ຕໍ່ໜ້າວິກິຕການ ການເມືອງໃນພະມ້າ

ອາຊຽນຍັງຄົງມີທ່າທີ ແບບສອງແງ່ສອງມຸມ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 18/11/2007 ແກ້ໄຂໃຫມ່ຫລ້າສຸດເມື່ອວັນທີ 18/11/2007 13:29 TU

ຊາວພະມ້າຊູປ້າຍປະທ້ວງໃກ້ໆສຖານທູດສິງ ຄະໂປ ທີ່ກຸງມະນີລາ ປະເທດຟີລິບປິນ (ພາບ: Reuters)

ເມື່ອພິຈາຣະນາຈາກກະແສຂ່າວທີ່ພວກ
ເຮົາໄດ້ຮັບໃນມື້ນີ້ (ອາທິດ 18 ພະຈິກ)
ກໍພໍສາມາດເວົ້າໄດ້ວ່າ ຄຳຖາມທີ່ວ່າ
"ກອງປະຊຸມສຸດຍອດກຸ່ມປະເທດອາຊຽນ
ຈະສາມາດແກ້ໄຂປັນຫາວິກິຕການທາງ
ດ້ານການເມືອງໃນປະເທດພະມ້າໄດ້ແນວ
ໃດ?" ນັ້ນ ຍັງຄົງເປັນເຄື່ອງໝາຍຄຳ
ຖາມທີ່ບໍ່ມີຄຳຕອບທີ່ຈະແຈ້ງຢູ່ຕໍ່ໄປ

ທ່າທີແບບສອງແງ່ສອງມຸມ
ຖ້າຈະເວົ້າອີກຢ່າງໜຶ່ງກໍຄື ອາຊຽນຍັງສແດງທ່າທີແບບສອງແງ່ສອງມຸມຢູ່ຄືເກົ່າ ເຮົາມາ
ວິເຄາະທ່າທີຂອງປະເທດເຈົ້າພາບເສັຽກ່ອນ ນາຍົກ ຣມຕ ສິງຄະໂປ ທ່ານລີຊຽນລຸງ
ໄດ້ໃຫ້ສັມພາດຕໍ່ລາຍວັນ "The Straight Times" ສແດງທັສນະຈະແຈ້ງງວ່າ
ສຖານະການໃນປະເທດພະມ້າທີ່ເປັນຢູ່ໃນເວລາປັດຈຸບັນ ບໍ່ສາມາດທີ່ຈະສືບຕໍ່ຍືດເຍື້ອ
ຍາວນານຕໍ່ໄປແນວນີ້ໄດ້ອີກ ທັງນີ້ກໍເພາະສ້າງຜົນກະທົບກະເທືອນໄປທົ່ວຂົງເຂດ ໝາຍ
ຄວາມວ່າກະທົບຕໍ່ອາຊຽນທັງມວນ

ຈາກການໃຫ້ສັມພາດດັ່ງກ່າວ ເຮົາກໍເບີ່ງເຫັນໄດ້ວ່າແມ່ນການເອົາທ່າທີທີ່ໜັກແໜ້ນໃນ
ທຳນອງທີ່ວ່າ ອາຊຽນຕ້ອງເດັດດ່ຽວເພື່ອປະນາມຕໍ່ການໃຊ້ຄວາມຮຸນແຮງປາບປາມ
ຂບວນການປະທ້ວງໃນປະ ເທດພະມ້າ

ແຕ່ອີກດ້ານໜຶ່ງ ເລຂາທິການຂອງອາຊຽນ ທ່ານອົງເກັງຢົງ ຊຶ່ງກໍເປັນຊາວສິງຄະໂປ
ຄືກັນ ຊ້ຳພັດໄດ້ ອອກມາກ່າວໃນລັກສນະເປັນການປ້ອງກັນໂດຍທາງອ້ອມຕໍ່ລະບອບ
ຜເດັດການທະຫານພະມ້າ ໂດຍທ່ານໄດ້ປະຕິເສດຕໍ່ການຮຽກຮ້ອງໃຫ້ມີການຂັບໄລ່ພະ
ມ້າອອກຈາກການເປັນສມາຊິກຂອງອາຊຽນ

