ນ້ຳນົມ ມີສານພິດ ໃນ ສປ ຈີນ

ລັຖະບານຈີນ ວ່າບໍ່ມີ ເມ່ລາມີ່ນ ໃນນົມແລ້ວ

ໂດຍ ບັນດານ ສີສຸນທອນ B. Sisounthone

ບົດຄວາມນີ້ເຜີຍແຜ່ເມື່ອວັນທີ 24/09/2008 ແກ້ໄຂໃຫມ່ຫລ້າສຸດເມື່ອວັນທີ 06/10/2008 15:58 TU

ເດັກເຈັບປ່ວຍ ຍ້ອນນົມຝຸ່ນ ທີ່ມີສານພິດຖີ້ມ ລໍຖ້າເຂົ້າກວດສຸຂພາບ ທີ່ໂຮງໝໍ
Reuters

ນາຍົກລັຖະມົນຕຣີຈີນ ວ່າຈະເອົາ ມາຕະການ ຢ່າງເຂັ້ມງວດກວດ ຂັນ ຕໍ່ຄຸນະພາບ ທາງດ້ານການ ຜລິດອາຫານ, ສ່ວນ ອົງການ ກວດກາ ແລະຄວບຄຸມຄຸນະພາບ ແຫ່ງຊາດ ກໍວ່າໄດ້ສຳລວດ ອາຫານ ປະເພດນົມ ທົ່ວປະເທດ, ແລະ ແຕ່ວັນທີ 14 ກັນຍາ ນີ້ມາ ບໍ່ມີສານເຄມີ ເມ່ລາມີ່ນ ໃນນ້ຳ ນົມອີກແລ້ວ.

ຕົ້ນຕໍ່ ເຮັດໃຫ້ ນ້ຳນົມຈີນ ມີສານພິດ ?

 

ຕົ້ນຕໍ່ ແມ່ນ ສານເຄມີ ເມລ່າມີນນ໌ ນັ້ນເປັນຕົ້ນເຫດ, ເຮັດໃຫ້ເກີດໜີ້ວ ໃນໝາກໄຂ່ຫລັງ, ເພາະມີການລັກລອບ ເອົາສານດັ່ງກ່າວນີ້ ໃສ່ນົມງົວ ຜູ້ຖືກສົງສັຍ ໄດ້ຮັບສາຣະພາບ ວ່າ ໄດ້ເອົາສານເຄມີ ເມລ່າມີນນ໌ ມາ ປະສົມໃສ່ກັບນົມສົດ, ເພື່ອບໍ່ໃຫ້ມີກິ່ນເໝັນ ແລະ ເຊື່ອງຊ້ອນການເພີ້ມ ທາດ ໂປຣເຕອິນ ແລະເຊື່ອງຊ້ອນນ້ຳ ທີ່ປະສົມໃສ່ນົມ ໃຫ້ມັນເຂັ້ມຂຸ້ນ ເໜືອນກັບນ້ຳນົມແທ້.

ສານເຄມີ ເມລ່າມີນນ໌ ນີ້ເປັນ ສານທີ່ ສຳຫລັບ ຜລິດຢາງ ປຣັດສຕິກ, ເຮັດກາວ, ຫຼືເຮັດຢາງໜຽວ ອື່ນໆ....

 

ມາເຖີງປັດຈຸບັນນີ້, ມີ 4 ຄົນຖືກຈັບ ແລະ 22 ຄົນ ຖືກເກາະໄປສອບ ສວນ. ເຈົ້າຮ້າທີ່ ແຈ້ງວ່າ ຍັງຈະມີ ອີກຫລາຍຄົນ ຈະຖືກຈັບຕື່ມອີກ ໃນຂັ້ນຕໍ່ໄປ.

 

ໃນ ສປ ຈີນ ນີ້ເຄີຍມີບັນຫາ ໃນດ້ານ ເຄື່ອງກິນ ເປັນພິດນີ້ມາແລ້ວ ເຊັ່ນ ເສັ້ນມີ່ ແລະ ເຂົ້າ ມີສານຂ້າແມງໄມ້, ຢາສີແຂ້ວ ຕ້ານຄວາມ ກ້າມ ແລະ ອາຫານໝາ ໃສ່ສານ ເມ່ລາມີ່ນ ດັ່ງນີ້ເປັນຕົ້ນ.

ປະຊາຊົນ ເອົານົມ ມີສານພິດ ມາສົ່ງຮ້ານຄ້າຄືນ
Afp

 

ເປັນຫຍັງ ທາງບໍຣິສັດ ແລະ ທາງການ ຈຶ່ງເອົາມາຕການ ກວດກາ ແລະ ຄວບຄຸມ ຊັກຊ້າ ?

