ຂເມນ

"ຂ້າ ຫຼື ຖືກຂ້າ" ດຸດ ບໍ່ມີທາງເລືອກ

ໂດຍ ບັນດານ ສີສຸນທອນ B. Sisounthone

ບົດຄວາມນີ້ເຜີຍແຜ່ເມື່ອວັນທີ 26/11/2009 ແກ້ໄຂໃຫມ່ຫລ້າສຸດເມື່ອວັນທີ 26/11/2009 14:10 TU

ດຸດ ຫຼື ແກ່ງເກັກອີວ
Reuters

ກ່ຽວກັບຄະດີ ທຳຮ້າຍມະນຸດ ໃນລະບອບຂເມນແດງ, ທະນາຍຄວາມ ຂອງຈຳເລີຍ ພະຍາຍາມປ້ອງກັນວ່າ "ຂ້າ ຫຼື ຖືກຂ້າ" ດຸດ ບໍ່ມີທາງເລືອກ ຫລັງຈາກ ອາຍາການສານ ໄດ້ກ່າວໂທດ ຈຳຄຸກ 40 ປີ

ຫລັງຈາກ ອາຍາການສານ ຍຸຕິທັມພິເສດ ຫຼືວ່າ ຝ່າຍໂຈດ ໄດ້ກ່າວ ໂທດ ໃສ່ ສະຫາຍ ດຸດ ຫຼື ແກ່ງ ເກັກອີວ ໃຫ້ຈຳຄຸກ 40 ປີ ມື້ວານນີ້ ໃນຖານທຳຮ້າຍມະນຸດຊາດ ໃນລະບອບ ຂເມນແດງ ໃນຊຸມປີ 1975-1979 ນັ້ນ.

ມື້ນີ້ ທະນາຍຄວາມ ຂອງຝ່າຍຈຳເລີຍ ສະຫາຍ ດຸດ ຫົວໜ້າຄຸກ ມໍຣະ ນະ ຕູນສເລັ່ງ, ຄື ຝຣັ່ງຊົ່ວ ຣູ່ ໄດ້ປ້ອງກັນຈຳເລີຍວ່າ "ດຸດ ບໍ່ມີທາງ ເລືອກ ເພາະຜູ່ກ່ຽວ ຢູ່ໃນກຳມື ຂອງພັກໂທນ ແລະ ຢູ່ໃນເຫດ ການນັ້ນ ຜູ່ກ່ຽວຕ້ອງ ປະຕິບັດ ຄືກັນກັບ ເຄື່ອງຈັກ ຖືກບັງຄັບ.  ສນັ້ນ ເຂົາຕ້ອງ ເລືອກ "ຂ້າ ຫຼື ຖືກຂ້າ" ເທົ່ານັ້ນ.

 

ທະນາຍຂອງໂຈດ ຍັງກ່າວຕໍ່ໄປວ່າ ບັນດາ ໄອຍາການສານ ໄດ້ພາດ ຕໍ່ເຫດການ ໃນປະວັດສາດ ໂດຍກ່າວ ໃຫ້ສານລົງໂທດ ຈຳເລີຍຈຳຄຸກ 40 ປີ ໂດຍຍັງບໍ່ທັນໄດ້ຮັບຟັງ ຄຳສາຣະພາບຂອງເຂົາເທື່ອ ແລະ ວ່າ ຖ້າ ບໍ່ມີ ດຸດ ຄະດີຄາຕະກັມ ມະນຸດຊາດນີ້ ອາຈະບໍ່ສາມາດ ດຳເນີນ ໄດ້.

 

ສນັ້ນ ທະນາຍ ຂອງໂຈດ ຈຶ່ງຂໍຮ້ອງວ່າ 40 ປີ ນັ້ນເປັນ ໂທດໜັກເກີນ ໄປ ສຳຫລັບ ດຸດ ທີ່ມີ ອາຍຸ 67 ປີແລ້ວ.

 

ດຸດ ຫຼື ຊື່ແທ້ແມ່ນ ແກ່ງເກັກອີວ ຖືກແຕ່ງຕັ້ງເປັນ ຫົວໜ້າຄຸກ ຕູນ ສເລັ່ງ ໃນລະບອບຂເມນແດງ, ຜູ່ກ່ຽວ ເປັນຜູ່ ສັ່ງເປັນ ສັ່ງຕາຍ ແລະ ສັ່ງໃຫ້ທໍຣະມານມະນຸດ ໄດ້ທຸກເວລາ, ໃນ ຊຸມປີ 1975-79 ນັ້ນ ມີຄົນ ຢູ່ໃນຄຸກ ມໍຣະນະ ນັ້ນ ຖືກສັງຫານ ປະມານ 15.000 ຄົນ.

 

ຫລັງຈາກ ການໄຕສວນຄະດີ ສີ້ນສຸດລົງແລ້ວ, ຄນະຂຸນສານ ຍຸຕິທັມ ພິເສດ ຈະຕັດສິນ ພິພາກສາ ຄະດີ ວ່າ ດຸດ ຜູ່ເປັນຈຳເລີຍນັ້ນ ໃນ ເດືອນ ມິນາ ປີ 2010 ໜ້ານີ້ ຈະຖືກ ຈຳຄຸກ 40 ປີ ເໝືອນດັ່ງ ອາຍາ ການສານ ໄດ້ກ່າວໂທດໃສ່ນັ້ນ ຫຼືບໍ່.

 

ດຸດ ອາຈະຖືກ ຈຳຄຸກ ຕລອດຊີວິດ ເພາະ ທີ່ຂເມນ ບໍ່ມີໂທດ ປະຫານ ຊີວີດ.

ຫລັງຈາກ ຄະດີ ດຸດ ແລ້ວ, ຜູ່ຖືກກ່າວຫາຄວາມ ໃນລະບອບຂເມນ ແດງ ຍັງມີຫົວໜ້າສຳຄັນ ອີກ 4 ຄົນ ຈະຖືກໄຕສວນຄະດີ ຄື ນວນ ເຈັ່ຽ, ຂຽວ ສຳພັນ, ອ່ຽງ ສາຣີ ແລະ ພັນລະຍາ ຂອງ ອ່ຽງ ສາຣີ ອີກ.

 

ໃນລະບອບ ຂເມນແດງນຳໂດຍ ໂປນປົດນັ້ນ ປະຊາຊົນຂເມນ ໄດ້ຖືກ ສັງຫານ ປະມານ 1 ລ້ານ 7 ແສນຄົນ.