ບົດວິເຄາະ: ສະຫະພາບເອີຣົບ / ເບື້ອງຫລັງການ ງັດຂໍ້ ຊາຣ໌ໂກຊີ - ແມນເດລຊັນ

ຍ້ອນປັນຫາ ການກະເສດ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 02/07/2008 ແກ້ໄຂໃຫມ່ຫລ້າສຸດເມື່ອວັນທີ 02/07/2008 10:14 TU

ທ່ານໂຢເຊ ມານູເອລ ບາໂຣໂຊ ປະທານກັມມາທິການເອີຣົບ (ຊ້າຍ) ຖແລງຂ່າວຮ່ວມກັບປະທາ ນາທິບໍດີ ນິໂກລາສ໌ ຊາຣ໌ໂກຊີ ທີ່ທຳນຽບປະທານາທິບໍດີ ວັງເອລີເຊ ນະຄອນຫລວງປາຣີສ ກ່ອນ ພິທີຮັບປະທານອາຫານຄໍ່າທີ່ຈັດເປັນກຽດໂດຍຜູ້ນຳຝຣັ່ງເສດ ແຕ່ທ່ານປີເຕີ ແມນເດລຊັນ ບໍ່ຍອມ ເຂົ້າຮ່ວມ (ພາບ: Reuters)

ການງັດຂໍ້ກັນຢ່າງໜັກລະຫວ່າງປະທານາທິບໍດີຝຣັ່ງເສດ ນີໂກລາສ໌ ຊາຣ໌ໂກຊີ
(Nicolas Sarkozy) ແລະ ກັມມາທິການເອີຣົບຝ່າຍການຄ້າ ທ່ານປີເຕີ ແມນ
ເດລຊັນ (Peter Mandelson) ມີພື້ນຖານມາຈາກການທີ່ຝຣັ່ງເສດເປັນປະ
ເທດໃຫຍ່ແຫ່ງກະເສຕກັມ ແຕ່ຖືກໜີບຈາກການເຈຣະຈາການຄ້າເສຣີ ທີ່ກົດດັນ
ໃຫ້ສະຫະພາບເອີຣົບ ລົດຜ່ອນການໃຫ້ເງິນອຸດໜຸນຕໍ່ກະເສຕກອນ

ປັນຫາມາຈາກການກະເສດ
ກ່ອນອື່ນເຮົາຕ້ອງເຂົ້າໃຈວ່າ ປະເທດຝຣັ່ງເສດເປັນປະເທດທີ່ມີຈຳນວນກະເສຕກອນແລະ
ພື້ນທີ່ທາງດ້ານການກະເສດຫລາຍທີ່ສຸດໃນສະຫະພາບເອີຣົບ ແລະງົບປະມານຂອງສະຫະ
ພາບທີ່ທຸ້ມເທໃສ່ການຊ່ວຍເຫລືອກະເສຕກອນນີ້ກໍສູງເຖິງ 45% ຂອງງົບປະມານທັງໝົດ
ຂອງສະຫະພາບ

ສນັ້ນບັນດາກະເສຕກອນຝຣັ່ງເສດຈຶ່ງໄດ້ຮັບການຊ່ວຍເຫລືອຈາກງົບປະມານທາງດ້ານ
ການກະເສດນີ້ຫລາຍທີ່ສຸດ ຄືຫລາຍກວ່າ 19% ຂອງການຊ່ວຍເຫລືອທັງໝົດ ເພາະ
ສນັ້ນໃນເມື່ອທ່ານ ປີເຕີ ແມນເດລຊັນ ໄດ້ທຳການເຈຣະຈາໃນຂອບອົງການການຄ້າໂລກ
ໂດຍອິງໃສ່ຫລັກການຜ່ອນສັ້ນຜ່ອນຍາວທາງດ້ານການກະເສດ ຊຶ່ງກໍຄືຮັບໃນການທີ່ຈະ
ໃຫ້ຈຳນວນເງິນອຸດໜຸນກະເສຕກອນໃນສະຫະພາບເອີຣົບລົດນ້ອຍລົງນັ້ນ ຈຶ່ງຈະເປັນການ
ເຮັດໃຫ້ປະເທດຝຣັ່ງເສດສູນເສັຽຜົນປໂຍດຫລາຍທີ່ສຸດ

