ການເລືອກຕັ້ງ ປະທານາທິບໍດີຝຣັ່ງ 2007

ມີຜູ້ສມັກທັງໝົດ 12 ທ່ານ

ໂດຍ  ພອນແກ້ວ

ບົດຄວາມນີ້ເຜີຍແຜ່ເມື່ອວັນທີ 21/03/2007 ແກ້ໄຂໃຫມ່ຫລ້າສຸດເມື່ອວັນທີ 21/03/2007 à 12:13 TU

ບັນດາຜູ້ສມັກຮັບເລືອກຕັ້ງປະທານາທິບໍດີ
ຝຣັ່ງ 12 ທ່ານ (ພາບຕັດຕໍ່ RFI)

ຄນະມົນຕຣີແຫ່ງກົດໝາຍຣັຖທັມມະນູນ
(Conseil constitutionnel) ໄດ້ປະ
ກາດຢ່າງເປັນທາງການແລ້ວເມື່ອວັນອັງ
ຄານ 20 ມີນາ ທີ່ຜ່ານມາ ບັນຊີລາຍຊື່
ຜູ້ສມັກຊິງຕຳແໜ່ງປະທານາທິບໍດີຂອງ
ປະເທດຝຣັ່ງ ເພື່ອທົດແທນທ່ານຈ໊າກ
ຊີຣັກ (Jacques Chirac) ທີ່ຕັດສິນ
ໃຈບໍ່ລົງສມັກເທື່ອໃໝ່ ຫລັງຈາກທີ່ຄອງ
ຕຳແໜ່ງມາເປັນເວລາ 12 ປີ ການລົງ
ຄະແນນສຽງຮອບທີໜຶ່ງຈະມີຂຶ້ນໃນວັນ
ອາທິດທີ 22 ເມສາ ແລະຮອບທີສອງໃນວັນທີ 6 ພຶສພາໜ້າ

ໃນບັນດາຜູ້ສມັກ 12 ທ່ານນີ້ ແມ່ນທ່ານນາງອ໊າກ ແລ໊ຕ ລາກີເຢ (Arlette Laguiller )
ຈາກພັກຊ້າຍຈັດ ເປັນຜູ້ເຄີຍລົງສມັກມາແລ້ວເຖິງ 5 ຄັ້ງ ໃນຂນະທີ່ທ່ານຊັງ-ມາຣີ ເລີ
ເປັນ (Jean-Marie Lepen) ຈາກພັກຂວາຈັດຊາດນິຍົມເຄີຍເຂົ້າແຂ່ງຂັນມາແລ້ວ
ເຖິງ 4 ຄັ້ງ ສ່ວນທ່ານນິໂກລາ ຊາກໂກຊີ  (Nicolas Sarkozy) ຈາກພັກຂວາ UMP
ແລະທ່ານນາງ ເຊໂກແລນ ໂຣຢາລ (Ségolène Royal) ຈາກພັກສັງຄົມນິຍົມ ຊຶ່ງ
ເປັນຜູ້ມີຄະແນນນິຍົມນຳໜ້ານັ້ນ ແມ່ນການລົງສມັກຄັ້ງທຳອິດ

ຊີວະປວັດໂດຍຫຍໍ້ຂອງຜູ້ສມັກແຕ່ລະທ່ານ

 

 ທ່ານໂອລີວີເອ ເບີຊັງເຊີໂນ (Olivier Besance-
not) (ພາບ: Reuters) ຜູ້ສມັກຫມາຍເລກ 1
ຈາກພັກຊ້າຍຈັດ "ສັນນິບາດຄອມມຸຍນິດປະຕິວັດ
(Ligue communiste révolutionnqire) ອາຍຸ
32 ປີ ໄດ້ເຂົ້າຮ່ວມສມັກເທື່ອທຳອິດໃນປີ 2002
ໄດ້ຮັບຄະແນນສຽງ 4.25% ໃນຮອບທີໜຶ່ງ

ອັນເນືອງມາຈາກເປັນຄົນຮູບຫລໍ່ ເວົ້ານົວຫົວມ່ວນມີ
ອັທຍາສັຍໃຈຄໍດີ ແລະມີສໄຕລ໌ການແຕ່ງຕົວງ່າຍໆແບບຄົນໜຸ່ມສມັຍໃໝ່ ທ່ານເບີຊັງ
ເຊີໂນຈຶ່ງໄດ້ກາຍມາເປັນໜຶ່ງໃນບັນດານັກການເມືອງລະດັບແນວໜ້າ ແລະເປັນທີ່ກ່າວ
ເຖິງຢ່າງລຽນຕິດໃນວົງການສັງຄົມແລະສື່ສານມວນຊົນຫລັງຈາກທີ່ໄດ້ລົງສມັກຊິງຕຳ
ແໜ່ງປະທານາທິບໍດີຄັ້ງທຳອິດເປັນຕົ້ນມາ

ແຕ່ຢ່າງໃດກໍຕາມ ເຖິງວ່າແນວຄິດການເມືອງຂອງເພິ່ນເປັນແນວຄິດຕ້ານລະບົບທຶນນິ
ຍົມກໍຕາມ ແຕ່ໂດຍອາຊີບປະຈຳແລ້ວທ່ານຊ້ຳພັດເປັນບຸຣຸດໄປສະນີສົ່ງຈົດໝາຍເປັນປະ
ຈຳທີ່ເມືອງ Neuilly-sur-Seine ຊານເມືອງນະຄອນຫລວງປາຣີສ໌ ຊຶ່ງເປັນເມືອງທີ່ຮູ້
ກັນດີວ່າຫລຼຫລາແລະຮັ່ງມີ

ທ່ານເບີຊັງເຊີໂນ ຜູ້ທີ່ໄດ້ຮັບປຣິນຍາຕຣີທາງດ້ານປວັດສາດ ໄດ້ສເນີນະໂຍບາຍ "ຫ້າມ
ໄລ່ຄົນງານອອກຈາກໜ້າທີ່", ສເນີໃຫ້ເງິນເດືອນຂັ້ນຕ່ຳສຸດເພີ້ມຂຶ້ນຈາກປະມານ 1000
ເອີໂຣຕໍ່ເດືອນໃນປັດຈຸ ບັນ ໄປເປັນ 1500 ເອີໂຣ ພ້ອມກັນນີ້ເພິ່ນຍັງສເນີໃຫ້ຣັດຍຶດເອົາ
ບ້ານເຮືອນເຄຫະສຖານທີ່ວ່າງເປົ່າທຸກແຫ່ງ ມາໝຸນໃຊ້ເພື່ອແກ້ໄຂປັນຫາການຂາດທີ່
ພັກອາໃສຂອງປະຊາຊົນຜູ້ທຸກຍາກ

