ມະຫາອຳນາດໃດ ສຖາບັນໃດ ກໍຂາດປະສິດ ທິພາບ

ຕໍ່ໜ້າວິກີຕການ ຣາຄານ້ຳມັນແພງ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 27/06/2008 ແກ້ໄຂໃຫມ່ຫລ້າສຸດເມື່ອວັນທີ 27/06/2008 15:24 TU

ດັສນີຕລາດຮຸ້ນໂລກດິ່ງພະສຸທາໄປຕາມໆກັນ ອັນເນື່ອງມາຈາກບັນດານັກລົງທຶນໃຊ້ຄວາມຣະມັດ ຣະວັງເປັນພິເສດ ອັນເນື່ອງມາຈາກຣາຄານ້ຳມັນແພງ ອາຫານແພງ ແລະ ອັຕຣາເງິນເຟີ້ (ພາບ: Reuters)

ຕໍ່ໜ້າ ວິກິຕການຣາຄານ້ຳມັນແພງ ແລະ ອາຫານແພງ ສ້າງຄວາມເດືອດ
ຮ້ອນໄປທົ່ວໃນທຸກວັນນີ້ ເບີ່ງຄືວ່າມະຫາອຳນາດໃດ ທະນາຄານກາງໃດ ຫລື
ກຸ່ມຜລິດນ້ຳມັນໃດໆ ກໍຂາດປະສິດທິພາບ ບໍ່ສາມາດຫາທາງແກ້ໄຂໄດ້

OPEP ເສື່ອມອິດທິພົນ
ຍົກຕົວຢ່າງໃຫ້ເຫັນງ່າຍໆກໍແມ່ນ ກຸ່ມປະເທດ OPEP ຊຶ່ງໃນອດີດທີ່ຜ່ານມານັ້ນ ຖືໄດ້
ວ່າເປັນກົກຊີ້ຕາຍປາຍຊີ້ເປັນກໍວ່າໄດ້ ໃນການກຳໜົດຣາຄານ້ຳມັນດິບໃນຕລາດໂລກ
າຍຄວາມວ່າຖ້າເພີ່ນຕັດສິນໃຈເພີ້ມປຣິມານການຜລິດ ຣາຄາກໍຈະລົດລົງ ຖ້າເພີ່ນລົດ
ການຜລິດຣາຄາກໍຈະສູງຂື້ນ

ແຕ່ຕົກມາເຖິງເວລານີ້ ເບີ່ງຄືວ່າອິດທິພົນ OPEP ໄດ້ເສື່ອມຖອຍລົງ ໂດຍເຮົາເຫັນ
ໄດ້ໃນວິກິຕການຄັ້ງນີ້ ການຕັດສິນໃຈໃດໆຂອງກຸ່ມບໍ່ມີຜົນເຮັດໃຫ້ຣາຄາລົດລົງແຕ່ປະ
ການໃດເລີຍ

ນອກຈາກນີ້ OPEP ຍັງຕ້ອງມາປະເຊີນໜ້າກັບປັນຫາທີ່ຂັດແຍ່ງກັນໄປໃນຕົວອີກ ເຊັ່ນ
ການເພີ້ມປຣິມານການຜລິດເພື່ອຕອບສນອງຄວາມຕ້ອງການທາງດ້ານອຸດສາຫະກັມຂອງ
ໂລກທີ່ຂຍາຍຕົວ ໂດຍສະເພາະໃນບັນດາກຸ່ມປະເທດອຸດສາຫະກັມເກີດໃໝ່ ພັດເປັນການ
ຂັດແຍ່ງກັບນະໂຍບາຍການລົດຜ່ອນອຸນຫະພູມຜິວໂລກ

ໃນຂນະທີ່ບັນດາກຸ່ມປະເທດຜູ້ຜລິດນ້ຳມັນລາຍໃຫຍ່ຂອງໂລກທີ່ບໍ່ໄດ້ເປັນສະມາຊິກຂອງ
OPEP ເຊັ່ນປະເທດຣັດເຊັຽເປັນຕົ້ນ ກໍສົ່ງສັນຍານທີ່ຂັດແຍ່ງກັບ OPEP ຢູ່ສເມີ

