ສປ ຈີນ

ຂ່າວສານທາງການຈີນ ໄດ້ຮຽກຮ້ອງຫາປະຊາຊົນ ໃຫ້ຢຸດ ທຳການປຸກລຸກ ຍຸຍົງ ຄວາມຮັກຊາດ ຕ້ານສິນຄ້າ ຕາເວັນຕົກ

ໂດຍ ບັນດານ ສີສຸນທອນ B. Sisounthone

ບົດຄວາມນີ້ເຜີຍແຜ່ເມື່ອວັນທີ 18/04/2008 ແກ້ໄຂໃຫມ່ຫລ້າສຸດເມື່ອວັນທີ 18/04/2008 12:41 TU

ປະທານາທິບໍດີ ສ໊າກໂກຊີ່ ໄດ້ຮຽກຮ້ອງ ອີກເທື່ອໃໝ່ ໃຫ້ມີການສົນທະນາ ກັນຄືນໃໝ່ ລະວ່າງ ຜູ່ຕາງໜ້າ ດາໄລ ລາມະ ແລະ ອຳນາດຈີນ

ນັບເປັນຄັ້ງທຳອິດ ຂ່າວສານທາງການຈີນ ໄດ້ຮຽກຮ້ອງຫາປະຊາຊົນ ໃຫ້ຢຸດ ທຳການປຸກລຸກ ຍຸຍົງ ຄວາມຮັກຊາດ ໃນລັກຊນະໂຄສະນາ ໂຈມຕີ ແລະ ປ່າວຫ້າມບໍ່ໃຫ້ ຊື້ສິນຄ້າ ທີ່ເປັນຍີ່ຫໍ້ ແລະຜະລິດຕະຜົນ ຂອງຊາວຕາເວັນຕົກ ໂດຍສະເພາະ ແມ່ນມາຈາກຝຣັ່ງ ເພາະບໍຣິສັດ ການຄ້າຝຣັ່ງ ຖືກສົງສັຍວ່າ ອູ້ມຊູ ເຫດຜົນໃນການຕໍ່ສູ້ ຂອງຊາວ ຕິເບດ.  

ມື້ນີ້ ປະທານາທິບໍດີ ສ໊າກໂກຊີ່ ໄດ້ຮຽກຮ້ອງ ອີກເທື່ອໃໝ່ ໃຫ້ມີການ ສົນທະນາ ກັນຄືນໃໝ່ ລະວ່າງ ຜູ່ຕາງໜ້າ ດາໄລ ລາມະ ແລະ ອຳນາດຈີນ.

 

ສ່ວນຢູ່ໃນເຄືອຄ່າຍ ແອ່ງແຕກແນດຈີນ ນັ້ນກໍ ມີການປ່າວ ຫ້າມບໍ່ ໃຫ້ໄປຊື້ເຄື່ອງ ໃນຮ້ານສັພະສິນຄ້າ ກາເຣີຟວກ ຂອງຝຣັ່ງ ແລະ ຂອງຊາວຕາເວັນຕົກອື່ນໆ ໃນ ສປ ຈີນ ນັ້ນອີກດ້ວຍ.

ນອກນີ້ ຍັງໂຄສະນາ ໂຈມຕີ ຊື່ມວນຊົນ ຂອງຊາວຕາເວັນຕົກ ຕື່ມ ອີກວ່າ ເຂົ້າຂ້າງ ຕິເບດ ແລະ ບິດເບື່ອນຄວາມຈິງ.

 

ຂ່າວສານຈີນໃໝ່ ໄດ້ວິເຄາະໃນແລງວານນີ້ວ່າ ຍ້ອນພຶດຕິກັມ ອັນຕໍ່າ ຊາມ ຂອງຊາວຕາເວັນຕົກ ຈຶ່ງເປັນຕົ້ນເຫດ ຍຸຍົງໃຫ້ ຊາວຈີນ ເກີດ ໂກດຮ້າຍຢ່າງແຮງ ແລະ ເກີດມີ ຄວາມເປັນຊາດນິຍົມ ຢ່າງໝົດຈິດ ໝົດໃຈ.

