ບົດວິເຄາະ: ຣາຄາເຂົ້າແພງໃນເອເຊັຽ ກະທົບທາງການເມືອງ ແລະ ສົງຄົມ ຄືແນວໃດ?

ປະເທດທີ່ເດືອດຮ້ອນ ມີທັງຜູ້ຜລິດຫລາຍທີ່ສຸດ ໃນໂລກ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 08/04/2008 ແກ້ໄຂໃຫມ່ຫລ້າສຸດເມື່ອວັນທີ 14/04/2008 15:40 TU

ຄົນງານທີ່ທ່າເຮືອກຸງມະນີລາ ກຳລັງຂົນເປົາເຂົ້າທີ່ສັ່ງຊື້ຈາດວຽດນາມ ອອກຈາກເຮືອຂື້ນໃສ່ຣົດ ບັນທຸກ...ຟີລິບປິນຂາດແຄນເຂົ້າ ຕ້ອງສັ່ງຊື້ຈາກວຽດນາມເຖິງ 1 500 000 ໂຕນ ທັງໆທີ່ວ່າ ຣາຄາໃນວຽດນາມເອງກໍສູງຂື້ນຄືກັນ (ພາບ: Reuters)

ນັບໄດ້ວ່າເປັນເຫດການທີ່ສ້າງຄວາມແປກປລາດໃຈ ແລະໜ້າງຶດງໍ້ອັສຈັນທີ່ສຸດ
ທັງນີ້ກໍເພາະບັນດາປະເທດທີ່ເດືອດຮ້ອນມີປະເທດຜູ້ຜລິດເຂົ້າອັນດັບທີໜຶ່ງ ທີ
ສອງ ແລະ ທີ່ສີ່ ຂອງໂລກ ຄືໄທຍ ວຽດ ນາມ ແລະ ອິນເດັຽ ຮ່ວມນຳດ້ວຍ

ເປັນໄປໄດ້ຢ່າງໃດທີ່ບັນດາປະເທດເຫລົ່ານີ້ຕ້ອງຕົກມາຢູ່ໃນສະພາບທີ່ເຖົ້າແກ່
ໂບຮານເພີ່ນເຄີຍເວົ້າກັນວ່າ "ເຂົ້າຍາກໝາກແພງ" ເຊີນທ່ານອ່ານຄຳຕອບລຸ່ມ
ນີ້

ສາເຫດຕົ້ນຕໍ
ຕົ້ນຕໍແມ່ນມາຈາກໄພພິບັດທັມມະຊາດ ນ້ຳຖ້ວມໃຫຍ່ໃນບັງຄລາເທດ ການລະບາດຂອງ
ສັຕຣູພືດທີ່ວຽດນາມ ແລະ ສະພາບອາກາດປັ່ນປ່ວນໃນປະເທດຈີນ ເຮັດໃຫ້ຜົນຜລິດຕົກ
ຕ່ຳ ໃນຂນະທີ່ຄວາມຕ້ອງການຍັງຄົງຄືເກົ່າ ຈຶ່ງໄດ້ກາຍເປັນສາເຫດເຮັດໃຫ້ຣາຄາສູງ
ຂື້ນ ໂດຍສະເພາະໃນຈີນແລະບັງຄລາເທດ ດຶງດູດໃຫ້ປະເທດອື່ນຢາກສົ່ງເຂົ້າໄປຂາຍ
ໃຫ້ເພາະໄດ້ຣາຄາດີ ຈົນເກີດການຂາດແຄນແລະຣາຄາສູງຂື້ນໃນບັນດາປະເທດຜູ້ຢາກ
ສົ່ງໄປຂາຍໃຫ້ນີ້

ການຈຳໜ່າຍເຂົ້າທີ່ຕລາດກຸງມະນີລາ.....ໃນຣະຍະໜຶ່ງປີທີ່ຜ່ານມາຣາຄາເຂົ້າໃນຟີລິບປິນສູງຂື້ນ 10,9% ໃນຂນະທີ່ອັຕຣາເງິນເຟີ້ກໍຂື້ນເຖິງ 6.4% ຊຶງເປັນອັຕຣາທີ່ສູງທີ່ສຸດໃນຮອບ 21 ປີທີ່ ຜ່ານມາ (ພາບ: Reuters)

