ປັນຫາລາວເຜົ່າມົ້ງ ທີ່ກັບຈາກສູນ ໃນປະເທດໄທຍ

ລາວວ່າ ບໍ່ມີຫຍັງ ຕ້ອງເປັນຫ່ວງ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 30/12/2009 ແກ້ໄຂໃຫມ່ຫລ້າສຸດເມື່ອວັນທີ 30/12/2009 12:58 TU

ຊາວລາວເຜົ່າມົ້ງກັບຈາກສູນບ້ານຫ້ວຍນໍ້າຂາວ ເຂົ້າພັກອາໃສຊົ່ວຄາວທີ່ສູນຕ້ອນຮັບແຂວງ ບໍຣິຄຳໄຊ (ພາບ: Reuters)

ທາງການ ສປປ ລາວ ອອກມາໃຫ້ຫລັກປະກັນໃນມື້ນີ້ (ພຸດ 30 ທັນວາ
2009) ວ່າ ສຳລັບຊາວ ລາວເຜົ່າມົ້ງ 4371 ຄົນ ທີ່ເດີນທາງກັບຄືນປະເທດ
ລາວ ຈາກສູນບ້ານຫ້ວຍນໍ້າຂາວ ເມື່ອວັນຈັນທີ່ ແລ້ວນັ້ນ ບໍ່ມີຫຍັງຕ້ອງເປັນ
ຫ່ວງແລະວິຕົກກັງວົນຕໍ່ອະນາຄົດຂອງພວກເຂົາເຈົ້າ ໃນຂະນະທີ່ທາງການ
ໄທຍກໍໃຫ້ການຢືນຢັນຄັກແນ່ວ່າຊາງລາວເຜົ່າມົ້ງທີ່ກັບບ້ານທຸກຄົນ ຈະໄດ້ຮັບ
ການປະຕິບັດຢ່າງດີ

"ພວກເຂົາເຈົ້າ (ຊາວມົ້ງ) ບໍ່ມີຫຍັງຕ້ອງຢ້ານກົວ" ທ່ານເຄນທອງ ນວນທະສິງ ໂຄສົກ
ກະຊວງການຕ່າງປະເທດລາວ ໄດ້ກ່າວໃຫ້ຫລັກປະກັນ ເປັນການຕອບໄປໃນຕົວຕໍ່ອົງ
ການຂ້າຫລວງໃຫຍ່ສະຫະປະຊາຊາດເພື່ອຊາວອົພຍົບ (HCR) ທີ່ຮຽກຮ້ອງຂໍເຂົ້າໄປ
ຢ້ຽມຢາມຊາວລາວເຜົ່າມົ້ງ ທີ່ຖືກສົ່ງກັບຄືນປະ ເທດລາວ

"ພວກເຂົາເຈົ້າເປັນຄົນລາວ ທີ່ກັບຄືນບ້ານເກີດເມືອງນອນ" ທ່ານເຄນທອງ ໄດ້ກ່າວ
ເພີ້ມ

ອີກປະການໜຶ່ງ ທ່ານກະສິດ ພິຣົມ ຣມຕ ຕ່າງປະເທດໄທຍ ກໍໄດ້ອອກມາກ່າວ ພະຍາ
ຍາມໃຫ້ຫລັກປະກັນແດ່ປະຊາຄົມນາໆຊາດວ່າ ຊາວລາວເຜົ່າມົ້ງຈະໄດ້ຮັບການປະຕິບັດ
ຢ່າງດີຈາກທາງການລາວ

"ປະເທດລາວ ໄດ້ໃຫ້ຄຳໝັ້ນສັນຍາກັບໄທຍວ່າ ຈະປະຕິບັດຢ່າງດີທີ່ສຸດຕໍ່ພວກເຂົາເຈົ້າ
ຈະບໍ່ມີການຄຸມຂັງ ພວກເຂົາຈະໄດ້ຮັບໜັງສືເດີນທາງ (Passport) ແລະ ຈະສາມາດພົບ
ປະກັບຄະນະຕົວແທນຈາກປະເທດທີສາມໄດ້ ທີ່ອາດຈະຮັບເອົາພວກເຂົາເຈົ້າໄປຕັ້ງຫລັກ
ແຫລ່ງໃໝ່" ຣມຕ ຕ່າງປະເທດ ໄທຍ ໄດ້ກ່າວ

"ພວກເຮົາເຊື່ອໝັ້ນວ່າ ໃນພາກປະຕິບັດຕົວຈິງ ປະເທດລາວກໍຈະເຮັດຕາມຄຳໝັ້ນສັນ
ຍາ"ທ່ານກະສິດ ພິຣົມ ໄດ້ກ່າວມ້ວນທ້າຍ