ຣັດເຊັຍ - ເຊ່ອ໊ອກຊີ່

ຣັດເຊັຍ ຢຸດເຄື້ອນໄຫວ ບັ້ນລົບ ໃນ ເຊ່ອ໊ອກຊີ່

ໂດຍ ບັນດານ ສີສຸນທອນ B. Sisounthone

ບົດຄວາມນີ້ເຜີຍແຜ່ເມື່ອວັນທີ 12/08/2008 ແກ້ໄຂໃຫມ່ຫລ້າສຸດເມື່ອວັນທີ 12/08/2008 12:54 TU

ການປະທ້ວງ ສະນັບສະນູນ ເຊ່ອ໊ອກຊີ່ ຕໍ່ໜ້າ ສຳນັກງານ ສຫປ ຊາຊາດ ທີ່ ນິວຢອກ
Reuters

ປະທານາທິບໍດີ ຣັດເຊັຍ ທ່ານ ດິມິຕຣີ ເມດເວເດບ ປະກາດຜ່ານ ທໍຣະພາບ ແຫ່ງຊາດ ໃຫ້ກຳລັງ ທະຫານ ຣັດເຊັຍ ຢຸດການເຄື່ອນ ໄຫວ ບັ້ນລົບ ເພື່ອແນ່ໄສ່ ການ ບັງຄັບໃຫ້ ປະເທດ ເຊ່ອ໊ອອກຊີ່ ຫັນມາຫາ ສັນຕິພາບ.

ໃນທີ່ສຸດ ປະທານາທິບໍດີ ຣັດເຊັຍ ທ່ານ ດິມິຕຣີ ເມດເວເດບ ປະກາດ ຜ່ານທໍຣະພາບ ແຫ່ງຊາດ ໃຫ້ກຳລັງທະຫານ ຣັດເຊັຍ ຢຸດການເຄື່ອນ ໄຫວບັ້ນລົບ ເພື່ອແນ່ໄສ່ ການບັງຄັບໃຫ້ ປະເທດ ເຊ່ອ໊ອອກຊີ່ ຫັນມາ ຫາ ສັນຕິພາບ ໂດຍຖະແລງວ່າ ການບຸກໂຈມຕີ ຂອງກຳລັງຣັດເຊັຍນັ້ນ ໄດ້ເຖີງ ຈຸດປະສົງແລ້ວ, ແລະ ຄວາມປອດພັຍ ຂອງທະຫານ ພິທັກ ສັນຕິພາບຣັດເຊັຍ ທີ່ປະຈຳການ ໃນ ເຂດ ໂອເຊ່ຊີ່ໃຕ້ ແລະ ປະຊາຊົນ ນັ້ນ ກໍໄດ້ຖືກຄ້ຳປະກັນ ໝົດແລ້ວ.

 

ທະຫານຣັດເຊັຍ ບຸກ ເຊ່ອ໊ອກຊີ່
Reuters

 ຫລັງຈາກນັ້ນ ຜູ່ບັນຊາການທະຫານ ສູງສຸດ ກໍສັ່ງບໍ່ໃຫ້ ກອງກຳລັງທະຫານ ຣັດເຊັຍ ບຸກກ້າວຕໍ່ໄປ ໃນ ປະເທດ ເຊ່ອ໊ອກຊີ່, ແຕ່ຍັງບໍ່ມີ ຄຳສັ່ງ ໃຫ້ຢຸດ ຍິງ ຫຼື ຖອນອອກ ຈາກປະເທດນີ້ເທື່ອ.

 

ແຜນທີ່ ເຊ່ອ໊ອກຊີ່
Reuters

 

ພໍດີ ຈວບເໝາະກັບ ການໄປເຖີງ ກຸງ ໂມສກູ່ ຂອງປະທານາທິບໍດີ ຝຣັ່ງ, ທ່ານ ສ໊າກໂກຊີ່ ໄດ້ສັນລະເສີນ ການຕັດສິນໃຈ ຢຸດຕິບັ້ນລົບ, ແລະປາຖນາ ຢາກໃຫ້ ມີການເຊັນສັນຍາ ຢຸດຍິງກັນ ໂດຍໄວ ເພື່ອໃຫ້ ແຕ່ລະປະເທດນັ້ນ ກັບຄືນສູ່ ສະພາບເດີມ ກ່ອນຈະເກີດການສູ້ລົບກັນ.*

 

ທ່ານ ນິໂກ່ລ່າ ຊາກໂກຊີ່ ປະທານາທິບໍດີ ຝຣັ່ງກຳລັງສົນທະນາກັບຄູ່ຕຳແໜ່ງຣັດເຊັຍ ທ່ານດີມິຕະຣີ ເມດເວ່ແດຟ ທີ່ວັງ ກເຣມແລ່ງ ຮ/ຣອຍເຕີ

 ທ່ານ ສ໊າກໂກຊີ່ ໃນຖານະເປັນ ປະທານວຽນ ເອີຣົບອີກນັ້ນ ໄດ້ກ່າວວ່າ ເປັນທັມມະດາ ທີ່ຣັດເຊັຍ ຕ້ອງປ້ອງກັນ ຜົນປະໂຜດ ຂອງຕົນ ແລະ ກໍເປັນທັມ ມະດາ ຄືກັນ ທີ່ ປະຊາຄົມ ສາກົນ ຕ້ອງການ ໃຫ້ມີ ການຄ້ຳປະກັນ ເອກະລາດ ແລະ ອະທິປະຕັຍ ຢ່າງຄົບ ຖ້ວນ ຂອງ ປະເທດ ເຊ່ອ໊ອກຊີ່.

