ປະເທດພະມ້າ/ອອງຊັນຊູກີ

ສລອງວັນເກີດ ຢູ່ໃນຄຸກ

ໂດຍ ສຸກວິໄລ ຊ. Soukvilay S.

ບົດຄວາມນີ້ເຜີຍແຜ່ເມື່ອວັນທີ 19/06/2009 ແກ້ໄຂໃຫມ່ຫລ້າສຸດເມື່ອວັນທີ 19/06/2009 15:42 TU

ເຂົ້າໜົມວັນເກີດ ກ້ອນງາມ ແຕ່ເຈົ້າຂອງ ງານ ນອນຢູ່ໃນຄຸກ (ພາບ : Reuters)

ໃນມື້ນີ້ ວັນທີ ໑໙ ມິຖຸນາ ເປັນ
ວັນຄ້າຍວັນເກີດ ຄົບ ໖໔ ປີຂອງ
ຍານາງ ອອງຊັນຊູກີ ຜູ່ນຳຝ່າຍ
ຄ້ານ ຣັຖບານທະຫານ ພະມ້າ.
ເຖີງວ່າປຣາສຈາກ ເຈົ້າຂອງ
ງານ ແຕ່ຝ່າຍສນັບສນູນ ຢູ່ຫຼາຍ
ຫົວເມືອງໃຫ່ຽໃນເຂດອາຊີ ຮວມ
ທັງ ທີ່ກຸງຢ້າງກຸ້ງເອງ ກໍພາກັນ ສເລີມສລອງ ຢ່າງເປັນຂະບວນ.

ໃນມື້ນີ້ ວັນທີ ໑໙ ມິຖຸນາ ຍານາງ ອອງຊັນຊູກີ ຜູ່ນຳຝ່າຍຄ້ານ ຣັຖບານ ທະຫານ ພະມ້າ ສລອງວັນ ຄ້າຍວັນເກີດ ຄົບ ໖໔ ປີ ຢູ່ໃນຄຸກ. ໃນຂນະ ທີ່ ການຮຽກຮ້ອງ ຂໍໃຫ້ມີການປົດປ່ອຍ ຜູ່ທີ່ຄົນສ່ວນໃຫ່ຽ ມັກປຽບທຽບໃສ່ ປະທານ ແນນສັນ ມັງເດີລາ ທ່ານນີ້ ກໍທະວີຂື້ນເລື້ອຍໆ ໃນທົ່ວໂລກ.

ທີ່ກຸງຢ້າງກຸ້ງ ເອງ ບັນດາ ຜູ່ສນັບສນູນ ຍານາງ ອອງຊັນ ຊູກີ ກໍພາກັນ ສເລີມສລອງ ວັນຄ້າຍວັນເກີດ ໖໔ ປີ ໃຫ້ຍານາງ ເຊັ່ນດຽວກັນ
(ພາບ : Reuters)

ໃນໂອກາດ ວັນຄ້າຍວັນເກີດ ຂອງ ຜູ້ນຳຝ່າຍຄ້ານ ພະມ້າທ່ານນີ້ ທີ່ກຸງ ບຣຸກແຊັນລ໌ ບັນດາຜູ່ນຳ ຂອງ ໒໗ ປະເທດພາຄີ ສຫະພາບ ກໍນັດອອກ ຖແລງການ ໃນຮູບແບບ ຈົດໝາຍ ເປີດຊອງ ເຖີງທາງ ການ ທະຫານ ພະມ້າ ອັນມີເນື້ອໃນ ຂໍໃຫ້ທຳການ ປົດປ່ອຍໂຕ ຍານາງ ອອງຊັນຊູກີ ໃນທັນທີ ແລະໂດຍ ປຣາສຈາກ ເງື່ອນໄຂໃດ໋ໆ ທັງສິ້ນ ແລະທັງນາບ ຂູ່ ນຳພ້ອມວ່າ ບໍ່ດັ່ງ ນັ້ນ ທາງ ສຫະພາບ ກໍຈະເອົາ ມາຕຣາ ການ ເພີ່ມການລົງໂທດ ປິດ ລ້ອມ ປະເທດພະມ້າ. ຈົດໝາຍ ເປີດ ຊອງ ສບັບນີ້ ປະກອບດ້ວຍ ໖໔ ຄວາມ ອັນເປັນສັນຍາລັກ ໖໔ ປີ ອາຍຸ ຂອງຍານາງ ອອງຊັນຊູກີ ນັ້ນເອງ.

ສ່ວນຢູ່ທີ່ ກຸງວໍຊິງຕັນ ກະຊວງການ ຕ່າງປະເທດ ອາເມຣິກາ ກໍໄດ້ອອກ ຖແລງການ ທວງການປົດປ່ອຍ ເຈົ້າຂອງລາງວັນ ໂນແບນລ໌ ຂາສາ ສັນຕິພາບ ທ່ານນີ້ ດ້ວຍການ ສັນຣະເສີນວ່າ ຍານາງເປັນຜູ່ເສັຽສຣະ ທັງຊີວິດຂອງຍານາງ ເພື່ອເຮັດໃຫ້ ມີການ ປ່ຽນແປງ ໄປທາງປະຊາ ທິປະໄຕ ແລະຄວາມກ້າວໜ້າຂອງ ປະເທດຊາດພະມ້າ.

