ສປ ຈີນ

ຈີນ ສະກັດກັ້ນ ການໃຊ້ຣະບົບ INTERNET

ໂດຍ ສີທູຍ ສຸວັນນະສີ

ບົດຄວາມນີ້ເຜີຍແຜ່ເມື່ອວັນທີ 31/07/2008 ແກ້ໄຂໃຫມ່ຫລ້າສຸດເມື່ອວັນທີ 31/07/2008 12:28 TU

ພາບ ສນາມ ກິລາໂອລິມປິກ ປັກິ່ງ ຫລື ຮັງນົກ ມີພວກ ກັມມະກອນ ທຳຄວາມສະອາດ ອອ້ມແອ້ມ ສະຖານທີ່ນັ້ນ (ພາບ ຣອຍເຕີ)

ຈີນ ຫັກຫລັງ ກັມມະການ ໂອລິມປິກ ຣະເມີດ ສັນຍາທີ່ໃຫ້ໄວ້ ຕອນສມັກ ໂດຍ ບໍ່ຍອມໃຫ້ ໃຊ້ ຣະບົບສາຍໄຍ ແອງແຕກແນດ ແບບ ເສຣີ ແມ່ນວ່າ ທາງ ກັມມະການ ກິລາ ໂອລິມປິກ ສາກັນ ຕໍ່ວ່າ ປານໃດ ກໍຕາມ

1/ ສປ ຈີນ ບໍ່ຍອມ ຄືນຄຳ ແລະ ນັກຂ່າວ ໃນ ຫ້ອງຂ່າວ ປະຈຳ ສນາມ ກິລາ ປັກກິ່ງ ບໍ່ສາມາດ ໃຊ້ ຣະບົບ INTERNET ໃນ ການ ຮັບ/ສົ່ງ ຂ່າວ ຢ່າງເສຣີ ຕາມທີ່ທາງຈີນຮັບປາກ ມາແຕ່ກ່ອນ ເຣື່ອງ ນີ້ ທາງ ຄນະກັມມະການ ກິລາ ໂອລິມປິກສາກົນ ຫລື CIO ເຫັນວ່າ ແນວໃດ ? 

ຄນະກັມມະການ ກິລາ ໂອລິມປິກສາກົນ ຫລື CIO ແມ່ນຢູ່ໃນທ່າ ຕົກ ສເງີ້ ກໍວ່າ ໄດ້ ເພາະ ໃນເມື່ອ ວ່າ ຊິມອບໃຫ້ຈີນ ເປັນເຈົ້າພາບ ຈັດ ງານ ກິລາ ໂອລິມປິກ 2008 ນີ້ ຈີນ ຮັບປາກ ກັບ ກັມມະການ ໂອລິມ ປິກສາກົນ ແລ້ວວ່າ ຈະ ໃຫ້ ເສຣີພາບ ໃນດ້ານສື່ມວນຊົນ ຄືກັບ ການ ຈັດ ໂອລິມປິກ ໃນປະເທດ ອື່ນ ຊຸດກ່ອນໆ ຜ່ານມາ ຈຶ່ງ ອະນຸຍາດ ໃຫ້ ຈີນ ຈັດໄດ້ ແລະ ໃນມື້ວັນພະຫັດນີ້ ປະທານ ກັມມະການ CIO ທ່ານ Jacques Rogge ທີ່ຫ່ ກໍໄປຮອດ ປັກກິ່ງ ວັນພະຫັດ ກໍແຈ້ງແບບ ພາກ ພູມໃຈວ່ານັບວ່າ ເປັນເທື່ອທຳອິດ ທີ່ສື່ມວນຊົນ ຕ່າງປະເທດ ສາມາດ ມາອອກຂ່າວ ເຄື່ອນໄຫວ ໃນປະເທດຈີນ ແລະ ສາມາດ ອອກຂ່າວໄດ້ ແບບ ເສຣີ ບໍ່ມີການບັງຄັບໃດໆ ຮວມ ທັງ ຣະບົບ ແອງ ແຕກແນດ ນຳດ້ວຍ. 

