ບົດວິເຄາະ: ຮອບປະຖົມ ທີ່ ຣັດໄອໂອວາ ສຳຄັນແນວໃດ?

ທ່ານໃດໄດ້ຮັບໄຊຊະນະ ໃນຣັດ "ໄອໂອວາ" ນີ້ແລ້ວ ມັກຈະໄດ້ຮັບການເລືອກເປັນຕົວແທນຂອງພັກ ມີຄວາມຈິງຊ່ຳໃດ?

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 03/01/2008 ແກ້ໄຂໃຫມ່ຫລ້າສຸດເມື່ອວັນທີ 14/01/2008 07:28 TU

ແຜນທີ່ປະເທດສຫະຣັດອະເມຣິກາ ສແດງທີ່ຕັ້ງຂອງຣັດ "ໄອໂອວາ" (IOWA) (ພາບຈາກ: http://quickfacts.census.gov/qfd/index.html)

ກ່າວກັນວ່າຜູ້ສມັກທ່ານໃດ ຈາກພັກໃດກໍຕາມ ທີ່ໄດ້ຮັບໄຊຊະນະໃນການ ເລືອກຕັ້ງຮອບປະຖົມໃນຣັດ "ໄອໂອວາ" ນີ້ແລ້ວ ມັກຈະໄດ້ຮັບການເລືອກ ເປັນຕົວແທນຂອງພັກໃນຂັ້ນສຸດທ້າຍ ເຂົ້າຊ່ວງຊິງຕຳແໜ່ງປະທານາທິບໍດີ ໃນວັນທີ 4 ພະຈິກສເມີ ມີຄວາມຈິງຊ່ຳໃດ?

ເປັນພຽງຂໍ້ສັງເກດ ບໍ່ແມ່ນຫລັກຕາຍຕົວ
ໃນອດີດທີ່ຜ່ານມາ ມັກເປັນແນວນັ້ນ ຄືໃຜຊນະໃນຣັດ "ໄອໂອວາ" ນີ້ແລ້ວ ມັກໄດ້ຮັບ
ການເລືອກຕັ້ງເປັນຕົວແທນຂອງພັກເຂົ້າຊ່ວງຊິງໃນຮອບສຸດທ້າຍສເມີ ແຕ່ກໍບໍ່ແມ່ນວ່າ
ຈະສເມີໄປທຸກຄັ້ງ

ມີຜູ້ໃຫ້ຂໍ້ສັງເກດວ່າ ໃນຣະຍະ 28 ປີ ທີ່ຜ່ານມາ ໝາຍຄວາມວ່າໃນການເລືອກຕັ້ງຮອບ
ປະຖົມ 7 ຄັ້ງຫລ້າສຸດຜ່ານມາທີ່ຣັດ "ໄອໂອວາ" ນີ້  5 ທ່ານໃນຈຳນວນ 7 ເປັນຜູ້ໄດ້
ໄຊຊະນະຂັ້ນສຸດທ້າຍເປັນ ຕົວແທນຂອງພັກ

ເຮົາເຫັນໄດ້ວ່າ 2 ທ່ານທີ່ບໍ່ໄດ້ຮັບໄຊຊະນະທີ່ຣັດ "ໄອໂອວາ" ກໍໄດ້ຮັບການເລືອກຕັ້ງ
ເປັນຕົວແທນຂອງພັກໃນຣະດັບຊາດ ເຂົ້າໄປຊ່ວງຊິງຕຳແໜ່ງປະທານາທິບໍດີໃນທີ່ສຸດ
ຄື ທ່ານຢອຣ໌ຊ ບຸສ (ພໍ່) (Gearge H. Bush) ແຫ່ງພັກຣີພັບບລິກກັນ ແລະ ທ່ານໄມ
ເຄີລ ດູກາກິສ (Mickael Dukakis) ແຫ່ງພັກດີໂມແຄຣຕ ທີ່ໄດ້ຄະແນນເປັນອັນດັບທີ່
ສາມໃນຣັດໄອໂອວາ