 

 

ສ່ວນກອງປະຊຸມ ລະວ່າງ ຣັດເຊັຍ ແລະ ອົງການ ປ້ອງກັນອັດລັງຕິກ ເໜືອ ຫຼືວ່າ ໂອ່ຕັງ ນັ້ນ ບໍ່ສາມາດຈັດຂື້ນໄດ້ ໃນມື້ນີ້, ເພື່ອພິຈາຣະນາ ຫາທາງແກ້ໄຂ ຄວາມຂັດແຍ້ງລະວ່າງ ຣັດເຊັຍ ກັບ ເຊ່ອ໊ອກຊີ່. ທັງນີ້ກໍເພາະວ່າ ການສົນທະນາ ສຳຄັນດັ່ງນີ້ ແມ່ນຕ້ອງການ ການກະ ຕຽມ ຢ່າງຄັກແນ່ ແລະ ໃຫ້ມີ ການປຶກສາ ຫາລືກັນ ຢ່າງກວ້າງຂວາງ.

 

ອິງຕາມ ທັສນະ ຂອງຄນະຊ້ຽວຊານ ນັ້ນຄາດວ່າ ຣັດເຊັຍ ສວຍໂອກາດ ແກ້ມັດ ບັນດາ ປະເທດ ຕາເວັນຕົກ ທີ່ຮັບຮູ້ ຍຸຍົງສົ່ງເສີມໃຫ້ ໂກໂສໂວ ແຍກຕົວອອກເປັນ ເອກະລາດ ແລະຕ້ອງການ ໃຫ້ບົດຮຽນ ແກ່ປະເທດ ເຊ່ອ໊ອກຊີ່ ນຳອີກດ້ວຍ, ເພາະຕອນ ແຍກຕົກອອກເປັນເອກະລາດ ຈາກ ສະຫະພາບ ໂຊວຽດ ໃໝ່ໆ ເຊ່ອ໊ອກຊີ່ ມີຄວາມເປັນ ຊາດນິຍົມ ຢ່າງສະ ຫັດສະກັນ ບັ່ນທອນ ຊົນຊາດ ໂອເຊ່ຊີ່ ເກີນໄປ.

ນອກນັ້ນ, ຍາມໃດ ປະທານາທິບໍດີ ສ໊າກກາວິນລີ່ ທີ່ນິຍົມ ເຂົ້າກັບເອີຣົບ ນັ້ນ ກໍພະຍາຍາມ ຢາກຂໍເຂົ້າເປັນສະມາຊິກ ຂອງ ສຫພ ເອີຣັບ ແລະ ຢາກເຂົ້າເປັນ ສະມາຊິກ ຂອງ ອົງການ ໂອຕັງ, ຊຶ່ງການປະພຶດດັ່ງກ່າວ ນີ້ ຖືກ ຣັດເຊັຍ ຄັດຄ້ານ ຢ່າງແຂງຂຶມ.

 

ການທີ່ ຣັດເຊັຍ ຍັງບຸກໂຈມຕີ ເຊ່ອ໊ອກຊີ່ ໃນຕອນເຊົ້າມື້ນີ້, ກ່ອນຈະມີ ຄຳຊັ່ງ ຂອງປະທານາທິບໍດີ ເມເວເດບ ອອກມາ ໃນຕອນທ່ຽງມື້ນີ້ ນັ້ນ, ກໍເພາະວ່າ, ຣັດເຊັຍ ບໍ່ຍອມຮັບເອົາໂຄງຮ່າງຍັດຕິ ທີ່ສະເນີໃຫ້ "ມີການ ຢຸດຍິງ ໂດຍດ່ວນ" ໃນເຊ່ອ໊ອກຊີ່, ໃນຕອນແລງວານນີ້, ໂດຍຖືວ່າ ຣັດເຊັຍ ຍັງບໍ່ສາມາດ ຮັບເອົາໂຄງຮ່າງສະບັບ ປັດຈຸບັນນີ້ໄດ້ເທື່ອ ແລະ ໃຫ້ເຫດຜົນວ່າ ໄວເກີນໄປໂພດ ແລະ ໂຄງຮ່າງດັ່ງກ່າວນັ້ນ ຣັດເຊັຍ ກໍບໍ່ໄດ້ເຂົ້າຮ່ວມ ອອກຄວາມເຫັນນຳ.

 

ແຕ່ໂຄງຮ່າງຍັດຕິ  ດັ່ງກ່າວນີ້, ຖືກຈັດຕຽມໂດຍ ຄນະຊ້ຽວຊານ ອາເມ ຣິກັນ ແລະ ເອີຣົບ ຂອງ ສຫປ ຊາຊາດ.

