ຝລັ່ງ/ຮອບສອງໂຕ້ວາທີ

ໂຣຢານຍື່ນມືຫາບາຍຣູ

ໂດຍ  ໂສວົງ

ບົດຄວາມນີ້ເຜີຍແຜ່ເມື່ອວັນທີ 28/04/2007 ແກ້ໄຂໃຫມ່ຫລ້າສຸດເມື່ອວັນທີ 28/04/2007 à 07:02 TU

ບາຍຣູ ~ໂຣຢານໂຕ້ວາທີ 28/4/07 ຮູບ:ປະກອບຈາກ ຮູບໂຄສະນາ-ສວ

ການໂຕ້ວາທີ ໂຣຢານ~ບານຣູ ເປັນບາດກ້າວໃໝ່ໃນສັງຄົມການ ເມືອງຝລັ່ງເຊິ່ງມາດາມໂຣຢານ ເປັນຜູ້ເບີກທາງໄປສູ່ການປ່ຽນແປງ ນະໂຍບາຍປ່ຽນແປງດັ່ງກ່າວນີ້ກໍ ເປັນພື້ນຖານຂອງແນວທາງໃໝ່ ຂອງພັກສັງຄົມນິຍົມ

ມາດາມໂຣຢານຈາກພັກສັງຄົມນິຍົມຕ້ອງການສຽງຈາກພັກຂອງບາຍຣູ ຜູ້ມີແນວທາງ ຢືນກາງຂວາ ປະຊາຊົນທີ່ໄດ້ເລືອກເອົາທ່ານບາຍຣູໃນຮອບທີ່ນຶ່ງມີເຖິງເກືອບເຈັດລ້ານ ຄົນ ແຕ່ບໍ່ໄດ້ເຂົ້າຮອບສອງຂອງການເລືອກຕັ້ງ ສ່ວນມາດາມໂຣຢານນັ້ນກໍເຂົ້າແຂ່ງ ກັບທ່ານສາກໂກຊີຈາກພັກຂວາກຳອຳນາດປັດຈຸບັນ ແຕ່ໂຣຢານບໍ່ພໍສຽງ ຈິ່ງຍື່ນມືໄປ ຂໍສຽງຈາກທ່ານບາຍຣູ ແມ່ນແຕ່ທ່ານສາກໂກຊີກໍຄືກັນ ຕ້ອງການສຽງຈາກບຸກຄົນກາງ ດັ່ງກ່າວ ບໍ່ວ່າ ໂຣຢານ ຫຼື ສາກໂກຊີ ທັງສອງບໍ່ມີການເຈລະຈາໃດໆກັບບາບຍຣູ

ຫຼັງຈາກສົ່ງສຽງອິນອອຍໄປຫາບາຍຣູຫຼາຍເທື່ອຫຼາຍທີ ນັບແຕ່ຮອບທີ່ນຶ່ງສຳເລັດລົງ ກໍ ຈິ່ງມີການຕັດສິນໃຈໂຕ້ວາທີກັນ ເພື່ອເບິ່ງວ່າ ນະໂຍບາຍຈຸດໃດຄືກັນ ຈຸດໃດແຕກຕ່າງ ກັນ ຖ້າບໍ່ໄດ້ສຽງຕື່ມຈາກທ່ານບາຍຣູ ມາດາມໂຣຢານຈະບໍ່ໄດ້ຮັບໄຊຊນະຮອບສອງ 

