ນິໂກລາສ໌ ຊາຣ໌ໂກຊີ ຢ້ຽມຢາມສຫະ ຣາຊອານາຈັກ ເອມີຣາ ອາຫຣັບ

ມີການລົງນາມ ໃຫ້ຝຣັ່ງເສດ ຕັ້ງຖານທັບ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 15/01/2008 ແກ້ໄຂໃຫມ່ຫລ້າສຸດເມື່ອວັນທີ 19/01/2008 08:59 TU

ທ່ານປະທານາທິບໍດີ ນິໂກລາສ໌ ຊາຣ໌ໂກຊີ (ຢືນຊ້າຍ) ແລະ ເອເມັຽຣ໌ ຊິກ ອາມັດ ບິນ ກາລີຟາ ອາລ ທານີ (ຢືນຂວາ) ປະມຸກແຫ່ງປະເທດກາຕາ ຮ່ວມເປັນສັກຂີພິຍານໃນການລົງນາມລະຫວ່າງ ທ່ານ Jean-François Cirelli (ນັ່ງຊ້າຍ) ປະທານຜູ້ອຳນວຍການບໍຣິສັດ "GDF" (Gas de France) ແລະ ຣມຕ ກະຊວງພລັງງານຂອງກາຕາ ທ່ານອັບດຸລລາ ອາລ ອັຕຕີຢາ (Abdullah al-Attiyah) (ນັ່ງຂວາ) (ພາບ: Reuters)

ຝຣັ່ງເສດ ແລະ ສຫະຣາຊອານາຈັກ ເອມີຣາ ອາຫຣັບ ຮ່ວມກັນລົງນາມໃນມື້
ນີ້ (ອັງຄານ 15 ມັງ ກອນ) ໃນສັນຍາກ່ຽວກັບການຕັ້ງຖານທັບຝຣັ່ງເສດທີ່ມີ
ລັກສນະຖາວອນ ທີ່ຈະມີກຳລັງພົນລະຫວ່າງ 400 – 500 ຄົນ ໃນດິນແດນ
ຂອງສຫະຣາຊອານາຈັກ ເອມີຣາ ອາຫຣັບ

ຜູ້ຮ່ວມລົງນາມຝ່າຍຝຣັ່ງເສດ ໄດ້ແກ່ ທ່ານແອຣ໌ເວ ມໍແຣັງ (Hervé Morin)
ຣມຕ ປ້ອງກັນປະເທດ ສ່ວນຜູ້ລົງນາມຝ່າຍ ເອມີຣາ ອາຫຣັບ ໄດ້ແກ່ ຣມຕ
ຕ່າງປະເທດ ຊິກ ອັບດາລລາ ເບັນ ຊາເຍດ ອາລ ນາຮາຢາເນ

ນອກຈາກນີ້ ຝຣັ່ງເສດ ແລະ ສຫະຣາຊອານາຈັກ ເອມີຣາ ອາຫຣັບ ກໍຍັງໄດ້
ຮ່ວມລົງນາມໃນສັນຍາວ່າດ້ວຍການຮ່ວມມືທາງດ້ານນິວເຄລັຽພົລເຮືອນນຳ
ດ້ວຍ ລົງນາມຝ່າຍຝຣັ່ງເສດໄດ້ແກ່ ທ່ານແບຣ໌ນາຣດ໌ ກຸສແນຣ໌ (Bernard
Kouchner) ຣມຕ ຕ່າງປະເທດ ຮ່ວມກັບຄູ່ຕຳແໜ່ງ ເອມີຣາ ອາຫຣັບ

ການລົງນາມໃນສັນຍາສອງສບັບມີຂຶ້ນທີ່ ກຸງອາບູ ດາບີ ນະຄອນຫລວງຂອງສຫະຣາຊ
ອານາຈັກ ເອມີຣາ ອາຫຣັບ ເນື່ອງໃນໂອກາດການເດີນທາງຢ້ຽມຢາມຂອງທ່ານປະ
ທານາທິບໍດີຝຣັ່ງເສດ ນິໂກ ລາສ໌ ຊາຣ໌ໂກຊີ

