ກອງປະຊຸມ G7

ວິກິດການ ການເງີນ

ໂດຍ ບັນດານ ສີສຸນທອນ B. Sisounthone

ບົດຄວາມນີ້ເຜີຍແຜ່ເມື່ອວັນທີ 10/10/2008 ແກ້ໄຂໃຫມ່ຫລ້າສຸດເມື່ອວັນທີ 10/10/2008 15:30 TU

ຕລາດຫຸ້ນ ຕົກຕໍ່າ ອີກໃນມື້ນີ້
reuters

ມື້ອື່ນເຊົ້າວັນເສົາ, ປທນບດ ຈ.ວ. ບຸດສ໌ ຈະຕ້ອນຮັບທັງໝົດ 20 ປະເທດ ທີ່ມີ ອຸສຫະກັມກ້າວໜ້າ ພ້ອມດ້ວຍບັນດາຫົວໜ້າອົງການ ກອງທຶນສາກົນ ແລະ ທະນາຄານ ໂລກ ຄື ທ່ານ Dominique Strauss-Kahn ແລະທ່ານ Robert Zoellick.

ໃນຕອນບ່າຍມື້ນີ້, ທີ່ ວໍຊິ່ງຕັນ, ບັນດາ ລັຖະມົນຕຣີການຄັງ ພ້ອມດ້ວຍ ຫົວໜ້າທະນາຄານກາງ ຂອງ 7 ປະເທດ ມະຫາອຳນາດ ອຸສຫະກັມ ຈະເຂົ້າປະຊຸມກັນ ເພື່ອສົນທະນາ ບັນຫາເສຖກິດ ໃນໂລກ.

 

ແລະ ມື້ອື່ນເຊົ້າວັນເສົາ, ປະທານາທິບໍ ຈ. ວ. ບຸດສ໌ ຈະຕ້ອນຮັບ ທັງ ໝົດ 20 ປະເທດ ທີ່ມີ ອຸສຫະກັມ ກ້າວໜ້າ ພ້ອມດ້ວຍ ບັນດາ ຫົວ ໜ້າ ອົງການ ກອງທຶນສາກົນ ແລະ ທະນາຄານໂລກ ຄື ທ່ານ Dominique Strauss-Kahn ແລະທ່ານ Robert Zoellick.

 

ຈຸດປະສົງ ແມ່ນຊອກຫາວິທີ ປະສານງານກັນ ເພື່ອປະເຊີນໜ້າຕໍ່ ວິກິດການ ໂດຍເໜັ້ນໜັກໄສ່ ບັນຫາ ຄວາມຕົກຕໍ່າ ໃນຕລາດຫຸ້ນ ແລະ ແກ້ໄຂບັນຫາ ການຂາດເຂີນ ເງີນທຶນໃນໂລກ.

 

ລັຖບານ ອາເມຣິກາ ຈະທຸ້ມເທ ທຸກວິທີທາງ ເພື່ອລະງັບ ວິກິດການ ຊຶ່ງປັດຈຸບັນນີ້ ກຳລັງສຶກສາ ການຈະໂອນຊື້ ທະນາຄານເອກະຊົນ ທີ່ ມີບັນຫາ ໃຫ້ມາເປັນ ລັຖວິສາຫະກິດ ເໝືອນດັ່ງ ອັງກິດ ທີ່ໄດ້ປະກາດ ຊື້ຫຸ້ນ ບາງສ່ວນ ຂອງ 8 ທະນາຄານ ໃນມື້ກ່ອນນີ້ໄປແລ້ວ.

 

ເຖີງແມ່ນວ່າ ລັຖະບານ ສຳຄັນຕ່າງໆ ໃນໂລກ ໄດ້ ເອົາມາຕການ ທຸ້ມເງີນ ອອກຊ່ວຍ ຢ່າງຂະນານໃຫຍ່ ມາໄດ້ນຶ່ງ ອາທິດ ແລ້ວກໍດີ, ມາເຖີງມື້ນີ້ ຕລາດຫຸ້ນ ທົ່ວໂລກ ຍັງມືດມົນ ຕົກຕໍ່າ ຢ່າງໜັກໜ່ວງ ອີກຢູ່.  

 

Reuters

ເປັນຫຍັງ ຕລາດຫຸ້ນໃນໂລກ ຍັງມືດມົນ ແລະ ຍັງຕົກຕໍ່າ ຢ່າງບໍ່ຢຸດຢັ້ງ, ທັ້ງໆທີ່ ລັຖະບານຕ່າງໆ ກໍໄດ້ອະນຸມັດເງີນ ອອກຊ່ວຍແລ້ວ ?