ເມື່ອຕົກເປັນຊີ້ນກາງຫີບ ຖືກໜີບຄືແນວນີ້ແລ້ວ ເບີ່ງຄືວ່າ OPEP ກໍພຍາຍາມດິ້ນລົນປັດ
ຄວາມຮັບຜິດຊອບອອກຈາກຕົນ ໂດຍເຫັນໄດ້ຈາກການອອກມາກ່າວຂອງ ທ່ານ Chakib
Khelil ປະທານຂອງກຸ່ມ ຕໍ່ໂທຣະທັດ France 24 ວ່າ ຣາຄາອາດດີດຕົວສູງຂື້ນຕື່ມອີກ
ເຖິງ 170 ດອລລາຣ໌ຕໍ່ບາຣິລກໍໄດ້ພາຍໃນຣະດູຮ້ອນນີ້ ແລະວ່າປັນຫາບໍ່ໄດ້ມາຈາກປຣິ
ມານການຜລິດແຕ່ຢ່າງໃດ ທັງນີ້ເພາະການຜລິດຂອງ OPEP 32 ລ້ານບາຣິລຕໍ່ວັນນັ້ນ
ພຽງພໍສາມາດຕອບສນອງຕໍ່ຄວາມຕ້ອງການຂອງ ຕລາດໂລກໄດ້

ເຮົາສັງເກດໄດ້ວ່າການສແດງທັສນະຂອງປະທານກຸ່ມ OPEP ປະການທີໜຶ່ງ ເປັນການ
ບອກປັດຄວາມຮັບຜິດຊອບ ແລະປະການທີສອງ ສແດງໃຫ້ເຫັນເຖິງອິດທິພົນທີ່ລົດລົງ ຄື
ບໍ່ສາມາດຄວບຄຸມຣາຄາໄດ້ຄືແຕ່ເກົ່າ

ໃຜຄືສາເຫດ?
ຖ້າເປັນເຊັ່ນນັ້ນ ແມ່ນຄວາມຜິດຂອງນັກປັ່ນຣາຄາເກງກຳໄລສ້າງສຖານະການໃນຕລາດ
ໂລກເຮັດໃຫ້ຣາຄາສູງຂື້ນໂດຍບໍ່ມີສາເຫດອັນແທ້ຈິງ ຫລືບໍ່ ?

ຖ້າອ້າງອີງຕາມທັສນະຂອງ ທ່ານ Jean-Claude Trichet ຜູ້ອຳນວຍການຊາວຝຣັ່ງ
ເສດຂອງທະນາຄານກາງເອີຣົບ (BCE) ແລ້ວ ການປັ່ນຣາຄາສແວງກຳໄລມີສ່ວນເຮັດ
ໃຫ້ຣາຄາສູງຂື້ນ ກໍຈິງຢູ່ ຫາກແຕ່ວ່າບໍ່ແມ່ນສາເຫດໃຫຍ່

ສາເຫດໃຫຍ່ມີສາມປະການຄື:

1. ຄວາມຕ້ອງການນ້ຳມັນໃນໂລກສູງຂື້ນ  (ຂໍ້ນີ້ຂັດແຍ່ງກັບທັສນະຂອງປະທານ OPEP)

2. ການຜລິດຂາດຄວາມແນ່ນອນ ໝາຍເຖິງສົງຄາມແລະໄພພິບັດທັມມະຊາດ ແລະ

3. ການແບ່ງສ່ວນການສັມປະທານຂຸດເຈາະນ້ຳມັນໃນໂລກ ທີ່ປ່ຽນແປງຢ່າງຂນານໃຫຍ່
ຂໍ້ນີ້ອາດໝາຍເຖິງການເຂົ້າສັມປະທານຂອງ ສປ ຈີນ ໃນທະວີບອາຟຣິກກາກໍໄດ້ ໂດຍ
ສະເພາະໃນປະເທດ Nigéria