ສຫະຣາຊອານາຈັກ ເອມີຣາ ອາຫຣັບນີ້ ເປັນຂັ້ນຕອນສຸດທ້າຍຂອງການສາລະ ເວ
ຢ້ຽມຢາມສາມປະເທດໃນຂົງເຂດອ່າວເປີເຊັຽຂອງຜູ້ນຳຝຣັ່ງເສດ ທີ່ເລີ້ມມາຕັ້ງ
ແຕ່ວັນອາທິດ (13 ມັງກອນ) ທີ່ແລ້ວ ທີ່ປະເທດ ອາຣາບີ ຊາອູດິດ,  ເມື່ອວານນີ້
(14 ມັງກອນ) ທີ່ປະເທດກາຕາ

ການລົງນາມກ່ຽວກັບການຕັ້ງຖານທັບຝຣັ່ງເສດໃນສຫະຣາຊອານາຈັກ ເອມີຣາ ອາ
ຫຣັບ ດັ່ງກ່າວຖືໄດ້ວ່າເປັນບາດກ້າວສຳຄັນຂອງການພັທນາການພົວພັນລະຫວ່າງ
ສອງປະເທດ ທັງນີ້ເພາະຕາມປົກຕິນັ້ນ ຣັຖບານແຫ່ງ ກຸງອາບູ ດາບີ ມີແນວທາງ
ຫວງແຫນອະທິປະໄຕຂອງຕົນຢ່າງທີ່ສຸດ ແລະຈະບໍ່ຍອມໃຫ້ຕ່າງປະເທດຕັ້ງຖານ
ທັບໃນດິນແດນຂອງຕົນຢ່າງງ່າຍໆ

ສ່ວນທີ່ກ່ຽວກັບການລົງນາມໃນສັນຍາການຮ່ວມມືທາງດ້ານນິວເຄລັຽນັ້ນ ກໍນັບໄດ້
ວ່າສຫະຣາຊອານາຈັກ ເອມີຣາ ອາຫຣັບ ເປັນປະເທດອາຫຣັບປະເທດທີສາມແລ້ວ
ທີ່ລົງນາມກັບຝຣັ່ງເສດຮ່ວມມືໃນດ້ານນີ້ ຫລັງຈາກທີ່ ອາລເຊຣີ ແລະ ລີບີ ໄດ້ລົງ
ນາມມາກ່ອນໜ້ານີ້ແລ້ວ

ກຸ່ມບໍຣິສັດ Areva ແລະ Suez (ສາຂາໄຟຟ້າ) ໄດ້ປະກາດເມື່ອວັນຈັນຜ່ານມາຈະ
ຮ່ວມກັນກັບບໍຣິ ສັດ Total (ຂຸດເຈາະນ້ຳມັນ) ເພື່ອຂາຍເຕົາປະຕິກອນນິວເຄລັຽນ້ຳເ
ຢັນຮຸ່ນໃໝ່ "EPR" (European Pressurized Water Reactor) ໃຫ້ແກ່ ເອມີຣາ
ອາຫຣັບ

ສ່ວນໃນການຢ້ຽມຢາມ ອາຣາບີ ຊາອູດິດ ເມື່ອວັນອາທິດ 13 ມັງກອນ ທີ່ຜ່ານມາ
ຂອງທ່ານປະທານາທິບໍຊາຣ໌ໂກຊີແລະຄນະນັ້ນ ທັງສອງປະເທດກໍໄດ້ລົງນາມໃນສັນ
ຍາສີ່ສບັບດ້ວຍກັນຄື

1. ສັນຍາວ່າດ້ວການຮ່ວມມືທາງດ້ານການຂຸດເຈາະນ້ຳມັນແລະກ໊າສທັມມະຊາດ
2. ສັນຍາວ່າດ້ວຍການຮ່ວມມືທາງດ້ານການທູດ
3. ສັນຍາວ່າດ້ວຍການຮ່ວມມືທາງດ້ານການສຶກສາແລະການຄົ້ນຄວ້າວິທຍາສາດ
4. ສັນຍາວ່າດ້ວຍການຝຶກອົບຮົມ

ສອງສັນຍາຫລັງນີ້ຈະເອື້ອອຳນວຍໃຫ້ ອາຣາບີ ຊາອູດິດ ຈັດສົ່ງບັນດາເຈົ້າໜ້າທີ່
ແລະນັກສຶກສາ ເດີນທາງມາທຳການສຶກສາແລະຝຶກອົບຮົມໃນປະເທດຝຣັ່ງເສດຈຳ
ນວນຫລາຍກວ່າເກົ່າ ສ່ວນໃນການຢ້ຽມຢາມກາຕານັ້ນ ກໍມີການລົງນາມໃນການ
ຮ່ວມໄມ້ຮ່ວມມືທາງດ້ານພລັງງານ