ຜູ້ສື່ຂ່າວອີກວ່າເພີ່ນໄດ້ຢິຍົກປັນຫາການຍິງຈຣວດໄປຕົກໃນປະເທດເຊອ໊ອກຊີ
(Géorgie) ເມື່ອວັນທີ 6 ສິງຫາທີ່ຜ່ານມາຂຶ້ນມາເວົ້າກັບຜູ້ນຳຣັດເຊັຽດ້ວຍ ແຕ່ກໍບໍ່
ໄດ້ເຜີຍວ່າ ວລາດິເມັຽຣ໌ ປຸດຕິນ ໄດ້ໃຫ້ຄຳຕອບແລະຊີ້ແຈງແນວໃດກ່ຽວກັບປັນຫານີ້

ສຳລັບຜູ້ນຳຂອງປະເທດເຊອ໊ອກຊີແລ້ວ ແມ່ນເປັນທີ່ຈະແຈ້ງທີ່ສຸດວ່າລູກຈຣວດທີ່
ໄປຕົກໃນປະ ເທດຂອງຕົນເມື່ອວັນທີ 6 ສິງຫານັ້ນ ແມ່ນກອງທັບຣັດເຊັຽເປັນຜູ້ຍິງ
ນາບຂູ່

ນອກຈາກນີ້ ການຄາຕກັມນັກຂ່າວຣັດເຊັຽ ຄືທ່ານນາງ ອານນາ ໂປລິດໂກ໊ຟສໄກຢາ
(Anna Politkovskaïa) ເມື່ອໜຶ່ງປີທີ່ຜ່ານມາ, ປັນຫາສົງຄາມໃນເຊັດເຊນີ
(Tchetchénie) ແລະປັນຫາການລະເມີດສິດທິມນຸດຊົນອື່ນໆ ກໍໄດ້ຮັບການຢິບຍົກ
ໂດຍຜູ້ນຳຝຣັ່ງເສດຕໍ່ໜ້າຜູ້ນຳຣັດເຊັຽເຊັ່ນດຽວກັນ ແລະທັງໝົດນີ້ທ່ານຜູ້ນຳຝຣັ່ງ
ເສດກໍບໍ່ໄດ້ໃຫ້ລາຍລະອຽດວ່າຄຳຕອບຂອງຝ່າຍຣັດເຊັຽນັ້ນ ເປັນທີ່ພໍໃຈຫລືບໍ່ ຈຶ່ງ
ທຳມີການສັນນິດຖານກັນວ່າໜ້າຈະເປັນການຢິບຍົກຂື້ນມາສົນທະນາກັນ "ພໍເປັນພິທີ"
ເທົ່ານັ້ນ

ປັນຫາຣັດເຊັຽໃຊ້ພລັງງານເປັນອາວຸດການເມືອງ
ໃນຂນະທີ່ປັນຫາກ່ຽວກັບການທີ່ຣັດເຊັຽນຳໃຊ້ພລັງງານເປັນອາວຸດທາງດ້ານການ
ເມືອງເພື່ອກົດດັນບັນດາປະເທດທີ່ເຄີຍຢູ່ໃນອດີດສຫະພາບໂຊວຽດມາກ່ອນ ຕົວ
ຢ່າງປະເທດອຸຍແກຣນ ທີ່ມີທ່າທີເອນອຽງມາທາງດ້ານຕະວັນຕົກ ດ້ວຍການປະ
ກາດຂຶ້ນຣາຄາພວດພາດບາດດຽວຢ່າງກະທັນຫັນ ແລະບາງຄັ້ງກໍເຖິງຂນາດຕັດ
ການລຳລຽງສົ່ງກ໊າສ ຈົນກະທົບມາເຖິງຫລາຍປະເທດໃນສຫະພາບເອີຣົບທີ່ຊື້ກ໊າສ
ຈາກຣັດເຊັຽຢ່າງຫລວງຫລາຍນັ້ນ ກໍບໍ່ໄດ້ມີການຢິບຍົກຂື້ນມາສົນທະນາກັນຊ້ຳ

