ລາຍງານ ອາເມຣິກາ/ແຮງງານເດັກ

ເດັກຖືກໄຊ້ແຮງງານ ໃນທຸກຂແນງ

ໂດຍ ສຸກວິໄລ ຊ. Soukvilay S.

ບົດຄວາມນີ້ເຜີຍແຜ່ເມື່ອວັນທີ 13/09/2009 ແກ້ໄຂໃຫມ່ຫລ້າສຸດເມື່ອວັນທີ 13/09/2009 10:57 TU

ຮູບແຕ້ມສໍດຳ ບັນທືກວ່າ ເດັກນ້ອຍ ແລະແມ່ຍີງ ເຮັດວຽກ ຂຸດບໍ່ຖ່ານຫີນ ສມັຍຕົ້ນສັດຕະວັດທີ ໒໐ ທີ່ປະເທດອັງກິດ (ພາບ : Flickr)

ລາຍງານ ປະຈຳປີ ຂອງກະຊວງແຮງງານ ອາເມຣິກາ ບົ່ງວ່າ ເດັກ ບໍ່ພົ້ນກະສຽນອາຍຸ ຈຳນວນປະມານ ໒໐໐ ລ້ານຄົນ ໃນ ໕໘ ປະເທດ ຖືກໄຊ້ແຮງງານ ອັນມີທັງແບບຂາຍ ແຮງງານ ຣາຄາຖືກ ແລະທັງແບບບັງຄັບ ແຮງງານ ເໝືອນຂ້າທາດ. ໃນຈຳນວນ ໕໘ ປະເທດນັ້ນ ກໍມີ ປະເທດ ອັຟການີສະຖານ, ເກົາຫຼີເໜືອ, ອີນເດັຽ, ອັກຊັງຕີນ ຫຼືຣັຖເຊັຽ ດັ່ງນີ້ເປັນຕົ້ນ. ການໄຊ້ແຮງງານ ແມ່ນນັບແຕ່ ຫັດທະກັມ ຜລິດສິນຄ້າ ຈົນຮອດ ການຄ້າປະເວນີ້.

ເດັກນ້ອຍເຮັດວຽກ ປັ້ນດີນກີ່ ທີ່ ປະເທດອີນເດັຽ
(ພາບ : Flickr)

ລາຍງານ ປະຈຳປີ ຂອງກະຊວງ ແຮງງານ ອາເມຣິກາ ທີ່ເຜີຍແຜ່ ໃນສັບປະດານີ້ນັ້ນ ຍັງໄດ້ແນບນຳ ບັນຊີສີນຄ້າ ທີ່ຜລິດຈາກ ແຮງງານ ເດັກ ວ່າມີ ໑໒໒ ຢ່າງດ້ວຍກັນ. ສ່ວນສະຖານທີ່ ທີ່ໄຊ້ແຮງງານ ເດັກ ນັ້ນ ນຳໜ້າກໍແມ່ນ ຕາມສວນຝ້າຍ, ສວນອ້ອຍ, ສວນປູກຢາສູບ, ສວນກາເຟ, ຕາມໄຮ່ນາ ຫຼືສວນປູກ ໝາກກາກາໂອ໋ ດັ່ງນີ້ເປັນຕົ້ນ. ຕໍ່ມາ ອັນດັບສອງ ເດັກຈະຖືກ ໄຊ້ແຮງງານ ໃນຂແນງຫັທະກັມ ເຊັ່ນຕາມ ໂຮງງານຫຍິບເສື້ອຜ້າ, ໂຮງງານຕໍ່າພົມປູພື້ນ ຫຼືໂຮງງານຫຍິບເກີບກິລາ. ອັນດັບສາມ ເດັກຖືກໄຊ້ແຮງງານ ຕາມບໍ່ຂຸດຄົ້ນຕ່າງໆ ເຊັ່ນ ຕາມບໍ່ຂຸດ ຖ່ານຫີນ, ບໍ່ຂຸດຄຳ ແລະບໍ່ຂຸດເພັດນີນຈີນດາ ທີ່ຕ້ອງການໄຊ້ ພະນັກງານ ໂຕນ້ອຍໆ ສະດວກ ໃນການຂຸດຄົ້ນນັ້ນ.
"ສະນັ້ນ ອາຫານບາງຢ່າງ ທີ່ເຮົາບໍຣິໂພກ ປະຈຳວັນ, ເຄື່ອງເອ້ເງີນ ເອ້ຄຳ ທີ່ເຮົາຖື ຫຼືເຄື່ອງໄຊ້ຂອງສອຍ ປະຈຳວັນ ປະເພດຢາງ ປລາສຕິກ ແມ່ນຈາກຝີມື ຂອງເດັກ ທີ່ຢູ່ໃນໄວ ທີ່ຄວນຮໍ່າຮຽນນັ້ນເອງ". ລາຍງານ ປະຈຳປີ ຂອງກະຊວງແຮງງານ ອາເມຣິກາ ໄດ້ວິຈານ.