 

ເພາະສະນັ້ນ ຂ່າວສານຈີນໃໝ່ ຈຶ່ງຕັກເຕື່ອນຫາ ເພື່ອນຮ່ວມຊາດວ່າ ບໍ່ຄວນຈະໂຈມຕີ ໂພດເກີນໄປ ແລະບໍ່ສົມຄວນ ໃຫ້ໄປແຕະຕ້ອງ ນະໂຍບາຍເປີດກ້ວາງ ເອົາການລົງທຶນມາຈາກຕ່າງປະເທດ.

 

ການທີ່ ເຄື່ອຄ່າຍ ແອ່ງແຕກແນດ ໂຄສະນາໂຈມຕີ ສິນຄ້າຝຣັ່ງນັ້ນ ແມ່ນເນື່ອງມາຈາກ ຈີນຖືວ່າ ການແຫ່ທວນໄຟ ໃນນະຄອນຫລວງ ປາຣີ ຜ່ານມານັ້ນ ມີຄວາມຫລົ້ມເຫລວ ແລະປະທານາທິບໍດີ ສ໊າກໂກ່ ຊີ່ ກໍໄດ້ນາບຂູ່ວ່າ ຈະຄັດຄ້ານ ບໍ່ໄປຮ່ວມພິທີເປີດງານແຂ່ງຂັນກິລາ ໂອ່ແລ່ມປິກ ທີ່ ປັກກິງ ໃນເດືອນ ສິງຫາ.

 

ການທີ່ ປະຊາຊົນ ຈີນ ເກີດມີປະຕິກິຍາ ຮັກຊາດ ໃນລັກຊນະນີ້ ບໍ່ແມ່ນຄັ້ງທຳອິດ, ລະຍະຫລັງ ຜ່ານມານີ້ ແມ່ນຕ້ານ ຜົນປະໂຍດ ຂອງຍີ່ປຸ່ນ ໃນ ປີ 2005.

ຕອນຕົ້ນ, ພັກ ແລະ ລັດ ໄດ້ອັດຫູອັດຕາປະປ່ອຍໃຫ້ມີ ການປະທ້ວງ ຂະຍາຍຕົວອອກ ກ້ວາງໄກ ແລະ ໂດ່ງດັງທົ່ວໂລກ, ຕາມທັມມະດາ ແລ້ວ, ທຸກການ ປະທ້ວງໃນ ສປ ຈີນ ນັ້ນແມ່ນຖືກຫ້າມ.

 

ນອກນັ້ນ, ພັກ ແລະ ລັດ ຍັງ ອະນຸຍາດໃຫ້ ນັກສະແດງຄວາມຄິດ ເຫັນ ຜ່ານເຄືອຄ່າຍ ແອ່ງແຕກແນດ ໂຈມຕີ ຜົນປະໂຍດຂອງຍີ່ປຸ່ນ ຢ່າງຮ້າຍແຮງ ເສັຍກ່ອນ, ກ່ອນ ຈະທຳການ ຫ້າມປາມໄວ້ ບໍ່ໃຫ້ ໄປໄກເກີນຄວນ ຕາມພາຍຫລັງ.

 

ເຖີງຢ່າງໃດກໍດີ, ບໍ່ວ່າຈະເປັນການ ປະທ້ວງໃດໆກໍຕາມ ໃນ ສປ ຈີນ ຖ້າຫາກວ່າ ການປະທ້ວງນັ້ນໆ ບໍ່ໄປແຕະຕ້ອງ ນະໂຍບາຍ ຂອງ ພັກ ແລະ ລັດ ຈີນແລ້ວ, ທາງການກໍ ປ່ອຍໃຫ້ ມີຂື້ນເສັຍກ່ອນ, ກ່ອນຈະຫ້າມ ຢັບຢັ້ງ.

ນັກສັນທັດ ກໍຣະນີ ໃຫ້ຄວາມເຫັນວ່າ ແມ່ນ ພັກ ແລະ ລັດ ເປັນຜູ່ຖື ບັງຫຽນ ແລະ ອູ້ມຊູ ຢູ່ເບື້ອງຫລັງ.