ຜົນເລືອກຕັ້ງ ປະທານາທິບໍດີ ຝຣັ່ງເສດ ຮອບທີໜຶ່ງ

ໂຣຢາລ 25.80 % ເຂົ້າຮອບສອງ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 22/04/2007 ແກ້ໄຂໃຫມ່ຫລ້າສຸດເມື່ອວັນທີ 22/04/2007 à 15:51 TU

ຍານາງ ໂຣຍຢ່ານ
(ພາບ: Reuters)

ທ່ານນາງເຊໂກແລນ ໂຣຢາລ ອາຍຸ 53
ປີແຫ່ງພັກສັງຄົມນິຍົມຝ່າຍຄ້ານ ໄດ້ຮັບ
ຄະແນນ 25.80% ຜ່ານເຂົ້າໄປແຂ່ງຂັນ
ຕັດເຊືອກໃນຮອບທີສອງກັບ ທ່ານນິໂກ
ລາ ຊາໂກຊີ ແຫ່ງພັກຂວາ UMP ຝ່າຍ
ຣັຖບານ ທີ່ໄດ້ 31.10% ຖ້າທ່ານນາງ
ໄດ້ຮັບໄຊຊະນະໃນຮອບທີສອງ ຊຶ່ງການ
ລົງຄະແນນສຽງຈະມີຂຶ້ນໃນວັນທີ 6 ພຶສ
ພາຈະເຖິງນີ້ ກໍຈະກາຍໄປເປັນປະທານາ
ທິບໍດີຍິງຄົນທຳອິດຂອງປະເທດຝຣັ່ງເສດ
ບໍ່ເຄີຍມີມາກ່ອນຈັກເທື່ອໃນປວັດສາດ
ແລະກໍຈະເປັນປະທານາທິບໍດີຜູ້ທີສອງແຫ່ງສາທາຣະນະຣັດທີ 5 ທີ່ມາຈາກພັກ
ສັງຄົມນິຍົມ ຫລັງຈາກທ່ານຟຣັງຊົວສ໌ ມິຕແຕຣ໌ຣັງດ໌

ປວັດຫຍໍ້
ທ່ານນາງເຊໂກແລນ ໂຣຢາລ (Ségolène Royal) ເກີດເມື່ອວັນທີ 22 ກັນຍາ 1953
ທີ່ກຸງດັກກາ (Dacca) ປະ ເທດເຊເນກາລ (Sénégal) ໃນທວີບອາຟຣິກກາ ອັນເນື່ອງ
ມາຈາກບິດາທີ່ເປັນນາຍທະຫານ ເດີນທາງໄປຮັບພາຣະກິດໂດຍບັງເອີນທີ່ປະເທດນີ້

ທ່ານນາງເຊໂກແລນ ໂຣຢາລ ໃຊ້ຊີວິດຄູ່ໂດຍບໍ່ເຄີຍຈົດທະບຽນສົມຣົດ ກັບທ່ານຟຣັງ
ຊົວສ໌ ໂຮລລັງດ໌ (François Hollande) ຊຶ່ງເປັນຜູ້ຮັບຕຳແໜ່ງເລຂາທິການເອກຂອງ
ພັກສັງຄົມນິຍົມມາແຕ່ປີ 1997

ທັງສອງໄດ້ພົບພໍ້ແລະຮູ້ຈັກກັນເປັນຄັ້ງທຳອິດໃນຕອນປາຍຂອງຊຸມປີ 1970 ທີ່ສຖາບັນ
ການປົກຄອງຊັ້ນສູງແຫ່ງຊາດ (Ecole nationale d'administration = ENA) ປັດຈຸ
ບັນມີລູກຍິງຊາຍຮ່ວມກັນ 4 ຄົນ ອາຍຸຕັ້ງແຕ່ 14 - 22 ປີ

ທ່ານນາງໂຣຢາລໄດ້ສມັກເຂົ້າເປັນສມາຊິກຂອງພັກສັງຄົມນິຍົມເມື່ອປີ 1978 ຈົນກະທັ້ງ
ເຖິງປີ 1988 ຈຶ່ງໄດ້ຮັບການເລືອກຕັ້ງເປັນ ສສ ຄັ້ງທຳອິດແລະຢ່າງເປັນປວັດການທີ່
ເຂດເລືອກຕັ້ງ Deux-Sèvres ທັງນີ້ເພາະແຕ່ໃດໆມາແມ່ນຜູ້ສມັກຈາກຝ່າຍຂວາເປັນ
ຜູ້ໄດ້ຮັບໄຊຊະນະມາຕລອດໃນເຂດເລືອກຕັ້ງດັ່ງກ່າວ ນັບຕັ້ງແຕ່ນັ້ນເປັນຕົ້ນມາ ທ່ານ
ນາງກໍໄດ້ຮັບການເລືອກຕັ້ງທຸກຄັ້ງໃນເຂດເລືອກຕັ້ງດຽວກັນນີ້