ສາເຫດກັກຕຸນ
ເພື່ອເປັນການແກ້ປັນຫາ ທາງການຂອງບາງປະເທດເຊັ່ນ ກັມພູເຈັຽ ວຽດນາມ ອິນເດັຽ
ເປັນຕົ້ນ ຕ້ອງອອກຄຳສັ່ງ "ຫ້າມ" ຫລືວ່າ "ຈຳກັດ" ປຣິມານການສົ່ງອອກ ກໍເລີຍຍິ່ງ
ເຮັດໃຫ້ບັນດາປະເທດທີ່ຂາດແຄນເພີ້ມຄວາມຕ້ອງການສູງຂື້ນອີກ ແກ່ດຶງໃຫ້ຣາຄາສູງ
ຕາມໄປນຳ ເປັນແຮງຜັກດັນເຮັດໃຫ້ເກີດມີການກັກຕຸນໃນບາງປະເທດທີ່ບໍ່ມີການຫ້າມ
ການສົ່ງອອກ ເຊັ່ນປະເທດໄທຍເປັນຕົ້ນ

 ປະຊາຊົນເຮໂລກັນໂຫມຊື້ຂນານໃຫຍ່ເພື່ອຕຸນເອົາໄວ້ ທັງນີ້ເພາະເກີດການຫວັ່ນເກງວ່າ
ຣາຄາຈະສູງຂື້ນຕື່ມປະການໜຶ່ງ ແລະປະການສອງເພາະພາກັນແຕກຕື່ນວ່າຢ້ານເກີດ
ຄວາມອົດຫິວ ເຂົ້າຈະຂາດຕລາດ

ຜົນກະທົບດ້ານສັງຄົມແລະການເມືອງ
ຜົນສະທ້ອນທາງດ້ານສັງຄົມເຫັນໄດ້ຢ່າງຊັດເຈນແລ້ວ ຕົວຢ່າງໃນປະເທດໄທຍ ການປຸ້ນ
ຈີ້ ການລັກເລັກຂໂມຍນ້ອຍ ເກີດຂື້ນປານດອກເຫັດ ໃນຂນະທີ່ການຂໂມຍໃຫຍ່ທີ່ບໍ່ມີໃຜ
ຄາດຄິດມາກ່ອນ ກໍເກີດຂື້ນຄືກັນ

ເມື່ອບໍ່ນານມານີ້ເກີດມີການລັກກ່ຽວເຂົ້າກັນຈົນໝົດທົ່ງນາ ໂດຍໃຊ້ຣົດ Tractors ເປັນ
ເຄື່ອງມືລັກກ່ຽວຍາມກາງຄືນ ຕື່ນເຊົ້າມາຊາວນາຜູ້ທຸ້ມເຮື່ອເທແຮງ ເອົາຫລັງສູ້ຟ້າໜ້າສູ້
ດິນ ທັງໄຖທັງດຳນັ້ນ ກັບມາພົບທົ່ງນາຂອງຕົນແປນເອີດເຕີດໃນຕອນເຊົ້າ ກໍແບບວ່າ
ຊ໊ອກເຖິງຂັ້ນເປັນລົມໄປເລີຍ ດຽວນີ້ຊາວນາໄທຍຕ້ອງໃຊ້ຄວາມຣະມັດຣະວັງຢ່າງສຸດຂີດ
ໝາເຫົ່າຍາມກາງຄືນຕ້ອງໄດ້ລຸກຂື້ນມາຈອບເບີ່ງໂລດ

ສ່ວນຢູ່ຟີລິບປິນ ເຈົ້າໜ້າທີ່ທະຫານແລະຕຳຣວດຕ້ອງໄດ້ອອກມາຮັກສາຄວາມສງົບໃນ
ຈຸດຕ່າງໆທີ່ມີການຂາຍເຂົ້າໃຫ້ແກ່ປະຊາຊົນ ໂດຍສະເພາະໃນຄຸ້ມທີ່ຍາກຈົນຂອງນະ
ຄອນຫລວງມະນີລາ ທັງນີ້ເພື່ອປ້ອງກັນການຍາດແຍ່ງກັນເຖິງຂັ້ນຈະລາຈົນ ທີ່ອາດສາ
ມາດເກີດຂື້ນໄດ້