ເຈຣະຈາໃຫ້ແລ້ວກ່ອນເລືອກຕັ້ງອະເມຣິກັນ
ບັນດານັກວິເຄາະຫລາຍໆທ່ານເຊື່ອວ່າ ການທີ່ທ່ານ ປີເຕີ ແມນເດລຊັນ ທີ່ເປັນຊາວອັງ
ກິດ ເລັ່ງເອົາແທ້ເອົາວ່າເພື່ອໃຫ້ການເຈຣະຈາການຄ້າໂລກ Doha Round ສິ້ນສຸດລົງ
ໂດຍຍອມຮັບການຜ່ອນປົນທີ່ຫລາຍເກີນໄປໃນສາຍຕາຂອງຜູ້ນຳຝຣັ່ງເສດນັ້ນ ເພາະຕ້ອງ
ການໃຫ້ປິດສາກລົງກ່ອນການເລືອກຕັ້ງຊິງຕຳແໜ່ງປະທານາທິບໍດີອະເມຣິກັນໃນວັນທີ 4
ເດືອນພະຈິກໜ້າ ໝາຍ ຄວາມວ່າໃນອີກ 4 ເດືອນຂ້າງໜ້ານີ້

ທັງນີ້ກໍເພາະວ່າຖ້າການເຈຣະຈາຍັງບໍ່ເສັດສິ້ນ ຜູ້ຄອງທຳນຽບຂາວຄົນໃໝ່ອາດຈະປ່ຽນ
ປິ້ນທ່າທີມາເບີ່ງຄືນໃໝ່ທັງໝົດຜົນຂອງການເຈຣະຈາທີ່ຜ່ານມາກໍໄດ້ ອັນຈະ ທຳໃຫ້ມີ
ຄວາມຈຳເປັນຕ້ອງເລີ້ມຕົ້ນທີ່ຈຸດສູນກັນໃຫມ່ອີກ ຊຶ່ງຈະແກ່ຍາວອອກໄປໂດຍບໍ່ຮູ້ວ່າຈະ
ສິ້ນສຸດລົງໃນອີກຈັກປີຂ້າງໜ້າ

ສັນຊາດອັງກິດຂອງ ແມນເດລຊັນ ກ່ຽວຂ້ອງຫລືບໍ່?
ສະຫະຣາຊອານາຈັກ ຫລືທີ່ຮູ້ກັນດີຢ່າງແຜ່ຫລາຍທີ່ສຸດໃນນາມຂອງປະເທດອັງກິດນັ້ນ
ຍາມໃດກໍໃຫ້ຄວາມສຳຄັນນ້ອຍຕໍ່ການກະເສດ

ອດີດນາຍົກ ຣມຕ ທ່ານໂທນີ ບແລຣ໌ (Tony Blair) ເຄີຍໄດ້ກ່າວໄວ້ວ່າຍຸກສມັຍນີ້ບໍ່
ແມ່ນຍຸກສມັຍເກົ່າແກ່ຕໍ່ໄປອີກແລ້ວ ຫາກແຕ່ວ່າແມ່ນຍຸກຍຸກ HI TECH ເພາະສນັ້ນ
ສະຫະພາບເອີຣົບຈຶ່ງບໍ່ຄວນທຸ້ມງົບປະມານໄປໃສ່ທາງດ້ານການກະເສດຫລາຍເກີນໄປ
ຫາກແຕ່ວ່າຄວນທຸ້ມໄປໃສ່ທາງດ້ານການສຶກສາແລະການຄົ້ນຄວ້າ

ການທີ່ທ່ານປີເຕີ ແມນເດລຊັນ ເປັນຊາວອັງກິດນີ້ບໍ ຈຶ່ງທຳໃຫ້ທ່ານຮັບເງື່ອນໄຂຫລາຍ
ຢ່າງທີ່ທ່ານຜູ້ນຳຝຣັ່ງເສດເຫັນໃນທຳນອງທີ່ວ່າເປັນການນຳເອົາກະເສຕກອນຂອງ
ສະຫະພາບເອີຣົບ ເວົ້າໃຫ້ຖືກຄັກໆກໍຄືກະເສຕກອນຝຣັ່ງເສດນັ້ນເອງ ຂື້ນຂຽງ

ເພື່ອເປັນການຕອບຄຳຖາມນີ້ ພວກເຮົາຂໍທົບທວນໃຫ້ທ່ານຊາບວ່າ ໂດຍຫລັກການແລ້ວ
ກັມມາທິການເອີຣົບບໍ່ມີສິດເຂົ້າຂ້າງປະເທດຕົນເອງ ຫາກແຕ່ວ່າດຳເນີນການໃດໆຕ້ອງ
ແມ່ນເພື່ອຜົນປໂຍດໂດຍສ່ວນຮວມຂອງສະຫະພາບ