ທີ່ກຸງ ໂກລາລຳປູກ ປະເທດ ມາເລເຊັຽ ສລອງວັນຄ້າຍ ວັນເກີດ ໖໔ ປີ ໃຫ້ຍານາງ ອອງຊັນຊູກີ ດ້ວຍການ ປ່ອຍນົກ ສັນຕິພາບ
(ພາບ : Reuters)

ດ້ານສຫະປະຊາຊາດ ທ່ານ ບານ ກີມູນ ເລຂາທິການເອກ ແລະທ່ານ ອີບຣາຮິມ ກຳບາຣີ ຜູ່ຕາງໜ້າ ພິເສດ ກໍໄດ້ຮັບຮວບຮວມ ບັນຊີ ລາຍເຊັນ ໖໗໐ ໐໐໐ ລາຍເຊັນ ຈາກ ໒໒໐ ປະເທດ ຮຽກຮ້ອງ ໃຫ້ ຣັຖບານພະມ້າ ປົດປ່ອຍ ໃນທັນທີ ນັກໂທດການເມືອງ ທີ່ມີທັງໝົດ ໒ ໑໐໐ ກວ່າຄົນ ໃນປະເທດ ພະມ້າ ນັ້ນ. ແລະບາງທີ ໂຕທ່ານ ບານ ກີມູນ ເລຂາທິການເອກ ຂອງສຫະ ປະຊາຊາດເອງ ກໍອາດຈະເດີນທາງ ໄປພະມ້າ ດ້ວຍໂຕທ່ານເອງ ໃນມໍ່ໆ ເພື່ອຮຽກຮ້ອງ ໃຫ້ທາງການ ພະມ້າ ປົດປ່ອຍໂຕ ຍານາງ ອອງຊັນຊູກີ.

ການສລອງ ວັນຄ້າຍວັນເກີດ ໖໔ ປີ ໃຫ້ຍານາງ ອອງຊັນຊູກີ ທີ່ບາງກອກ (ພາບ : Reuters)

ສຳລັບເຂດອາຊີ ບັນດາຜູ່ສນັນ ສນູນ ຍານາງອອງຊັນຊູກີ ໃນຫົວ ເມືອງໃຫ່ຽໆ ບໍ່ວ່າຈະແມ່ນ ຢູ່ ບາງ ກອກ, ໂກລາລຳປູ້ກ ຫຼືແມ້ກະທັງ ທີ່ກຸງຢ້າງກຸ້ງເອງ ກໍພາກັນ ສເລີມ ສລອງ ຈັດງານວັນເກີດ ໃຫ້ແກ່ ຍານາງ ຢ່າງມີສັນຍາລັກ ກັນເປັນ ແຖບແຖວ ຊື່ງແຕ່ລະບ່ອນ ແມ່ນມີ ເຂົ້າໜົມ ວັນເກີດໄຕ້ທຽນ ປະກອບ ລາຍການ ຢ່າງຄັກແນ່ ເຖີງວ່າຈະ ປຣາສຈາກ ເຈົ້າຂອງງານ ກໍຕາມ.

ສ່ວນບຸກຄົນ ໂດ່ງດັງຫຼື ຜູ່ຊົງຄຸນ ນະວຸດທິ ບໍ່ວ່າວົງການ ການເມືອງ ຫຼື ໃນວົງການ ບັນເທີງ ຫຼາຍທ່ານ ໃນນັ້ນເປັນຕົ້ນ ກໍມີ ຍານາງ ສີຣິນ ເອບາດີ ເຈົ້າຂອງລາງວັນ ໂນແບນລ໌ ສາຂາສັນຕິພາບ ຊາວ ອີຫຣ້ານ, ເດວີ້ດ ເບກກຳ ດາຣາກິລາເຕະບານ ຊາວອັງກິດ, ຊ໊ອກ ກລູນເນ ແລະ ຈູຍລີຢາ ໂຣແບກສ໌ ດາຣາພາພຍົນ ຊາຍແລະຍິງ ອາເມຣິກາ ຜູ່ໂດ່ງດັງ ແລະຮູບໂສມງາມ ຕ່າງກໍພາກັນ ເຄື່ອນໄຫວ ໃຫ້ສຳພາດ ປາກົດໃນ ເຄື່ອຄ່າຍ ແອ໊ງແຕ໊ກແນດຕ໌ ສແດງ ການສນັບສນູນ ເປັນກຳລັງໃຈ ຕໍ່ຍານາງ ອອງຊັນຊູກີ ຢ່າງເປັນຂບວນ.