ຝລັ່ງ//ຝ່າຍຂວາ ໄດ້ສຽງສ່ວນຫຼາຍ ເດັດຂາດ

ຝ່າຍຊ້າຍ ບໍ່ເສັຽຖ້ຽວ

ໂດຍ  ໂສວົງ

ບົດຄວາມນີ້ເຜີຍແຜ່ເມື່ອວັນທີ 18/06/2007 ແກ້ໄຂໃຫມ່ຫລ້າສຸດເມື່ອວັນທີ 18/06/2007 à 07:43 TU

ນາຍົກຝລັ່ງ ທ່ານຟຣັງຊົວຟີຢົງ ກ່າວຄຳປາສັຍ ຫຼັງຜົນເລືອກຕັ້ງ ຜູ້ແທນ ແລງວັນທີ່ 17/6/07
ຮູບ:reuters

ຝ່າຍຂວາ UMP ມີສຽງສ່ວນຫຼາຍ ທັມມະດາ ໃນສະພາຊຸດທີ່ 13 ຈະມານີ້ ບໍ່ໄດ້ຮັບຈຳນວນຕາມທີ່ຕ້ອງການ ເພາະ ປະຊາຊົນຫັນໄປປ່ອນເອົາຝ່າຍຊ້າຍຫຼາຍ ຕື່ມຂຶ້ນໃນຮອບສອງ ເຊິ່ງຝ່າຍຊ້າຍກໍຖື ວ່າ ເປັນຊັຍຊນະວາດນຶ່ງ ຫຼັງຈາກໄດ້ ຄາດວ່າ ຈະລົ້ມເຫຼວຫຼາຍໃນຮອບສອງ

ໃນຈຳນວນຣັຖມຸນຕີ 11 ທ່ານທີ່ເຂົ້າສມັກຜູ້ແທນຊຸດທີ່ 13 ນີ້ ກໍມີແຕ່ທ່ານອາແລັງ ຊຸບເປເສັຽຊັຍຢູ່ເມືອງບອກໂດ ອັນເຮັດໃຫ້ເພິ່ນຕ້ອງປະກາດລາອອກຈາກຕຳແໜ່ງ ຣັຖມຸນຕີກະຊວງສະພາບແວດລ້ອມ ເຊິ່ງຖືວ່າ ເປັນກະຊວງສຳຄັນໃນສັຕວັດທີ່ 21 ນີ້ ແລະ ເປັນກະຊວງຕັ້ງໃໝ່ ອີກຢ່າງນຶ່ງ ທ່ານອາແລັງຊຸບເປກໍຍັງເປັນບຸກຄົນອັນ ດັບສອງໃນຣັຖບານ

ກ່ຽວກັບຣັຖມຸນຕີຄົນໃດທີ່ເຂົ້າສມັກຜູ້ແທນນີ້ ຖ້າວ່າ ຕົກຜູ້ແທນກໍຕ້ອງລາອອກຈາກ ຕຳແໜ່ງຣັຖມຸນຕີ ຕາມເງື່ອນໄຂທີ່ນາຍົກຟີຢົງໄດ້ປະກາດໄປແລ້ວໃນວັນທີ່ 23 ພຶສພາຜ່ານມາ ເພາະນາຍົກວ່າ ເມື່ອສມັກຜູ້ແທນບໍ່ໄດ້ ກໍໝາຍຄວາມວ່າ ປະຊາຊົນ ບໍ່ມັກຕົນ ຈິ່ງຕ້ອງລາອອກ

ໃນການປ່ອນບັດວັນທີ່ 17 ເມຖຸນານີ້ ກໍມີປະຊາຊົນບໍ່ໄປອອກສຽງ 40.01% ເຊິ່ງ ຖືວ່າ ຫຼາຍທີ່ສຸດໃນສາທາລະນະລັດທີ່ຫ້າ ນັບແຕ່ປີ 1958 ເປັນຕົ້ນມາ ສ່ວນຜົນ ການເລືອກຕັ້ງນັ້ນ ມີດັ່ງຕໍ່ໄປນີ້ :

ພັກຂວາ UMP ຂອງປະທານາທິບໍດີໃີຈຳນວນຜູ້ແທນ (314 ຄົນ)
ພັກສັງຄົມນິຍົມ (185)
ພັກກາງໃໝ່ ພັນທະມິດຂອງພັກ UMP (22)
ພັກກອມມຸນິດ (15)
ຝ່າຍຊ້າຍອື່ນໆ (15)
ຝ່າຍຂວາອື່ນໆ (9)
ພັກຣາດີການຊ້າຍ/Radicaux de gauche (7)
ພັກທັມມະຊາດຂຽວ/Verts (4)
ພັກກາງ/Modem/Mouvement de démocratie (3)
ພັກເພື່ອປະເທດຝລັ່ງ/MPF (1)
ພັກຂວາຈັດ FN (ບໍ່ໄດ້ຜູ້ແທນຈັກຄົນ)

ສຳລັບຝ່າຍສັງຄົມນິຍົມນັ້ນ ກໍສະແດງຄວາມພໍໃຈທີ່ກ້າວຂຶ້ນທ່າສຳຄັນ ເປັນຝ່າຍຄ້ານ ໃນສະພາ ຮ່ວມກັບຝ່າບຊ້າຍບາງສ່ວນ ພັກນີ້ຖືວ່າ ຝ່າຍຕົນໄດ້ຮັບການເຫັນໃຈຈາກ ປະຊາຊົນ ໄດ້ຮັບຄວາມໄວ້ເນື້ອເຊື່ອໃຈຕື່ມຂຶ້ນ ເພື່ອໃຫ້ຕໍ່ສູ້ເອົາຄວາມເປັນທັມມາໃຫ້ ຈາກຝ່າຍກຳອຳນາດ ເພື່ອບໍ່ໃຫ້ ເປັນອຳນາດຜູກຂາດແຕ່ພັກຝ່າຍດຽວ

ແຕ່ເຖິງຢ່າງໃດ ພັກຂວາ UMP ກໍມີສຽງຂ້າງຫຼາຍຢູ່ແລ້ວໃນສະພາ ມີແຕ່ປະກອບ ຣັຖບານໃໝ່ຂຶ້ນທໍ່ນັ້ນ ໂດຍສະເພາະກໍຊອກຜູ້ຈະເຂົ້າແທນທ່ານອາແລັງຊຸບເປທີ່ລາ ອອກຈາກຣັຖມຸນຕີກະຊວງສະພາບແວດລ້ອມ ຍ້ອນຕົກຜູ້ແທນດັ່ງກ່າວ