ປະເທດໄທຍ

ການຂາດສະເຖັຽຣະພາບ ທີ່ຍັງຄົງແກ່ຍາວ

ໂດຍ ໄຊຊະນະ ທານາດາບຸຕຣ໌

ບົດຄວາມນີ້ເຜີຍແຜ່ເມື່ອວັນທີ 25/08/2009 ແກ້ໄຂໃຫມ່ຫລ້າສຸດເມື່ອວັນທີ 25/08/2009 13:07 TU

ເຈົ້າໜ້າທີ່ຕຳຣວດກຳລັງກວດສອບຊາກຣົດຍົນບັນທຸກລະເບີດ ທີ່ຖືກນຳໃຊ້ໃນການກໍ່ການຮ້າຍ ໃນມື້ນີ້ (ອັງຄານ 25 ສິງຫາ) ໃນໃຈກາງ ຂອງເມືອງ ນາຣາທິວາດ ພາກໃຕ້ ຂອງປະເທດ (ພາບ: Reuters)

ກຸ່ມຄົນເສື້ອແດງກກະກຽມການປະທ້ວງໃຫຍ່ ສ່ວນຢູ່ພາກໃຕ້ກໍມີການກໍ່ການຮ້າຍ
ດ້ວຍຣົດຍົນບັນທຸກລະເບີດ ມີຜູ້ໄດ້ຮັບບາດເຈັບຢ່າງນ້ອຍ 42 ຄົນ ຕາມລາຍ
ງານຂ່າວຫລ້າສຸດທີ່ພວກເຮົາໄດ້ຮັບ ເປັນການສແດງໃຫ້ເຫັນວ່າແມ່ນການສືບ
ຕໍ່ຂອງການປັ່ນປ່ວນ ແລະ ການຂາດສະເຖັຽຣະພາບທາງດ້ານການເມືອງ ທີ່
ຍືດເຍື້ອຍາວນານມາໄດ້ສີ່ຫ້າປີແລ້ວ

ພວກເຮົາມາເລີ້ມຕົ້ນພິຈາຣະນາປັນຫາຄວາມປັ່ນປ່ວນທາງດ້ານການເມືອງເສັຽກ່ອນ ກ່ອນ
ທີ່ຈະເວົ້າເຖິງປັນຫາຄວາມພະຍາພຍາມແຍກດິນດິນໂດຍຂບວນການຈັດຕັ້ງມຸສລິມໃນພາກ
ໃຕ້ຂອງປະເທດ

ເສື້ອແດງເຮັດແບບດຽວກັບເສື້ອເຫລືອງ

ການທີ່ກຸ່ມເສື້ອແດງປະກາດເຈດຕະນາຈະຊຸມນຸມປະທ້ວງໃຫຍ່ໃນມື້ອື່ນນີ້ເປັນຕົ້ນໄປ ໄປຈົນ
ເຖິງທ້າຍສັປດານີ້ ຫລືອາດແກ່ຍາວອອກໄປເທົ່າທີ່ຈະຍາວໄດ້ ແມ່ນມີເປົ້າໝາຍຈະກົດດັນ
ຕໍ່ຣັຖບານຂອງທ່ານ ນາຍົກ ຣມຕ ອະພິສິດ ເວຊຊາຊີວະ ເພື່ອໃຫ້ປະກາດຍຸບສະພາ
ແລະຈັດການເລືອກຕັ້ງໃໝ່ກ່ອນກຳໜົດ ຊຶ່ງກໍແມ່ນຂໍ້ຮຽກຮ້ອງອັນດຽວກັນທີ່ກຸ່ມຄົນເສື້ອ
ເຫລືອງຝ່າຍກົງກັນຂ້າມ ໄດ້ເຄີຍກະທຳມາແລ້ວຕໍ່ຣັຖບານທີ່ກຸ່ມຄົນເສື້ອແດງໃຫ້ການສນັບ
ສນຸນ

ຣັຖບານຫວັ່ນປະກາດຊໍ້າຮອຍເກົ່າ
ເມື່ອເບີ່ງຈາກການປະກາດພະຣາຊບັນຍັດຄວາມປອດໄພ ເພີ້ມອຳນາດໃຫ້ແກ່ເຈົ້າໜ້າທີ່
ຕຳຣວດແລະທະຫານໃນການຮັກສາຄວາມປອດໄພແລ້ວ ເຮົາກໍເຫັນໄດ້ແຈ້ງວ່າຣັຖບານມີ
ຄວາມຫວັ່ນເກງວ່າປວັດສາດຈະຊໍ້າຮອຍເກົ່າ