 

ນັບຕັ້ງແຕ່ ຄືນວັນທີ 22 ແລະ 23 ກັນຍາ ນີ້ມາ ຂ່າວສານທາງການ ຈີນ ຈຶ່ງໄດ້ເພີ້ມທະວີ ການປ່າວປະກາດ ອອກຕໍ່ມວນຊົນຢ່າງກວ້າງ ຂວາງ ວ່າບໍຣິສັດ ສັ່ນລູ ນີ້ໄດ້ເຊື່ອງຊ້ອນ ຄວາມຈິງ ຕໍ່ນົມທີ່ມີສານພິດ ດ້ວຍທາດ ເມ່ລາມີ່ນ ແລະຫຍ້ຳວ່າ ບໍຣິສັດ ສັ່ນລູ ນີ້ ໄດ້ປິດຄວາມລັບ ຫຼືວ່າ ຕົວະມາໄດ້ຫລາຍເດືອນແລ້ວ.

 

ບໍຣິສັດ ສັ່ນລູ ຕັ້ງຢູ່ໃນແຂວງ ເຮເບີຍ, ຮ່າງຈາກ ປັກກິງ 200 ກລມ, ເປັນນຶ່ງໃນຈຳນວນ ບໍຣິສັດ ຍັກໃຫຍ່ ໃນຈີນ ດ້ານການຜລິດ ອາຫານ ຈາກພື້ນຖານນ້ຳນົມ ເຊັ່ນ ນ້ຳນົມຟຸ່ນ ຫຼື ນົມນ້ຳ, ຢ່າອ້ວກ,   ຫຼືວ່າ ປະກອບ ໃນຂະນົມ ແລະ ອາຫານອື່ນໆ...

 

ຄວາມຈິງ ເຣື້ອງນ້ຳນົມ ມີສານພິດນີ້, ບໍຣິສັດ ສັ່ນລູ ໄດ້ຖືກຮ້ອງຟ້ອງ ຈາກພໍ່ແມ່ເດັກ ມາຕັ້ງແຕ່ ເດືອນ ທນວາ 2007 ພຸ້ນແລ້ວ, ຊຶ່ງຕອນ ນັ້ນ ຍັງບໍ່ຮູ້ວ່າ ແມ່ນຫຍັງ ເປັນຕົ້ນເຫດເທື່ອ.

ຫລັງຈາກ ມີເດັກເຈັບປ່ວຍ ໜັກນ໊າຂື້ນເລື້ອຽໆແລ້ວ ຕໍ່ມາຈຶ່ງທຳການ ວິຈັຍ ແລະຄົ້ນພົບເຫັນ ສານເຄມີ ເມ່ລ່າມີ່ນ ຢູ່ໃນນົມ ກໍຕໍ່ເມື່ອຕົກມາ ເຖີງເດືອນ ມິຖຸນາ ປີ 2008 ແລ້ວ.

 

ທາງບໍຣິສັດຮູ້ຄັກແນ່ ແລ້ວວ່າ ນົມມີສານພິດ, ແຕ່ກໍບໍໄດ້ ແຈ້ງເຕືອນ ໃຫ້ ທາງການຊາບເລີຍ ລໍຖ້າປະມານເດືອນກວ່າ ຈົນເຖີງ ວັນທີ 2 ສິງຫາ ຈຶ່ງໄດ້ແຈ້ງໃຫ້ ຄນະປົກຄອງແຂວງຊາບ.

 

ຫລັງນັ້ນ ທາງການແຂວງ ແລະຄນະຮັບຜິດຊອບພັກຄອມມູຍນິດ ໃນ ແຂວງ ເຮເບີຍ ໃຫ້ຊາບເຣື້ອງນີ້ແລ້ວ ແຕ່ກໍຍັງ ພາກັນຊັກຊ້າຢູ່ອີກ ຈົນ ກວ່າສະຖານະການ ຈະຮ້າຍແຮງຂື້ນນັບມື້.

 

ສເລັ່ຽແລ້ວ ນົມມີສານພິດ ໃດ້ປິດລັບ ມາປະມານ 9 ເດືອນ, ຕ່າງຝ່າຍ ຕ່າງຢ້ານຄວາມຜິດ ແລະຝ່າຍບໍຣິສັດ ກໍຢ້ານເສັຍຊື່ສຽງ ແລະຈຳໜ່າຍ ສິນຄ້າບໍ່ອອກ, ສ່ວນທາງການແຂວງ ກໍມິດງຽບບໍ່ແຈ້ງປ່າວເຕືອນ ປະ ຊາຊົນ ແລະ ຂັ້ນສູງຕໍ່. ຈົນກະທັ້ງ ກ່ອນໜ້າ 2 ມື້ ຈະມີເດັກຜູ່ທຳອິດ ເສັຍຊີວິດ ທາງຄນະປົກຄອງແຂວງ ຈຶ່ງໄດ້ແຈ້ງໃຫ້ລັຖບານກາງ ປັກກິງ ຊາບ.

