ເລືອກຕັ້ງ ສສ ຝຣັ່ງເສດ 2007

ຂໍ້ມູນທີ່ຄວນຮູ້

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 10/06/2007 ແກ້ໄຂໃຫມ່ຫລ້າສຸດເມື່ອວັນທີ 10/06/2007 à 15:41 TU

ການໃຊ້ສິດປະຊາທິປະໄຕລົງຄະແນນສຽງ ຂອງຊາວຝຣັ່ງເສດເລືອກ ສສ ຮອບທີໜຶ່ງ (ພາບ: Reuters)

ການເລືອກຕັ້ງສະມາຊິກສະພາຜູ້ແທນ
ຣາສດອນປີ 2007 ຊຶ່ງການລົງຄະແນນ
ສຽງຮອບທີໜຶ່ງມີຂື້ນໃນມື້ນີ້ ເປັນການ
ເລືອກຕັ້ງຄັ້ງທີ 13 ນັບຕັ້ງແຕ່ "ກົດ
ໝາຍຣັຖທັມມະນູນແຫ່ງສາທາຣະ ນະ
ຣັດທີ 5" ໄດ້ຮັບການປະກາດໃຊ້ຕັ້ງແຕ່
ວັນທີ 4 ຕຸລາ 1958 ເປັນຕົ້ນມາ ໂດຍ
ມີບັນດາຜູ້ສມັກທັງໝົດ 7369 ທ່ານ
ຈາກກວ່າ 80 ພັກການເມືອງ ໃນນັ້ນເປັນສຕຣີ 3177 ທ່ານ ທັງນີ້ເພື່ອຊ່ວງ
ຊິງກັນເປັນຜູ້ຄອງທີ່ນັ່ງໃນສະພາຈຳນວນທັງໝົດ 577 ທີ່ນັ່ງ ຕາມກົດໝາຍ
ຣັຖທັມມະນູນ ຜູ້ສມັກ ສສ ແຕ່ລະທ່ານຕ້ອງມີສັນຊາດຝຣັ່ງເສດອາຍຸບໍ່ຕ່ຳກວ່າ
23 ປີ ແລະຕ້ອງເປັນຜູ້ທີ່ບໍ່ຖືກຕັດສິດພົລເມືອງໃນການລົງສມັກຮັບເລືອກຕັ້ງ
ໃນຂນະທີ່ຜູ້ ປ່ອນບັດກໍຕ້ອງອາຍຸຢ່າງນ້ອຍ 18 ປີ

ວິທີການລົງຄະແນນສຽງ

ພົລເມືອງຝຣັ່ງເສດ 44.5 ລ້ານຄົນທີ່ມີອາຍຸຕັ້ງແຕ່ 18 ປີຂຶ້ນໄປ ເປັນຜູ້ມີສິດອອກສຽງ
ເລືອກຕັ້ງໃນຈຳນວນພົລເມືອງທັງໝົດ 64 ລ້ານຄົນ ໂດຍແຕ່ລະຄົນໃຊ້ສິດປະຊາທິປະ
ໄຕຂອງຕົນລົງຄະແນນສຽງໂດຍກົງສອງຄັ້ງ ຄືໃນຮອບທີ່ໜຶ່ງແລະຮອບທີ່ສອງ ເລືອກ
ເອົາຜູ້ສມັກຜູ້ໃດຜູ້ໜຶ່ງພຽງຜູ້ດຽວ ທີ່ສັງກັດພັກໃດພັກໜຶ່ງ ທີ່ຕົນນິຍົມ

ຜູ້ສມັກທ່ານໃດ ໃນເຂດເລືອກຕັ້ງໃດໆ ທີ່ໄດ້ຮັບຄະແນນສຽງ (50% + 1) ຂອງຄະ
ແນນສຽງທີ່ປ່ອນລົງໃນຫີບເລືອກຕັ້ງ ກໍຈະໄດ້ຮັບການເລືອກຕັ້ງໄປເລີຍໃນຮອບທີໜຶ່ງ
ສ່ວນຜູ້ສມັກທີ່ໄດ້ຮັບຄະແນນນ້ອຍກວ່າຕົວເລກທີ່ກ່າວເທິງນີ້ ຈະຜ່ານເຂົ້າໄປຊິງໄຊກັນ
ໃໝ່ອີກເທື່ອໜຶ່ງໃນຮອບທີ່ສອງ