ເລຂາທິການອາຊຽນສແດງເຫດຜົນວ່າ ການຂັບໄລ່ພະມ້າອອກຈາກການເປັນສມາຊິກ
ນັ້ນ ສຖານະການກໍຍິ່ງຈະໜັກໜ້າ ບັນດານາຍພົນທັງຫລາຍທີ່ກຳບັງຫຽນຂອງປະເທດ
ພະມ້າໃນເວລາປັດຈຸບັນຍິ່ງຈະມີຄວາມສດວກສບາຍຫລາຍຂື້ນໃນການລ່ວງລະເມີດສິດ
ທິມນຸດຊົນ ໂດຍຈະບໍ່ມີໃຜມາທັກທ້ວງໃຫ້ໄດ້ຍິນ ກໍໃນທຳນອງທີ່ວ່າທາງທີ່ດີກໍໃຫ້ພະມ້າ
ຢູ່ເປັນສມາຊິກຕໍ່ໄປ ຖ້າມີປັນຫາໃດກໍຄ່ອຍເວົ້າຄ່ອຍຈາກັນໄດ້

ເມື່ອສຣຸບຄວາມແລ້ວ ທ່າທີຂອງນາຍົກ ຣມຕ ສິງຄະໂປ ແມ່ນທ່າທີທີ່ຢາກໃຫ້ມີການ
ເບີ່ງຄືນໃໝ່ຕໍ່ປະເພນີດັ້ງເດີມຂອງອາຊຽນ ຊຶ່ງກໍຄືປະເພນີ "ບໍ່ແຊກແຊງຕໍ່ກິຈການ
ພາຍໃນຂອງປະເທດສມາຊິກອື່ນ" ໃນຂນະທີ່ເລຂາທິການອາຊຽນ ຍັງຄົງຍຶດໝັ້ນ
ໃນປະເພນີດັ້ງເດີມນີ້ຢູ່

ກົດບັດຈະຊ່ວຍແກ້ປັນຫາແນວໃດ?
ແລ້ວການທີ່ອາຊຽນຈະມີການລົງນາມຮັບຮອງເອົາກົດບັດໃນກອງປະຊຸມສຸດຍອດຄັ້ງນີ້
ຈະສາມາດເຮັດໃຫ້ອາຊຽນນຳໃຊ້ກົດເກນເພື່ອແກ້ໄຂປັນຫາການລະເມີດສິດທິມນຸດຊົນ
ໃນປະເທດພະມ້າໄດ້ຫລືບໍ່? ຄຳຖາມນີ້ກໍຄືກັນກັບຄຳຖາມທຳອິດ ຍັງບໍ່ມີຄຳຕອບທີ່ຈະ
ແຈ້ງຄັກແນ່ ຍັງຄົງເປັນເຄື່ອງໝາຍຄຳຖາມຂນາດໃຫຍ່ຄືກັນ

ຈິງຢູ່ທີ່ກົດບັດຂອງອາຊຽນມີບົດບັນຍັດວ່າ "ສົ່ງເສີມແລະປົກປ້ອງການເຄົາຣົບສິດທິມະ
ນຸດຊົນແລະສິດທິເສຣີພາບຂັ້ນພື້ນຖານຂອງພົລເມືອງ"  ນອກຈາກນີ້ກົດບັດກໍຍັງກຳໜົດ
ໃຫ້ມີການຈັດຕັ້ງຄນະກັມມາທິການວ່າດ້ວຍສິດທິມນຸດຊົນຂອງອາຊຽນນຳດ້ວຍ

ແຕ່ຄນະກັມມາທິການທີ່ວ່າຈະຜ່ານມະຕິໃດໆໄດ້ນັ້ນ ກໍຈະຕ້ອງໄດ້ຮັບການລົງຄະແນນ
ສຽງ "ທີ່ເປັນເອກສັນ" ຈາກບັນດາປະເທດສມາຊິກເທົ່ານັ້ນ ຂໍ້ນີ້ກໍເປັນການເຫັນໄດ້
ຢ່າງຈະແຈ້ງແລ້ວວ່າບໍ່ມີວັນຈັກເທື່ອທີ່ປະເທດພະມ້າ ຫລືປະເທດສມາຊິກອື່ນໆທີ່
ລ່ວງລະເມີດສິດທິມນຸດຊົນຈະອອກສຽງເພື່ອໃຫ້ມີການປະນາມແລະເອົມາຕຣາການ
ເດັດຂາດຕໍ່ຕົນເອງ

