ເລືອກຕັ້ງ ປະທານາທິບໍດີ ຝຣັ່ງເສດຮອບສອງ

ໄບຣູສງວນທ່າທີ ບໍ່ຮຽກຮ້ອງ ໃຫ້ປ່ອນບັດ ເລືອກຜູ້ໃດ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 25/04/2007 ແກ້ໄຂໃຫມ່ຫລ້າສຸດເມື່ອວັນທີ 25/04/2007 à 18:19 TU

ທ່ານຟຣັງຊົວສ໌ ໄບຣູ ຫົວໜ້າພັກກາງ
UDF ໃນກອງປະຊຸມໃຫ້ສັມພາດຕໍ່ຜູ້ສື່
ຂ່າວທີ່ປາຣີສ ປະກາດໃຫ້ເສຣີພາບຕໍ່
ຖານຄະແນນຂອງຕົນ ໃນການເລືອກຜູ້
ສມັກໃນຮອບທີສອງ ແລະປະກາດຈັດ
ຕັ້ງພັກການເມືອງໃໝ່ ຊື່ພັກ "ປະຊາທິ
ປະໄຕ" (ພາບ: Reuters)

ເປັນທີ່ແຈ້ງຂາວແລ້ວ ທ່ານຟຣັງຊົວສ໌
ໄບຣູ (François Bayrou) ປະທານ
ພັກຝ່າຍກາງ UDF ຜູ້ໄດ້ຄະແນນສຽງ
ເປັນອັນດັບທີສາມໃນຮອບທີໜຶ່ງ ປະຕິ
ເສດທີ່ຈະຮຽກຮ້ອງໃຫ້ຖານຄະແນນ
(Electorat) ຂອງຕົນ 6 ລ້ານ 8
ແສນສຽງ ໄປປ່ອນບັດໃຫ້ຜູ້ສມັກທ່ານ
ໃດທ່ານໜຶ່ງ ໃນຈຳນວນ ສອງທ່ານທີ່
ຜ່ານເຂົ້າໄປຊິງໄຊຕັດເຊືອກກັນໃນຮອບ
ທີສອງ ຄື ທ່ານນິໂກລາ ຊາຣ໌ໂກຊີ
(Nicolas Sarkozy) ແຫ່ງພັກຝ່າຍ
ຂວາ UMP ຊຶ່ງເປັນຝ່າຍຣັຖບານ ແລະທ່ານນາງເຊໂກແລນ ໂຣຢາລ
(Ségolène Royal) ແຫ່ງພັກສັງຄົມນິຍົມຝ່າຍຄ້ານ ຊຶ່ງການລົງຄະແນນສຽງ
ຈະມີຂື້ນໃນວັນທີ 6 ພຶສພາໜ້ານີ້

ຕັ້ງພັກການເມືອງໃໝ່
ທ່ານໄບຣູ ທີ່ໄດ້ຮັບຄະແນນສຽງເຖິງ 18.57% ໃນຮອບທີ່ໜຶ່ງ ຫລັງຈາກທ່ານນາງໂຣ
ຢາລ (25.80%) ແລະ ທ່ານຊາຣ໌ໂກຊີ (31.10%) ໄດ້ປະກາດທ່າທີດັ່ງກ່າວໃນການ
ເປີດໃຫ້ສຳພາດຕໍ່ຜູ້ສື່ຂ່າວໃນມື້ນີ້ (ພຸດ 25 ເມສາ) ທີ່ນະຄອນຫລວງປາຣີສ໌ ພ້ອມດຽວ
ກັນກໍໄດ້ປະກາດການຈັດຕັ້ງພັກການເມືອງໃໝ່ທີ່ຈະມີຊື່ວ່າ "ພັກປະຊາທິປະໄຕ" ທົດ
ແທນພັກ UDF ທີ່ໄດ້ຮັບການກໍ່ຕັ້ງຂຶ້ນມາຕັ້ງແຕ່ປີ 1978 ໂດຍທ່ານວາເລຣີ ຢິສກາຣ໌ດ
ແດັສແຕັງ (Valéry Giscard d'Estaing) ໃນຂນະທີ່ເພີ່ນຄອງຕຳແໜ່ງປະທານາທິ
ບໍດີ