ວິທີລົງຄະແນນສຽງທີ່ສລັບຊັບຊ້ອນ
ສ່ວນວິທີການລົງຄະແນນສຽງນັ້ນ ກໍສລັບຊັບຊ້ອນ ເປັນເຣື່ອງໜ້າປວດຫົວຢ່າງແທ້ຈິງ
ແມ່ນແຕ່ຄົນອະເມຣິກັນເອງຈຳນວນຫລວງຫລາຍ ກໍບໍ່ສາມາດເຂົ້າໃຈໄດ້

ເວົ້າງ່າຍໆກໍຄືວ່າ ບໍ່ຄືກັນກັບໃນປະເທດຝຣັ່ງເສດ ທີ່ໃຜວ່າງໃນຊົ່ວໂມງໃດກໍໄປລົງຄະ
ແນນໄດ້ ຈົນກວ່າຈະປິດໜ່ວຍເລືອກຕັ້ງໃນເວລາ 20 ໂມງ

ຫາກແຕ່ວ່າຢູ່ຣັດ "ໄອໂອວາ" ຂອງສຫະຣັດອະເມຣິການີ້ (ໃນຣັດອື່ນໆກໍຄືກັນ) ການລົງ
ຄະແນນສຽງເປີດເມື່ອຕອນ 18. 30 ໂມງ ຕາມເວລາທ້ອງຖິ່ນ ສຳລັບ "ພັກດີໂມແຄຣຕ"
ສ່ວນການລົງຄະແນນສຽງສຳລັບ "ພັກຣີພັບບລິກກັນ" ນັ້ນ ແມ່ນເປີດຕັ້ງແຕ່ເວລາ
19.00 ໂມງ ແລະ ການລົງຄະແນນສຽງກໍດຳເນີນໄປພຽງ ແຕ່ໃຊ້ເວລາປະມານ 2 – 3
ຊົ່ວໂມງເທົ່ານັ້ນ

ນັ້ນກໍໝາຍຄວາມ ປະຊາຊົນຜູ້ມີສິດອອກສຽງເລືອກຕັ້ງອາຍຸຕັ້ງແຕ່ 18 ປີຂື້ນໄປ ອອກ
ຈາກບ້ານຂອງຕົນໃນຕອນຄ່ຳມືດ ຖ້າມກາງຄວາມໜາວເຢັນຂັ້ນອຸນຫະພູມຕິດລົບ ເພື່ອ
ໄປໃຊ້ສິດຂອງຕົນ ອັນເປັນການອະທີບາຍເຖິງວ່າ ເປັນຫຍັງການນອນຫລັບທັບສິດຈຶ່ງມີ
ສູງ ຍົກຕົວຢ່າງ ເມື່ອປີ 2004 ມີຜູ້ນອນຫລັບທັບສິດເຖິງ 78% ສຳລັບ "ພັກພັກດີໂມ
ແຄຣຕ"

ການແຍກຜູ້ເລືອກດີໂມແຄຣຕແລະຣີພັບບລິກກັນ
ຜູ້ລົງຄະແນນສຽງ ເວລາຈົດຊື່ວ່າເປັນຜູ້ມີສິດອອກສຽງນັ້ນ ກໍຕ້ອງບອກລ່ວງໜ້າອີກ
ວ່າ ຈະລົງໃຫ້ພັກໃດເສັຽກ່ອນ

ຢູ່ປະເທດຝຣັ່ງເສດ ເມື່ອເຮົາໄປຈົດຊື່ຢູ່ Mairie ບໍ່ມີໃຜຖາມວ່າເຮົາຈະລົງຄະແນນ
ສຽງໃຫ້ພັກໃດ ໃຫ້ຜູ້ໃດ ແຕ່ຢູ່ອະເມຣິກາເພີ່ນຖາມກ່ອນວ່າຈະລົງໃຫ້ພັກໃດ ແລ້ວກໍ
ຈົດຊື່ລົງໃນບັນຊີຜູ້ຈະເລືອກພັກນັ້ນ

ດັ່ງນັ້ນຢູ້ຣັດ "ໄອໂອວາ" ຈຶ່ງມີຜູ້ຈະເລືອກ "ພັກຣີພັບບລັກກັນ" 624 ພັນຄົນ ແລະ ຜູ້
ຈະເລືອກ"ພັກດີໂມແຄຣຕ" 645 ພັນຄົນ