ອັນນີ້ ກໍຊີ້ໃຫ້ເຫັນວ່າ ມາດາມໂຣຢານສະແດງເຖິງຈຸດປະສົງຢາກປ່ຽນແປງ
ທັສນະພາບການເມືອງຝລັ່ງ ເພາະຖືວ່າ ຜ່ານມານັ້ນຫຼ້າສມັຍແລ້ວ ສົມຄວນກ້າວ
ເຂົ້າສູ່ຍຸກໃໝ່ສຳລັບຊົນຮຸ່ນໃໝ່ພາຍຂ້າງໜ້າ ພັກຊ້າຍອື່ນໆເຊັ່ນຊ້າຍຈັດ ເຖິງວ່າ
ບໍ່ມັກແນວທາງປ່ຽນແປງລັກສນະນີ້ກໍຕາມ ຈຳເປັນຕ້ອງພາກັນອ້ອມຂ້າງມາດາມ
ໂຣຢານເພື່ອຂັດຂວາງທ່ານສາກໂກຊີບໍ່ໃຫ້ໄດ້ຮັບໄຊຊນະໃນຮອບສອງ ສ່ວນໂຣຢານ
ກໍຊອກທຸກວິທີທາງ ເພື່ອຍາດເອົາໄຊຊນະໃຫ້ໄດ້ຕາມນະໂຍບາຍໄຂກວ້າງໄປສູ່
ຫຼາຍທິດທາງການເມືອງ

ການປ່ຽນແປງດັ່ງກ່າວທີ່ປວງຊົນໄດ້ຍິນໄດ້ຟັງຕລອດການໂຄສະນາຫາສຽງໃນ
ຮອບທີ່ນຶ່ງນັ້ນ ແມ່ນປ່ຽນແປງຫຍັງແທ້ ຮອດດຽວນີ້ ຜູ້ໃດກໍໂຫ່ແຊວກັນວ່າ ປ່ຽນ
ແປງຕ້ອງປ່ຽນແປງ

ການທີ່ໂຣຢານຍື່ນມືໄປຫາບາຍຣູ ກໍນັບເປັນການປ່ຽນແປງໄປໃນໂຕແລ້ວສຳລັບ
ການເມືອງຝລັ່ງ ເຊິ່ງບໍ່ເຄີຍເປັນໄປລັກສນະນີ້ຈັກເທື່ອ ໂຣຢານເປັນນັກການເມືອງ
ຮຸ່ນໃໝ່ສຳລັບຊົນຮຸ່ນໃໝ່ທີ່ປາຖນາໜີອອກຈາກວົນວຽນແຫ່ງສະພາບການເມືອງ
ເດີມ ຫຼ້າຫຼັງບໍ່ເໜັງຕີງ

ສະພາບການເມືອງສມັຍຜ່ານມາ ເປັນສະພາບນອນນິ້ງ ບັນດານັກການເມືອງຢູ່
ໃນສະພາບທີ່ບໍ່ແຈ້ງຂາວ ເຊິ່ງຄົນສມັຍນີ້ຕິຕຽນຢູ່ສເມີ ເຊັ່ນບາງຄົນບໍ່ກ້າສະແດງ
ຕົນວ່າຕົນເປັນຊ້າຍຫຼືເປັນຂວາ ເຊັ່ນໂຕຢ່າງ ທ່ານນິໂກລາສາກໂກຊີໄດ້ກ່າວໃນການ
ໂຄສະນາຫາສຽງຮອບສອງວ່າ ຂ້າພະເຈົ້າເປັນຝ່າຍຂວາ ແລະຕ້ອງກ້າເວົ້າກ້າ
ວ່າ ຕ້ອງຢູ່ໃນຄວາມແຈ້ງຂາວຕໍ່ໜ້າປວງຊົນ ບໍ່ຕ້ອງຫົດໂຕຢູ່ ບໍ່ຕວົະ ບໍ່ອຳແນວ
ໃດ ສະນັ້ນຕໍ່ໄປນີ້ ແມ່ນເປັນສມັຍເລີ່ມຕົ້ນທັບມ້າງແນວຄິດເກົ່າໃຫ້ແຕກ ແຕ່ຕາມ
ທີ່ປັນຈິງຜ່ານມາ ໃນປີ 1968 ກໍໄດ້ມີການພຍາຍາມໜີອອກຈາກສະພາບເກົ່າ
ແລ້ວ