ຢູ່ບັງຄລາເທດ ຣາຄາເຂົ້າດີດຕົວສູງຂື້ນ ຈົນວ່າຣັຖບານຕ້ອງແນະນຳປະຊາຊົນໃຫ້ແບ່ງ
ໄປກິນເຜືອກນຳເພື່ອລົດຜ່ອນຄວາມຕ້ອງການເຂົ້າ ນັກວິເຄາະຫລາຍທ່ານເຫັນວ່າວິກິຕ
ການຣາຄາເຂົ້າແພງ ອາດແກ່ດຶງໃຫ້ເກີດຄວາມວຸ້ນວາຍແລະກະທົບຕໍ່ສເຖັຽຣະພາບ
ຂອງຣັຖບານຊົ່ວຄາວໄດ້

ເຈົ້າໜ້າທີ່ຮັກສາຄວາມປອດໄພຂອງບັງຄລາເທດ ກຳລັງເອົານ້ຳໃຫ້ຍິງຄົນໜຶ່ງດື່ມ ຫລັງຈາກທີ່ ອິດເມື່ອຍ້ອນເຂົ້າແຖວຍາວຢຽດເພື່ອຊື້ເຂົ້າຣາຄາຖືກ ທີ່ຣັຖບານອອກເງິນອຸດໜຸນ ຣາຄາເຂົ້າໃນ ບັງຄລາເທດສູງຂື້ນເຖິງ 100% ໃນຣະຍະໜຶ່ງປີທີ່ຜ່ານມາ ຈົນວ່າຣັຖບານຕ້ອງແນະນຳໃຫ້ປະ ຊາຊົນຫັນໄປກິນເຜືອກແດ່ (ພາບ: Reuters)

ໃນຂນະທີ່ອິນເດັຽ ກໍມີການສັ່ງຫ້າມການສົ່ງອອກ ແຕ່ກໍບໍ່ແນ່ວ່າຈະສາມາດຢຸດການສູງຂື້ນ
ຂອງຣາຄາໄດ້ຫລືບໍ່ ອາດກາຍໄປເງື່ອນໄຂລົບໃຫ້ແກ່ຣັຖບານ "ກາງຊ້າຍ" ທີ່ນຳພາໂດຍ
ພັກ Congrès ກໍໄດ້ສຳລັບການເລືອກຕັ້ງໃນປີໜ້າ

ພວກເຮົາຍັງຈື່ໄດ້ວ່າຣັຖບານກາງຊ້າຍນີ້ໄດ້ຮັບການເລືອກຕັ້ງມາໃນປີ 2004 ກໍແມ່ນຍ້ອນ
ປະຊາຊົນຜູ້ທຸກຍາກຫາເຊົ້າກິນຄ່ຳຈຳນວນຫລາຍຮ້ອຍລ້ານຄົນເປັນຜູ້ທຸ້ມຄະແນນສຽງໃຫ້
ແລະກໍແມ່ນປະຊາຊົນເຫລົ່ານີ້ທີ່ໄດ້ຮັບຄວາມເດືອດຮ້ອນໜັກຈາກສິນຄ້າຣາຄາແພງຄັ້ງນີ້

ສ່ວນຢູ່ມາເລເຊັຽ ການທີ່ພັກ UMNO ຂອງຣັຖບານ ບໍ່ສາມາດຄອງສຽງສ່ວນຫລາຍເຖິງ
2/3 ໄດ້ໃນການເລືອກຕັ້ງເມື່ອຕົ້ນເດືອນມີນາຜ່ານມາ ກໍແມ່ນມີສາເຫດໃຫຍ່ມາຈາກການ
ດີດຕົວສູງຂື້ນຂອງຣາຄາສິນຄ້າ ນັບເປັນຄວາມລົ້ມແຫລວຄັ້ງທຳອິດຂອງຣັຖບານທີ່ຄອງ
ອຳນາດຢ່າງລຽນຕິດໄດ້ 38 ປີຜ່ານມາ ແລ້ວ

ແມ່ນແຕ່ກະທັ້ງໃນສິງຄະໂປ ຊຶ່ງເປັນປະເທດທີ່ອຸດົມຮັ່ງມີ ກໍບໍ່ໄດ້ຮັບການຍົກເວັ້ນ ມີກະແສ
ຂ່າວເລັດລອດອອກມາຢ່າງໝິດແໝວວ່າ ມີກວ່າ 10 ຄົນ ໄດ້ພາກັນລົງຖນົນປະທ້ວງ
ສແດງຄວາມບໍ່ພໍໃຈຕໍ່ຄ່າຄອງຊີບທີ່ສູງຂື້ນ ຊຶ່ງນັບວ່າເປັນການຕັດສິນໃຈທີ່ສ່ຽງທີ່ສຸດ ທັງ
ນີ້ເພາະສິງຄະໂປມີກົດໝາຍ "ຫ້າມການຊຸມນຸມປະທ້ວງເດັດຂາດ"

