ການລົດຜ່ອນ ອຸນຫະພູມ ຜິວໂລກ

ຍາກ ຖ້າປາສຈາກ ຈີນ ແລະ ອະເມຣິກາ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 24/07/2009 ແກ້ໄຂໃຫມ່ຫລ້າສຸດເມື່ອວັນທີ 24/07/2009 13:10 TU

ສປ ຈີນ ແລະ ສຫຣ ອະເມຣິກາ ເປັນສອງປະເທດມະຫາອຳນາດອຸດສາຫະກັມ ທີ່ປ່ອຍຄວັນພິດ CO2 ຫລາຍທີ່ສຸດ ໃນໂລກ (ພາບ: Fotolia)

ຄວາມພະຍາຍາມຂອງປະຊາຄົມໂລກໃນການລົດຜ່ອນອຸນຫະພູມຜິວໂລກ ຈະມີ
ໂອກາດປະສົບຜົນສໍາເຣັດໄດ້ຫລາຍຂຶ້ນ ຖ້າໄດ້ຮັບການຮ່ວມໄມ້ຮ່ວມມືຈາກ ສປ
ຈີນ ແລະ ສຫຣ ອະເມຣິກາ ເພາະມະຫາອໍານາດຂອງໂລກສອງປະເທດນີ້ ເປັນຕົ້ນຕໍປັນຫາສໍາຄັນກວ່າໝູ່

ເພາະສະນັ້ນການຢ້ຽມຢາມ ສປ ຈີນ ຂອງທ່ານ ບັນ ກີມູນ ເລຂາທິການໃຫຍ່ອົງການ
ສະຫະປະຊາຊາດ ຈຶ່ງແມ່ນການຢ້ຽມຢາມທີ່ມີຄວາມສຳຄັນຍິ່ງ ທັງນີ້ເພາະຖ້າປາສຈາກ
ການຮ່ວມໄມ້ຮ່ວມມືຂອງຈີນແລ້ວ ກໍຍ່ອມເປັນໄປໄດ້ຍາກທີ່ໂລກຈະປະສົບຜົນສຳເຣັດໄດ້
ຢ່າງສົມບູນແບບໃນການຊອກຫາສົນທິສັນຍາສບັບໃໝ່ ທີ່ແນໃສ່ການຕໍ່ສູ້ກັບການປ່ຽນ
ແປງຂອງດິນຟ້າອາກາດຂອງໂລກ

ທີ່ວ່າແນວນີ້ກໍເພາະ ໃນປັດຈຸບັນນີ້ ສປ ຈີນ ແລະ ສຫຣ ອະເມຣິກາ ໄດ້ກາຍມາເປັນ
ສອງປະເທດທີ່ ປ່ອຍແກ໊ສ CO2 ອອກສູ່ບັນຍາກາດຫລາຍທີ່ສຸດໃນໂລກ.....ແກ໊ສ
CO2 ຊຶ່ງກໍຄືຄວັນພິດຕ່າງໆ ທີ່ປ່ອຍອອກຈາກບັນດາໂຮງຈັກໂຮງງານນັ້ນເອງ ຄື
ສາເຫດຕົ້ນຕໍເຮັດໃຫ້ອຸນຫະພູມໂລກສູງຂຶ້ນ

ອັນທີ່ຈິງ ທັງ ສຫຣ ອະເມຣິກາ ແລະ ສປ ຈີນ ບໍ່ໄດ້ຮ່ວມລົງນາມໃນສົນທິສັນຍາກຽວ
ໂຕວ່າດ້ວຍການລົດຜ່ອນອຸນຫະພູມຜິວໂລກ ເພາະສະນັ້ນຕາມທິສດີແລ້ວສອງປະເທດ
ນີ້ຈຶ່ງບໍ່ມີພັນທະບັງຄັບວ່າ ຕ້ອງລົດຜ່ອນການປ່ອຍແກ໊ສ CO2 ເປັນຕົວເລກຄັກແນ່

ແຕ່ປັນຫາມີຢູ່ວ່າ ຕໍ່ໜ້າສຖານະການການປ່ຽນແປງຂອງອາກາດທີ່ເປັນໄປຢ່າງວ່ອງ
ໄວຢ່າງໃນທຸກວັນນີ້ ສອງປະເທດມະຫາອຳນາດໂລກ ສປ ຈີນ ແລະ ສຫຣ ອະເມຣິກາ
ຈຶ່ງບໍ່ມີທາງຫລີກລ້ຽງໄດ້ ຈຳເປັນຈະຕ້ອງໄດ້ເອົາຄວາມຮັບຜິດຊອບຮ່ວມກັນກັບປະຊາ
ຄົມໂລກ

ສຫຣ ອະເມຣິກາ ພາຍໃຕ້ການນຳຂອງ ບາຣັກ ໂອບາມາ ໄດ້ສແດງເຈຕນາຈະແຈ້ງ
ແລ້ວວ່າ ຈະປ່ຽນຈາກໜ້າມືເປັນຫລັງມືເມື່ອທຽບກັບ ສຫຣ ອະເມຣິກາ ສະໄໝ GWB
ເປັນຜູ້ນຳໃນຣະຍະແປດປີທີ່ຜ່ານມາ ທີ່ປະຕິເສດ "ສົນທິສັນຍາກຽວໂຕ" ເພາະເຫັນວ່າ
ບັງຄັບແຕ່ບັນດາປະເທດອຸດສາຫະກັມໃຫຍ່ ແຕ່ບໍ່ວາງກົດບັງຄັບຫຍັງຫລາຍຕໍ່ບັນດາ
ປະເທດດ້ອນພັທນາ ທີ່ເປັນຕົ້ນຕໍຂອງພາວະໂລກຮ້ອນຄືກັນ ເຊັ່ນການຕັດໄມ້ທຳລາຍປ່າ
ເປັນຕົ້ນ