ຕິຕຽນຊາຣ໌ໂກຊີຢ່າງໜັກ
ຫົວໜ້າພັກ UDF ມີທ່າທີທີ່ແຕກຕ່າງຕໍ່ຜູ້ຜ່ານເຂົ້າຮອບສອງທັງສອງທ່ານ ໂດຍສເພາະ
ໄດ້ກ່າວຕິຕຽນຢ່າງໜັກຕໍ່ທ່ານຊາຣ໌ໂກຊີວ່າ "ເປັນຜູ້ມີຣົສນິຍົມໃນການຂົ່ມຂູ່" ແລະວ່າ
ຖ້າໄດ້ຮັບເລືອກຕັ້ງຜູ້ສມັກຈາກພັກ UMP ຈະເປັນຜູ້ນຳທີ່ "ຮວບອຳນາດ" ຢ່າງບໍ່ເຄີຍມີ
ມາກ່ອນຈັກເທື່ອ

ຜູ້ນຳພັກ UDF ບໍ່ໄດ້ບອກຈະແຈ້ງວ່າ "ຣົສນິຍົມໃນການຂົ່ມຂູ່" ນັ້ນ ແມ່ນຫຍັງ ແຕ່ຈາກ
ການເຜີຍຂອງ "ເປັດລ່າມໂສ້" (Canard enchaîné) ລາຍສັປດາທີ່ມັກເຈາະເລິກ
ທຳໃຫ້ຮູ້ວ່າ ຫລັງຈາກຮັບຊາບຜົນຂອງການເລືອກຕັ້ງຮອບທີໜຶ່ງແລ້ວ ທັງທ່ານນິໂກລາ
ຊາຣ໌ໂກຊີ ແລະ ທ່ານນາງເຊໂກແລນ ໂຣຢາລ ໄດ້ພຍາຍາມຕິດຕໍ່ ທ່ານຟຣັງຊົວສ໌
ໄບຣູທາງໂທຣະສັບ

ໃນການເປີດປະຊຸມໃຫ້ສັມພາດຕໍ່ຜູ້ສື່ຂ່າວ ເຖິງແມ່ນທ່ານຟຣັງຊົວສ໌ ໄບຣູ ໄດ້ກ່າວປະຕິ
ເສດວ່າ ບໍ່ໄດ້ສົນທະນາໃດໆທາງໂທຣະສັບ ທັງກັບທ່ານນິໂກລາ ຊາຣ໌ໂກຊີ ແລະ ທ່ານ
ນາງເຊໂກແລນ ໂຣຢາລ ແລະທັງສອງທ່ານພຽງແຕ່ໄດ້ຝາກຂໍ້ຄວາມເອົາໄວ້ເທົ່ານັ້ນ
ກໍຕາມ ແຕ່ "ເປັດລ່າມໂສ້" ກໍເຜີຍວ່າ ໃນການສົນທະນາທາງໂຣະສັບ ທ່ານຊາຣ໌ໂກຊີ
ໄດ້ກ່າວໃນຕອນຕົ້ນ ສແດງຄວາມຍິນດີຕໍ່ທ່ານໄບຣູທີ່ສາມາດສ້າງຄະແນນສຽງໄດ້ເກີນ
ຄວາມຄາດໝາຍໃນຮອບທີໜຶ່ງ ກ່ອນທີ່ຈະຜ່ານໄປສູ່ປັນຫາທີ່ຫລໍ່ແຫລມ

ນັ້ນກໍຄືການສເນີໃຫ້ມີການພົບພໍ້ເຈຣະຈາກັນເພື່ອເວົ້າເຖິງແຜນການຮ່ວມມືກັນໃນຂັ້ນຕໍ່ໄປ
ພ້ອມທັງວາງເປັນເງື່ອນໄຂໃຫ້ພັກຝ່າຍກາງ UDF ເລືອກລະຫວ່າງ "ການຮ່ວມຣັຖ
ບານ" ຫລື "ເປັນຝ່າຍຄ້ານ"

