ການລົງທຶນ ຕ່າງປະເທດ ໃນ ສປປ ລາວ

ວຽດນາມ ຈະລົງທຶນ ໃນໂຄງການ ກວ່າພັນລ້ານໂດລາ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 05/01/2010 ແກ້ໄຂໃຫມ່ຫລ້າສຸດເມື່ອວັນທີ 05/01/2010 12:13 TU

ທ່ານເຄນທອງ ນວນທະສິງ ໂຄສົກກະຊວງການຕ່າງປະເທດຂອງ ສປປ ລາວ (ພາບ: flickr.com)

ບໍລິສັດວຽດນາມ "Long Thanh Golf Trading and Investment Co." ໄດ້ເລີ້ມຕົ້ນໂຄງການ ລົງທຶນຂນາດມະຫຶມາໃນລາວແລ້ວຕັ້ງແຕ່ວັນອາທິດ ທີ 4 ມັງກອນ 2010

ເປັນໂຄງການມູນຄ່າກວ່າ 1000 ລ້ານໂດລາ ສ້າງສນາມກອລຟ໌ ໂຮງແຮມລະດັບ 5
ດາວ ທີ່ພັກອາໃສ ໂຮງຮຽນ ໂຮງພຍາບານ ແລະ ສິ່ງອຳນວຍຄວາມສດວກອື່ນໆ

ທັງໝົດເທິງພື້ນທີ່ 557 ເຮັກຕາຣ໌ ໃກ້ໆນະຄອນວຽງຈັນ ຕາມການເຜີຍຂອງສຳນັກ
ຂ່າວສານວຽດນາມ (VNA) ທີ່ຢໍ້າອີກວ່າ ໂຄງການທັງໝົດກະຈະແລ້ວເສັດໃນອີກ
12 ປີຂ້າງໜ້າ

ທ່ານເຄນທອງ ນວນທະສິງ ໂຄສົກກະຊວງການຕ່າງປະເທດຂອງລາວ ກໍໄດ້ໃຫ້
ການຢືນຢັນຂ່າວນີ້ຕໍ່ສຳນັກຂ່າວສານ AFP ວ່າ ທາງການລາວ ໄດ້ມີການລົງນາມ
ໃນບັນທຶກຄວາມເຂົ້າໃຈ "MOU" ກັນແລ້ວກັບບໍຣິສັດວຽດນາມ

ທ່ານບອກອີກວ່າ ໂຄງການນີ້ເປັນໂຄງການລົງທຶນຕ່າງປະເທດ ທີ່ໃຫຍ່ທີ່ສຸດ ຮອງ
ລົງມາຈາກໂຄງການ "ນໍ້າເທີນ-2" ມູນຄ່າ 1 450 ລ້ານໂດລາ ທີ່ລົງທຶນຮ່ວມກັນ
ລະຫວ່າງ ຝຣັ່ງ ລາວ ແລະ ໄທຍ

ວຽດນາມນຳໜ້າການລົງທຶນຕ່າງປະເທດໃນລາວ
ເມື່ອເດືອນມິຖຸນາຜ່ານມາ ກອງປະຊຸມບັນດາບໍຣິສັດວຽດນາມກວ່າ 60 ບໍຣິສັດທີ່
ລົງທຶນໃນລາວ ພາຍໃຕ້ການເປັນປະທານຂອງເອກອັຄຣັຖທູດວຽດນາມ ປະຈຳ
ລາວ ທ່ານຕາ ມິນ ໂຈວ ໄດ້ເຜີຍໃຫ້ຮູ້ວ່າ ມູນຄ່າການລົງທຶນຂອງວຽດນາມໃນ
ລາວ ໄດ້ສູງຂຶ້ນເຖິງ 1200 ລ້ານໂດລາແລ້ວ ຍັງຄົງຮັກສາອັນດັບໜຶ່ງຂອງການ
ລົງທຶນຕ່າງປະເທດໃນລາວໄວ້ເໝືອນເດີມ

ການລົງທຶນຂອງວຽດນາມ ເປັນປັດໃຈໜຶ່ງທີ່ຈະເຮັດໃຫ້ຣັຖບານລາວບັນລຸເຖິງ
ເປົ້າໝາຍຂອງຕົນ ຄືການບັນລຸເຖິງການຂຍາຍຕົວຂອງ GDP ໃນຣະດັບ 7.5%
ສຳລັບປີງົບປະມານ  2008 – 2009 ເພື່ອປັບປຸງຊີວິດຄວາມເປັນຢູ່ຂອງປະຊາ
ຊົນໃຫ້ດີຂື້ນ ແລະ ບັນລຸເຖິງເປົ້າໝາຍຫລຸດພົ້ນອອກຈາກ ຖານະປະເທດທີ່ຍາກ
ຈົນທີ່ສຸດໃນໂລກ ໃນປີ 2020