 

ທ່ານນາງມາຣີ ຍອຣ໌ຊ ບຸຟເຟ (Marie-George Buffet) (ພາບ: Reuters)
ອາຍຸ 58 ປີ ຜູ້ສມັກໝາຍເລກ 2 ຈາກພັກ
ຄອມມຸຍນິດຝຣັ່ງເສດ ໂດຍເປັນສຕຣີຜູ້ທຳ
ອິດໃນປວັດສາດທີ່ຄອງຕຳແໜ່ງເລຂາທິ
ການໃຫຍ່ຂອງພັກການເມືອງນີ້ ນອກຈາກນີ້ທ່ານນາງກໍຍັງຄອງຕຳແໜ່ງສມາຊິກສພາ
ບໍຣິຫານ ແຂວງ Seine-Saint-Denis ແລະເຈົ້າຄອງກຳແພງນະຄອນຂອງເມືອງ
Blanc-Mesnil ໃນແຂວງ Seine-Saint-Denis ນຳດ້ວຍ ການລົງສມັກຊິງຕຳແໜ່ງ
ປະທານາທິບໍດີໃນຄັ້ງນີ້ເປັນຄັ້ງທຳອິດໃນຊີວິດການເມືອງຂອງທ່ານນາງ

ລະຫວ່າງປີ 1997 – 2002 ທ່ານນາງໄດ້ຄອງຕຳແໜ່ງ ຣມຕ ກະຊວງກິລາໃນຣັຖບານ
ທີ່ມີທ່ານ ລີໂອແນລ ໂຈ໊ສແປັງ (Lionel Jospin) ຈາກພັກສັງຄົມນິຍົມເປັນນາຍົກ ຣມຕ
ທີ່ປົກຄອງຮ່ວມກັບປະທານາທິບໍດີຝ່າຍຂວາ ຈ໊າກ ຊີຣັກ (UMP) ເມື່ອປີ 2005

ທ່ານນາງມາຣີ ຍອຣ໌ຊ ບຸຟເຟ ເປັນຜູ້ໜຶ່ງໃນບັນດານັກການເມືອງທີ່ອອກຂົນຂວາຍໂຄສະ
ນາເພື່ອໃຫ້ປະຊາຊົນຊາວຝຣັ່ງເສດປະຕິເສດຕໍ່ຮ່າງທັມມະນູນຂອງສຫະພາບເອີຣົບ ຫລັງ
ຈາກການອອກສຽງປະຊາມະຕິເມື່ອວັນທີ 29 ພຶສພາທີ່ມີຜົນປະຕິເສດຮ່າງທັມມະນູນຂອງ
ສຫະພາບແລ້ວ ທ່ານນາງກໍສືບຕໍ່ຢ່າງບໍ່ລົດລະໃນການຕ້ານລະບົບເສຖກິດໂລກາພິວັດ
ຫລືລະບົບເສຖກິດທີ່ປາສຈາກພົມແດນ

ພ້ອມດຽວກັນທ່ານນາງມາຣີ ຍອຣ໌ຊ ບຸຟເຟ ຍາມໃດກໍສແດງທ່າທີຢາກໃຫ້ມີຜູ້ສມັກຂອງ
ຂບວນການຝ່າຍຊ້າຍພຽງຜູ້ດຽວລົງສມັກຊິງຕຳແໜ່ງປະທານາທິບໍດີໃນປີ 2007 ນີ້ ແຕ່ບໍ່ປະສົບຜົນສຳເຣັດ ໂດຍເຮົາສັງເກດໄດ້ວ່າໃນຈຳນວນຜູ້ສມັກ 12 ທ່ານນັ້ນ ມີຜູ້
ສມັກຈາກຝ່າຍຊ້າຍຕ່າງໆ ທັງຊ້າຍຄລາສສິກແລະຊ້າຍຈັດເຖິງ 7 ທ່ານ ຈົນບັນດາ ສື່ມວນຊົນຕັ້ງຂໍ້ສັງເກດວ່າ "ຫລາຍຜູ້ສມັກເກີນໄປຈາກຝ່າຍຊ້າຍເປັນການຂ້າຝ່າຍຊ້າຍ"
(Trop de gauche tue la gauche)

ນະໂຍບາຍສຳຄັນທີ່ເລຂາທິການໃຫຍ່ພັກຄອມມຸຍນິດຝຣັ່ງເສດນຳສເນີສຳລັບການເລືອກ
ຕັ້ງຊິງຕຳແໜ່ງປະທານາທິບໍດີໃນຄັ້ງນີ້ກໍຄື ຂຶ້ນເງິນເດືອນຂັ້ນຕ່ຳສຸດຈາກປະມານ 1000
ເອີໂຣໃນປັດຈຸບັນ ໄປເປັນ 1500 ເອີໂຣ ນັບຕັ້ງແຕ່ວັນທີ 1 ກໍຣະກົດ ປີນີ້ເປັນຕົ້ນໄປ,
ໃຫ້ຣັດດຳເນີນການສ້າງເຄຫະສຖານ 600 000 ໜ່ວຍໃນຣະຍະ 5 ປີ ເພື່ອແກ້ໄຂປັນ
ຫາການຂາດທີ່ພັກອາໃສ

ໃນທາງດ້ານພລັງງານ ທ່ານນາງສນັບສນຸນໃຫ້ສືບຕໍ່ໂຄງການແຫ່ງຊາດ EPR ທີ່ເມືອງ
Flamanville ໃນແຂວງ Manche ແລະໂູຄງການນາໆຊາດ ITER ທີ່ມີສູນກາງໃຫຍ່
ໃນປະເທດຝຣັ່ງເສດ ທັງສອງແມ່ນໂຄງການຄົ້ນຄວ້າເພື່ອສ້າງປະຕິກອນນິວເຄລັຽຮຸ່ນ
ໃໝ່ທີ່ບໍ່ໃຊ້ທາດ Uranium ເປັນເຊື້ອເພີງ