ມາດາມໂຣຢານຍື່ນມືໄປຫາທ່ານລາຍຣູ ເພື່ອໂຕ້ວາທີ ກໍສະແດງເຖິງການເລີ່ມ
ຕົ້ນສືບຕໍ່ແນວທາງໃໝ່ອອກຈາກທິສດີເກົ່າແກ່ຂອງສັງຄົມນິຍົມ ທີ່ບໍ່ເຄີຍອ້າແຂນ
ໄປຫາຝ່າຍຂວາໃດໆ ເພາະປະຊາຊົນ ຫຼືພັກຂວາອື່ນໆກໍຖືສເມີວ່າ ບາຍຣູເປັນ
ຂວາ ຝ່າຍຂວາອື່ນໆວ່າ ໃນເມື່ອຂຶ້ນຊື່ວ່າ ຂວາ ແລ້ວ ກໍຕ້ອງອ່ຽງໄປຫາຂວາສເມີ

ສ່ວນທ່ານສາກໂກຊີກໍຄືກັນ ຕ້ອງການອອກຈາກແນວທາງເດີມຂອງຝ່າຍຂວາ ຈິ່ງ
ຂີດເສັ້ນໄວ້ເຫິງນານເຖິງຫ້າປີວ່າ ຕ້ອງຕັດຂາດກັບແນວທາງຂວາເດີມ ທ່ານ
ສາກໂກຊີມີເປົ້າໝາຍສ້າງແນວທາງຂວາຍຸກໃໝ່ໃຫ້ເຂົ້າກັບສະພາບໃໝ່ຂອງ
ໂລກາວິວັດເສຖກິດຕໍ່ໜ້າຄວາມກ້າວໜ້າເລີຍໆຂອງວິທຍາສາດເຕັກໂນໂລຊີ

ທ່ານສາກໂກຊີກໍວ່າ ຕົນຕ້ອງການປ່ຽນແປງທັສນະພາບຂອງການເມືອງຝລັ່ງ
ຝ່າຍຂວາອື່ນກໍບໍ່ເຕື້ອງນຳການປ່ຽນແປງ (ນອກຈາກພັກຢືນກາງຂອງທ່ານບາຍຣູ)
ທັງສອງທ່ານ ຄື ສາກໂກຊີ ແລະໂຣຢານ ແມ່ນຖືວ່າ ເປັນຜູ້ນຳເສັ້ນທາງໄປສູ່ການ
ປ່ຽນແປງ ແຕ່ຫາກບໍ່ໄປຕາມເສັ້ນສາຍທາງດຽວກັນທໍ່ນັ້ນ ຜູ້ນຶ່ງພັດອາສັຍທາງ
ຂວາເປັນພາຫານະ (ຄືທ່ານສາກໂກສີ) ຜູ້ນຶ່ງອີກພັດອາສັຍທາງສັງຄົມນິຍົມເປັນ
ພາຫານະ (ຄືມາດາມໂຣຢານ) ຜູ້ນຶ່ງອີກກໍອາສັຍສາຍທາງກາງເປັນພາຫານະ
(ຄື ບາຍຣູ) ແຕ່ຍັງໄປບໍ່ລອດເທື່ອ ອາດສາມາດໄປລອດໄດ້ໃນອີກຫ້າປີຂ້າງໜ້າ

ຖ້າຈະຫຼົບຄືນຫຼັງນ້ອຍນຶ່ງໄປຫາປີ 1968 ອີກ ຫຼັງຈາກເຫດຮຸນແຮງປີນັ້ນຜ່ານ
ໄປສາມປີ ນາຍພົນເດີໂກນລາອອກຈາກຕຳແໜ່ງປະທານາທິບໍດີ ເພາະສູ້ໜ້າ
ກັບການພຍາຍາມປ່ຽນແປງນັ້ນບໍ່ໄດ້ ສັງຄົມໃນສມັຍດັ່ງກ່າວກໍຕ້ອງການປ່ຽນ
ແປງແນວໃດແນວນຶ່ງ ເຍົາວະຊົນອອກໜ້າເພື່ອການປ່ຽນຫຼາຍດ້ານ...