ກ່າວຄືກຸ່ມຄົນເສື້ອແດງ ອາດຈະເຮັດແບບດຽວກັບທີ່ກຸ່ມຄົນເສື້ອເຫລືອງເຄີຍກະທຳມາ
ແລ້ວເພື່ອຂັບໄລ່ຣັຖບານນິຍົມທັກສິນ ທີ່ມີທ່ານ ສມັກ ສຸນທໍຣະເວດ ແລະ ທ່ານສົມຊາຍ
ວົງສວັດ ເປັນນາຍົກ ຣມຕ

ນັ້ນກໍຄື ການເຂົ້າຍຶດທຳນຽບຣັຖບານ ແລະ ຍຶດສນາມບິນທັງສອງແຫ່ງຂອງນະຄອນ
ຫລວງບາງກອກ ຢ່າງຍືດເຍື້ອຍາວນານ ສ້າງຄວາມເສັຽຫາຍທາງດ້ານເສຖກິດ ແລະ
ພາບພົດຂອງປະເທດ ໃນສາຍຕາຂອງບັນດານັກທ່ອງທ່ຽວ

ທີ່ພວກເຮົາວ່າຣັຖບານຂອງທ່ານນາຍົກ ຣມຕ ອະພິສິດ ເວຊຊາຊີວະ ມີຄວາມຫວັ່ນເກງ
ແນວນັ້ນ ກໍເພາະເຫັນໄດ້ໃນການປະກາດພະຣາຊບັນຍັດຄວາມປອດໄພ ທີ່ເພີ້ມອຳນາດ
ໃຫ້ແກ່ເຈົ້າໜ້າທີ່ທະຫານ ໃຫ້ສາມາດອອກມາຊ່ວຍຕຳຣວດໄດ້ ເພື່ອປ້ອງກັນສຖານທີ່
ສຳຄັນທາງຣາຊການຕ່າງໆໃນນະຄອນ ຫລວງ ໃນນັ້ນຮວມທັງພະບໍຣົມມະຫາຣາຊວັງນຳ
ດ້ວຍ ພ້ອມທັງໃຫ້ອຳນາດໃນການກວດຄົ້ນຫາອາວຸດ ແລະ ປະກາດຫ້າມການສັນຈອນ

ການຊຸມນຸມຂອງກຸ່ມຄົນເສື້ອແດງທີ່ສນາມຫລວງ ໃນໃຈກາງນະຄອນຫລວງບາງກອກ ເມື່ອວັນທີ 17 ສິງຫາຜ່ານມາ ເພື່ອຍື່ນດີກາຕໍ່ກະສັດ ພູມີພົນ ອະດຸລຍະເດດ ໃຫ້ຊົງພະຣາຊທານອະໄພ ຍະໂທດແດ່ອດີດນາຍົກ ຣມຕ ທັກສິນ ຊິນນະວັດ (ພາບ: Reuters)

ເມື່ອອາທິດແລ້ວນີ້ ກຸ່ມປະທ້ວງນິຍົມທັກສິນກໍໄດ້ຈັດຊຸມນຸມມາແລ້ວທີ່ສນາມຫລວງ ໃກ້ໆ
ກັບພະບໍຣົມມະຫາຣາຊວັງ ເພື່ອຖວາຍດີກາຂໍໃຫ້ພະເຈົ້າຢູ່ຫົວຂອງໄທຍພະຣາຊທານນີ
ຣະໂທດກັມໃຫ້ແກ່ອດີດນາຍົກ ຣມຕ ທີ່ລີ້ໄພໃນຕ່າງປະເທດ

ເພາະສະນັ້ນຣັຖບານຈຶ່ງຫວັ່ນເກງວ່າກຸ່ມປະທ້ວງເສື້ອແດງຈະ ສ້າງຄວາມກົດດັນຕໍ່ພະບໍ
ຣົມມະຫາຣາຊວັງອີກ ຈຶ່ງໄດ້ມີຄຳສັ່ງໃຫ້ເຈົ້າໜ້າທີ່ວາງກຳລັງຮັກສາຄວາມປອດໄພ
ເຕັມທີ່ຕໍ່ສະຖາບັນສູງສຸດຂອງປະເທດ