 

ທ່ານເຊຣາຣດ໌ ຊີວາກດີ (Gérard Schi-
vardi) (ພາບ: AFP) ຜູ້ສມັກໝາຍເລກ
3 ອາຍຸ 56 ປີ ລົງສມັກໃນນາມຂອງພັກ
ແຮງງານ (Parti des Travailleurs)
ແລະປະກາດຕົວເປັນຜູ້ຕາງໜ້າຂອງບັນດາ
ເຈົ້າຄອງກຳແພງນະຄອນຫົວເມືອງເລັກຫົວ
ເມືອງນ້ອຍຕ່າງໆໃນເຂດຊົນນະບົດທີ່ໄດ້ຮ່ວມ
ແຮງຮ່ວມໃຈກັນຕໍ່ຕ້ານສົນທິສັນຍາມາສຕຣິກ
(Maastricht) ສ້າງຕັ້ງສຫະພາບເອີຣົບ

ທ່ານເຊຣາຣ໌ກ ຊີວາກດີ ທວງຕລອດເວລາ
ໃຫ້ປະເທດຝຣັ່ງເສດຖອນຕົວອອກຈາກສຫະ
ພາບເອີຣົບ, ອອກຈາກຄນະກັມມາທິການເອີຣົບ, ອອກຈາກທະນາຄານກາງເອີຣົບ ແລະ
ອອກຈາກສພາເອີຣົບ

ກ່ອນທີ່ຈະມາຈັດຕັ້ງພັກການເມືອງຂອງຕົນທ່ານເຊຣາຣ໌ກ ຊີວາກດີ ເຄີຍເປັນສມາຊິກ
ຂອງພັກສັງຄົມນິຍົມມາກ່ອນແຕ່ໄດ້ລາອອກເມື່ອປີ 2003

 

ທ່ານຟຣັງຊົວສ໌ ໄບຣູ ຂນະຫາສຽງເລືອກຕັ້ງ
(ພາບ: Reuters)
ທ່ານຟຣັງຊົວສ໌ ໄບຣູ (François Bayrou)
ປະທານພັກກາງ UDF ອາຍຸ 55 ປີ ເຄີຍລົງ
ຮ່ວມສມັກຊິງຕຳແໜ່ງປະທານາທິບໍດີມາແລ້ວ
ຄັ້ງໜຶ່ງເມື່ອປີ 2002 ໄດ້ຮັບຄະແນນສຽງ
6.4% ໃນຮອບທີໜຶ່ງ

ຫລັງຈາກທີ່ໄດ້ຮັບປຣິນຍາເອກທາງດ້ານອັກສອນສາດ (Lettres classiques) ທ່ານກໍ
ໄດ້ຮັບການເລືອກຕັ້ງເປັນສມາຊິກສພາທ້ອງຖິ່ນຂອງແຂວງ Pyrénéés-Atlantique
ເມື່ອອາຍຸພຽງແຕ່ 34 ປີເທົ່ານັ້ນ ແລະໄດ້ກຳຕຳແໜ່ງ ຣມຕ ກະຊວງສຶກສາທິການເມື່ອ
ອາຍຸ 41 ປີ ຈາກປີ 1993 – 1997 ກ່ອນທີ່ຈະໄດ້ຮັບການເລືອກຕັ້ງໃຫ້ເປັນປະທານພັກ
UDF (Union pour la démocratie française)

ນັບແຕ່ນັ້ນເປັນຕົ້ນມາ ທ່ານກໍໄດ້ນຳເນີນນະໂຍບາຍຕ້ານຝ່າຍຂວາ RPR ແລະ UMP
ມາຕລອດ ທີ່ພຍາຍາມຈະກືນກິນພັກ UDF ຢ່າງບໍ່ລົດລະ...ເມື່ອເດືອນພຶສພາ ປີ
2006 ທ່ານໄດ້ນຳພາ ສສ ສັງກັດພັກ ຮ່ວມອອກສຽງໃນສພາສນັບສນຸນຮ່າງຍັດຕິບໍ່
ໄວ້ວາງໃຈຕໍ່ຣັຖບານຂອງທ່ານນາຍົກ ຣມຕ ໂດມີນິກ ເດີ ວິລແປັງ (Dominique de
Villepin) ຮ່າງຍັດຕິດັ່ງກ່າວສເນີຮ່ວມກັນໂດຍພັກສັງຄົມນິຍົມ, ພັກຂຽວ ແລະພັກການ
ເມືອງຝ່າຍຄ້ານອື່ນໆ

ນະໂຍບາຍທີ່ສຳຄັນທີ່ສ້າງຄະແນນນິຍົມໃຫ້ແກ່ທ່ານ ຟຣັງສ໌ຊົວ ໄບຣູ ກໍຄືນະໂຍບາຍ
ຈະຮັບບຸກຄົນທີ່ມີຄວາມສາມາດເຂົ້າຮ່ວມເປັນຄນະຣັຖບານ ໂດຍບໍ່ເລືອກວ່າເປັນຝ່າຍຂວາ
ຫລືຝ່າຍຊ້າຍ

 

 ທ່ານໂຢເຊ ໂບເວ ກຳລັງຫາສຽງເລືອກຕັ້ງ
(ພາບ:AFP)
ທ່ານໂຢເຊ ໂບເວ (José Bové) ອາຍຸ 53
ປີຜູ້ສມັກໝາຍເລກ 5 ໄດ້ກາຍມາເປັນຕົວ
ເດັ່ນແລະເປັນແຊມປ້ຽນຂອງບັນດາອົງການ
ຈັດຕັ້ງທີ່ຕໍ່ຕ້ານລະບົບເສຖກິດໂລກາພິວັດ ທັງນີ້ຫລັງຈາກທີ່ເພິ່ນໄດ້ນຳຄນະບຸກມ້າງເພ
ທຳລາຍຮ້ານອາຫານປະເພດ "ກິນດ່ວນ" (McDonald's) ນັບແຕ່ນັ້ນມາ ທ່ານໂຈເຊ
ໂບເວບໍ່ເຄີຍລົດລະໃນການຕໍ່ສູ້ ຈົນວ່າສານໄດ້ຕັດສິນລົງໂທດຈຳຄຸກ 4 ເດືອນເມື່ອທ້າຍ
ປີ 2005 ຍ້ອນໄດ້ນຳພາຄນະບຸກເຂົ້າທຳລາຍໄຮ່ເຂົ້າໂພດແປງພັນທຸກັມ (OGM)