 

ສ່ວນ ສຫລ ອາເມຣິການັ້ນ, ປະທານາທິບໍດີ ບຸສຊ໌ ກໍໄດ້ຂື້ນສຽງ ຢ່າງ ແຂງຂັນ ໂດຍຕັກເຕືອນ ຣັດເຊັຍວ່າ ຖ້າບໍ່ຢຸດຕິ ບັ້ບລົບ ອັນໂຫດຫ້ຽມ ໃນ ເຊ່ອ໊ອກຊີ່ ນັ້ນ ການພົວພັນ ລະວ່າງ ອາເມຣິກາ ກັບຣັດເຊັຍ ກໍ ອາຈະຖືກບັ່ນທອນ.

 

ທ່ານ ບຸສຊ໌ ຖະແລງຕໍ່ໄປວ່າ : ການທີ່ ຣັດເຊັຍ ບຸກລຸກ ປະເທດ ເພື່ອນບ້ານ ທີ່ມີ ອະທິປະຕັຍ ຢ່າງເຕັມປ່ຽມ ແລະ ຂົມຂູ່ ລັຖະບານ ທີ່ຖືກເລືອກຕັ້ງຂື້ນ ແບບປະຊາທິປະຕັຍ ໂດຍປະຊາຊົນ ຂອງເຂົາເອງ ນັ້ນ, ເປັນທີ່ ຮັບເອົາບໍ່ໄດ້ ໃນ ສັຕະວັດ ທີ 21 ນີ້.

ທ່ານ ບຸສຊ໌ ຍັງຄາດຕື່ມອີກວ່າ ການກະທຳ ຂອງ ຣັດເຊັຍ ຄ້າຍຄືວ່າ ຕ້ອງການຢາກ ໂຄນລົ້ມ ລັຖະບານ ເຊ່ອ໊ອກຊີ່ ອີກດ້ວຍ.

 

 

ທ່ານ ວີຕາລີ່ ຈ໊ວກກີ່ນ ເອກອັຄະລັຖະທູດ ຣັດເຊັຍ ທີ່ ສຫປ ຊາຊາດ
Reuters

 ກ່ຽວກັບເຣື້ອງ ໂຄ່ນລົ້ມ ລັຖະ ບານ ເຊ່ອ໊ອກຊີ່ນີ້, ທ່ານ ຈ໊ວກກີ່ນ ເອກ ອັກຄະລັຖະທູດ ຣັດເຊັຍ ທີ່ສຫປ ຊາຊາດ ໄດ້ປະຕິເສດວ່າ ຣັດເຊັຍ ບໍ່ເຈຕະນາ ຈະໂຄ່ນລົ້ມ ປະທານາທິບໍດີ ເຊ່ອ໊ອກຊີ່.

ແຕ່ກົງກັນຂ້າມກັບ ທັສະນະ ຂອງ ທ່ານ ແຊກເກີ່ຍ ລາຟໂລຟ ລັຖະ ມົນຕຣີ ການຕ່າງປະເທດ ຣັດເຊັຍ ນັ້ນຄາດວ່າ : ອາຈະເປັນ ການດີ ຖ້າຫາກ ປະທານາທິບໍດີ ຊ໊າກກາວິນລີ່ ລາອອກຈາກ ຕຳແໜ່ງ, ເພາະ ທ່ານບໍ່ສາມາດ ເປັນຄູ່ຂາສົນທະນາ ຫຼື ເຈຣະຈາກັບ ຣັດເຊັຍໄດ້, ແລະ ທ່ານ ກໍໄດ້ ທຳການຄາຕະກັມ ຕໍ່ຄົນຣັດເຊັຍ.

 

ອົງການ ຂ້າຫລວງໃຫຍ່ ສຫປ ຊາຊາດ ດ້ານອົພະຍົບ ປະກາດວ່າ ຢ່າງນ້ອຍ ບໍ່ຕ່ຳກວ່າ 100.000 ຄົນ ໄດ້ອົພະຍົບລົບພັຍ ໃນຕອນ ສູ້ລົບ ລະວ່າງ ຣັດເຊັຍ ກັບ ເຊ່ອ໊ອກຊີ່.

ເມືອງ ກໍຣີ່ ຖືກຍົນຣັດເຊັຍ ຖະລົ່ມລະເບີດ
Reuters

 

ປະຊາຊົນ ໃນ ໂອເຊ່ຊີ່ ໃຕ້ 30.000 ຄົນ ຂອງທັງໝົດ 70.000 ຄົນ ໄດ້ປົບໜີ ຂື້ນໄປໃນເຂດ ໂອເຊ່ຊີ່ ເໜືອ ຊຶ່ງຢູ່ໃນເຂດແດນຣັດເຊັຍ. ນອກນັ້ນ ໄດ້ອົພະຍົບ ໄປໃນເຂດຕ່າງໆ ຂອງ ເຊ່ອ໊ອກຊີ່.