ກໍແມ່ນຍ້ອນເຫດຜົນຄືແນວນີ້ ບັນດາຝ່າຍຄ້ານພະມ້າຈຶ່ງໄດ້ທວງໃຫ້ອາຊຽນຫ້າມບໍ່
ໃຫ້ຣັຖບານພະມ້າລົງນາມໃນກົດບັດຂອງກຸ່ມ ຊຶ່ງກໍໄດ້ຮັບການປະຕິເສດໄປແລ້ວໂດຍ
ເລຂາທິການຂອງອາຊຽນ

ທັງໝົດນີ້ ແມ່ນຍັງບໍ່ທັນໄດ້ກ່າວເຖິງທ່າທີຂອງບັນດາປະເທດສມາຊິກໃໝ່ຄື ກັມພູເຈັຽ
ລາວ ແລະ ວຽດນາມ ທີ່ຍາມໃດກໍປ້ອງກັນປະເພນີດັ້ງເດີມຂອງອາຊຽນມາຕລອດ ຄືບໍ່
ແຊກແຊງກິຈການພາຍໃນຂອງປະເທດສມາຊິກອື່ນ

ໃນກອງປະຊຸມສຸດຍອດເທື່ອນີ້ພວກເຮົາໄດ້ຮັບຂ່າວແຕ່ສເພາະການສແດງທ່າທີຂອງ
ນາຍົກ ຣມຕ ຮຸນເຊັນແຫ່ງກັມພູເຈັຽເທົ່ານັ້ນ ທີ່ຄັດຄ້ານມາຕຣາການລົງໂທດຕໍ່ພະມ້າ
ເຖິງແມ່ນລາວແລະວຽດນາມຍັງບໍ່ທັນໄດ້ສແດງທ່າທີໃນກອງປະຊຸມເທື່ອນີ້ ແຕ່ເຮົາກໍ
ເຊື່ອວ່າຈະບໍ່ມີຄວາມແຕກຕ່າງຈາກທ່າທີຂອງນາຍົກ ຣມຕ ຮຸນເຊັນ

"ການສ້າງກຸງໂຣມບໍ່ແມ່ນແລ້ວເສັດໃນວັນໜຶ່ງຍາມດຽວ"
ເມື່ອສຣຸບຄວາມແລ້ວ ໝາກຜົນທີ່ຈະເປັນຮູບທັມແທ້ໆຈາກກອງປະຊຸມສຸດຍອດອາຊຽນ
ຄັ້ງນີ້ກໍຄົງຈະມີສເພາະທາງດ້ານການຄ້າດ້ວຍການລົງນາມເພື່ອເປີດເຂດການຄ້າເສຣີ
ພາຍໃນປີ 2015 ເທົ່ານັ້ນ

ສ່ວນທີ່ກ່ຽວກັບສິດເສຣີພາບປະຊາທິປະໄຕຍຊຶ່ງໂລກຕະວັນຕົກຖືເປັນສິດທິຂັ້ນພື້ນຖານ
ຂອງພົລເມືອງນັ້ນ ອາຊຽນກໍຍັງຄົງສອງແງ່ສອງມຸມຕໍ່ໄປ

ຢ່າງໃດກໍຕາມ ການທີ່ອາຊຽນມີກົດບັດອອກມາໃຊ້ເປັນກົດເກນຂໍ້ບັງຄັບທີ່ອາຊຽນຢາກ
ໃຫ້ຄ້າຍຄືກັນກັບສຫະພາບເອີຣົບນັ້ນ ກໍຖືໄດ້ແລ້ວວ່າເປັນບາດກ້າວນ້ອຍໆບາດກ້າວໜຶ່ງ
ໄປສູ່ຂ້າງໜ້າ ຄຳພັງເພີຍໂບຮານເພີ່ນຍັງກ່າວໄວ້ວ່າ "ການສ້າງກຸງໂຣມບໍ່ແມ່ນ
ແລ້ວເສັດໃນວັນໜຶ່ງຍາມດຽວ"

ສລຸບກໍຄື ຖ້າໃຜເປັນຄົນໃຈຮ້ອນແມ່ນຈະຕ້ອງໄດ້ຮັບກັບຄວາມຜິດຫວັງຈາກກອງປະຊຸມ
ສຸດຍອດກຸ່ມປະເທດອາຊຽນໃນຄັ້ງນີ້ (ເຊີນຄລິກລຸ່ມນີ້ເພື່ອຮັບຟັງບົດວິເຄາະໂດຍ
ສຽງຂອງນັກຂ່າວ)