ການປະທ້ວງນັດຢຸດງານ ໃນຝຣັ່ງ

ມື້ອື່ນ ຍັງດຳເນີນຕໍ່ ບົດວິເຄາະ 14/11/2007

ໂດຍ ບັນດານ ສີສຸນທອນ B. Sisounthone

ບົດຄວາມນີ້ເຜີຍແຜ່ເມື່ອວັນທີ 14/11/2007 ແກ້ໄຂໃຫມ່ຫລ້າສຸດເມື່ອວັນທີ 14/11/2007 15:18 TU

ການເຈຣະຈາ ລະວ່າງກັມມະບານ ເຊເສ່ເຕ່ CGT ທ່ານ ຕີ່ໂບ່ Thibault ແລະ ລັຖມົນຕຣີແຮງງານ ທ່ານ ແບ໊ກຕຣັ່ງ Bertrand
photo : AFP

ມື້ນີ້ ມີການປະທ້ວງ ຫລາຍດ້ານ ໃນຝຣັ່ງ ແຕ່ສຳຄັນນັ້ນ ແມ່ນ ການນັດຢຸດງານຂອງພະນັກງານ ຂົນສົ່ງ ທີ່ສ້າງຄວາມເດືອດຮ້ອນ ເຮັດໃຫ້ປະຊາຊົນຢຸ້ງຍາກລຳບາກ ໃນການສັນຈອນ ທົ່ວປະເທດ

ມື້ນີ້ ມີການປະທ້ວງ ຫລາຍດ້ານໃນຝຣັ່ງ ແຕ່ສຳຄັນນັ້ນແມ່ນ ການນັດຢຸດ ງານ ຂອງພະນັກງານຂົນສົ່ງ ທີ່ສ້າງຄວາມເດືອດຮ້ອນ ເຮັດໃຫ້ປະຊາຊົນ ຕ້ອງຢຸ້ງຍາກລຳບາກ ໃນການສັນຈອນ ທົ່ວປະເທດ.

 

ຈຸດປະສົງ ໃນການປະທ້ວງ ຂອງພະນັກງານຂົນສົ່ງ ສາທາຣະນະຊົນ ນັ້ນ ມີປະເດັນໃຫຍ່ດັ່ງນີ້ :

 

1/- ຄັດຄ້ານ ການເສັຍຊ່ວຍບຳນານ ຈາກ 37,5 ປີ ຂື້ນເປັນ 40 ປີ.  ມາເຖີງປັດຈຸບັນນີ້ ມີຫລາຍກັມມະບານລັດວິສາຫະກິດ ໄດ້ຍອມຮັບເອົາ ເອົາລັກການ 40 ປີ ເໝືອນດັ່ງ ພະນັກງານທົ່ວໄປໃນຝຣັ່ງ ນັ້ນແລ້ວ.

 

ການເສັຍຊ່ວຍບຳນານທົ່ວໄປ ຂອງພະນັກງານເອກະຊົນ ປ່ຽນຈາກ

39,5 ປີ ຂື້ນເປັນ 40 ປີ ຈະເລີ້ມປະຕິບັດແຕ່ປີ 2008 ຫາ 2011

ແລະ ຈະຂື້ນ ເປັນ 41 ປີ ຈາກ ປີ 2012 ເປັນຕົ້ນໄປ.

ສ່ວນອາຍຸ ອອກກິນເບັ້ຍບຳນານ ທົ່ວໄປນັ້ນ ສາມາດເລີ້ມແຕ່ 60 ປີ ເປັນຕົ້ນໄປ ແລະ 65 ປີ ສູງສຸດ ແລະ 56 ປີ ສຳຫລັບ ຜູ່ເຮັດວຽກ ມາແຕ່ ອາຍຸ 14 ປີ  (ທັງໝົດນີ້ ອາຈະຖືກປ່ຽນແປງໃໝ່ ກໍເປັນໄດ້ ໃນອານາຄົດ).  ແລະ ການຄຳນວນ ເງີນບຳນານ ຂອງພະນັກງານ ເອກະຊົນນັ້ນ ຕ້ອງເອົາເງີນເດືອນທີ່ຫລາຍໃນ 25 ປີ ມາເປັນຖານນັບ.

 

ແຕ່ສຳຫລັບ ລະບົບບຳນານພິເສດ ໃນປັດຈຸບັນນີ້ ມີດັ່ງນີ້ :

-         ສຳຫລັບ ພະນັກງານ ໄຟຟ້າ EDF ແລະ ແກ໊ຊ GDF ນັ້ນ ເສັຍຊ່ວຍ 37,5 ປີ ແລະ ຖືເອົາເງີນເດືອນ ຂອງເດືອນສຸດທ້າຍ ມາເປັນຖານນັບອັຕຣາ ເງີນເບັ້ຽບຳນານ. ສ່ວນອາຍຸ ອອກກິນ

   ເບັ້ຍ ບຳນານ ລະວ່າງ 50 ຫາ 60 ປີ.

-         ສຳຫລັບ ພະນັກງານລົດໄຟ ແລະ ລົດເມ SNCF et RATP ນັ້ນ ເສັຍຊ່ວຍ 37,5 ປີ ແລະ ຖືເອົາເງີນເດືອນຂອງ 6 ເດືອນ ສຸດທ້າຍ ມາເປັນຖານນັບອັຕຣາ ເງີນເບັ້ຽບຳນານ. ສ່ວນອາຍຸ ອອກກິນເບັ້ຍບຳນານ ສາມາດເລີ້ມໄດ້ແຕ່ 50 ຫາ 60 ປີ.