250 ດອລລາຣ໌ ຕໍ່ບາຣິລ
ເມື່ອສຣຸບຄວາມແລ້ວ ໃຜເວົ້າໃຜລຳກໍມ່ວນກັນທັງນັ້ນ ໝາຍຄວາມວ່າທຸກຄົນມີເຫດຜົນ
ໜ້າເຊື່ອຖືກັນທັງນັ້ນ ຈຶ່ງທຳໃຫ້ພວກເຮົາສຣຸບໄດ້ວ່າສາເຫດທີ່ທຳໃຫ້ຣາຄານ້ຳມັນພຸ່ງສູງ
ຂື້ນປານຈຣວດຄືແນວນີ້ ແມ່ນມີສາຣະພັດປັນຫາ ທີ່ໃຜໆກໍບໍ່ສາມາດແກ້ໄຂໄດ້

ເຖິງຂນາດກັບວ່າ ທ່ານ Alexeï Miller ປະທານຜູ້ອຳນວຍການບໍຣິສັດຍັກໃຫຍ່ຂຸດເຈາະ
ນ້ຳມັນຂອງຣັດເຊັຽ ກໍເຖິງຂນາດຄາດຄະເນວ່າ ຣາຄາໜຶ່ງບາຣິລຕໍ່ 250 ດອລລາຣ໌ນັ້ນ
ບໍ່ແມ່ນສິ່ງທີ່ເປັນໄປບໍ່ໄດ້

ເງີນເຟີ້ຕິດຕາມມາ
ໃນເມື່ອຣາຄານ້ຳມັນແພງ ອັຕຣາເງິນເຟີ້ກໍສູງຂື້ນໃນໂລກ ຢູ່ຍີ່ປຸ່ນສູງຂື້ນເຖິງ 1,5% ເມື່ອ
ເດືອນພຶສພາທີ່ຜ່ານມາ ສູງທີ່ສຸດໃນຍີ່ປຸ່ນໃນຮອບ 18 ປີ ໃນຂນະທີ່ເງິນເຟີ້ໃນກຸ່ມປະ
ເທດສະຫະພາບເອີຣົບກໍສູງເຖິງ 3,7% ໃນຊ່ວງດຽວກັນ ໝາຍຄວາມວ່າເກີນຂີດແດງ
ທີ່ທະນາຄານກາງເອີຣົບກຳໜົດເອົາໄວ້ທີ່ 2%

ໃນຂນະທີ່ທະນາຄານກາງອະເມຣິກັນ (FED) ທີ່ມັກລົດອັຕຣາດອກເບັ້ຽແກ້ໄຂປັນຫາເສຖ
ກິດຟືດເຄືອງ ກໍຕັດສິນໃຈຮັກສາອັຕຣາດອກເບັ້ຽພື້ນຖານໃນຣະດັບເກົ່າ 2% ເມື່ອວັນພຸດ
ຜ່ານມາ ແລະເພື່ອເປັນການຕ້ານໄພເງີນເຟີ້ທະນາຄານກາງເອີຣົບກໍອາດຈະຂື້ນອັຕຣາ
ດອກເບັຽໃນຕົ້ນເດືອນກໍຣະກົດໜ້ານີ້ ຊຶ່ງຊ່ຽວຊານໃດໆກໍຄາດຄະເນກັນແນວນັ້ນ

ແນ່ນອນຈະເປັນການສ້າງຄວາມບໍ່ພໍໃຈຕື່ມອີກຕໍ່ທ່ານປະທານາທິບໍດີຝຣັ່ງເສດ ນິໂກລາສ໌
ຊາຣ໌ໂກຊີ ທີ່ຍາມໃດກໍຕຳນິຕິຕຽນທະນາຄານກາງເອີຣົບຕລອດມາ ທີ່ດຳເນີນນະໂຍບາຍ
ດອກເບັ້ຽສູງ ເປັນອຸປສັກຕໍ່ການຂຍາຍຕົວທາງດ້ານເສຖກິດ ເປັນອຸປສັກຕໍ່ການດຳເນີນ
ນະໂຍບາຍການປະຕິຮູບທີ່ເພີ່ນໄດ້ວາງອອກ ທີ່ຈະສຳເຣັດໄດ້ກໍຕໍ່ເມື່ອມີການຂຍາຍຕົວທາງ
ດ້ານເສຖກິດເປັນປັດໃຈອູ້ມຊູເທົ່ານັ້ນ