ໜ່ວຍເລືອກຕັ້ງກໍບໍ່ແມ່ນສຖານທີ່ດຽວກັນ ໜ່ວຍເລືອກຕັ້ງສຳລັບ "ພັກດີໂມແຄຣຕ" ຢູ່
ບ່ອນໜຶ່ງ ແລະຂອງ "ພັກຣິພັບບລັກກັນ" ຢູ່ອີກບ່ອນໜຶ່ງ

ສ່ວນອີກ 800 000 ຄົນ ໃນຣັດໄອໂອວານີ້ ແຈ້ງວ່າ ເປັນຜູ້ມີສິດລົງຄະແນນສຽງ
"ອິສຣະ" ກຸ່ມທີ່ແຈ້ງວ່າເປັນອິສຣະນີ້ ບໍ່ມີສິດອອກສຽງເລີຍ ເວັ້ນເສັຽແຕ່ວ່າຕອນ
ເດີນທາງໄປເຖິງໜ່ວຍເລືອກຕັ້ງແລ້ວ ໄປບອກປ່ຽນໃຈ ແລະຈົດຊື່ວ່າຈະເປັນຜູ້ລົງ
ຄະແນນສຽງໃຫ້ພັກໃດພັກໜຶ່ງ

ການຢັ່ງສຽງບໍ່ແນ່ນອນ
ກໍແມ່ນຍ້ອນເຫດຜົນຄືແນວນີ້ ການຢັ່ງສຽງທີ່ອອກມາ ຈຶ່ງບໍ່ມີຄວາມແນ່ນອນ ຜູ້ລົງ
ຄະແນນສຽງສາມາດບອກປ່ຽນໃຈໄດ້ຢູ່ກັບໜ່ວຍເລືອກຕັ້ງເອງ ໝາຍຄວາມວ່າໃນ
ວິນາທີສຸດທ້າຍ

ເວົ້າລະອຽດຕື່ມອີກກໍຄື ໃຜກໍຕາມເມື່ອຈົດຊື່ກ່ອນວັນລົງຄະແນນສຽງນັ້ນບອກວ່າຈະ
ເລືອກພັກ ກ. ແຕ່ເມື່ອເຖິງວັນເລືອກຕັ້ງແລ້ວປ່ຽນໃຈວ່າຈະເລືອກພັກ ຂ. ເມື່ອເວ
ລາອອກຈາກບ້ານກໍຈະຕ້ອງໄປທີ່ໜ່ວຍເລືອກຕັ້ງຂອງພັກ ຂ. ແລະກໍໄປຈົດຊື່ບອກ
ປ່ຽນໃຈກັບທີ່ໂລດ

ວິທີລົງຄະແນນສຽງສຳລັບສອງພັກທີ່ແຕກຕ່າງກັນ
ວິທີການລົງຄະແນນສຽງສຳລັບ "ພັກຣີພັບບລັກກັນ" ກໍບໍ່ຄືກັນອີກກັບການລົງຄະແນນ
ໃຫ້ "ພັກດີໂມແຄຣຕ"

ສຳລັບ "ພັກຣີພັບບລັກກັນ" ນັ້ນ ຊີ້ມືເອົາ ຜູ້ສມັກຜູ້ໃດໄດ້ຫລາຍກວ່າ ກໍແມ່ນໄດ້ຮັບ
ເລືອກຕັ້ງໂລດ

ແຕ່ສຳລັບ "ພັກດີໂມແຄຣຕ" ສລັບຊັບຊ້ອນ ທຳອິດຜູ້ໃດຈະເລືອກຜູ້ສມັກໃດກໍໃຫ້ໄປ
ຮວມກັນເປັນກຸ່ມ ກຸ່ມໃດມີຄົນ 15% ຂຶ້ນໄປຂອງຜູ້ມາຮ່ວມປະຊຸມ ຈຶ່ງຈະສາມາດຜ່ານ
ໄປຮອບສອງໄດ້

ສນັ້ນກຸ່ມບໍ່ເຖິງ 15% ຕ້ອງຍຸບຕົວເອງ ແລະຕ້ອງໄປເຂົ້າກັບກຸ່ມໃດກຸ່ມໜຶ່ງ ຈົນໃນທີ່
ສຸດຈະເຫລືອສອງກຸ່ມ ກຸ່ມໃດຫລາຍກວ່າກໍເປັນກຸ່ມຜູ້ຊນະ