ອາເມຣິກາ-ຄວາມປອດພັຍ

ໂອບາມາ ເພີ້ມມາຕະການ

ໂດຍ ບັນດານ ສີສຸນທອນ B. Sisounthone

ບົດຄວາມນີ້ເຜີຍແຜ່ເມື່ອວັນທີ 05/01/2010 ແກ້ໄຂໃຫມ່ຫລ້າສຸດເມື່ອວັນທີ 05/01/2010 12:13 TU

ປະທານາທິບໍດີ ບາຣັກ ໂອບາມາ
Reuters

ປະທານາທິບໍດີ ບາຣັກ ໂອບາມາ ຮຽກປະຊຸມຄນະຮັບຜິບຊອບ ດ້ານສືບລາຊການລັບ ເພື່ອສອບຖາມເຖີງຄວາມກະຈ່າງແຈ້ງ ກ່ຽວກັບການກໍ່ການຮ້າຍທີ່ບໍ່ສຳເຣັດຜົນ ໃສ່ຍົນ ບໍຣິສັດ ແດ່ນຕ່າ ອາເມຣິກັນ

ຈຸດປະສົງ ແມ່ນເພື່ອແກ້ໄຂຄວາມບົກພ່ອງຕ່າງໆ ທີ່ອຳນວຍໃຫ້ ນັກກໍ່ ການຮ້າຍ ພະຍາຍາມ ລະເບີດຍົນໂດຍສານ ອາເມຣິກັນ ແລະ ເພື່ອ ເອົາມາຕະການ ຈຳເປັນສຳຫລັບຫລີກເວັ້ນ ບໍ່ໃຫ້ເຫດການດັ່ງກ່າວນີ້ ເກີດຂື້ນ ຄືນໃໝ່ອີກ.

 

ປັດຈຸບັນ ຍັງບໍ່ຮູ້ວ່າ ຈະມີການຊັບປ່ຽນໜ້າທີ່ໃໝ່ຫຼືບໍ່ ໃນວົງການສືບ ລາຊການລັບ ແລະຄວາມປອດພັຍແຫ່ງຊາດ, ແຕ່ວ່າ ບັນດາຫົວໜ້າ ສຳຄັນ ຈະຕ້ອງອະທິບາຍ ເຖີງເຫດການຢ່າງລະອຽດ ຕໍ່ ປທນທິບໍດີ ໂອບາມາ ທີ່ວ່າບໍ່ພໍໃຈ ໃນການປະຕິບັດງານ ຂອງບັນດາຫົວໜ້າ ກົມສືບລາຊການລັບນີ້ ແຕ່ຢ່າງໃດ.

 

ນັບແຕ່ ວັນທີ 25 ທັນວາ 2009 ມາ, ການເປີດເຜີຍ ເຖີງຄວາມ ຂາດຕົກ ບົກພ່ອງ ໃນການຄວບຄຸມ ຄວາມປອດພັຍ ນັບມື້ນັບຫລາຍ ຂື້ນ, ຈົນອຳນວຍຄວາມສາມາດ ໃຫ້ນັກສຶກສາໜຸ່ມ ສວຍໂອກາດ ເອົາລະເບີດ ເຊື່ອງຂື້ນຍົນໄດ້, ທັ້ງໆທີ່ວ່າ ພໍ່ ຂອງຜູ່ກ່ຽວເອງ ກໍໄດ້ ແຈ້ງຄວາມຕໍ່ ກົມສືບລາຊການລັບ ຊີໄອເອ່ ແລ້ວວ່າ ລູກຊາຍຂອງ ເຂົາ ໄດ້ເຂົ້າຮ່ວມໃນ ວົງການກໍການຮ້າຍ ອ່ານກ່າຍດ່າ.

 

ທັງໝົດນີ້ເປັນການຂາດ ຄວາມຮ່ວມມືກັນ ລະຫວ່າງ ແຕ່ລະພະແນກ ທີ່ກ່ຽວຂ້ອງ, ການກວດກາ ບັນຊີລາຍຊື່ ຜູ່ທີ່ຕ້ອງສົງສັຍ ປະມານ 5 ແສນກວ່າຄົນ ກໍບໍ່ມີປະສິດທິຜົນ, ການສິ່ງຊອມ ກໍມີ ຄວາມລະເຫລີງ ແລະຂາດຕົກບົກພ່ອງໄປຕາມໆກັນ.

 

ປທນທິບໍດີ ໂອບາມາ ຈະຕ້ອງຢູ່ໃນສາຍຕາຂອງປະຊາຊົນສະເມີວ່າ ເປັນປທນ ທິບໍດີ ທີ່ສາມາດ ປົກປ້ອງຄວາມປອດພັຍໃຫຫ້ ປະຊາຊົນ ຂອງຕົນໄດ້.  ສະນັ້ນ, ຕ້ອງມີການເຂັ້ມງວດ ໃນມາຕະການໃໝ່ ສຳຫລັບກວດກາ ແລະຄວບຄຸມ ໃນເດີນຍົນ ໃນ 14 ປະເທດ ທີ່ຖືວ່າ ຊ່ຽງຕໍ່ການເກີດມີ ການກໍ່ການຮ້າຍ ທີ່ຖືກປະກາດອອກໃຊ້ ໃນມື້ວານນີ້ ວັນຈັນ ທີ 4 ມົກະຣາ 2010 ນີ້ ເປັນຕົ້ນໄປ.

 

ມາຕະການໃໝ່ດັ່ງກ່າວນີ້ ສ້າງຄວາມໝັ້ນໃຈໃຫ້ປະຊາຊົນ ຫລາຍຂື້ນ ກວ່າເກົ່າ, ແຕ່ກໍເປັນການ ສ້າງຄວາມບໍ່ພໍໃຈໃຫ້ ສະມາຄົມປ້ອງກັນ ສິດທິມະນຸດ ທີ່ຖືວ່າເປັນການກຳຈັດ ປັດເປົ່າຊົນຊາດຊົນເຜົ່າ.

 

ອີກດ້ານນຶ່ງ, ສະຖານທູດ ອາເມຣິກາ ໃນນະຄອນຫລວງ ສ່ານ່າ ໄດ້ໄຂຄືນໃໝ່ໃນມື້ນີ້ ຫລັງຈາກໄດ້ ປິດມາ ສອງມື້, ທຳນຽບຂາວ ໄດ້ສັນລະເສີນ ລັຖະບານ ເຢເມັ່ນ ທີ່ໄດ້ເອົາມາຕະການປາບ ສາຂາ ກຸ່ມກໍ່ການຮ້າຍ ອ່ານກ່າຍດ່າ ໃນປະເທດ. ສ່ວນ ສະຖານທູດ ຝຣັ່ງ ແລະ ອັງກິດ ນັ້ນ ຍັງປິດຢູ່.