ເມື່ອປີ 1992 ໄດ້ຮັບຕຳແໜ່ງເປັນ ຣມຕ ກະຊວງສພາບສິ່ງແວດລ້ອມໃນຣັຖບານທີ່ມີ
ທ່ານປີ ແອຣ໌ ເບເຣໂກວົວ (Pierre Bérégovoy) ເປັນນາຍົກ ຣມຕ, ຈາກປີ 1997
ເຖິງປີ 2000 ຮັບຕຳແໜ່ງເປັນ ຮອງ ຣມຕ ກະຊວງສຶກສາທິການ ແລະ ຈາກປີ 2000
ເຖິງປີ 2002 ເປັນ ຮອງ ຣມຕ ກະຊວງຄອບຄົວ ເດັກ ແລະ ບຸກຄົນພິການທຸພົລພາບ

ຕຳແໜ່ງປັດຈຸບັນ ນອກຈາກເປັນ ສສ ແລ້ວ ທ່ານນາງເຊໂກແລນ ໂຣຢາລ ຍັງເປັນປະ
ທານສພາປົກຄອງແຄ້ວນ Poitou-Charentes ຕັ້ງແຕ່ປີ 2004 ເປັນຕົ້ນມາ

ກຳໄຊຊະນະເປັນຕົວແທນພັກ
ທ່ານນາງເຊໂກແລນ ໂຣຢາລ ໄດ້ຮັບການແຕ່ງຕັ້ງຈາກກອງປະຊຸມຫລວງຂອງພັກສັງ
ຄົມນິຍົມທີ່ນະຄອນຫລວງປາຣີສເມື່ອວັນທີ 26 ພະຈິກ 2006 ໃຫ້ເປັນຕົວແທນຂອງພັກ
ລົງສມັກແຂ່ງຂັນຊິງຕຳແໜ່ງປະທານາທິບໍດີ ໂດຍສາມາດກຳໄຊຊະນະເໜືອບັນດາບຸກ
ຄົນສຳຄັນຣະດັບ "ຊ້າງສານ" ຂອງພັກ ໄດ້ຮັບຄະແນນສຽງສນັບສນຸນຈາກບັນດາສມາ
ຊິກພັກເຖິງ 60.6% ໃນຂນະທີ່ ທ່ານໂດມີນິກ ສໂຕຣສສການຫ໌ (Dominique
Strausskanh) ອດີດ ຣມຕ ເສຖກິດແລະການເງິນ ໄດ້ 20.81% ແລະທ່ານລໍຣັງຕ໌
ຟາບີອຸສ (Laurent Fabius) ອດີດນາຍົກ ຣມຕ ໄດ້ 18.59%

ປັດໃຈແຫ່ງການກຳໄຊຊະນະຂອງທ່ານນາງກໍຄືການເນັ້ນນະໂຍບາຍທາງດ້ານສັງຄົມ
ແລະທັມມະຈະຣິຍາ ນັບຕັ້ງແຕ່ປັນຫາເດັກຖືກທາຣຸນກັມ ໄປຈົນເຖິງປັນຫາຄວາມຮຸນ
ແຮງຜ່ານໂທຣະພາບ

ແນວຄິດ "Blairisme"

ໃນການໂຄສະນາຫາສຽງເລືອກຕັ້ງ ມີຫລາຍຄັ້ງທີ່ທ່ານນາງເຊໂກແລນ ໂຣຢາລ ໄດ້ເອົາ
ທ່າທີທີ່ບໍ່ຄ່ອຍຈະເປັນຊ້າຍພໍປານໃດ ເຊັ່ນການເຫັນພ້ອມໃຫ້ສ້າງຄ້າຍກັກກັນສຳລັບຊາວ
ໜຸ່ມເກເລອັນທະພານ ແບບຄ້າຍທະຫານເປັນຕົ້ນ ອັນເປັນການອອກນອກແນວທາງດັ້ງ
ເດີມຂອງພັກສັງຄົມນິຍົມ ທີ່ຍາມໃດກໍມີໃຈບຸນສຸນທານເມດຕາສົງສານ ໃຫ້ຄວາມອຸປຖັມ
ຄ້ຳຊູແລະຊ່ວຍເຫລືອແກ່ຜູ້ມີໂອກາດນ້ອຍ

ໃນການໃຫ້ສັມພາດຕໍ່ລາຍວັນເສຖກິດຂອງອັງກິດ The Financial Times ທ່ານນາງ
ເຊໂກແລນ ໂຣຢາລ ຍັງໄດ້ກ່າວວ່າທ່ານນາງນິຍົມຊົມຊອບໃນ "ແນວທາງທີສາມ" ຂອງ
ທ່ານໂທນີ ບແລຣ໌ (Tony Blair) ນາຍົກ ຣມຕ ອັງກິດ ໂດຍສເພາະໃນເຣື່ອງຂອງການ
ອັດສີດກ້ອນເງິນການລົງທຶນຂອງພາກຣັດ, ການແກ້ໄຂປັນຫາການວ່າງງານຂອງຊາວ
ໜຸ່ມຕລອດຈົນຮອດການຊ່ວຍເຫລືອຂອງພາກຣັດຕໍ່ບັນດາບັນດິດໜຸ່ມໃຫ້ມີໂອກາດເຂົ້າສູ່
ຕລາດແຮງງານໄດ້ຕາມຄວາມເໝາະສົມ