ແຕ່ວ່າການທີ່ຈະມີສິດເຂົ້າແຂ່ງຂັນໃນຮອບທີ່ສອງໄດ້ນັ້ນ ຜູ້ສມັກໃດໆ ຈະຕ້ອງໄດ້ຮັບຄະ
ແນນສຽງຢ່າງນ້ອຍທີ່ສຸດບໍ່ຕ່ຳ ກ ວ່າ 12.5% ຂອງບັນຊີລາຍຊື່ຜູ້ມີສິດອອກສຽງເລືອກ
ຕັ້ງທັງໝົດໃນເຂດເລືອກຕັ້ງ

ນັ້ນກໍໝາຍຄວາມວ່າຜູ້ສມັກທີ່ເຂົ້າແຂ່ງຂັນຊິງກັນເປັນ ສສ ໃນຮອບທີ່ສອງນີ້ອາດມີຫລາຍ
ກວ່າສອງທ່ານກໍໄດ້ ສ່ວນຜູ້ສມັກທີ່ໄດ້ຄະແນນຕ່ຳ ກ ວ່າ 12.5%  ກໍຕົກຮອບໄປເລີຍ
ບໍ່ມີສິດເຂົ້າໄປແຂ່ງຂັນໃນຮອບທີ່ສອງ

ແຕ່ໃນກໍຣະນີທີ່ໃນຮອບທີໜຶ່ງ ບໍ່ມີຜູ້ສມັກທ່ານໃດໄດ້ຮັບຄະແນນສຽງເຖິງ 12.5% ກໍຈະ
ແມ່ນຜູ້ສມັກສອງທ່ານທີ່ໄດ້ຮັບຄະແນນສຽງຫລາຍທີ່ສຸດ ເປັນຜູ້ເຂົ້າໄປຊິງໄຊກັນໃນຮອບ
ທີສອງແລະຜູ້ສມັກທີ່ໄດ້ຮັບຄະແນນສຽງຫລາຍທີ່ສຸດຈະເປັນຜູ້ໄດ້ຮັບການເລືອກຕັ້ງ ແຕ່
ໃນກໍຣະນີທີ່ຄະແນນສຽງເທົ່າກັນຜູ້ທີ່ມີອາຍຸຫລາຍກວ່າຈະເປັນຜູ້ໄດ້ຮັບການເລືອກຕັ້ງ

ວິທີການເລືອກຕັ້ງສອງຮອບຕາມທີ່ກ່າວມານີ້ ເປັນປັດໃຈເອື້ອອຳນວຍເຮັດໃຫ້ພັກການ
ເມືອງໃຫຍ່ໆ ໂດຍສະເພາະພັກການເມືອງທີ່ເປັນຝ່າຍຣັຖບານ ສາມາດມີສຽງເັດດຂາດ
ໃນສະພາໄດ້ ແລະເປັນຣັຖບານທີ່ມີສະເຖັຽຣະພາບ ໂດຍໄດ້ຮັບການສນັບສນຸນຈາກສະ
ພາຢ່າງຖ້ວມລົ້ນ ທັງນີ້ກໍເພາະພັກເລັກພັກນ້ອຍທີ່ບໍ່ໄດ້ຮັບສຽງເກິນກວ່າ 12.5% ນັ້ນ
ບໍ່ມີໂອກາດໄດ້ຮັບການເລືອກຕັ້ງໃຫ້ມີ ສສ ໃນສະພານັ້ນເອງ

