ຄົນລາວ ທີ່ຍັງຄ້າງຢູ່ໄທຍ ຕັ້ງແຕ່ ໑໙໗໕

ວິຕົກກັງວົນ ໃນສະຖານະພາບຕົນ

ໂດຍ ສຸກວິໄລ ຊ. Soukvilay S.

ບົດຄວາມນີ້ເຜີຍແຜ່ເມື່ອວັນທີ 27/12/2009 ແກ້ໄຂໃຫມ່ຫລ້າສຸດເມື່ອວັນທີ 27/12/2009 13:23 TU

ທ່ານ ກຸ ແສງພັຍວັນ ປະທານກຸ່ມຄົນລາວ ບໍ່ມີສັນຊາດ ໃນເຂດ ອຸບົນ ປະເທດໄທຍ
(ພາບ : ຊົງຣິດ ໂພນເງີນ)

ປີ ໑໙໗໕ ເມື່ອໄດ້ມີການປ່ຽນ ຣະບອບການປົກຄອງ ຈາກພະຣາຊ ອານາຈັກລາວ ມາສະຖາປະນາເປັນ ສາທາຣະນະຣັຖ ປະຊາທິ-ປະໄຕ ປະຊາຊົນລາວ ວິຖີຊີວິດ ຂອງຄົນລາວ ນັບຫຼາຍແສນ ໄດ້ຫັນປ່ຽນ. ເກືອບທຸກຄົວເຮືອນ ມີຫົວໜ້າຄອບຄົວ ຫຼືສະມາຊິກ ຄອບຄົວ ຖືກຈັບໄປ ສຳມະນາ ຫືຼບໍ່ໂຕນຂ້າມຟາກໄທຍ. ໓໐ ກວ່າປີຜ່ານມາ ກໍຍັງມີຄົນລາວ ທີ່ບໍ່ມີໂອກາດຫຼື ບໍ່ຕ້ອງການ ໄປປະເທດທີສາມ ເຫຼືອຄ້າງຢູ່ໄທຍ ຫຼາຍ ພັນຄົນ ພວກເຂົາເຈົ້າ ໄດ້ອອກມາສະແດງການ ຮ້ອງທຸກ ຂໍຄວາມເຫັນໃຈ ຂໍຄວາມ ສະດວກ ໃນການເດີນທາງ ສັນຈອນໄປມາ ພາຍໃນ ປະເທດໄທຍ ໂດຍສະເພາະ ເພື່ອການຊອກຫາ ວຽກເຮັດງານທຳ ຮວມໄປເຖີງ ການປິ່ນປົວ.

ເມື່ອປີ ໑໙໗໕ ເມື່ອໄດ້ມີການປ່ຽນ ຣະບອບການປົກຄອງ ນັ້ນໃນທັນທີ ພຣະເຈົ້າມະຫາຊີວິດ ສຣີສວ່າງວັທນາ ພຣະອັກຄະມະເຫສີ ພ້ອມ ອົງມົງກຸດ ຣາຊກຸມມານ ເຈົ້າຟ້າຊາຍ ແລະເຊື້ອພຣະວົງ ຫຼາຍອົງ ຮວມໄປເຖີງ ບັນດາ ຂ້າຣາຊການ ທະຫານຕຳຣວຈ ຮວມທັງໝົດ ຫຼາຍສີບພັນ ຄົນຖືກຈັບໄປ ສຳມະນາ ຊື່ງບາງຜ່ອງ ທີ່ຍັງໂຊກດີ ກໍໄດ້ກັບສູ່ຄອບຄົວ ແຕ່ສ່ວນໜື່ງ ແມ່ນໂຊກຮ້າຍສຸດ ຊາຕາຂາດ ຢູ່ໃນສູນສຳມະນາ.
ນອກຈາກນີ້ ນັບແຕ່ປີ ໑໙໗໕ ປະຊາຊົນລາວ ປະມານ ໑໐ % ຍັງໄດ້ພາກັນ ໂດດໂຕນໂຍນໜີ ຂ້າມນ້ຳຂອງ ເປັນອົພຍົບ ລີ້ພັຍການເມືອງ ຢູ່ປະເທດໄທຍ. ຊື່ງສ່ວນມາກແລ້ວ ກໍໄດ້ຖືກຮັບ ໄປດຳຣົງຊີວິດ ໃນປະເທດທີສາມ ແຈກກະຈັກກະຈາຍ ໄປເກືອບທົ່ວມູມໂລກ. ຫາກແຕ່ວ່າ ກໍຍັງເຫຼືອອີກ ຈຳນວນໜື່ງ ທີ່ຍັງເຫື້ອຄ້າງ ໄຊ້ຊີວິດ ສ້າງຄອບສ້າງຄົວ ຢູ່ໃນປະເທດໄທຍ ຫາກແຕ່ ກໍກາຍເປັນຄົນຕ່າງຊາດ ບໍ່ມີສັນຊາດ ອັນຖືກຕ້ອງ ຊື່ງປັດຈຸບັນ ຄຳນວນໄດ້ວ່າ ມີປະມານ ໘ ໐໐໐ ກວ່າຄົນ.

ໃນວາຣະ ທີ່ທາງການໄທຍ ຕຣຽມພ້ອມ ຈະສົ່ງຊາວມົ້ງ ຢູ່ຫ້ວຍນ້ຳຂາວ ກັບຄືນປະເທດລາວ ໃຫ້ໝົດກ້ຽງ ຕາມທີ່ໄດ້ຕົກກັນ ແບບສອງຝ່າຍ ກັບທາງການລາວນີ້ ພວກຄົນລາວ ບໍ່ມີສັນຊາດ ກຸ່ມນີ້ໄດ້ອອກມາ ສະແດງການ ຮ້ອງທຸກ ຂໍຄວາມເຫັນໃຈ ກັບທາງການໄທຍ ດ້ວຍການ ຂໍຄວາມສະດວກ ໃນການເດີນທາງ ສັນຈອນໄປມາ ພາຍໃນປະເທດໄທຍ ໂດຍສະເພາະ ເພື່ອການຊອກຫາ ວຽກເຮັດງານທຳ ຮວມໄປເຖີງ ການປິ່ນປົວພະຍາດ.
ຊົງຣິດ ໂພນເງີນ ຜູ່ສື່ຂ່າວຂອງພວກເຮົາ ທີ່ປະເທດໄທຍ ໄດ້ມີໂອກາດ ພົບພໍ້ສຳພາດ ພວກເຂົາເຈົ້າ.

ຊື່ງທ່ານສາມາດກລິກຟັງ ຢູ່ລຸ່ມນີ້ໄດ້

ທ່ານ ກຸ ແສງພັຍວັນ ແລະຄອບຄົວ ເມື່ອຕອນ ໄປຮ່ວມ ການຊຸມນຸມຕ້ານ ໂຄງການສ້າງເຄື່ອນ ຢູ່ບ້ານກຸ່ມ ເມື່ອວັນທີ ໑໔ ຜ່ານມານີ້ (ພາບ : ຊົງຣິດ ໂພນເງີນ)