ເມື່ອເດືອນເມສາຜ່ານມາ ກຸ່ມຄົນເສື້ອແດງກໍເຄີຍໄດ້ພະຍາຍາມປິດລ້ອມທຳນຽບຣັຖບານ
ມາແລ້ວແລະເຄີຍປະສົບຜົນສຳເຣັດໃນການຂັດຂວາງກອງປະຊຸມສຸດຍອດກຸ່ມປະເທດອາ
ຊ້ຽນ

ພວກແຍກດິນແດນ ໃນພາກໃຕ້ ສວຍໂອກາດ

ເບີ່ງຄືວ່າກຸ່ມຂບົດແຍກດິນແດນໃນພາກໃຕ້ຂອງປະເທດກໍໄດ້ສວຍໂອກາດຄວາມເຄັ່ງຕຶງ
ທາງດ້ານການເມືອງໃນບາງກອກນີ້ ປະຕິບັດການກໍ່ການຮ້າຍໃນໃຈກາງຕົວເມືອງນະຣາ
ທິວາດເຊົ້າມື້ນີ້ ມີຜູ້ໄດ້ບາດເຈັບເຖິງ 42 ຄົນເປັນຢ່າງນ້ອຍ ຕາມຂ່າວຫລ້າສຸດ

ສ່ວນຫລາຍແມ່ນບັນດາຂ້າຣາຊການທີ່ນັບຖືສາສນາພຸດ ໃນນັ້ນຮວມທັງຜູ້ວ່າຣາຊການ
ຈັງຫວັດຫລືເຈົ້າແຂວງນຳດ້ວຍ ຈຶ່ງຖືໄດ້ວ່າເປັນໜຶ່ງໃນຈຳນວນປະຕິບັດການກໍ່ການ
ຮ້າຍທີ່ຮ້າຍແຮງທີ່ສຸດ

ສິ່ງທີ່ໜ້າສັງເກດກໍແມ່ນ ການກໍ່ການຮ້າຍມີຂື້ນຫລັງຈາກການຈຳສິນອົດ ຣາມາດານ ໄດ້
ເລີ້ມຂຶ້ນພຽງບໍ່ເທົ່າໃດຊົ່ວໂມງ ເປັນການຊີ້ໃຫ້ເຫັນຊັດແຈ້ງວ່າກຸ່ມກໍ່ການຮ້າຍພະຍາຍາມ
ຫລີກເວັ້ນທີ່ຈະໃຫ້ຊາວມຸສລິມດ້ວຍກັນຕົກເປັນເຫຍື່ອການກະທຳຂອງຕົນ

ຈະກະທົບຕໍ່ລາວ ບໍ່ຫລາຍກໍນ້ອຍ
ສຣຸບກໍຄື ສຖານະການການເມືອງໃນປະເທດໄທຍໃນຣະຍະສີ່ຫ້າປີມານີ້ ໂດຍຍັງບໍ່ທັນໄດ້
ນັບກໍຣະນີພິພາດກັບກັມພູເຈັຽໃນປັນຫາຍາດແຍ່ງອະທິປະໄຕເໜືອດິນແດນເຂົາພະວິຫານ
ຈຶ່ງບໍ່ແມ່ນສຖານະການທີ່ເອື້ອອຳນວຍຕໍ່ການພັທນາເສຖກິດຂອງປະເທດເລີຍ

ໃນຖານະທີ່ປະເທດໄທຍມີການລົງທຶນໃນອັນດັບແນວໜ້າໃນ ສປປ ລາວ ຈຶ່ງເປັນທີ່ແນ່
ນອນວ່າຈະຕ້ອງກະທົບຕໍ່ປະເທດເພື່ອນບ້ານດ້ານຝັ່ງຊ້າຍແມ່ນໍ້າຂອງ ບໍ່ຫລາຍກໍນ້ອຍ
(ເຊີນຄລິກລຸ່ມນີ້ ເພື່ອຮັບຟັງບົດວເຄາະໂດຍສຽງຂອງນັກຂ່າວ)