ຄວາມສເມີພາບຂອງຈຳນວນຜູ້ສມັກຍິງ-ຊາຍ 

ປີນີ້ເປັນປີທີ່ແປດແລ້ວຫລັງຈາກທີ່ມີການປະຕິຮູບກົດໝາຍຣັຖທັມມະນູນກຳໜົດໃຫ້ຈຳນວນ
ຜູ້ສມັກຍິງແລະຊາຍຂອງແຕ່ລະພັກຕ້ອງເທົ່າທຽມກັນ (50/50) ແຕ່ເຖິງປານນັ້ນປະ ເທດ
ຝຣັ່ງເສດກໍຍັງມີຄວາມກ້າວໜ້າຢ່າງເຊື່ອງຊ້າໃນເຣື່ອງຄວາມສເມີພາບດັ່ງກ່າວ ໂດຍຢູ່
ໃນອັນດັບທີ 59 ຂອງໂລກ ມີສຸພາບສຕຣີເປັນຜູ້ລົງສມັກໃນການເລືອກຕັ້ງ ສສ ຄັ້ງນີ້
ພຽງແຕ່ 41.6% ເທົ່ານັ້ນ ເພີ້ມຂຶ້ນຢ່າງເຊື່ອງຊ້າເມື່ອປຽບທຽບກັບ 5 ປີກ່ອນທີ່ມີ 39%

ໃນຣະຍະແປດປີທີ່ຜ່ານມານັ້ນ ພັກການເມືອງທີ່ມີຄວາມກ້າວໜ້າຫລາຍກວ່າໝູ່ໃນເຣື່ອງ
ຄວາມສເມີພາບຜູ້ສມັກຍິງຊາຍນີ້ ໄດ້ແກ່ບັນດາພັກເລັກພັກນ້ອຍ ທັງນີ້ເພາະເປັນພັກທີ່ບໍ່ມີ
ງົປມານຫລາຍ ຈຶ່ງພຍາຍາມຫລີກເວັ້ນການຕັດເງິນການຊ່ວຍເຫລືອຈາກຣັຖບານຍ້ອນ
ຄວາມບໍ່ສເມີພາບຂອງຜູ້ສມັກຍິງຊາຍນີ້

ຄວາມສເມີພາບ ຍິງ-ຊາຍ ແລະເງິນຊ່ວຍເຫລືອຈາກຣັຖບານ

ກົດໝາຍຣັຖທັມມະນູນຫ້າມບໍ່ໃຫ້ພັກການເມືອງຮັບເງິນຊ່ວຍເຫລືອຈາກນິຕິບຸກຄົນ (Per-
sonne morale) ໃນຂນະທີ່ສ່ວນບຸກຄົນ (Personne physique) ກໍສາມາດໃຫ້ເງິນ
ຊ່ວຍເຫລືອແກ່ພັກການເມືອງໄດ້ຄົນໜຶ່ງບໍ່ເກີນ 7500 ເອີໂຣຕໍ່ປີ ດັ່ງນັ້ນຣັຖບານຈຶ່ງເປັນ
ຜູ້ທີ່ຮັບພາຣະຫລາຍກວ່າຜູ້ອື່ນໃນການໃຫ້ເງິນຊ່ວຍເຫລືອແກ່ບັນດາພັກການເມືອງຕ່າງ
ໆ ໂດຍຄຳນວນຕາມຈຳນວນຄະແນນສຽງທີ່ພັກການເມືອງໄດ້ຮັບໃນການເລືອກຕັ້ງ ຄື
1 ຄະແນນຕໍ່ 1.63 ເອີໂຣ

ແຕ່ການທີ່ຈະໄດ້ຮັບເງິນຊ່ວຍເຫລືອນັ້ນ ພັກການເມືອງຕ່າງໆຈະຕ້ອງໄດ້ຮັບຄະແນນສຽງ
ໃນການເລືອກຕັ້ງຢ່າງນ້ອຍທີ່ສຸດ 1% ຂຶ້ນໄປ ແລະຕ້ອງສົ່ງສມາຊິກຂອງຕົນລົງສມັກ
ຢ່າງນ້ອຍ 50 ທ່ານໃນ 50 ເຂດເລືອກຕັ້ງໃນຈຳນວນທັງໝົດ 577 ເຂດເລືອກຕັ້ງ