ທ່ານ ອາດ ຊິ ເວົ້າໄວເກີນໄປ ເພາະ ໃນມື້ດຽວກັນນັ້ນ ທາງຈີນ ປະ ກາດ ທັນທີ ວ່າ ຈະບໍ່ອະນຸຍາດ ໃຊ້ ແອງແຕກແນດ ແບບເສຣີໄດ້ ໃນ ຫ້ອງຂ່າວ ໃນສນາມກິລາໂອລິມປິກ. ນອກຈາກນັ້ນແລ້ວ Websites ຕ່າງໆ ທີ່ທາງຈີນ ເຫັນວ່າ ຂັດກັບນະໂຍບາຍຈີນ ຈະ ຖືກ ຕັດ ອອກ ໂດຍ ສະເພາະ ກໍແມ່ນ Websites ຂອງ Human Rights Watchs Websites ຂອງພວກ Falungong ແລະ Websites ນັກຂ່າວ ບໍ່ມີ ພົມແດນ Reporters sans Frontières ເປັນຕົ້ນ. 

ທ່ານ ຊັນເວຕ ຮັບຜິດ9ອບສື່ມວນຊົນ ຂອງ CIO ໃຫ້ ທັສນະ ແບບ ຫາ ທາງອອກ ເພາະ ຮູ້ສືກ ຖືກ ຫັກຫລັງແລ້ວ ວ່າ - ມີ ແຕ່ ບາງ Web- sites ເທົ່ານັ້ນດອກ ທີ່ ຖືກ ອັດ ເພາະ ມັັນ ຣະເມີດ ກົດຫມາຍຂອງ ສປ  ຈີນ. ພວກເຮົາຫວັງວ່າ ພວກ ນັກຂ່າວ ຕ່າງປະເທດ ຈະ ສາ ມາດ ຮັບນັບຖື ກົດຣະບຽບ ກົດຫມາຍ ຂອງ ສປ ຈີນ ໄດ້. 

ຫມາຍເຖິງວ່າ ທາງ ກັມມະການ CIO ຍອມຮັບ ການຫລົບ ລີ້ນ ປີ້ນ ຄວາມ ຂອງ ສປ ຈີນ ທີ່ ຣະເມີດ ເສຣີພາບໃນ ການອອກຂ່າວ ຕາມທີ່ ສັນຍາໄວ້ ເມື່ອກ່ອນແລ້ວ. 

ນອກໄປຈາກນີ້ ທ່ານ Kevan Kosper ຮັບຜິດຊອບ ການຂ່າວ ຂອງ CIO ໃຫ້ທັສນະວ່າ ອາດມີການຕົກລົງກັນໃຫມ່ ຣະຫວ່າງ ສປ ຈີນ ແລະ ກັມມະການກິລາໂອລິມປິກສາກົນ ແຕ່ ບໍ່ບອກ ໃຫ້ຂ້າ ພະເຈົ້າ ຊາບນຳ. ເປັນທີ່ແປກປະຫລາດທີ່ວ່າ ຜູ້ຮັບຜິດຊອບ ດ້ານຂ່າວ ບໍ່ຮູ້ ເຣື່ອງຫຍັງ ວ່າມີການຕົກລົງ ໃຫມ່ຫລືບໍ່ ແລະ ທ່ານ ໂຣກ ປະທານ CIO ກໍຍັງບໍ່ຮູ້ຈຶ່ງໄດ້ປະກາດວ່າ ສາມາດໃຊ້ ແອງແຕກແນຕໄດ້ ແລະ ມີເສຣີພາບໃນການອອກຂ່າວ.

 ທ່ານ ເມນາກ ແຫ່ງ ອົງການນັກຂ່າວບໍ່ມີພົມແດນ ແຈ້ງໃນ ຖແລງ ການ ສບັບ ນຶ່ງວ່າ ທີ່ເຫັນນີ້ ແມ່ນ ຊັຍຊນະ ຂັ້ນທຳອິດ ຂອງຈີນ ເພາະ ສັນຍາ ທີ່ທາງ ຈີນ ໃຫ້ໄວ້ ຕອນ ສມັກ ໄດ້ຖືກ ຣະເມີດ ຢ່າງສິ້ນເຊີງ ແລະ ທາງ ກັມມະການໂອລິມປິກ ເຫັນພ້ອມກັບການຣະເມີດ ຂອງ ຈີນ ອັນຫມາຍເຖິງວ່າ ກັມມະການ ໂອລິມປິກສາກົນ ຫມົດ ກຽດສັກສີ ໄປແລ້ວທີ່ຮ່ວມມື ກັບ ທ່າທີ ຂອງຈີນ.