 

ເພາະສນັ້ນ ທັງໝົດນີ້ ເປັນຍ້ອນມີການຊື້ຈ້າງຈອບອອຍ ແລະ ຂາດ ຄວາມ ຮັບຜິດຊອບ ຈອງຄນະ ບໍຣິຫານ ບໍຣິສັດ ແລະ ຄນະປົກຄອງ ທ້ອງຖີ່ນ. ອີກປະການນຶ່ງ ບໍຣິສັດ ສັ່ນລູ ນີ້ ຍັງເປັນນຶ່ງ ໃນຈຳນວນ ບໍຣິສັດສຳຄັນ ໃຫ້ການອຸປະຖັມ ຫຼື ເປັນ ສະປ່ອນເຊີ້ ໃຫ້ງານແຂ່ງຂັນ ກິລາ ໂອແລມປິກສາກົນ ອີກດ້ວຍ.

 

ຈົນເຣື້ອງບານປາຍ ລັຖະບານກາງ ຊັກຊ້າອີກ 2 ອາທິດ ຈຶ່ງມີ ມີຄຳ ສັ່ງເດັດຂາດ ຫ້າມນົມລ້ຽງເດັກ ຂອງ ສັ່ນລູ ໃນວັນມີ 11 ກັນຍາ ແລະ ວັນທີ່ 18 ກັນຍາ ຈຶ່ງປ່າວສັນຍານພັຍ ຢ່າງກວ້າງຂວາງ ແລະສັ່ງໃຫ້ ເອົາມາຕະການ ຄວບຄຸມ ແລະກວດກາ ດ່ວນ ຕໍ່ສິນຄ້າ ປະເພດດັ່ງກ່າວນີ້.

 

ຕໍ່ມາໃນລະດັບ ສາກົນກໍໄດ້ ແຈ້ງເຕືອນສັນຍານພັຍ ຕໍ່ນົມປົນສານເຄມີ ເມ່ລາມີ່ນ, ຫລາຍປະເທດ ກໍໄດ້ເອົາມາຕການປ້ອງກັນ ໂດຍ ຫ້າມບໍ່ ໃຫ້ ນຳເອົາສິນຄ້າ ປະເພດນ້ຳນົມຈາກ ສປ ຈີນ ເຂົ້າໃນ ປະເທດ ຈົນ  ກ່ວາຈະມີຄຳສັ່ງ ໃໝ່ ເຊັ່ນ ໃນວຽດນາມ, ບຣູໄນ, ໃຕ້ຫວັນ, ຂເມນ, ບັງຄລາເທດ, ບູຣຸ່ນດີ່, ກົກຕ໌ດີວົ່ວ, ມາເລເຊັຍ, ອິໂດເນເຊັຍ, ສິງກະໂປ ແລະ ອື່ນໆ.. ສ່ວນ ສຫພ ເອີຣົບ ນັ້ນໄດ້ ຫ້າມບໍໃຫ້ ສິນ ຄ້າຂອງຈີນ ປະເພດດັ່ງກ່າວນີ້ ເຂົ້າມາຈຳໜ່າຍ ຕັ້ງແຕ່ ປີ 2002 ພຸ້ນ ຍ້ອນການ ກວດກາ ຄວບຄຸມ ຄຸນະພາບ ບໍ່ພຽງພໍ.

 

ກ່ຽວກັບ ພັຍອັນຕລາຍ ໃນການຜລິດອາຫານການກິນ ລະດັບ ອຸສຫະ ກັມ ໃນ ສປ ຈີນ ນີ້ ເຄີຍມີມາ ຫລາຍຄັ້ງແລ້ວ, ເຖີງແມ່ນວ່າ ຜູ່ຮັບ ຜິດຊອບ ຂັ້ນສູງເຄີຍຖືກຕັດສິນປະຫານຊີວິດ ແລະ ຜູ່ຮັບຜິດຊອບ ຫລາຍຄົນ ໄດ້ຕິກຄຸກ ຍ້ອນສໍ້ລາດບັງຫລວງ ແລະ ບໍ່ເອົາໃຈໃສ່ ໃນໜ້າທີ່ ແລ້ວກໍຕາມ, ແຕ່ບັນຫານີ້ ຍັງຊຳເຮື້ອຢູ່, ແລະ ແນ່ນອນ ຄັ້ງນີ້ ຈະຕ້ອງມີການ ສອບສວນກັນຢ່າງຖ້ວນຖີ່ ຄາດວ່າ ມີ ຄນະຮັບ ຜິດຊອບ ທີ່ກ່ຽວຂ້ອງຫລາຍຄົນ ຈະຕິດຄະດີ ໄປຕາມໆກັນ.