ທ່ານໂຢເຊ ໂບເວ ສູບກອກເປັນປະຈຳ ແລ້ວໄວ້ຫນວດຕລອດ ຈົນຖືກຂນານນາມວ່າ
"Astérix" ວີຣະບຸຣຸດສມັຍໂບຮານທີ່ເປັນຜູ້ນຳພາໃນການລຸກຮືຂຶ້ນຕໍ່ສູ້ກັບອຳນາດຍຶດ
ຄອງຂອງກອງທັບພະ ເຈົ້າ ຈູລ ເຊຊາຣ໌ (Jules César) ແຫ່ງອານາຈັກໂຣມັນ

ແຕ່ໃນບາງຄັ້ງກໍມີການປຽບທຽບວ່າ ທ່ານໂຢເຊ ໂບເວ ມີລັກສນະຄ້າຍຄືກັນກັບທ່ານ
ເລັກ ວາເລຊາ (Lech Walesa) ອດີດຜູ້ນຳຂອງອົງການຈັດຕັ້ງກັມມະບານ
Solidarité ຂອງປະເທດໂປໂລຍ ທີ່ຕໍ່ສູ້ຕ້ານກັບລະບອບຄອມມຸຍນິດ ໃນບາງຄັ້ງກໍມີ
ການຂນານນາມວ່າທ່ານ ໂຢເຊ ໂບເວ ເປັນ ໂຣບິນຮູດ

ໃນຈຳນວນໂຄງການການເມືອງທີ່ທ່ານ ໂຢເຊ ໂບເວ ສເນີ 125 ຂໍ້ນັ້ນ ກໍມີການຂຶ້ນ
ອັຕຣາເງິນເດືອນ ຂັ້ນຕ່ຳສຸດຈາກປະມານ 1000 ເອີໂຣ ໄປເປັນ 1500 ເອີໂຣ
ແລະການສ້າງຕັ້ງກະຊວງສິດທິສຕຣີ

 

ທ່ານນາງໂດມີນິກ ວອຍເນ (ພາບ: AFP)
ທ່ານນາງໂດມີນິກ ວອຍເນ (Dominique Voynet) ອາຍຸ 48 ປີ
ສມາຊິກສພາສູງ ເປັນຜູ້ສມັກໝາຍເລກ 6 ຈາກພັກຂຽວອະນຸຣັກ
ທັມມະຊາດແລະສພາບສິ່ງແວດລ້ອມ ເຄີຍຮ່ວມລົງສມັກຊິງຕຳແໜ່ງປະທານາທິບໍດີ
ມາແລ້ວຄັ້ງໜຶ່ງເມື່ອປີ 1995 ໄດ້ຮັບຄະແນນສຽງ 3.32% ໃນຮອບທີໜຶ່ງ

ທ່ານນາງໂດມີນິກ ວອຍເນ ເປັນສມາຊິກກໍ່ຕັ້ງພັກຂອງເພິ່ນເອງເມື່ອປີ 1984 ຫລັງຈາກ
ນັ້ນກໍໄດ້ຮັບການເລືອກຕັ້ງເປັນສມາຊິກສພາເອີຣົບເມື່ອປີ 1989 – 1992, ເປັນສມາຊິກ
ສພາບໍຣິຫານແຂວງ Franche-Comté ຈາກປີ 1992 – 1994

ທ່ານນາງໂດມີນິກ ວອຍເນ ເປັນຜູ້ລິເລີ້ມອອກແນວຄວາມຄິດເຂົ້າເປັນພັນທະມິດກັບພັກ
ສັງຄົມນິຍົມໃນການເລືອກຕັ້ງ ສສ ກ່ອນກຳໜົດເມື່ອປີ 1997 ຜົນກໍຄືທ່ານນາງພ້ອມ
ດ້ວຍສມາຊິກພັກອີກ 6 ທ່ານໄດ້ຮັບການເລືອກຕັ້ງເຂົ້າສູ່ສພາ

ຈາກປີ 1997 – 2001 ເປັນ ຣມຕ ຈາກພັກຂຽວຄົນທຳອິດໃນປວັດສາດ ໂດຍຄອງ
ຕຳແໜ່ງ ຣມຕ ກະຊວງສພາຍສິ່ງແວດລ້ອມ

ນະໂຍບາຍສຳຄັນທີ່ທ່ານນາງສເນີໃນການລົງສມັກຊິງຕຳແໜ່ງປະທານາທິບໍດີໃນຄັ້ງນີ້
ກໍຄືໃຫ້ເພີ້ມງົບປະມານການຊ່ວຍເຫລືອຄົນຍາກຈົນຂຶ້ນອີກ 50% ຈາກນີ້ເຖິງ 5 ປີຂ້າງ
ໜ້າ, ໃຫ້ຣັດສ້າງເຄຫະສຖານຈຳນວນ 1 ລ້ານໜ່ວຍເພື່ອຊ່ວຍເຫລືອຜູ້ທີ່ຂາດທີ່ພັກອາ
ໃສ ພ້ອມທັງໃຫ້ຣັດອອກບັດໃຫ້ແກ່ຊາວຕ່າງດ້າວທີ່ຢູ່ໃນປະເທດຝຣັ່ງເສດທຸກຄົນ

ກ່ຽວກັບນະໂຍບາຍທາງດ້ານພລັງງານນັ້ນ ທ່ານນາງໂດມີນິກ ວອຍເນ ໄດ້ສເນີໃຫ້ລົດ
ການນຳໃຊ້ພລັງງານນິວເຄລັຽລົງ 30% ຈາກນີ້ໃນຣະຍະ 10 ປີຂ້າງໜ້າ ພ້ອມທັງໃຫ້
ຢຸດເຊົາໂຄງການ EPR ຊຶ່ງເປັນໂຄງການແຫ່ງຊາດຄົ້ນຄວ້າວິທີສ້າງປະຕິກອນນິວ
ເຄລັຽຮຸ່ນໃໝ່ທີ່ບໍ່ໃຊ້ທາດ Uranium

 