 

ອີງຕາມ ຜົນລາຍງານ ຂອງສະພາສູງນັ້ນ ເຜີຍວ່າ ຜູ່ອອກ ກິນເບັ້ຽບຳ ນານ ກ່ອນອາຍຸ 55 ປີ : ພະນັກງານ ລົດເມ ແລະ ລົດໄຟໃຕ້ດິນ RATP ມີ 53,7% ສ່ວນ ພະນັກງານ ລົດໄຟ SNCF ນັ້ນ ມີ 99,7%.  ແຕ່ສຳຫລັບ ຂ້າລັຖະການນນັ້ນ ມີ 54,3% ແລະ ພະນັກ

ງານ ເອກະຊົນ ມີ ແຕ່ 17,6%.

 

2/- ກັມມະບານແຮງງານ ສະເນີໃຫ້ ຖືເອົາຄ່າຄອງຊີບ ເປັນເດັນນຶ່ງ

ສຳຄັນ ໃນການຕັ້ງຖານ ນັບອັຕຣາສ່ວນ ຂອງເງີນເບັ້ຽຍຳນານ.

 

3/- ກັມມະບານແຮງງານ ສະເນີໃຫ້ລຸດພາສີ ສ່ວນນຶ່ງ ຂອງເງີນເບັ້ຍ

ບຳນານ.

 

4/- ກັມມະບານ ສະເນີໃຫ້ເຈຣະຈາ ແຕ່ລະຂະແໜ່ງໄປ ຫຼື ແຕ່ລະ ໂຮງງານໄປ ແລະໃຫ້ມີ ຄນະບໍຣິຫານລັດວີສະຫະກິດ ຮ່ວມນຳດ້ວຍ.

 

ມື້ເຊົ້ານີ້ ກັມມະບານ ແລະແລະ ທ່ານ ແບ໊ກຕຣັ່ງ ລັຖະມົນຕຣີແຮງງານ ຕາງໜ້າລັຖະບານ ໄດ້ເຂົ້າໂຕະເຈຣະຈາກັນ ແລະໄດ້ນຳເອົາຂໍ້ສະເນີ ຂອງກັມມະບານ ໄປລາຍງານຕໍ່ ນາຍົກ ແລະ ປະທານາທິບໍດີ ທີ່ວັງ ເອ່ລີ່ເຊ່.

 

ເຫດຜົນສຳຄັນທີ່ ທາງລັຖະບານສະເນີ ເຮັດການປະຕິຮູບ ລະບົບເບັ້ຽ ບຳນານພິເສດນີ້ກໍເພາະວ່າ :

 

1/- ມີການຂາດຄວາມສະເມີພາບລະ ລະບົບພິເສດ ກັບ ລະບົບທົ່ວໄປ.

 

2/- ເຫັນວ່າ ປະຊາຊົນ ທີ່ມີອາຍຸຍືນ ຢູ່ໃນວັຍບຳນານນັ້ນ ຫລາຍຂື້ນ ກວ່າເກົ່າ ແລະ ຈຳນວນຜູ່ທຳງານ ເສັຍຊ່ວຍນັ້ນ ບໍ່ພຽງພໍກັບ ການຈະ

ຖອກ ເງີນເສັຽຊ່ວຍເຂົ້າຄັງບຳນານ, ສະນັ້ນ ອີກປະມານສິບກວ່າປີ ຂ້າງໜ້ານີ້ ແນ່ນອນ ຈະຕ້ອງມີບັນຫາ ແລະ ລັຖະບານ ກໍເຫັນສົມຄວນ ຈະຕ້ອງເລີ້ມປະຕິຮູບແຕ່ດຽວນີ້ເປັນຕົ້ນໄປ ເພື່ອຮັກສາລະບົບບຳນານ ແບບແບ່ງສັນປັນສ່ວນ.

 

ສ່ວນກ່ຽວກັບ ການຈະປະຕິຮູບລະບົບບຳນານພິເສດນີ້ ປະທານາທິບໍດີ ສ໊າກໂກ່ຊີ່ ໄດ້ປະກາດນະໂຍບາຍມາແຕ່ຕອນຫາສຽງເລືອກຕັ້ງພຸ້ນແລ້ວ ແລະປະຊາຊົນ ສ່ວນຫລາຍກໍເຫັນພ້ອມນຳ.

ສນັ້ນ ລັຖະບານຈຶ່ງໄດ້ຕັດສິນໃຈປະຕິຮູບ ໂດຍບໍ່ຫວັ່ນຕໍ່ການປະທ້ວງ ນັດຢຸດງານໃດໆທັງນັ້ນ ຊຶ່ງກ່ອນໜ້ານີ້ບໍ່ມີ ລັຖະບານຊຸດໃດ ສາມາດ ແຕະຕ້ອງ ລະບົບບຳນານພິເສດນີ້ໄດ້ເລີຍ ເພາະແຕ່ລະຄັ້ງຜ່ານມານັ້ນ ການປະທ້ວງລະດັບຊາດ ໄດ້ກົດດັນ ສົ່ງຜົນສະທ້ອນເຮັດໃຫ້ ກົງຈັກ ເສຖກິດ ແລະສັງຄົມຢຸດສະງັກ ອັນເປັນເຫດໃຫ້ລັຖະບານ ຈຳຕ້ອງ ໄດ້ຍອມຖອນການປະຕິຮູບ.