ເມື່ອ ບາຣັກ ໂອບາມາ ຂຶ້ນຄອງຕຳແໜ່ງປະທານາທິບໍດີ ຈຶ່ງມີຄວາມເປັນໄປໄດ້ຢ່າງ
ສູງທີ່ ສຫຣ ອະເມຣິກາ ຈະເຂົ້າຮ່ວມໃນສົນທິສັນຍາສບັບໃໝ່ທີ່ຈະທົດແທນສົນທິສັນຍາ
ກຽວໂຕຕັ້ງແຕ່ປີ 2012 ເປັນຕົ້ນໄປ ແລະ ຮ່ວມໄມ້ຮ່ວມມືຢ່າງໃກ້ຊິດກັບ ສປ ຈີນ ແລະ
ອິນເດັຽ ເພື່ອລົດຜ່ອນອຸນຫະພູມຜິວໂລກ

ມື່ອທ້າຍເດືອນມິຖຸນາຜ່ານມາ ສະພາຕໍ່າອະເມຣິກັນກໍໄດ້ລົງມະຕິຮັບຮອງເອົາຮ່າງ
ກົດໝາຍທີ່ແນໃສ່ການລົດຜ່ອນການປ່ອຍແກ໊ສ CO2 ໃຫ້ໄດ້ 17% ຈາກນີ້ເຖິງປີ
2020 ເມື່ອທຽບກັບລະດັບຂອງປີ 2005

ພ້ອມດຽວກັນກໍເລັ່ງການພັທນາແຫລ່ງພລັງງານທີ່ສະອາດ ເຊັ່ນ Bio-Diesel, ພະລັງ
ງານແສງແດດ, ພລັງງານລົມ ແລະ ອື່ນໆ ເພື່ອໄປສູ່ເປົ້າໝາຍລົດຜ່ອນການປ່ອຍ
ແກ້ສ CO2 ໃຫ້ໄດ້ເຖິງ 85% ໃນປີ 2050

ແຕ່ເຖິງປານນັ້ນກໍຕາມ ທາງ ສປ ຈີນ ກໍຍັງເຫັນວ່າບໍ່ເປັນການພຽງພໍ ສຫຣ ອະເມຣິກາ
ຕ້ອງພະຍາຍາມຫລາຍກວ່ານັ້ນ ເພາະຖືວ່າເປັນຜູ້ເຮັດໃຫ້ໂລກເປິເປື້ອນຫລາຍທີ່ສຸດ
ຊຶ່ງກໍຄືຕົ້ນຕໍໃຫຍ່ທີ່ເຮັດໃຫ້ໂລກຮ້ອນນັ້ນເອງ

ກໍແມ່ນຍ້ອນສອງປະເທດຍັກໃຫຍ່ ຍັງບໍ່ສອດຄ່ອງກັນໃນຕົວເລກ ທ່ານບັນ ກີມູນ ຈຶ່ງວ່າ
ເດີນທາງມາ ສປ ຈີນ ໃນມື້ນີ້ ເພື່ອພະຍາຍາມຊອກຫາທາງໃຫ້ມີການສອດຄ່ອງກັນ
ລະຫວ່າງສອງຍັກໃຫຍ່ ຜູ້ປ່ອຍແກ໊ສ CO2 ຫລາຍທີ່ສຸດໃນໂລກ

ຢ່າງໃດກໍຕາມ ໃນຣະຍະຫລັງໆຜ່ານມານີ້ ສປ ຈີນ ກໍໄດ້ຕໍ່ສູ້ກັບປັນຫາສະພາບສິ່ງແວດ
ລ້ອມຂອງຕົນບໍ່ແມ່ນຂອງຄ່ອຍ ອັນເກີດຈາກການພັທນາອຸດສາຫະກັມຂນານໃຫຍ່
ຍ້ອນວ່າພລັງງານເຖິງ 70% ຂອງຈີນມາຈາກຖ່ານຫິນ ທີ່ຖືວ່າເປັນແຫລ່ງພລັງງານ
ທີ່ເປິເປື້ອນ ບໍ່ນ້ອຍໜ້າໄປຈາກນໍ້າມັນ

ກໍຍ້ອນສຳນຶກໃນໄພອັນຕຣາຍໃນຣະຍະຍາວນານ ສປ ຈີນ ມະຫາອຳນາດເສຖກິດໝາຍ
ເລກ 3 ຂອງໂລກ ຈຶ່ງເລີ້ມຫັນມາສຶກສາຫາແຫລ່ງພລັງງານທົດແທນ ພລັງງານທີ່
ສະອາດແລ້ວ ໃນຣະຍະຫລັງໆມານີ້ ໂດຍສະເພາະພລັງງານຈາກກັງຫັນລົມ ຈົນກາຍ
ມາເປັນປະເທດອັນດັບທີສີ່ຂອງໂລກທາງດ້ານນີ້

ປັດຈຸບັນ ສປ ຈີນ ຜລິດພລັງງານລົມໄດ້ 12 Gigawatts ແລະ ໝາຍໝັ້ນປັ້ນມືຈະເພີ້ມ
ໃຫ້ສູງຂຶ້ນ ເປັນ 30 Gigawatts ໃນປີ 2020 ກ່ອນທີ່ຈະບັນລຸເຖິງ 100 Gigawatts ໃນຂັ້ນຕໍ່ໄປ