ທ່ານຟີລິບ ເດີ ວິລລີເອ ໃນຂນະ
ຫາສຽງເລືອກຕັ້ງ (ພາບ: Reuters)
ທ່ານຟີລິບ ເດີ ວິລລີເອ (Philippe de Villiers) ຜູ້ສມັກໝາຍເລກ 7 ອາຍຸ 58 ປີ
ປະທານພັກຂວາຊາດນິຍົມ "Mouvement
pour la France" ສຳເຣັດການສຶກສາຈາກສຖາບັນການປົກຄອງແຫ່ງຊາດ
(ENA) ໄດ້ເຄີຍຮ່ວມລົງສມັກເລືອກຕັ້ງຊິງຕຳແໜ່ງປະທານາທິບໍດີມາແລ້ວຄັ້ງໜຶ່ງເມື່ອ
ປີ 1995 ໄດ້ຮັບຄະແນນສຽງ 4.74% ໃນຮອບທີໜຶ່ງ

ທ່ານຟີລິບ ເດີ ວິລລີເອ ໄດ້ຮັບຕຳແໜ່ງ ຣມຕ ຊ່ວຍວ່າການກະຊວງວັທນະທັມຈາກປີ
1986 – 1987, ນັບຕັ້ງແຕ່ປີ 1988 ເປັນຕົ້ນມາ ໄດ້ຮັບການເລືອກຕັ້ງເປັນປະທານ
ສພາບໍຣິຫານທ້ອງຖິ່ນແຂວງວັງເດ (Vendée) ຈົນກະທັ້ງເທົ່າທຸກວັນນີ້

ຜົນງານທີ່ດີເດັ່ນຂອງທ່ານກໍຄື ໃນນາມຂອງປະທານສພາບໍຣິຫານແຂວງ ທ່ານຟີລິບ
ເດີ ວິລລີເອ ໄດ້ເປັນຕົວຕັ້ງຕົວຕີໃນການສນັບສນຸນຊຸກຍູ້ໃຫ້ຈັດງານມຫະກັມໃຫຍ່ສແດງ
ລະຄອນໂບຮານທີ່ເມືອງ Puy-du-Fou

ໃນການລົງຮັບສມັກເລືອກຕັ້ງສມາຊິກຣັຖສພາເອີຣົບເມື່ອປີ 1999 ນັ້ນ ບັນຊີຜູ້ສມັກທີ່ທ່ານ
ເດີ ວິລລີເອ ນຳພາ ໄດ້ຮັບຄະແນນສຽງເຖິງ 13.05% ຫລາຍກວ່າບັນຊີີທີ່ມີທ່ານ
ນິໂກລາ ຊາໂກຊີ ເປັນຜູ້ນຳພາຊ້ຳ (RPR/UDF)

ນະໂຍບາຍຕົ້ນຕໍທີ່ຖືວ່າສຳຄັນທີ່ສຸດຂອງທ່ານ ຟີລິບ ເດີ ວິລລີເອ ນັ້ນກໍຄື ຢຸດເຊົາການ
ຮັບຄົນເຂົ້າເມືອງແບບຢູ່ຖາວອນ, ຍົກເລີກກົດໝາຍວ່າດ້ວຍການເຮັດວຽກ 35 ຊົ່ວໂມງຕໍ່
ສັປດາ, ຈັດການອອກສຽງປະຊາມຕິກ່ຽວກັບການຈະຢູ່ຮ່ວມໃນເງິນສກຸນດຽວເອີໂຣຕໍ່ໄປ
ອີກຫລືບໍ່

ກ່ອນທີ່ຈະມີການອອກສຽງປະຊາມຕິຄັ້ງວັນທີ 29 ພຶສພາ ປີ 2005 ກ່ຽວກັບທັມມະນູນ
ຂອງສຫະພາບເອີຣົບ ທ່ານກໍໄດ້ອອກໂຄສະນາເຊີນຊວນໃຫ້ປະຊາຊົນອອກສຽງ "ບໍ່ຮັບ"
ແລະຜົນທີ່ອອກມາກໍເປັນໄປຕາມນັ້ນ ຄືປະຊາຊົນຊາວຝຣັ່ງເສດສ່ວນໃຫຍ່ ໄດ້ອອກສຽງ
ປະຕິເສດ ຈົນກາຍເປັນວິກິດການສຖາບັນຂນາດໜັກຂອງສຫະພາບເອີຣົບ ທີ່ຍັງບໍ່ເປັນທີ່
ຊັດແຈ້ງວ່າຈະລົງຕົວກັນໃນທຳນອງໃດ ເຖິງແມ່ນວ່າ 27 ປະເທດສມາຊິກ ໄດ້ອອກ
ຖແລງການເນື່ອງໃນໂອກາດສລອງຄົບຮອບ 50 ປີຂອງການກໍ່ຕັ້ງສຫະພາບເອີຣົບ ວ່າ
ຈະໃຫ້ມີກົດໝາຍທັມມະນູນຫລືສົນທິສັນຍາສບັບໃໝ່ອອກມາໃຊ້ໃນປີ 2009 ກໍຕາມ

 

 

ທ່ານນາງເຊໂກແລນ ໂຣຢາລ Ségolène
Royal (ພາບ: AFP) ອາຍຸ 54 ປີ ຜູ້
ສມັກໝາຍເລກ 8 ຈາກພັກສັງຕົມນິຍົມ
ຊຶ່ງເປັນພັກຝ່າຍຄ້ານທີ່ໃຫຍທີ່ສຸດ

ທ່ານນາງໄດ້ຮັບການເລືອກຕັ້ງຈາກສມາ
ຊິກພັກດ້ວຍຄະແນນສຽງຖ້ວມລົ້ນໃຫ້ເປັນ
ຕົວແທນຂອງພັກລົງສມັກແຂ່ງຂັນຊິງຕຳ
ແໜ່ງປະທານາທິບໍດີໃນຄັ້ງນີ້

