ປະເທດໄທຍ

ຄວາມບອບບາງ ຂອງຣັຖບານຊຸດໃໝ່

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 15/12/2008 ແກ້ໄຂໃຫມ່ຫລ້າສຸດເມື່ອວັນທີ 15/12/2008 15:50 TU

ທ່ານອະພິສິດ ເວຊຊາຊີວະ ໄດ້ຮັບຄວາມ ໄວ້ວາງໃຈຈາກສະພາ ດ້ວຍຄະແນນສຽງ 235 ຕໍ່ 198 ໃຫ້ດຳຣົງຕຳແໜ່ງນາຍົກ ຣ ມຕ ໄທຍ ຄົນໃໝ່ (ພາບ: Reuters)

ຖືໄດ້ວ່າການທີ່ ທ່ານອະພິສິດ ເວຊຊາຊີ
ວະ ໄດ້ຮັບຄວາມໄວ້ວາງໃຈຈາກສະພາ
ໃຫ້ດຳຣົງຕຳແໜ່ງ ນາຍົກ ຣມຕ ປະ
ກອບຣັຖບານຊຸດໃໝ່ ໂດຍມີສຽງສນັບ
ສນຸນ 235 ຕໍ່ 198 ນັ້ນເປັນການເຮັດ
ໃຫ້ຄວາມສັບສົນວຸ້ນວາຍ ຄວາມປັ່ນປ່ວນ
ທາງດ້ານການເມືອງໃນປະເທດໄທຍທີ່
ດຳເນີນຢ່າງລຽນຕິດມາເປັນເວລາເຖິງ
10 ເດືອນນັ້ນ ໄດ້ສິ້ນສຸດລົງ ຢ່າງນ້ອຍ
ທີ່ສຸດກໍເປັນການຊົ່ວຄາວ

ແຕ່ບໍ່ໄດ້ໝາຍຄວາມວ່າຈະເປັນການຮັບປະກັນການມີສະເຖັຽຣະພາບທາງດ້ານ
ການເມືອງໄດ້ຢ່າງໝັ້ນ ຄົງຖາວອນ ທັງນີ້ອັນເນື່ອງມາຈາກປະເທດໄທຍໄດ້
ແບ່ງແຍກກັນອອກເປັນສອງຝ່າຍເຫັນໄດ້ຢ່າງຊັດ ແຈ້ງທີ່ສຸດ ຝ່າຍໜຶ່ງ "ເສື້ອ
ເຫລືອງ" ນິຍົມກະສັດແລະຕໍ່ຕ້ານທັກສິນ ແລະ ອີກຝ່າຍໜຶ່ງ "ເສື້ອແດງ" ນິ
ຍົມອດີດນາຍົກ ຣມຕ ຊຶ່ງໃນຕອນນີ້ລີ້ໄພການເມືອງໃນຕ່າງປະເທດ

ການປ່ຽນຄ້າຍ
ທີ່ພວກເຮົາໃຫ້ການວິເຄາະຄືແນວນີ້ ປະການທີໜຶ່ງ ເພາະໃນລະບົບການເມືອງຂອງໄທຍ
"ການປ່ຽນຄ້າຍ" ເປັນປະເພນີການເມືອງທີ່ມີການປະຕິບັດກັນຢ່າງກວ້າງຂວາງ ໂດຍມີ
ຜົນປໂຍດເປັນຕົວກຳໜົດ

ການທີ່ ທ່ານອະພິສິດ ເວຊຊາຊີວະ ສາມາດໄດ້ຮັບຄວາມໄວ້ວາງໃຈຈາກສະພາໃນເທື່ອ
ນີ້ ກໍແມ່ນ "ການປ່ຽນຄ້າຍ" ເປັນປັດໃຈສຳຄັນ ໂດຍ ສສ ຈຳນວນເຖິງ 67 ທ່ານ ທີ່ເຄີຍ
ຮ່ວມສນັບສນຸນຣັຖບານນິຍົມທັກສິນທີ່ຕົກໄປແລ້ວນັ້ນ ໄດ້ປິ້ນເສື້ອຫັນມາໃຫ້ການສນັບສນຸນ
ພັກປະຊາທິປັດຝ່າຍຄ້ານ ຈົນຫົວໜ້າພັກໄດ້ກາຍມາເປັນນາຍົກ ຣມຕ ຄົນໃໝ່ ທີ່ມີສຽງ
ສະໜັບສະໜຸນໃນສະພາເກີນກວ່າສຽງສ່ວນຫລາຍເດັດຂາດພຽງແຕ່ 7 ສຽງເທົ່ານັ້ນ
ໃນຈຳນວນ ສສ ທັງໝົດ 447 ທ່ານໃນສະພາ

ຖືໄດ້ວ່າເປັນສຽງສນັບສນຸນທີ່ "ບອບບາງ" ໃນກໍຣະນີເກີດການຂັດແຍ່ງພາຍໃນແລະມີ
ການຖອນຕົວຂອງພັກຮ່ວມຣັຖບານປະສົມ ຣັຖບານຂອງ ທ່ານອະພິສິດ ເວຊຊາຊີວະ ກໍ
ອາດຕົກໃນຍາມໃດກໍໄດ້

