ທັສນະລາຍວັນຝຣັ່ງ

ອາກອນ ມົລະພິດ ເປັນຫົວຂໍ້ຂ່າວໃຫຍ່ ຂອງລາຍວັນຝຣັ່ງໃນເຊົ້າມື້ນີ້

ໂດຍ ບັນດານ ສີສຸນທອນ B. Sisounthone

ບົດຄວາມນີ້ເຜີຍແຜ່ເມື່ອວັນທີ 11/09/2009 ແກ້ໄຂໃຫມ່ຫລ້າສຸດເມື່ອວັນທີ 11/09/2009 11:54 TU

ອາກອນ ມົລະພິດ ເປັນຫົວຂໍ້ຂ່າວໃຫຍ່ ຂອງລາຍວັນຝຣັ່ງໃນເຊົ້າມື້ນີ້, ຫລັງຈາກ ການປະກາດ ຂອງປະທານາທິບໍດີ ສ໊າກໂກຊີ່.

 

"ສ໊າກໂກຊີ່ ນັກອານຸລັກທັມມະຊາດ ໃນຫຍ້າ" ອັນນີ້ແມ່ນຫົວຂໍ້ໃຫຍ່ ຂອງລາຍວັນ ລີເບຣາຊົງ ໂດຍອາທິບາຍວ່າ ການຕັ້ງ ພາສີອາກອນ ມົລະພິດນີ້ຂື້ນ ເປັນບາດກ້າວ ທີ່ບັນດາ ສະມາຄົມ ອະນຸລັກສະພາບ ແວກລ້ອມຕ່າງໆ ເຫັນວ່າ ບໍ່ສົມເຫດສົມຜົນ.

 

ໂຄງການກົດໝາຍ ລະບຸວ່າ 17 ເອີໂຣ ຕໍ່ອາຍພິດ CO2 ນຶ່ງໂຕນ ທີ່ພົ່ນອອກ, ພາສີ ແລະ ລະບົບສົ່ງເງີນຄືນ ຈະຖືກປະຕິບັດ ແຕ່2010 ເປັນຕົ້ນໄປ ແຕ່ກໍຕ້ອງໄດ້ຜ່ານມະຕິຈາກສະພາກ່ອນ.

 

ສ່ວນ ເລີຟີກາໂຣ ພາດວ່າ "ອາກອນ ມົລະພິດ" ເປັນການທ້າ ທາງ ດ້ານອະນຸລັດທັມມະຊາດ ຂອງ ສ໊າກໂກຊີ່. ປະທານປະເທດ ປະກາດ ການສ້າງຕັ້ງການເສັຽຊ່ວຍ ອາກອນມົລະພິດ ໂດຍຄໍ້າປະກັນ ວ່າ ເງີນທີ່ຈ່າຍໄປນັ້ນ ອາຈຖືກ ຊົດໃຊ້ຄືນດ້ວຍການຜ່ອນພາສີລາຍຮັບ ໃຫ້ບາງຄອບຄົວ ທີ່ຢູ່ຮ່າງໄກ ການຂົນສົ່ງສາທາຣະນະຊົນ.

 

ຖ້າຈະທຽບແລ້ວ ປະເທດຝຣັ່ງ ບໍ່ໄດ້ສົ່ງມົລະພິດໃສ່ອາກາດ ຫລາຍ ກວ່າປະເທດ ອື່ນໆ ແຕ່ເປັນຫຍັງຈຶ່ງ ຕັ້ງອາກອນຂື້ນ, ທັ້ງນີ້, ນອກ ຈາກອານຸຣັກທັມມະຊາດ ໃຫ້ແກ່ອະນຸຊົນຮຸ້ນຫລັງແລ້ວ ຍັງເປັນຕົວ ຢ່າງທີ່ດີ ເພື່ອຕໍ່ລອງໄກ່ເກັ່ຽ ໃຫ້ປະເທດອື່ນໆ ມີຄວາມຮູ້ສຶກ ໃນການ ອະນຸຣັກທັມມະຊາດ ໃຫ້ສົດໄສ ຊ່ວຍກັນ.

 

ຝຣັ່ງ ສົ່ງອາຍພິດ ພຽງແຕ່ 5,8 ໂຕນຕໍ່ປີ/ຕໍ່ຄອບຄົວ, ຖ້າສະເລັ່ຽໄສ່ ປະຊາຊົນ ທົ່ວໄປແລ້ວ.

ເອມຽກຣາ ອາຣັບ 29,9 ໂຕນ, ອາເມຣິການ 19,1 ໂຕນ, ອົສຕຣາລີ 18,7 ໂຕນ, ການາດາ  17,3 ໂຕນ, ຣັດເຊັຍ 11,2 ໂຕນ, ເກົາຫຼີໃຕ້ 10 ໂຕນ, ເຍັຽຣະມັນ 9,7 ໂຕນ, ຍີ່ປຸ່ນ 9,7 ໂຕນ, ອັງກິດ 8,6 ໂຕນ, ອິຕາລີ 7,3 ໂຕນ, ອັຟຣິກກາໃຕ້ 7,2 ໂຕນ, ຈີນ 4,47 ໂຕນ, ອິນເດັຽ 1,2 ໂຕນ.

 

ສຳຫລັບ ລາຍວັນ ເລ່ ເອໂກ່ ນັ້ນພາດວ່າ ສ໊າກໂກຊີ່ ພະຍາຍາມ ຫັນປ່ຽນຝຣັ່ງ ໄປຫາ ການເສັຽຊ່ວຍຂຽວ, ດັ່ງດຽວກັບ ລາບວັນ ລາ ຕຣີ່ບູນ ນັ້ນພາດວ່າ ສັງຄາມຕ້ານ ອາກອນມົລະພິດ.