ທ່ານນາງ Ségolène Royal ກໍຄືກັນກັບບັນດານັກການເມືອງຄົນສຳຄັນຂອງຝຣັ່ງ
ເສດສ່ວນໃຫຍ່ ຈົບການສຶກສາມາຈາກສຖາບັນການປົກຄອງແຫ່ງຊາດ (ENA)
ແລະກໍແມ່ນໃນສຖາບັນການສຶກສາແຫ່ງນີ້ເອງທີ່ທ່ານນາງໄດ້ພົບກັບທ່ານ ຟຣັງຊົວສ໌
ໂຮລລັງດ໌ (François Hollande) ເລຂາທິການໃຫຍ່ຂອງພັກສັງຄົມນິຍົມ ທີ່ໄດ້ກາຍ
ມາເປັນຄູ່ຊີວິດຂອງທ່ານນາງໃນປັດຈຸບັນ ໂດຍທີ່ບໍ່ເຄີຍໄດ້ຈົດທະບຽນການແຕ່ງດອງ
ຢ່າງເປັນທາງການຈັກເທື່ອ ແລະມີພຶຍານຮັກຮ່ວມກັນເຖິງ 4 ຄົນ

ທ່ານນາງເຊໂກແລນ ໂຣຍາລ ໄດ້ເຂົ້າເປັນສມາຊິກຂອງພັກສັງຄົມນິຍົມເມື່ອປີ 1978 ຫລັງຈາກນັ້ນ ໄດ້ເຂົ້າໄປເຮັດວຽກທີ່ທຳນຽບປະທານາທິບໍດີ ວັງເອລີເຊ ໃນສມັຍທີ່ທ່ານ ຟຣັງຊົວສ໌ ມິຕແຕຣ໌ຣັງດ໌ (François Mitterrand) ເປັນປະທານາທິບໍດີ

ທ່ານນາງເຊໂກແລນ ໂຣຢາລ ໄດ້ຮັບການເລືອກຕັ້ງເປັນ ສສ ຄັ້ງທຳອິດເມື່ອປີ 1988
ໂດຍລົງສມັກທີ່ແຂວງ Deux-Sèvres ກ່ອນທີ່ຈະກ້າວເຂົ້າມາກຳຕຳແໜ່ງ ຣມຕ ກະ
ຊວງສພາບສິ່ງແວດລ້ອມລະຫວ່າງປີ 1992 – 1993

ຈາກປີ 1997–2002 ເປັນ ຣມຕ ກະຊວງສຶກສາ, ຄອບຄົວແລະເດັກ,  ເມື່ອປີ 2004
ໄດ້ຮັບການເລືອກຕັ້ງເປັນປະທານສພາບໍຣິຫານແຂວງ Poitou-Charente ເປັນ
ການກຳໄຊຊະນະເໜືອນາຍົກ ຣມຕ ຝ່າຍຂວາ ທ່ານ Jean-Pierre Raffarin ທີ່ຄອງ
ຕຳແໜ່ງປະທານສພາບໍຣິຫານແຫ່ງນີ້ມາກ່ອນ

ໃນໂຄງການການເມືອງທີ່ທ່ານນາງສເນີ 100 ຂໍ້ນັ້ນ ກໍມີການປ່ຽນແປງກົດໝາຍຣັຖ
ທັມມະນູນຈາກສບັບສາທາຣະນະຣັດທີ 5 ໃນປັດຈຸບັນ ໄປເປັນສບັບສາທາຣະນະຣັດທີ 6

 

ທ່ານເຟຣເດຣິກ ນີອູ (Frédéric Nihous) (ພາບ: AFP) ຜູ້ສມັກ
ໝາຍເລກ 9 ອາຍຸ 39 ປີ ລົງສມັກໃນນາມຂອງຕົວແທນກຸ່ມປະມົງ,
ລ້າສັດ, ຮັກທັມມະຊາດ ແລະຮີດຄອງປະເພນີດັ້ງເດີມ ທີ່ປະເທດ
ຝຣັ່ງເສດເຄີຍປະຕິບັດກັນມາແລະຍັງຄົງປະຕິບັດສືບທອດກັນມາຈົນເຖິງປັດຈຸບັນຕາມ
ຊົນນະບົດ

ທ່ານເຟຣເດຣິກ ນີອູ ປະຕິເສດບໍ່ຍອມຮັບສຫະພາບເອີຣົບ ທີ່ປະກອບໄປດ້ວຍຫລາຍຣັດ
ແບບດຽວກັບສຫະຣັດອະເມຣິກາ ທີ່ຖືເອົາທີ່ຖືເອົາແຕ່ເຣື່ອງເສຖກິດປາສຈາກພົມແດນ
ເປັນຫລັກໃຫຍ່

ເຖິງຈະມີແນວນະໂຍບາຍຮັກທັມມະຊາດແລະປົກປ້ອງສພາບສິ່ງແວດລ້ອມກໍຕາມ ແຕ່ທ່ານ
ກໍປະນາມຢູ່ສເມີວ່າພັກຂຽວແລະອນຸຣັກທັມມະຊາດກຸ່ມອື່ນໆມີແນວຄິດຜເດັດການ

ເມື່ອປີ 2002 ທ່ານເຟຣເດຣິກ ນີອູ ໄດ້ຮັບຄະແນນສຽງ 4.23% ໃນຮອບທີໜຶ່ງ ແຕ່ວ່າ
ຫລັງຈາກການປລາໄຊໃນການເລືອກຕັ້ງສມາຊິກສພາບໍຣິຫານເຂວງແລະສມາຊິກຣັຖສພາ
ເອີຣົບເມື່ອປີ 2004 ພັກການເມືອງຂອງທ່ານນີອູກໍມີຕົວແທນໃນສພາບໍຣິຫານແຂວງແຕ່ 3
ທ່ານເທົ່ານັ້ນ

 

ທ່ານ ຊັງ ມາຣີ ເລີເປັນ (Jean-Marie Le
Pen) (ພາບ: INA) ອາຍຸ 78 ປີ ເປັນປະ
ທານພັກຂວາຈັດຊາດນິຍົມ Front National
ຄັ້ງນີ້ເປັນຄັ້ງທີ 5 ແລ້ວທີ່ທ່ານລົງສມັກຮັບ
ເລືອກຕັ້ງຊິງຕຳແໜ່ງປະທານາທິບໍດີ ຄັ້ງທີ່
ບັນລຸຜົນສູງສຸດກໍຄືເມື່ອປີ 2002 ໂດຍທ່ານ
ສາມາດສ້າງປາກົດການ "ແຜ່ນດິນຖລົ່ມ" ຜ່ານເຂົ້າໄປຊິງໄຊໃນຮອບທີສອງໄດ້ ໂດຍ
ບຽດໃຫ້ທ່ານນາຍົກ ຣມຕ ລີໂອແນລ ໂຈ໊ສແປັງ (Lionel Jospin) ແຫ່ງພັກສັງຄົມ
ນິຍົມໃນຮອບທີໜຶ່ງໃຫ້ຕົກຮອບໄປ