ອີກປະການໜຶ່ງ ຜູ້ອຳນວຍການໃຫຍ່ອົງການການຄ້າໂລກ ທ່ານປາສກາລ ລາມີ
(Pascal Lamy) ກໍແມ່ນຊາວຝຣັ່ງເສດ ເພາະສນັ້ນຖ້າຫາກມີແນວຄວາມຄິດທີ່ວ່າ
ທ່ານປີເຕີ ແມນເດລຊັນ ຍອມເສັຽສລະຜົນປໂຍດຂອງກະເສຕກອນເອີຣົບ ມີສ່ວນກ່ຽວ
ຂ້ອງກັບການທີ່ເພີ່ນເປັນຊາວອັງກິດນັ້ນ ຈຶ່ງບໍ່ໜ້າຈະເປັນແນວຄິດທີ່ໜ້າເຊື່ອຖືໄດ້

ການເປັນປະທານທີ່ສັບສົນຫຍຸ້ງຍາກ
ເມື່ອສຣຸບຄວາມແລ້ວ ການເປັນປະທານວຽນສະຫະພາບເອີຣົບຂອງປະເທດຝຣັ່ງເສດນີ້
ກໍແມ່ນເລີ້ມຕົ້ນດ້ວຍການງັດຂໍ້ກັນໂລດ ແລະຕໍ່ໄປກໍອາດຈະມີການງັດຂໍ້ອື່ນໆຕິດຕາມມາ
ກໍໄດ້ ກ່ອນທີ່ການເປັນປະ ທານວຽນຈະສິ້ນສຸດລົງໃນຕອນທ້າຍຂອງປີນີ້

ໃນນັ້ນທີ່ສຳຄັນກໍມີການພຍາຍາມຜັກດັນໃຫ້ຂບວນການໃຫ້ສັຕຍາບັນຕໍ່ສົນທິສັນຍາລິສ
ບອນມີການສືບຕໍ່ ຫລັງຈາກທີ່ວ່າຊາວໄອຣ໌ແລນດ໌ໄດ້ອອກສຽງປະຊາມະຕິປະຕິເສດມາ
ແລ້ວເມື່ອວັນທີ 12 ມິຖະນາທີ່ຜ່ານມາ

 ໃນຂນະທີ່ປະທານາທິບໍດີຂອງໂປແລນດ໌ ທ່ານເລັກ ກັ໊ກຊິນສະກີ (Leck Kaczynsky)
ຜູ້ບໍ່ນິຍົມເອີຣົບ ກໍໄດ້ເລືອກເອົາວັນທຳອິດຂອງການເປັນປະທານວຽນຂອງສະຫະພາບ
ເອີຣົບຂອງຝຣັ່ງເສດນີ້ ອອກມາສແດງທ່າທີວ່າເພີ່ນຈະບໍ່ລົງນາມໃຫ້ສັຕຍາບັນຕໍ່ສົນທິ
ສັນຍາລິສບອນ ທີ່ເພີ່ນເຫັນວ່າ "ໄຮ້ຄ່າ" ຫລັງຈາກທີ່ໄດ້ຮັບການປະ ຕິເສດໂດຍຊາວ
ໄອຣ໌ແລນດ໌ ທັງນີ້ເຖິງແມ່ນວ່າຣັຖສະພາຂອງໂປແລນດ໌ໄດ້ລົງມະຕິຮັບຮອງການໃຫ້
ສັຕຍາບັນໄປແລ້ວເມື່ອເດືອນເມສາຜ່ານມາກໍຕາມ

ທ່າທີຂອງປະທານາທິບໍດີໂປແລນດ໌ນີ້ຍັງສອດຄ່ອງກັນອີກກັບທ່າທີຂອງປະທານາທິບໍດີ
ແຫ່ງສາທາຣະນະເຊັກສ໌ ທ່ານວາກລາຟ ຄລາວສ໌ (Vaclav Claus) ກໍເລີຍທຳໃຫ້
ຄວາມຫວັງທີ່ວ່າການໃຫ້ສັຕຍາບັນຕໍ່ສົນທິສັນຍາລິສບອນ ອາດເສັດສິ້ນໃນຊ່ວງ 6
ເດືອນແຫ່ງການເປັນປະທານວຽນຂອງປະເທດຝຣັ່ງເສດນີ້ ຕ້ອງຫ່າງໄກຄວາມຈິງອອກ
ໄປຕື່ມອີກ

ຫລືວ່າສົນທິສັນຍາລິສບອນນີຈະຕົກນ້ຳປ໋ອມແປ໋ມໄປເລີຍ ຄືກັນກັບຮ່າງທັມມະນູນທີ່ຊາວ
ຣັ່ງເສດແລະຊາວເນເທີແລນດ໌ໄດ້ອອກສຽງປະຊາມະຕິປະຕິເສດມາກ່ອນແລ້ວ?
ເປັນເຣື່ອງທີ່ຈະຕ້ອງຕິດຕາມກັນຕໍ່ໄປ