 

ແມ່ນ ລັຖະບານຕ່າງໆ ກໍໄດ້ອະນຸມັດເງີນອອກຊ່ວຍ ຢ່າງມະຫາສານ ແລ້ວ ແລະ ທະນາຄານກາງ ກໍໄດ້ພາກັນລຸດ ອັດຕຣາ ດອກເບັ້ຽລົງ ຕລອດເຖີງ  ການຄ້ຳປະກັນ ເງີນຝາກ ແລະ ກຳລັງ ພະຍາຍາມ ເຮັດທຸກສິ່ງ ທຸກຢ່າງ ເພື່ອ ຈະຟື້ນຟູ ເສຖກິດໂລກ.

 

ແຕ່ຄຳຖາມນັ້ນ ມີຢູ່ວ່າ ເປັນຫຍັງ ກົງຈັກເສຖກິດຍັງບໍ່ເດີນ, ເໝືອນກັບ ລົດ ທີ່ບໍ່ມີນ້ຳມັນ, ແຕ່ ໃສ່ນ້ຳມັນໃຫ້ແລ້ວ ກໍຍັງບໍ່ເດີນ. ດັ່ງດຽວກັບຕລາດຫຸ້ນໃນໂລກ ໃນປັດຈຸບັນນີ້ ຍັງອືດອາດ ຕົກຕໍ່ອີກຢູ່ ໂດຍ ຂາດຄວາມກະຕືລືລົ້ນ ໃນການລົງທືນ.

 

ອັນຈະສົ່ງຜົນສະທ້ອນ ໃຫ້ເກີດ ວິກິດການເສຖກິດ ຊັກຊ້າ ແລະ ອ່ອນ ສະມັຕະພາບລົງ ແລະຈະເຮັດໃຫ້ເກີດ ບັນຫາສັງຄົມ ເຊັ່ນ ການວ່າງ ງານ, ຄ່າຄອງຊີບແພງ ດັ່ງນີ້ເປັນຕົ້ນ.

ຕໍ່ບັນຫານີ້, ຄນະຜູ່ນຳທົ່ວໂລກ ກຳລັງຕົກຢູ່ໃນຄວາມກັງວົນ ພະຍາຍາມ ຊ່ວຍກັນຊອກຫາທາງອອກ.

 

ເປັນດ້ວຍເຫດໃດ ? ດັສນີ ຕລາດຫຸ້ນຍັງ ຕົກໆໆ ຕື່ມອີກຢູ່.

 

ທັງນີ້, ເປັນເພາະວ່າ, ນັກລົງທຶນ ຍັງລັ່ງເລໃຈ ຍ້ອນຍັງຂາດຄວາມໃວ້ ວາງໃຈ ຢູ່.

ທຸກຄົນຍັງ ລໍເບີ່ງ ແລະ ຍັງຈະພິຈາຣະນາ ໃຫ້ຖີ່ຖ້ວນ ກ່ອນຈະລົງທືນ, ເພາະຄາດວ່າ ຄວາມຕົກຕໍ່າ ຊັກຊ້າ ຂອງເສຖກິດ ອາຈະມີຂື້ນ ໃນຂ້າງ ໜ້ານີ້, ສະນັ້ນ ຈຶ່ງໄດ້ໂຈະ ການລົງທຶນໄວ້ກ່ອນ.

 

ດັ່ງດຽວກັນກັບ ລະວ່າງທະນາຄານ ຫາ ທະນາຄານ, ບາງທະນາຄານ ມີເງີນສົດ ຢ່າງລົ້ນເຫຼືອ ແຕ່ບໍ່ໃຫ້ ທະນາຄານ ທີ່ຂາດເງີນນັ້ນຢືມ ເພາະ ບໍ່ເຊື່ອໝັ້ນວ່າ ຈະໄດ້ຄືນ ຫຼືບໍ່.

 

ສະນັ້ນ ສະພາບ ວິກິດການ ຂອງຕລາດຫຸ້ນ ໃນປັດຈຸບັນນີ້, ຈະຕ້ອງ ແມ່ນ ພາຣະໜ້າທີ່ ຂອງລັຖະບານ ຕ່າງໆ ຈະຕ້ອງແກ້ໄຂ, ແລະຕ້ອງ ເຮັດທຸກວິທີທາງ ເພື່ອໃຫ້ໄດ້ ຄວາມໃວ້ໃຈ ໃນວົງການລົງທືນ ກັບຄືນ ມາ. ເຊັ່ນ ອັງກິດ ປະກາດຊື້ທະນາຄານ ເອກະຊົນ, ອາເມຣິກາ ກຳລັງ ສຶກສາ ເຣື້ອງນີ້ຢູ່ຄືກັນ. ທັງນີ້ ກໍເພາະວ່າ ວິກິດການ ຂຸ້ນຂ້ຽວ. ຢ່າລືມວ່າ ການທຸ້ມເງີນ ອອກຊ່ວຍນັ້ນ ແມ່ນການຄ້ຳປະກັນ ເພື່ອໃຫ້ມີ ຄວາມໃວ້ວາງໃຈ.