ນັບຕັ້ງແຕ່ໄດ້ຮັບການເລືອກຕັ້ງເປັນ ສສ ຄັ້ງທຳອິດເມື່ອປີ 1956 ທ່ານເລີເປັນກໍໄດ້
ກາຍເປັນຕົວເດັ່ນ ເປັນແຊມປ້ຽນຂອງແນວຄວາມຄິດຊາດນິຍົມຂວາຈັດມາຕລອດ
ໂດຍເຊີດຊູສອງນະໂຍບາຍໃຫຍ່ດັ່ງນີ້:
1. ຕໍ່ຕ້ານການເຂົ້າເມືອງຊາວຊາວຕ່າງດ້າວ
2. ເຊີດຂູພົລເມືອງທີ່ມີເຊື້ອຊາດຝຣັ່ງເສດ

ໃນການລົງສມັກແຂ່ງຂັນຊິງຕຳແໜ່ງປະທານາທິບໍດີຄັ້ງທຳອິດເມື່ອປີ 1974 ທ່ານຊັງ ມາຣີ ເລີເປັນ ໄດ້ຮັບຄະແນນສຽງພຽງແຕ່ 0.7% ເທົ່ານັ້ນ ແຕ່ໃນປີ 1988 ໄດ້ເຖິງ 14.4%, ປີ 1995 ໄດ້ 15% ແລະ ໃນປີ 2002 ໄດ້ 16.26% ໃນຮອບທີໜຶ່ງ ແລະ
17.79% ໃນຮອບທີສອງ ຕໍ່ໜ້າຄູ່ແຂ່ງ ຄືທ່ານຊີຣັກ ທີ່ໄດ້ຮັບການສນັບສນຸນຢ່າງຖ້ວມ
ລົ້ນກວ່າ 82% ໂດຍທຸກແນວຄິດທີ່ຕໍ່ຕ້ານແນວຄິດຂວາຈັດກຽດຊັງຄົນຕ່າງຊາດຂອງ
ທ່ານເລີເປັນ ໄດ້ໂຫມທຸ້ມເທຄະແນນສຽງໃຫ້ ໃນນັ້ນຮວມທັງຝ່າຍທີ່ຕໍ່ຕ້ານ ທ່ານຊີຣັກ
ໃນຮອບທີໜຶ່ງ

 

ທ່ານນາງອາຣ໌ແລັຕ ລາກີເຍ (Arlette
Laguillet) (ພາບ: AFP) ຜູ້ສມັກໝາຍເລກ
11 ອາຍຸ 66 ປີ ເປັນຜູ້ຕາງໜ້າພັກຊ້າຍຈັດ
Lutte ouvrière ເຄີຍລົງສມັກແຂ່ງຂັນຊິງຕຳ
ແໜ່ງປະທານາທິບໍດີຜ່ານມາແລ້ວ 5 ຄັ້ງ

ຄັ້ງນີ້ເປັນຄັ້ງທີ 6.....ນັບຕັ້ງແຕ່ຄັ້ງທຳອິດຈົນເຖິງຄັ້ງທີ 6 ນີ້ ນະໂຍບາຍຂອງທ່ານນາງບໍ່
ເຄີຍປ່ຽນແປງຈັກເທື່ອ ກ່າວຄື ປ້ອງກັນຜົນປໂຍດຂອງຜູ້ອອກແຮງງານ ແລະຕ້ານນາຍທຶນ
ສຸດໂຕ່ງມາຕລອດ

"ຂ້າພະເຈົ້າຕໍ່ສູ້ກັບລະບອບນາຍທຶນເພາະແມ່ນລະບອບຂອງຄົນຜີບ້າທີ່ເອົາແຕ່
ກຳໄລເປັນໃຫຍ່"

ເປັນຂໍ້ຄວາມທີ່ທ່ານນາງເຄີຍກ່າວມາຕລອດ ບໍ່ວ່າໃນການສມັກຄັ້ງທຳອິດເມື່ອປີ 1974 ທີ່
ທ່ານນາງໄດ້ຄະແນນສຽງພຽງ 2.3% ໃນຮອບທຳອິດ ຫລືໃນປີ 2002 ເມື່ອທ່ານນາງໄດ້
ຄະແນນສຽງຫລາຍທີ່ສຸດ ເຖິງ 5.72% ກໍຄືກັນກັບການສມັກຄັ້ງນີ້ ທ່ານນາງຍັງຄົງຍຶດ
ໝັ້ນໃນແນວຄວາມຄິດເກົ່າຢ່າງບໍ່ມີປ່ຽນແປງ

ທ່ານນາງອາຣ໌ແລັຕ ລາກີເຍ ເຄີຍເຮັດວຽກເປັນພນັກງານພຶມດີດຂອງທະນາຄານ Crédit
lyonnais ໃນຊີວິດການເມືອງ ທ່ານນາງໄດ້ຮັບການເລືອກຕັ້ງເປັນສມາຊິກຣັຖສພາເອີຣົບ
ຈາກປີ 1999 – 2004 ຄຽງຄູ່ກັນໄປກໍເປັນສມາຊິກສພາບໍຣິຫານເຂດຊານເມືອງນະຄອນ
ຫລວງປາຣີສ໌ ທີ່ເອີ້ນວ່າ Ile de France

ໜຶ່ງໃນຈຳນວນນະໂຍບາຍທີ່ທ່ານນາງສເນີກໍຄື ຂຶ້ນເງິນເດືອນຂັ້ນຕ່ຳສຸດຈາກປະມານ
1000 ເອີໂຣໃນປັດຈຸບັນ ໄປເປັນ 1500 ເອີໂຣ ແລະໃຫ້ຣັດປຸກສ້າງທີ່ພັກອາໃສໃຫ້ແກ່
ຜູ້ທຸກຍາກຈຳນວນ 1 200 000 ຫນ່ວຍ

 