ຢູ່ປະເທດຈີນ ຣາຄາຊີ້ນສູງຂື້ນເຖິງ 60% ໃນຣະຍະໜຶ່ງປີ ຈົນວ່າຣັຖບານຕ້ອງປະກາດ
ມາຕຣາການ "ແຊ່ເຢັນຣາຄາ" ໝາຍຄວາມວ່າຫ້າມຂື້ນຣາຄາສິນຄ້າປະເພດອາຫານແລະ
ພລັງງານ ຊຶ່ງເປັນມາຕຣາການທີ່ນອນຢູ່ໃນນະໂຍບາຍຕ້ານເງີນເຟີ້ ຊຶ່ງເປັນນະໂຍບາຍ
ຣີບດ່ວນຂອງຣັຖບານປັກກິ່ງ ແຕ່ເຖິງປານນັ້ນການຊຸມນຸມປະທ້ວງຂອງປະຊາຊົນຜູ້ເດືອດ
ຮ້ອນກໍຍັງມີຢ່າງລຽນຕິດ ໂດຍສະເພາະໃນຊົນນະບົດ

ຢູ່ວຽດນາມ ຈິງຢູ່ທີ່ເສຖກິດມີການຂຍາຍຕົວເຖິງ 8% ແຕ່ກໍເປັນສາເຫດແກ່ດຶງໃຫ້ເກີດ
ອັຕຣາເງິນເຟີ້ທີ່ສູງເຖິງ 16% ເມື່ອປີ 2007 ຜ່ານມາ ສ້າງຜົນກະທົບໜັກຕໍ່ປະຊາຊົນຊຶ່ງ
ໃນຣະຍະຫລັງໆຫລາຍເດືອນທີ່ຜ່ານມາໄດ້ເພີ້ມທະວີການສແດງຄວາມບໍ່ພໍໃຈດ້ວຍການ
ປະທ້ວງ

ຊາວນາຍັງຄົງທຸກຍາກຄືເກົ່າ
ໃນເມື່ອຣາຄາເຂົ້າສູງຂື້ນຄືແນວນີ້ແລ້ວ ຊາວນາໄດ້ຮັບຜົນປໂຍດຫລືບໍ່? ຄໍາຕອບກໍຄື "ບໍ່"
ຍັງຄົງທຸກຍາກຄືເກົ່າ ຕົວຢ່າງຊາວນາໃນປະເທດໄທຍທີ່ລາຍໄດ້ຕ້ອງໝົດໄປກັບການໃຊ້
ໜີ້ ທັງນີ້ເພາະປຸ໋ຍຣາຄາແພງ ນ້ຳມັນກໍແພງພໍປານຄຳແທ່ງ ອັນເປັນສາເຫດເຮັດໃຫ້ພວກ
ເຂົາເຈົ້າບໍ່ສາມາດກັກຕຸນເຂົ້າເພື່ອຂາຍຂື້ນຣາຄາໄດ້ ແຕ່ມີຄວາມຈຳເປັນຕ້ອງຂາຍອອກ
ເພື່ອຫາເງິນມາໃຊ້ໜີ້

ສລຸບກໍຄື ມີແຕ່ພໍ່ຄ້າຄົນກາງ ຜູ້ສົ່ງອອກ ແລະໂຮງສີເທົ່ານັ້ນ ເປັນຜູ້ກອບໂກຍເງິນເຂົ້າກະ
ເປົ໋າກັນເປັນການໃຫຍ່ ແຕ່ເຖິງປານນັ້ນ ຄົນກຸ່ມນີ້ກໍຍັງໂຍນຄວາມຜິດກັນໄປກັນມາ ວ່າເປັນ
ຜູ້ກັກຕຸນ ອັນເປັນສາເຫດເຮັດໃຫ້ເກີດການຂາດແຄນ ແລະເຮັດໃຫ້ຣາຄາພຸ່ງຂື້ນປານລູກ
ສອນໄຟ ດັ່ງທີ່ເປັນຢູ່ໃນປັດຈຸບັນ