 

ເຖີງແມ່ນ ບັນດາລັຖບານ ຈະທຸ້ມເງີນອອກ ແລະ ລຸດອັດຕຣາ ດອກ ຫຼືຄ້ຳປະກັນ  ເງີນຝາກ ຫຼື ເງີນອອມສິນ ຕ່າງໆນັ້ນ ກໍຍັງພຽງພໍ ທີ່ ຈະສ້າງຄວາມໃວ້ເນື້ອເຊື່ອໃຈ ໃນວົງການລົງທືນ.

 

ເໝືອນດັ່ງ ທ່ານ Dominique Strauss-Kahn ຫົວໜ້າ ອົງການ ກອງທຶນສາກົນ ໄດ້ອະທິບາຍວ່າ ກ່ອນຈະເກີດມີຄວາມໃວ້ວາງໃຈນີ້, ລະບົບທະນາຄານ ຈະຕ້ອງຖືກປະຕິຮູບໃໝ່ ໃຫ້ເຖີງກົກ ເຖີງຮາກ, ຄືຕ້ອງອອກລະບຽບການໃໝ່ ຢ່າງຫັດກຸມ ແລະໃຫ້ມີຄວາມ ໂປ່ງສັຍ ໃນທຸກລະດັບ, ແລະ ເຣື້ອງອະພິສິດ ພິເສດເກີນໄປ ຂອງຫົວໜ້າ ທະນາຄານນັ້ນ ກໍຄວນຕັດຜ່ອນຍ່ອນລົງ ແລະ ຕ້ອງໃຫ້ມີການລົງໂທດ ຕໍ່ຫົວໜ້າ ທະນາຄານ ທີ່ທຳຜິດ ນຳອີກດ້ວຍ.

 

ຖ້າບໍ່ເຄັ່ງຄັດນັ້ນ ຈະທຸ້ມເທ ເງີນອອກຊ່ວຍເທົ່າໃດ ກໍເໝືອນກັບ ຖອກ ນ້ຳລົງ ໃນທະເລຊາຍ, ແລະບັນຫາ ກໍຈະຍິ່ງໜັກໜ້າ ຮ້າຍແຮງຂື້ນ ກວ່າເກົ່າ.

 

ໃນເມື່ອ ສະພາບການ ໃນຕລາດຫຸ້ນ ຍັງຊຳເຮື້ອ ຢູ່ໃນມື້ນີ້  ແນ່ນອນ ກອງປະຊຸມ G7 ຈະຕ້ອງຊອກຫາທາງອອກທີ່ເໝາະສົມ, ເພາະບັນຫາ ນີ້ ແຕະຕ້ອງເສຖະກິດ ທົ່ວໂລກ.

 

ເພາະສະນັ້ນ, ຍີ່ປຸ່ນ ຈຶ່ງໄດ້ໄດ້ ສະເນີຊ່ວຍ ເງີນແກ່ ກອງທຶນສາກົນ ເພື່ອນຳເອົາໄປຊ່ວຍ ປະເທດອື່ນໆ ທີ່ບໍ່ສາມາດຄ້ຳປະກັນ ການເງີນໃນ ປະເທດຕົນເອງໄດ້.

 

ຍີ່ປຸ່ນຍັງມີກອງທຶນ ສຳຮອງ 995 ພັນລ້ານ ໂດລາ, ສ່ວນ ສປ ຈີນ ນັ້ນ ຍັງບໍ່ທັນມີວິແວວ ວ່າຈະຊ່ວຍໃຜເທື່ອ ແຕ່ ຈີນ ນັ້ນ ມີ ທຶນ ສຳຮອງໃວ້ ຫລາຍ ກວ່າໝູ່ 2000 ພັນລ້ານ ໂດລາ.

 

ຖ້າກອງປະຊຸ່ມ G7 ຄັ້ງນີ້ ບໍ່ມີ ປະສິດທິຜົນ, ຍີ່ປຸ່ນ ມີໂຄງການ ຈະ ຮຽກ ກອງປະຊຸມ ສະມັຍວິສາມັນ ຂອງ ກຸ່ມ G8 ໃນທ້າຍປີນີ້, ໂດຍ ແມ່ນ ຣັດເຊັຍ ຈະຖືກເຊີນເຂົ້າຮ່ວມນຳ.