ລາຍສັປດາ "ເປັດລ່າມໂສ້" ເຜີຍອີກວ່າທ່ານນິໂກລາ ຊາຣ໌ໂກຊີ ໄດ້ກ່າວໃນການສົນ
ທະນາທາງໂທຣະສັບກັບທ່ານໄບຣູອີກວ່າ ສສ ຂອງພັກ UDF ທ່ານໃດທີ່ບໍ່ໃຫ້ຄຳໝັ້ນ
ສັນຍາເປັນ "ລາຍລັກ ອັກສອນ" ວ່າຈະສນັບສນຸນພັກ UMP ແລ້ວ, ສສ ຈາກພັກ
UDF ທ່ານນັ້ນກໍຈະພົບພໍ້ກັບຄູ່ແຂ່ງຈາກພັກ UMP ໃນການເລືອກຕັ້ງ ສສ ທີ່ຈະມີຂື້ນໃນ
ວັນທີ 10 ແລະ 17 ເດືອນມິຖຸນາໜ້າ

ແຕ່ຢ່າງໃດກໍຕາມ ການສົນທະນາທາງໂທຣະສັບລະຫວ່າງທ່ານຊາຣ໌ໂກຊີແລະທ່ານໄບຣູ
ຈະມີຂື້ນແທ້ ຫລືບໍ່ມີກໍຕາມ ແຕ່ໃນການໃຫ້ສັມພາດຕໍ່ລາຍວັນ Le Monde ສບັບປະຈຳ
ວັນພຸດ 25 ເມສາ (ວັນ ດຽວກັບທີ່ທ່ານໄບຣູເປີດປະຊຸມໃຫ້ສັມພາດຕໍ່ຜູ້ສື່ຂ່າວ) ທ່ານນິ
ໂກລາ ຊາຣ໌ໂກຊີ ໄດ້ກ່າວໃນທຳນອງຄ້າຍຄືກັນວ່າ: "ສສ ພັກ UDF ທ່ານໃດກໍ
ຕາມທີ່ເອົາທ່າທີສນັບສນຸນຂ້າພະເຈົ້າກ່ອນວັນລົງຄະແນນສຽງຮອບທີສອງໃນ
ວັນທີ 6 ພຶສພາ ຈະໄດ້ຮັບການພິຈາຣະນາໃຫ້ມີຖານະເປັນຜູ້ສັງກັດຝ່າຍຣັຖ
ບານແລະຈະໄດ້ຮັບການອູ້ມຊູສນັບສນຸນຈາກພັກ UMP ໃນການເລືອກຕັ້ງ
ສສ ໃນເດືອນມິຖຸນາໜ້າ"

ຍ້ອງໂຣຢາລແບບມີເງື່ອນໄຂ
ໃນສ່ວນທີ່ກ່ຽວກັບທ່ານນາງໂຣຢາລນັ້ນ ທ່ານໄບຣູໄດ້ກ່າວວ່າເປັນຜູ້ມີປະຊາທິປະໄຕດີ
ກວ່າແລະເປັນຜູ້ເອົາໃຈໃສ່ເປັນຢ່າງດີຕໍ່ປັນຫາທາງດ້ານສັງຄົມ ແຕ່ກໍໄດ້ຕຳນິຕິຕຽນໃນ
ນະໂຍບາຍຂອງທ່ານນາງ ໃນການທີ່ຈະສ້າງກົມກອງຕ່າງໆຂື້ນມາເພີ້ມເຕີມ

ນອກຈາກນີ້ ທ່ານຟຣັງຊົວສ໌ ໄບຣູ ຍັງກ່າວປະຕິເສດວ່າ ໃນສຖານະການປັດຈຸບັນເປັນ
ໄປບໍ່ໄດ້ທີ່ຈະຮັບຕຳແໜ່ງ ຣມຕ ໃນຄນະຣັຖບານທີ່ຈະຖືກປະກອບຂື້ນຫລັງການເລືອກຕັ້ງ
ແຕ່ກໍຕຽມພ້ອມທີ່ຈະຮັບການໂຕ້ວາທີ ບໍ່ວ່າກັບທ່ານນາງໂຣຢາລກໍຄືກັນກັບທ່ານຊາຣ໌ໂກຊີ
ຖ້າຫາກວ່າທັງສອງທ່ານຫາກສເນີມາ

"ຂ້າພະເຈົ້າມີນ້ຳໃຈເປີດກວ້າງ ແລະຍິນດີທີ່ຈະໂອ້ລົມກັບທຸກຝ່າຍດ້ວຍຄວາມ
ຫວັງດີ" ທ່ານໄບຣູ ໄດ້ກ່າວ