2/ ທ່ານ ປະທານາທິບໍດີ Georges W. Bush ແຫ່ງສຫະຣັດ ອະ ເມຣິກາ ກໍ ໄດ້ຕ້ອນຮັບ ນັກຕໍ່ຕ້ານ ຣະບອບ ຫລື dissidents ຕົວ ສະກາດ ຂອງຈີນ ລີ້ພັຍ ໃນ ອະເມຣິກາ 5 ຄົນ ກ່ອນຊິໄປຮ່ວມ ເປີດ ປະຖົມມະເຣີກ ກິລາ ໂອລິມປິກ ປັກກິ່ງ ເຣື່ອງມັນເປັນຈັ່ງໃດ ? 

ແມ່ນແລ້ວ - ໃນມື້ວັນ ອັງຄານ ຜ່ານມານີ້ ທ່ານປະທານາທິບໍດີ ບູສ ໄດ້ ຕ້ອນຮັບ ພວກຕໍ່ຕ້ານ ຫົວສະກາດ ຂອງຣະບອບ ຈີນ - ແລະວ່າ ຈະ ນຳ ທັສນະ ຂອງ ພວກຕໍ່ຕ້ານດັ່ງກ່າວ ໄປ ວ່າ ຢູ່ເມືອງຈີນ ເມື່ອ ໄປຮອດແລ້ວ. 

ທາງຈີນ ມີປະຕິກິຣິຍາ ແບບ ເຄັ່ງຂຶມ ແລະວ່າ ການຕ້ອນຮັບ ພວກ ຕໍ່ຕ້ານຈີນ ຢູ່ ທຳນຽບຂາວນີ້ ເປັນ ສັນຍານ ບໍ່ດີ ສົ່ງເຖິງ ພວກຕ້ານ ຣະບອບຈີນທັງຫລາຍ. ຖືວ່າ ພວກ 5 ຄົນ ນັ້ນ ແມ່ນ ພວກ ກັນດານ ພວກ ຢາກ ແຍກ ແຜ່ນດິນຈີນ ຕ້ານ ຣະບອບຈີນ ແລະ ເປັນພວກ ອັນ ຕຣາຍຕໍ່ສະເຖັຽຣະພາບຂອງ ຈີນນຳດ້ວຍ. 

ນອກໄປ ຈາກນີ້ອີກ ທາງຈີນ ຍັງປະນາມ ສສ ອະເມຣິກາ ແລະ ສະມາ ຊິກວຸທິສະພາ ຫລື ເຊນາເຕີ ອະເມຣິກາ ທີ່ປະນາມຈີນ ໃນ ການ ຣະເມືອ ສິດທິມະນຸສ ໃນຈີນ ທາງຈີນວ່າ ເປັນ ການເອົາ ທ່າທີ ທີ່ ຫນ້າ ປະນາມ ຂອງພວກ ສສ ດັ່ງກ່າວ. 

ແຕ່ ໃນລະຍະຫລັງໆ ເມື່ອໃກ້ຊິຮອດ ການໄຂ ກິລາ ໂອລິມປິກ ເຂົ້າ ທາງ ຈີນ ຮັດກຸມ ດ້ານຄວາມປອດພັຍ ຫລາຍຂຶ້ນ ພວກໃດ ທີ່ສົງສັຍ ວ່າ ຈະເປັນພັຍຕໍ່ຄວາມປອດພັຍ ຖືກ ສົ່ງໄປ ຢູ່ຫ່າງໄກ ປັກກິ່ງ ແລະ ຜູ້ໃດ ທີ່ຂັດກັບຣະບອບ ຖືກຈັບໄປຂັງໄວ້ ຕົວຢ່າງ ທນາຍຄວາມຜູ້ນຶ່ງ ແລະ ອາຈານມະຫາວິທຍາລັຍ ຜູ້ນຶ່ງ ຖືກຈັບສົ່ງໄປ ສັມມະນາ ເພາະ ຕໍ່ສູ້ເພື່ອ ຄວາມຍຸຕິທັມແກ່ ຊາວຈີນ ທີ່ພົບພັຍພິບັດ ແຜ່ນດີນໄຫວ ແຄວ້ນ ເຊຈວນ ທີ່ບໍ່ໄດ້ຮັບຄວາມເປັນທັມ ເປັນຕົ້ນ ແລະ ນອກນັ້ນ ການເຂົ້າ ການອອກ ນະຄອນປັກກິ່ງ ແມ່ນຖືກກວດຂັນເປັນທີ່າຸດ ເວລານີ້.
SITHUY SOUVANNASY