ທ່ານນິໂກລາ ຊາກໂກຊີ (Nicolas
Sarkozy) (ພາບ: AFP) ອາຍຸ 52
ປີ ຜູ້ສມັກໝາຍເລກ 12 ໄດ້ເຂົ້າຮັບຕຳ
ແໜ່ງເປັນປະທານພັກ UMP ມາຕັ້ງ
ແຕ່ທ້າຍປີ 2004

ທ່ານເປັນນັກການເມືອງອາຊີບທີ່ອຸທິດຕົນ
ຢ່າງສຸດກຳລັງເພື່ອໄປໃຫ້ເຖິງເປົ້າໝາຍ
ອັນສູງສຸດ ຄືການເຂົ້າກຳຕຳແໜ່ງປະທານາທິບໍດີຂອງປະເທດ

ທ່ານປະທານາທິບໍດີ ຈ໊າກ ຊີຣັກ (Jacques Chirac) ເອງ ຊຶງເຄີຍເປັນຜູ້ຊຸກຍູ້
ສນັບສນຸນ ທ່ານຊາໂກຊີ ມາກ່ອນໃນຕອນຕົ້ນ ຄ້າຍຄືພໍ່ກັບລູກ ກໍເຄີຍຕັ້ງເປົ້າໝາຍ
ແບບດຽວກັນນີ້ມາກ່ອນແລ້ວໃນອະດີດ ກ່ອນທີ່ທັງສອງຈະກາຍມາເປັນຂີ້ມິ້ນກັບປູນ
ໃນຄ້າຍການເມືອງດຽວກັນເມື່ອປີ 1995

ທ່ານຊາໂກຊີເຄີຍເປັນຜູ້ທີ່ໃກ້ຊິດທີ່ສຸດຂອງຄອບຄົວຂອງທ່ານຊີຣັກ ໂດຍໄດ້ຮ່ວມເປັນ
ພິຍານໃນພຶທີແຕ່ງດອງຂອງລູກສາວຂອງທ່ານຊີຣັກ ຄືທ່ານນາງກໂລດ ຊີຣັກ
(Claude Chirac) ກັບ ຕີແອຣີ ເຣ (Thierry Rey) ແຊມປ້ຽນຫລຽນຄຳກິລາ
ໂອແລມປິກປະເພດຢູໂດ

ທ່ານນິໂກລາ ຊາໂກຊີ ເລີ້ມຕົ້ນເຂົ້າສູ່ເວທີການເມືອງຕັ້ງແຕ່ຈົບອອກຈາກສຖາ
ບັນການປົກຄອງແຫ່ງຊາດ (ENA) ໃໝ່ໆ ໄດ້ກາຍມາເປັນເຈົ້າຄອງກຳແພງ
ນະຄອນຂອງເມືອງ Neuilly sur Seine ຊານເມືອງນະຄອນຫລວງປາຣີສ໌ ທີ່
ຖືວ່າເປັນເມືອງຂອງຄົນຮັ່ງມີ ເມື່ອອາຍຸພຽງແຕ່ 28 ປີເທົ່ານັ້ນ

ເມື່ອປີ 1993 ທ່ານນິໂກລາ ຊາໂກຊີ ຮັບຕຳແໜ່ງເປັນ ຣມຕ ກະຊວງງົບປະມານ
ກ່ອນທີ່ຈະມີປັນຫາຂັ້ນແຕກຫັກກັບທ່ານຊີຣັກ ໂດຍທ່ານຊາໂກຊີໄດ້ຫັນໄປໃຫ້ການ
ສນັບສນຸນແກ່ເອດູອາຣ໌ດ ບາລາດູຣ໌ (Edouard Ballardur) ນາຍົກ ຣມຕ ຈາກ
ພັກ RPR ໃນການລົງສມັກຊິງຕຳແໜ່ງປະທານາທິບໍດີ ໃນປີ 1995 ເປັນການ
ຕັດໜ້າທ່ານຊີຣັກທີ່ເປັນຫົວໜ້າພັກ

ເມື່ອປີ 2002 ທ່ານນິໂກລາ ຊາໂກຊີ ໄດ້ເຂົ້າກຳຕຳແໜ່ງເປັນ ຣມຕ ກະຊວງພາຍ
ໃນ ກ່ອນທີ່ຈະລາອອກເມື່ອເດືອນພະຈິກປີ 2004 ເພື່ອໄປຮັບຕຳແໜ່ງເປັນປະ
ທານຂອງພັກ UMP ໃນຖ້າມກາງການບໍ່ເຫັນພ້ອມຂອງທ່ານຊີຣັກ

ອີກຫົກເດືອນຕໍ່ມາ ທ່ານຊາໂກຊີ ກໍຫວນກັບມາກຳຕຳແໜ່ງ ຣມຕ ກະຊວງພາຍໃນ
ອີກເທື່ອໜຶ່ງ ໂດຍເປັນໝາຍເລກ 2 ຂອງຣັຖບານຂອງທ່ານນາຍົກ ຣມຕ ໂດມີນິກ
ເດີ ວິລແປັງ (Dominique de Villepin) ທັງນີ້ຫລັງຈາກການປລາໄຊອັນໜັກຂອງ
ພັກ UMP ໃນການເລືອກຕັ້ງລະດັບທ້ອງຖິ່ນ ແລະ ຫລັງຈາກທີ່ຊາວຝຣັ່ງເສດໄດ້
ອອກສຽງປະຊາມະຕິປະຕິເສດຮ່າງທັມມະນູນຂອງສຫະພາບເອີຣົບ ເມື່ອວັນທີ 29
ພຶສພາ ປີ 2005

ໃນສາຍຕາຂອງບັນດາສື່ສານມວນຊົນແລ້ວ ການທີ່ສາຍສັມພັນລະຫວ່າງທ່ານ ຈ໊າກ
ຊີຣັກ ແລະ ທ່ານນິໂກລາ ຊາໂກຊີ ມີທັງຮັກແລະທັງຊັງນັ້ນ ກໍເພາະທັງສອງທ່ານມີ

ລັກສນະຄວາມຕັ້ງໃຈແລະ ໝາຍໝັ້ນປັ້ນມືທີ່ຄ້າຍຄືກັນ ນັ້ນກໍຄືການກ້າວໄປສູ່ຕຳແໜ່ງ
ການເປ໊ນເຈົ້າເຂົ້າຄອງທຳນຽບປະທານາທິບໍດີ ວັງເອລີເຊ (Palais de l'Elysée)
ນັ້ນເອງ