ມີການອ້າງເຫດຜົນວ່າ "ເວລາບໍ່ພຽງພໍ" ທັງໆທີ່ເມື່ອບໍ່ນານມານີ້ ທ່ານນິໂກລາສ໌
ຊາຣ໌ໂກຊີ ເຄີຍກ່າວຕຳນິຕິຕຽນຣັດເຊັຽໃນປັນຫານີ້ວ່າ "ຮຸນແຮງ" ດ້ວຍການນຳໃຊ້
ພລັງງານເປັນອາວຸດທາງດ້ານການເມືອງ

ເປັນຫຍັງຝຣັ່ງເສດຈຶ່ງປ່ຽນທ່າທີ?
ຄຳອະທິບາຍທີ່ດີທີ່ສຸດຕໍ່ການປ່ຽນແປງທ່າທີຂອງທ່ານປະທານາທິບໍດີຊາຣ໌ໂກຊີ
ໃນຄັ້ງນີ້ ແມ່ນຜົນປໂຍດທາງດ້ານການຄ້າ ເມື່ອເດືອນກໍຣະກົດທີ່ຜ່ານມາບໍຣິສັດ
Total ຂອງຝຣັ່ງເສດກໍໄດ້ຮັບໄຟຂຽວຈາກຣັຖບານຣັດເຊັຽແລ້ວ ໃຫ້ດຳເນີນການ
ຂຸດເຈາະກ໊າສທັມມະຊາດໃນທະເລ Barents ຂອງຣັດເຊັຽໄດ້ ນອກຈາກນີ້ອີກທັງ
ສອງປະເທດກໍຍັງມີການລົງທຶນຮ່ວມກັນອີກໃນທາງດ້ານການບິນ

ອີກປະການໜຶ່ງ ປະເທດຣັດເຊັຽດຽວນີ້ບໍ່ແມ່ນປະເທດຣັດເຊັຽໃນສມັຍຊຸມປີ 1990
ຕໍ່ໄປອີກແລ້ວ ທັງນີ້ເພາະມີລາຍໄດ້ມຫາສານຈາກການຂາຍກ໊າສໃຫ້ໂລກຕະວັນຕົກ
ຈົນສາມາດໃຊ້ໜີ້ສິນຄືນໃຫ້ແກ່ FMI ແລະປະເທດມຫາອຳນາດຕະວັນຕົກອື່ນໆໄດ້
ຈົນໝົດສິ້ນແລ້ວ

ໝາຍຄວາມວ່າຣັດເຊັຽໄດ້ຫວນກັບຄືນມາຢູ່ໃນຖານະເປັນຄູ່ແຂ່ງກັບສຫະຣັດອະເມ
ຣິກາແລະໂລກຕະວັນຕົກໄດ້ຄືເກົ່າແລ້ວ ບໍ່ໄດ້ກົ້ມໜ້າໃຊ້ໜີ້ຄືກັນກັບໃນຊຸມປີ 1990
ຫລັງການພັງທະລາຍຂອງສຫະພາບໂຊວຽດຕໍ່ໄປອີກ

ກໍຢ່າງທີ່ໄດ້ກ່າວມາແຕ່ຕົ້ນນັ້ນເອງວ່າ ລະຫວ່າງຍັກໃຫຍ່ຕໍ່ຍັກໃຫຍ່ ຍ່ອມເປັນໄປ
ບໍ່ໄດ້ທີ່ຈະປະເຊີນໜ້າກັນເຖິງຂັ້ນແຕກຫັກ ການຫາທາງອອກຕໍ່ຄວາມຂັດແຍ່ງຍ່ອມ
ເປັນທາງສາຍກາງຢູ່ສເມີ ກໍເຂົ້າທຳນອງທີ່ວ່າ "ຊິ້ນໄປ ປາມາ" ນັ້ນເອງ