ເດັກນ້ອຍເຮັດວຽກ ເກັບດອກຝ້າຍ ທີ່ ອາຟຣິກກາ (ພາບ : Flickr)

ນອກຈາກການໄຊ້ແຮງງານ ແບບ ໄຊ້ຝີມືຫຼືງານໜັກແລ້ວ ລາຍງານ ປະຈຳປີ ຂອງກະຊວງ ແຮງງານ ອາເມຣິກາ ຍັງໄດ້ ບົ່ງອີກວ່າ ເດັກທີ່ ຖືກບັງຄັບ ເປັນສີນຄ້າ ປະເວນີ້ ກໍມີຫຼາຍ ເໝືອນກັນ. ເຊັ່ນ ໃນບັນດາ ປະເທດ ຣັຖເຊັຽ, ອຸຍແຄຣ໊ນ, ຟີລິບປີນ ແລະ ໄທຍ ເດັກຜູ່ຮັບເຄາະ ມັກຖືກໄຊ້ ບັງຄັບເປັນ ຕົວສແດງໜັງໂປ້ ຢ່າງໜ້າສົງສານ.
ລາຍງານ ປະຈຳປີ ຂອງກະຊວງແຮງງານ ອາເມຣິກາ ໄດ້ອ້າງອີງ ເພີ່ມວ່າ : "ອົງການແຮງງານສາກົນ ຄາດຄຳນວນວ່າ ມີປະຊາຄົມໂລກ ຜູ່ພົ້ນກະສຽນ ອາຍຸແລ້ວ ບໍ່ຕໍ່າກວ່າ ໑໒ ລ້ານຄົນ ທີ່ເຮັດວຽກງານ ຢ່າງບໍ່ເຕັມໃຈ ຫຼືຖືກບັງຄັບ ເຖີງຂັ້ນ ຂ້ອຍຂ້າ ທາດ. ສ່ວນເດັກນ້ອຍ ທີ່ ເຮັດວຽກ ບໍ່ວ່າຈະເຮັດ ເພື່ອລ້ຽງຊີບເອງ ຫຼືຖືກບັງຄັບນັ້ນ ຄຳນວນ ໄດ້ວ່າ ມີບໍ່ຕໍ່າກວ່າ ໒໐໐ ລ້ານຄົນ ໃນທົ່ວໂລກ". ກະຊວງແຮງງານ ອາເມຣິກາ ໄດ້ວິພາກວິຈານ ນຳພ້ອມອີກວ່າ ແມ່ນຍ້ອນວິກິດການ ເສຖກິດ ປັດຈຸບັນ ທີ່ເປັນສາເຫດ ອີກອັນໜື່ງ ທີ່ເຮັດໃຫ້ ການບັງຄັບ ໄຊ້ແຮງງານ ທະວີຄູນຂື້ນ ຊື່ງຜູ່ຢູ່ ໃນສະຖານະພາບ ເປາະບາງ ງ່າຍ ແລະສະດວກ ໃນການສວຍໄຊ້ບັງຄັບ ກໍແມ່ນໄດ້ແກ່ ເດັກ ແລະ ແມ່ຍີງນັ້ນເອງ.

ເດັກນ້ອຍເຮັດວຽກ ຄົ້ນຂີ້ເຫຍື້ອ ຊອກຫາຂອງ ພໍທີ່ຈະນຳໄປໄຊ້ ຫຼືຂາຍໄດ້ ທີ່ ເບຣ່ຊີນລ໌ (ພາບ : Flickr)

ທົບທວນວ່າ ເປົ້າໝາຍ ຂອງການ ຄົ້ນຄົ້ວລາຍງານ ຂໍ້ມູນ ຂອງກະຊວງ ແຮງງານ ອາເມຣິກາ ດັ່ງກ່າວ ແມ່ນເພື່ອປຸກຣະດົມຫຼື ໃຫ້ຂໍ້ຄິດ ແກ່ຝຸງຊົນ ຜູ່ອຸປໂພກ ແລະບໍຣິໂພກ.
ໃນບົດຄຳນຳ ຂອງລາຍງານ ປະຈຳປີ ຂອງກະຊວງແຮງງານ ອາເມຣິກາ ໄດ້ຊີ້ແຈງ ໃນຕອນໜື່ງ ວ່າ : "ຜູ່ອຸປໂພກ ແລະບໍຣິໂພກ ຈະຕ້ອງຄິດ ຢ່າງຖີ່ຖ້ວນ ຫຼືອາດບໍ່ຊີ້ ສີນຄ້າ ຊ້ຳຖ້າຫາກ ພວກເຂົາເຈົ້າ ຊາບວ່າ ສີນຄ້ານັ້ນໆ ຖືກຜລິດ ຈາກການບັງຄັບແຮງງານ ຫຼືຈາກ ອົ້ງມືນ້ອຍໆ ຂອງເດັກໄຮ້ດຽງສາ".