ຕົກມາສມັຍນີ້ປີ 2007 ປະຊາຊົນກວ່າ 11 ລ້ານຄົນເລືອກເອົາເສັ້ນທາງປ່ຽນແປງ
ຕາມແບບທີ່ສເນີໂດຍທ່ານສາກໂກຊີ ຈິ່ງເລືອກເອົາບຸກຄົນດັ່ງກ່າວ ຈິ່ງໄດ້ຮັບ
31.10% ໃນຮອບທີ່ນຶ່ງນຳໜ້າໂຣຢານທີ່ໄດ້ຮັບ 25.80% ຈິ່ງໄດ້ເຮັດໃຫ້ສອງທ່ານ
ນີ້ໄປແຂ່ງກັນໃນຮອບສອງສຸດທ້າຍ ເພື່ອຍາດຕຳແໜ່ງປະທານາທິບໍດີປີ 2007

ປະຊາຊົນຈຳນວນເກືອບເກົ້າລ້ານເລືອກເສັ້ນທາງປ່ຽນແປງທີ່ສເນີໂດຍໂຣຢານ
ສ່ວນນຶ່ງອີກຈຳນວນເກືອບເຈັດລ້ານເລືອກເອົາເສັ້ນທາງປ່ຽນແປງແບບບາຍຣູ ລວມທັງໝົດມີຢູ່ 27 ລ້ານ ທີ່ມັກໃຫ້ມີການປ່ຽນແປງໃນການເມືອງຝລັ່ງ (ຈາກ
44 ລ້ານ 5 ແສນທີ່ມີສິດທິປ່ອນບັດ)

ການໂຕ້ວາທີດັ່ງກ່າວນີ້ ຝ່າຍໃດກໍບໍ່ມີຈຸດປະສົງຢາກຮ່ວມພັກແຕ່ຢ່າງໃດ ສ່ວນ
ມາດາມໂຣຢານກໍວ່າ ບໍ່ໄດ້ກ່າວເຖິງການເຂົ້າຮ່ວມກັນ ທ່ານບາຍຣູກໍຄືກັນ ຈຸດທີ່
ບໍ່ຄືກັນດ້ານນະໂຍບາຍ ກໍແມ່ນດ້ານເສຖກິດ ສ່ວນດ້ານການປະຕິຮູບກົດໝາຍ
ຕ່າງໆນັ້ນ ກໍເຫັນວ່າມີຈຸດຖືກຕ້ອງກັນ

ຫຼັງຈາກໂຕ້ວາທີກັນແລ້ວ ທ່ານບາຍຣູກ່າວວ່າ ຕຽມພ້ອມໂຕ້ວາທີກັບທ່ານ
ສາກໂກຊີລັກສນະດຽວກັບທີ່ເປັນໄປແລ້ວກັບມາດາມໂຣຢານ ທ່ານຍັງຖແລງອີກ
ວ່າ ນີ້ກໍເປັນການໄຂຊ່ອງທາງໃຫ້ຜູ້ອື່ນອີກຫຼາຍໆຄົນໄດ້ປະຕິບັດຕາມ ເພາະບໍ່ມີ
ຫຍັງງ່າຍຄືຄິດພາຍໃນໄລຍະດັ່ງກ່າວ ເພື່ອເຮັດໃຫ້ທຸກຢ່າງແຈ້ງຂາວສຳລັບ
ປະຊາຊົນທີ່ຄອຍຖ້າພິສູດເບິ່ງນະໂຍບາຍຂອງບັນດານັກການເມືອງກ່ຽວກັບບັນ
ຫາໃຫຍ່ໆ

ເມື່ອສລູບແລ້ວ ປະຊາຊົນຕ້ອງການປ່ຽນແປງແບບສາກໂກຊີຫຼາຍກວ່າແບບອື່ນໆ
ຕາມຫາງສຽງໃນຮອບທີ່ນຶ່ງ ແຕ່ກໍຄອງຖ້າເບິ່ງວ່າ ໃນການປ່ອນບັດຮອບສອງວັນ
ທີ່ 6/5/07 ນີ້ ປະຊາຊົນສ່ວນຫຼາຍສຸດທ້າຍຈະເລືອກເອົາເສັ້ນທາງປ່ຽນແປງແບບ
ຂອງໃຜ...