ຫົວໜ້າພັກ UDF ກ່າວອີກວ່າ "ພັກປະຊາທິປະໄຕ" ທີ່ທ່ານຈະຈັດຕັ້ງຂື້ນ ຈະຈັດສົ່ງຕົວ
ແທນລົງຮັບສມັກໃນທຸກການເລືອກຕັ້ງທີ່ຈະມີຂື້ນໃນອະນາຄົດ ໂດຍສເພາະກໍແມ່ນການ
ເລືອກຕັ້ງ ສສ ໃນເດືອນມິຖຸນາໜ້າ ທັງນີ້ເພື່ອເປັນປາກເປັນສຽງໃຫ້ແກ່ຊາວຝຣັ່ງເສດຜູ້
ມີຄວາມປາຖນາຕໍ່ແນວທາງການເມືອງໃໝ່ ທີ່ເປັນເອກຣາດ ແລະມີເສຣີພາບໃນການ
ສແດງຄວາມຄິດເຫັນ

ໂຣຢາລຮັບການໂຕ້ວາທີທີ່ສ້າງສັນກັບໄບຣູ

ເປັນທີ່ໜ້າສັງເກດວ່າ ຫລັງການໃຫ້ສັມພາດຕໍ່ຜູ້ສື່ຂ່າວຂອງ ທ່ານຟຣັງຊົວສ໌ ໄບຣູ ແລ້ວ
ທ່ານນາງເຊ ໂກແລນ ໂຣຢາລ ກໍໄດ້ອອກມາຖແລງສແດງທ່າທີວ່າ ທ່ານນາງເຫັນມີ
ຫລາຍຈຸດທີ່ສອດຄ່ອງກັນລະຫວ່າງນະໂຍບາຍຂອງທ່ານນາງແລະນະໂຍບາຍຂອງ
ທ່ານໄບຣູ ພ້ອມທັງສເນີໃຫ້ມີການ "ໂຕ້ວາທີທີ່ສ້າງສັນ" ເພື່ອບັນລຸເຖິງຄວາມແຈ້ງ
ຂາວຕໍ່ກັນແລະກັນໃນວັນສຸກ ທີ 27 ເມສານີ້ທີ່ນະຄອນຫລວງປາຣີສ ໂດຍສມາຄົມສື່ມວນ
ຊົນທ້ອງຖິ່ນຈະຈັດຂື້ນ

"ຂ້າພະເຈົ້າບໍ່ມີຫຍັງຂັດຂ້ອງຕໍ່ການໂຕ້ວາທີດັ່ງກ່າວ ທັງນີ້ເພື່ອໃຫ້ແຈ້ງຂາວ
ຕໍ່ກັນ ແລະເພື່ອບໍ່ໃຫ້ມີການຊັກຊ້າໃນການອອກໂຄສະນາຫາສຽງຮ່ວມກັນສຳ
ລັບຮອບທີສອງ" ທ່ານນາງໂຣຢາລໄດ້ກ່າວ

ຊາຣ໌ໂກຊີຈະຊນະໂຣຢາລ
ອີກປະການໜຶ່ງ ຜົນການຢັ່ງຄວາມນິຍົມຂອງສຖາບັນ IPSOS/DELL ໄດ້ຄາດຄະເນວ່າ
ທ່ານນິໂກ ລາ ຊາຣ໌ໂກຊີ ແຫ່ງພັກ UMP ຝ່າຍຂວາ ຈະເປັນຜູ້ໄດ້ຮັບໄຊຊະນະເໜືອ
ທ່ານນາງເຊໂກແລນ ໂຣຢາລ ແຫ່ງພັກສັງຄົມນິຍົມຝ່າຍຄ້ານ ໃນຮອບທີສອງ ດ້ວຍຄະ
ແນນສຽງ 53.5% ຕໍ່ 46.5% ການສຳຣວດຄວາມເຫັນດັ່ງກ່າວ ມີຂຶ້ນເມື່ອວັນທີ 23
ແລະ 24 ເມສານີ້ ດ້ວຍການສຸ່ມຕົວຢ່າງຈາກ 1208 ຄົນໂດຍທາງໂທຣະສັບ