ຢ່າງໃດກໍຕາມ ຈຳນວນເງິນຊ່ວຍເຫລືອນີ້ຈະຖືກຕັດເຖິງ 50% ຂອງຄວາມແຕກຕ່າງລະ
ຫວ່າງຈຳນວນຜູ້ສມັກຍິງ-ຊາຍທີ່ພັກການເມືອງສົ່ງລົງສມັກ

ຕົວຢ່າງ "ພັກ X" ສົ່ງຜູ້ສມັກຊາຍລົງແຂ່ງຂັນ 55 ທ່ານ ແລະຍີງ 45 ທ່ານ ຄວາມ
ແຕກຕ່າງກໍຄື 10 ເຄິ່ງໜຶ່ງຂອງ 10 ກໍຄື 5 ເພາະສນັ້ນເງິນຊ່ວຍເຫລືອແກ່ພັກການເມືອງ
ກໍຈະຖືກຕັດລົງ 5%

ເມື່ອປຽບທຽບກັບປີ 2002 ພັກສັງຄົມນິຍົມມີຄວາມກ້າວໜ້າ 11% ໂດຍມີຜູ້ສມັກທີ່ເປັນ
ສຕຣີໃນການເລືອກຕັ້ງ ສສ ປີ 2007 ນີ້ 45.5% ໃນຂນະທີ່ພັກຝ່າຍຂວາ UMP ມີ
26.6% ຢ່າງໃດກໍຕາມ ເຖິງກົດໝາຍຣັຖທັມມະນູນສົ່ງເສີມຄວາມສເມີພາບຍິງຊາຍໃນ
ເວທີການເມືອງກໍຕາມ ແຕ່ຜູ້ທີ່ໄດ້ຮັບການເລືອກຕັ້ງຫລາຍກວ່າກໍຍັງເປັນນັກການເມືອງ
ເພດຊາຍຄືເກົ່າ ໂດຍເຫັນໄດ້ຈາກສະພາຊຸດປັດຈຸບັນທີ່ຈະໝົດອາຍຸລົງໃນໄວໆນີ້ ໃນຈຳ
ນວນ ສສ 577 ທ່ານ ມີ ສສ ທີ່ເປັນສຕຣີພຽງແຕ່ 13% ເທົ່ານັ້ນ

ນອກຈາກໄດ້ຮັບເງິນຕາມຈຳນວນຄະແນນສຽງແລ້ວ ສສ ພັກການເມືອງຕ່າງໆກໍຍັງໄດ້
ຮັບເງິນຊ່ວຍເຫລືອຈາກຣັຖບານຕາມຈຳນວນ ສສ ອີກດ້ວຍ ຄື ສສ ໜຶ່ງທ່ານຕໍ່ 44 ພັນ
ເອີໂຣຕໍ່ປີເປັນເວລາ 5 ປີ ແລະເງິນຈຳນວນນີ້ບໍ່ແມ່ນເຂົ້າກະເປົ໋າຂອງ ສສ ຫາກແຕ່ວ່າ
ເຂົ້າບັນຊີຂອງພັກການເມືອງ

ໂດຍຫລັກການການຊ່ວຍເຫລືອດັ່ງກ່າວ ພັກ UMP ທີ່ມີ ສສ 352 ທ່ານໃນສະພາຊຸດ
ປັດຈຸບັນທີ່ຈະຄົບວາຣະໄວໆນີ້ ຈຶ່ງໄດ້ຮັບ 15 ລ້ານເອີໂຣເມື່ອປີ 2006 ທີ່ຜ່ານມາ ໃນ
ຂນະທີ່ພັກສັງຄົມນິຍົມແລະພັນທະມິດທີ່ມີຈຳນວນ ສສ ຮວມກັນທັງໝົດ 150 ທ່ານ ໄດ້
ຮັບ 7 ລ້ານເອີໂຣ, ສ່ວນພັກ UDF ໄດ້ຮັບກວ່າ 1 ລ້ານເອີໂຣເລັກນ້ອບສຳລັບຈຳນວນ
ສສ 28 ທ່ານ