ໃນການໃຫ້ສັມພາດຕໍ່ລາຍວັນອັງກິດ Times ກ່ອນຮອບທີໜຶ່ງເລັກນ້ອຍ ທ່ານຟຣັງຊົວສ໌
ໂຮລລັງດ໌ ກໍໃຫ້ການຢືນຢັນວ່າການຫາສຽງຂອງທ່ານນາງເຊໂກແລນ ໂຣຢາລ ແມ່ນເນັ້ນ
ໜັກໄປໃນແນວທາງທີ່ໄດ້ແບບຢ່າງມາຈາກແນວຄວາມຄິດ "blairisme"

ຢ່າງໃດກໍຕາມ ກໍບໍ່ໄດ້ໝາຍຄວາມວ່າທ່ານນາງໂຣຢາລຈະເຫັນດີເຫັນງາມໄປນຳແນວຄິດ
ຂອງນາຍົກ ຣມຕ ອັງກິດໄປເສັຽທຸກຢ່າງ ໂດຍສເພາະໃນຣະຍະຫລັງມານີ້ທ່ານນາງໄດ້
ຕຳນິຕິຕຽນຕໍ່ການເສີຍເມີຍຂອງຣັຖບານແຫ່ງກຸງລອນດອນຕໍ່ໜ້າສຖານະການການປິດໂຮງ
ງານໃນສຫະຣາຊອານາຈັກ ທ່ານນາງເຫັນວ່າເປັນເພາະ ໂທນີ ບແລຣ໌ "ຢູ່ໃນອຳນາດ
ຍາວນານ ຈົນເກີນໄປ"

"ແນວທາງທີສາມ" ຕາມແນວຄິດ "Blairisme" ນັ້ນ ກໍຄືການປະສົມປະສານລະຫວ່າງ
ທິສດີການເມືອງຂວາແລະຊ້າຍ ໂດຍການຊຸກຍູ້ສົ່ງເສີມບັນດານາຍຈ້າງໃນການສ້າງເສຖ
ກິດໃຫ້ແຂງແກ່ງ ເພື່ອສ້າງວຽກເຮັດງານທຳໃນຣະດັບເຕັມປ່ຽມ ຄຽງຄູ່ກັນໄປກັບການສ້າງ
ຄວາມຍຸດຕິທັມທາງດ້ານສັງຄົມ ໂດຍສເພາະການປັບປຸງຣະບົບປະກັນສັງຄົມທີ່ມີຄຸນນະ
ພາບໂດຍອີງໃສ່ພື້ນຖານທາງເສຖກິດທີ່ແຂງແກ່ງ

ເວົ້າງ່າຍໆກໍຄືແນວຄວາມຄິດ "Blairisme" ສາມາດປຽບທຽບໄດ້ກັບກັບທິສດີຂອງທ່ານ
ເຕີ້ງ ຈຽມ ປິງ ທີ່ວ່າ "ແມວສີດຳຫລືແມວສີຂາວ ບໍ່ແມ່ນປັນຫາສຳຄັນ ສິ່ງສຳຄັນ
ກໍຄືຕ້ອງຄຸບໜູໃຫ້ໄດ້" ນັ້ນເອງ

ການທີ່ທ່ານນາງເຊໂກແລນ ໂຣຢາລ ມີແນວຄວາມຄິດທີ່ຄ້າຍຄືກັນກັບ "ແນວທາງທີສາມ"
ຂອງນາຍົກ ຣມຕ ອັງກິດ ໂທນີ ບແລຣ໌ ຄືແນວນີ້ ຈຶ່ງໄດ້ເປັນສາເຫດໃຫ້ບັນດາພັກການ
ເມືອງຊ້າຍຈັດທັງຫລາຍພາກັນກ່າວຫາທ່ານນາງວ່າມີທ່າອຽງ "ລ້ຽວຂວາ" ທັງໆທີ່ພັກ
ສັງຄົມນິຍົມເປັນພັກການເມືອງຝ່າຍຊ້າຍ

ໃນຂນະທີ່ບັນດາບຸກຄົນສຳຄັນທີ່ເປັນແກນນຳຂອງພັກສັງຄົມນິຍົມເອງທີ່ເຫັນວ່າ "ແນວທາງ
ທີສາມ" ຂອງນາຍົກ ຣມຕ ອັງກິດ ເປັນທິສດີແຫ່ງການດູໝິ່ນຜູ້ອອກແຮງງານກິນເງິນ
ເດືອນນັ້ນ ກໍກ່າວຫາທ່ານນາງໂຣຢາລເຊັ່ນດຽວກັນວ່າ ອອກນອກແນວທາງຂອງພັກ ຊຶ່ງ
ທ່ານນາງກໍບໍ່ໄດ້ປະຕິເສດ ໂດຍກ່າວວ່າ "ຂ້າພະເຈົ້າໃຊ້ສິດເສຣີພາບຢ່າງເຕັມທີ່"