ຊ່ອງວ່າງລະຫວ່າງຄົນໃນເມືອງອລະຊົນນະບົດ

ປະການທີ່ສອງ ນາຍົກ ຣມຕ ຄົນໃໝ່ ຈິງຢູ່ເປັນນັກການເມືອງໜຸ່ມ ອາຍຸພຽງ 44 ປີ ມີ
ແນວຄວາມຄິດທັນສະໄໝ ໄດ້ຮັບການສຶກສາທີ່ມີຄຸນນະພາບຈາກມະຫາວິທຍາໄລນາມ
ກະເດື່ອງຣະດັບໂລກທີ່ປະ ເທດອັງກິດ ຄືມະຫາວິທຍາໄລ "Oxford" ຈຶ່ງເປັນທີ່ນິຍົມ
ຊົມຊອບຂອງບັນດາປັນຍາຊົນ ຂອງວົງການທຸຣະກິດການຄ້າໃນນະຄອນຫລວງ ໃນຫົວ
ເມືອງໃຫຍ່ ແລະ ໃນພາກໃຕ້ຂອງປະເທດ ແຕ່ສໄຕລ໌ ຂອງທ່ານ ທີ່ເປັນບຸກຄົນທີ່ມາ
ຈາກຄອບຄົວທີ່ມີຖານະ ຊໍ້າພັດເຂົ້າກັນຍາກກັບພົລເມືອງໃນຊົນນະບົດ ຊຶ່ງເປັນພົລ
ເມືອງສ່ວນໃຫຍ່ຂອງປະເທດ ແລະ ເປັນຖານຄະແນນທີ່ໜຽວແໜ້ນຂອງກຸ່ມນິຍົມ
ທ່ານທັກ ສິນ ຊິນນະວັດ

ກ່າວກັນວ່າ ທ່ານອະພິສິດ ເວຊຊາຊີວະ ຕະໜັກແກ່ໃຈເປັນຢ່າງດີເຖິງປັນຫາຂໍ້ນີ້ ແລະ
ໄດ້ໃຊ້ຄວາມພະຍາຍາມເຕັມທີ່ເພື່ອລົງພື້ນຖານໃຫ້ສາມາດເຂົ້າກັບ "ຄົນບ້ານນອກ"
ໃຫ້ໄດ້ ແຕ່ທ່ານກໍປະສົບກັບຄວາມລົ້ມແຫລວ

ນອກຈາກນີ້ ກຸ່ມຄົນ "ເສື້ອແດງ" ຊໍ້າພັດຍັງປະກາດຈະເດີນໜ້າສະແດງພະລັງຢູ່ຕໍ່ໄປ
ໂດຍຈະເຮັດທຸກວິທີທາງທີ່ສາມາດເຮັດໄດ້ເພື່ອຂັດຂວາງການປະຕິບັດງານຂອງຄະ
ນະຣັຖບານຊຸດໃໝ່

ເມື່ອສະຫລຸບຄວາມແລ້ວ ພວກເຮົາຍັງເບີ່ງບໍ່ເຫັນວ່າການທີ່ ທ່ານອະພິສິດ ເວຊຊາຊີ
ວະ ໄດ້ກາຍມາເປັນນາຍົກ ຣມຕ ຄົນໃໝ່ ຈະເຮັດໃຫ້ປະເທດໄທຍຫວນກັບຄືນສູ່ການມີ
ສະເຖັຽຣະພາບທາງດ້ານການ ເມືອງທີ່ໝັ້ນຄົງຖາວອນໄດ້ຄືແນວໃດ

ນອກຈາກນີ້ ການທີ່ປະເທດໄທຍໄດ້ຈົມດິ່ງລົງສູ່ວິກິດການທາງດ້ານການເມືອງນັບຕັ້ງ
ແຕ່ປີ 2006 ເປັນຕົ້ນມາ ກໍເປັນການຊີ້ໃຫ້ເຫັນວ່າ ລະບອບປະຊາທິປະໄຕໃນປະເທດ
ໄທຍຍັງບໍ່ໄດ້ຮັບການຍອມຮັບນັບຖືຈາກສັງຄົມເທົ່າທີ່ຄວນຈະເປັນ

ແຕ່ຢ່າງໃດ ກໍຕ້ອງຄອຍຕິດຕາມເບີ່ງກັນຕໍ່ໄປ ບາງທີ ນາຍົກ ຣມຕ ຄົນໃໝ່ຂອງໄທຍ
ອາດສາມາດພິກປິ້ນການວິເຄາະຂອງບັນດານັກສັງເກດການທັງຫລາຍກໍອາດເປັນ
ໄປໄດ້ ຖ້າວ່າເພີ່ນສາມາດເຮັດໄດ້ແນວນັ້ນແທ້ ກໍຈະຖືໄດ້ວ່າເພີ່ນເປັນນັກການເມືອງ
ທີ່ມີພອນສວັນເປັນເລີດ